ವಿದ್ಯುತ್ ಬಿಲ್ ಕಡಿಮೆ ಮಾಡುವುದು ಹೇಗೆ? ಕರೆಂಟ್ ಖರ್ಚು ಉಳಿಸಲು ಏನೆಲ್ಲಾ ಮಾಡಬಹುದು? ಇಲ್ಲಿದೆ ವಿವರ
How to Reduce Electricity Bill at Home: ಮನೆಯ ಸಮೀಪ ಮರ ಗಿಡಗಳು ಇರುವಂತೆ ನೋಡಿಕೊಳ್ಳಬೇಕು. ಅಲ್ಲದೆ, ಮನೆಯ ವಿದ್ಯುತ್ ಉಪಕರಣಗಳ ಬಗ್ಗೆ ಗಮನ ಹರಿಸುವುದು ಕೂಡ ಉತ್ತಮ.
ಕೊರೊನಾ ಹಾಗೂ ಲಾಕ್ಡೌನ್ ಬಳಿಕ ಬೆಲೆ ಏರಿಕೆ, ಅಗತ್ಯ ವಸ್ತುಗಳು ಮತ್ತು ಇಂಧನ ದುಬಾರಿ ಆಗಿದೆ. ಇದರಿಂದ ಜನರು ಹಣ ಉಳಿತಾಯ ಮಾಡಲು ಕಷ್ಟಪಡುತ್ತಿದ್ದಾರೆ. ಮನೆಯ ಆಯವ್ಯಯ ನೋಡಿಕೊಳ್ಳುವುದು ಸವಾಲಾಗಿದೆ.
ಮತ್ತೊಂದು ಕಡೆ ಕರೆಂಟ್ ಬಿಲ್ ಕೂಡ ಕಟ್ಟಬೇಕು. ಒಟ್ಟಾರೆ ಬೆಲೆ ಏರಿಕೆಯನ್ನು ಕಡಿಮೆ ಆಗುವಂತೆ ನಾವು ಮಾಡಲು ಆಗುವುದಿಲ್ಲ. ಆದರೆ, ಕೆಲವು ಖರ್ಚುಗಳನ್ನು ಉಳಿತಾಯ ಮಾಡಿ ಅದರ ಪರಿಣಾಮ ಕಡಿಮೆ ಮಾಡಿಕೊಳ್ಳಬಹುದು. ವಿದ್ಯುತ್ ಬಿಲ್ ಕಡಿಮೆ ಮಾಡುವುದು ಕೂಡ ಒಂದು ದಾರಿ.
ಮನೆಯಲ್ಲಿ ಸರಿಯಾದ ಜಾಗದಲ್ಲಿ ಕಿಟಕಿ ಹಾಗೂ ಬಾಗಿಲು ಇರುವುದು ಅತಿ ಅಗತ್ಯ. ಇದರಿಂದಾಗಿ ಬೆಳಗಿನ ಹೊತ್ತಿನಲ್ಲಿ ಕೂಡ ಮನೆಯ ಲೈಟ್ ಆನ್ ಮಾಡುವುದು ತಪ್ಪುತ್ತದೆ. ಈಗಿನ ದಿನಮಾನದಲ್ಲಿ ಮನೆಯ ಮಾಡಿಗೆ ಪಾರದರ್ಶಕ ಗ್ಲಾಸ್ಗಳನ್ನು ಅಳವಡಿಸುವ ಕ್ರಮವೂ ಇದೆ. ಅದರಿಂದಲೂ ಬಹಳ ಬೆಳಕು ಮನೆಯೊಳಗೆ ಪ್ರವೇಶಿಸುತ್ತದೆ.
ಮನೆಯ ಮಾಡಿಗೆ ಸೋಲಾರ್ ಪ್ಯಾನೆಲ್ಗಳನ್ನು ಅಳವಡಿಸುವುದು ಮತ್ತೊಂದು ಕ್ರಮ. ಹೀಗೆ ಮಾಡುವುದರಿಂದ ಬಹಳಷ್ಟು ಪ್ರಮಾಣದ ವಿದ್ಯುತ್ ಬಿಲ್ ಕಡಿತಗೊಳಿಸಬಹುದು. ಮನೆಯ ಲೈಟ್, ಫ್ಯಾನ್ ಇತ್ಯಾದಿಗಳನ್ನು ಕೂಡ ಸೋಲಾರ್ ಮೂಲಕ ನಡೆಸಬಹುದು. ಇದರಿಂದ ಕರೆಂಟ್ ಬಿಲ್ ಕಡಿತವಾಗುತ್ತದೆ.
ಮನೆಯ ಸಮೀಪ ಮರ ಗಿಡಗಳು ಇರುವಂತೆ ನೋಡಿಕೊಳ್ಳಬೇಕು. ಅಲ್ಲದೆ, ಮನೆಯ ವಿದ್ಯುತ್ ಉಪಕರಣಗಳ ಬಗ್ಗೆ ಗಮನ ಹರಿಸುವುದು ಕೂಡ ಉತ್ತಮ. ಉದಾಹರಣೆಗೆ, ಎಲೆಕ್ಟ್ರಿಕ್ ಬಲ್ಬ್ ಬದಲಾಗಿ, ಎಲ್ಇಡಿ ಅಳವಡಿಸುವುದು ಒಳ್ಳೆಯದು. ಅದು ಕಡಿಮೆ ವಿದ್ಯುತ್ ಬಳಸುತ್ತದೆ. ಇತ್ತೀಚೆಗೆ ಸೆನ್ಸಾರ್ ಲೈಟ್ಗಳು ಕೂಡ ಬಂದಿವೆ. ಅಂದರೆ, ನಿಗದಿತ ಪ್ರಮಾಣದ ಬೆಳಕು ಇದ್ದಾಗ ಅದು ತಾನಾಗಿಯೇ ಆಫ್ ಆಗುತ್ತದೆ.
ಮನೆ ಕಟ್ಟಲು ಬಳಸಿರುವ ವಸ್ತುಗಳು ಕೂಡ ಮುಖ್ಯವಾಗುತ್ತದೆ. ಸಾಧ್ಯವಾದಷ್ಟು ಪ್ರಾಕೃತಿಕವಾಗಿ ಲಭ್ಯವಿರುವ ಸೌಕರ್ಯ ಬಳಸಿ ಮನೆ ನಿರ್ಮಿಸುವುದು ಒಳ್ಳೆಯದು.