Indo Pak Border: ಥಾರ್ ಮರುಭೂಮಿಯ ಪಾಕ್ ಗಡಿ ತನೋತ್​ಗೆ ಬರುವವರು ಇಬ್ಬರೇ; ಬೆಸ್ಟ್​ ಫ್ರೆಂಡ್ ಅಥವಾ ವರ್ಸ್ಟ್​ ಎನಿಮಿ

ಪಾಕಿಸ್ತಾನದ ಗಡಿ ಎಂದಾಕ್ಷಣ ನಮ್ಮೆದುರು ಬರುವುದು ಕಾಶ್ಮೀರ. ಆದರೆ ಪಾಕಿಸ್ತಾನವು ಗುಜರಾತ್, ರಾಜಸ್ಥಾನ, ಪಂಜಾಬ್​ ರಾಜ್ಯಗಳೊಂದಿಗೂ ಗಡಿ ಹಂಚಿಕೊಂಡಿದೆ. ಅದರಲ್ಲಿಯೂ ರಾಜಸ್ಥಾನದ ಥಾರ್ ಮರುಭೂಮಿಯಲ್ಲಿರುವ ಗಡಿಯಲ್ಲಿ ಕೆಲಸ ಮಾಡುವುದೆಂದರೆ ಯೋಧರ ಪಾಲಿಗೆ ಸಿಯಾಚಿನ್​ನಷ್ಟೇ ಸವಾಲಿನ ಸಂಗತಿ. ಥಾರ್​ ಮರುಭೂಮಿಯಲ್ಲಿ ಪಾಕ್ ಗಡಿ ಹೇಗಿದೆ ಎಂಬ ಪ್ರಶ್ನೆಗೆ ದಕ್ಷಿಣ ಕನ್ನಡ ಜಿಲ್ಲೆ ಪುತ್ತೂರು ತಾಲ್ಲೂಕು ಉಪ್ಪಿನಂಗಡಿಯ ರೈತರಾದ ಗೋಪಾಲಕೃಷ್ಣ ಕುಂಟಿನಿ ಚಿತ್ರಗಳ ಮೂಲಕ ಉತ್ತರಿಸಿದ್ದಾರೆ. ರಾಜಸ್ಥಾನದ ಥಾರ್ ಮರುಭೂಮಿಯಲ್ಲಿ ಸಿಗುವ ತನೋತ್ ಊರಿನ ಆಚೆಗೆ ಪಾಕಿಸ್ತಾನವಿದೆ. ಇಲ್ಲಿನ ಬವ್ಲಿಯಾನ್​ನಲ್ಲಿ 30 ರೌಂಡ್ಸ್​ (ಗುಂಡು) ಇರುವ ಸ್ಟೆನ್ ಗನ್ ಹಿಡಿದುಕೊಂಡು ಯೋಧರು ಇರುಳೂ ಹಗಲೂ ಕಾಯುತ್ತಿದ್ದಾರೆ. ಪ್ರತಿ ಯೋಧನಿಗೆ ದಿನಕ್ಕೆ 12 ಗಂಟೆ ಪಾಳಿ. 52 ಡಿಗ್ರಿ ಸೆಲ್ಸಿಯಸ್​ನಲ್ಲಿ ಕೊತ ಕೊತ ಕುದಿಯುತ್ತಾ ದೇಶ ರಕ್ಷಣೆ ಮಾಡಬೇಕು. ಹಿಮಾಲಯದ ಮೈನಸ್ 4 ಡಿಗ್ರಿಯಷ್ಟೇ ಕಠಿಣ ಇದು.