Dakshinamurthy Pooja: ವಿದೇಶದಲ್ಲಿರುವ ನಿಮ್ಮ ಮಕ್ಕಳ ಅಥವಾ ಆತ್ಮೀಯರ ಯಶಸ್ಸಿಗೆ ದಕ್ಷಿಣಾಮೂರ್ತಿ ಪೂಜೆ; ಸಂಪೂರ್ಣ ವಿವರ ಇಲ್ಲಿದೆ

ನಮ್ಮ ಕುಟುಂಬದ ಸದಸ್ಯರು, ಮಕ್ಕಳು ಅಥವಾ ಇತರ ಆತ್ಮೀಯರು ವಿದೇಶದಲ್ಲಿ ಉದ್ಯೋಗ, ವ್ಯಾಸಂಗ ಅಥವಾ ಜೀವನ ಸಾಗಿಸುತ್ತಿರುವಾಗ, ಅವರು ಅನೇಕ ಸವಾಲುಗಳನ್ನು ಎದುರಿಸಬೇಕಾಗಬಹುದು. ಉದ್ಯೋಗದಲ್ಲಿ ಸ್ಥಿರತೆ ಸಿಗದಿರುವುದು, ಬಡ್ತಿಯ ಕೊರತೆ, ಅನಾರೋಗ್ಯ, ಹೊಸ ಪರಿಸರಕ್ಕೆ ಹೊಂದಿಕೊಳ್ಳಲು ಕಷ್ಟಪಡುವುದು, ವೀಸಾ ಅಥವಾ ಗ್ರೀನ್ ಕಾರ್ಡ್ ಪಡೆಯುವಲ್ಲಿ ಅಡೆತಡೆಗಳು, ಅಥವಾ ಒಡನಾಟದಲ್ಲಿ ಸಮಸ್ಯೆಗಳು ಇವೆಲ್ಲವೂ ಸಾಮಾನ್ಯ. ಭಾರತದಲ್ಲಿರುವ ಪೋಷಕರು, ಸಹೋದರರು ಮತ್ತು ಇತರ ಬಂಧುಗಳಿಗೆ ಇದು ದೊಡ್ಡ ಚಿಂತೆಯ ವಿಷಯವಾಗಿರುತ್ತದೆ. ತಮ್ಮವರ ಯಶಸ್ಸು ಮತ್ತು ಸುರಕ್ಷತೆಗಾಗಿ ಅವರು ಏನು ಮಾಡಬಹುದು ಎಂಬ ಪ್ರಶ್ನೆ ಮೂಡುವುದು ಸಹಜ. ಧರ್ಮಶಾಸ್ತ್ರಗಳು ಇಂತಹ ಸಂದರ್ಭಗಳಲ್ಲಿ ದಕ್ಷಿಣಾಮೂರ್ತಿಯ ಆರಾಧನೆಯು ಅತ್ಯಂತ ಪರಿಣಾಮಕಾರಿ ಪರಿಹಾರ ಎಂದು ತಿಳಿಸುತ್ತವೆ. ಈ ಬಗ್ಗೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ನೀಡಿರುವ ಮಾಹಿತಿ ಇಲ್ಲಿದೆ.

ವಿಡಿಯೋ ಇಲ್ಲಿದೆ ನೋಡಿ:

ದಕ್ಷಿಣಾಮೂರ್ತಿಯು ಜ್ಞಾನ, ಸ್ಥಿರತೆ, ನಿರ್ಧಾರ ಶಕ್ತಿ ಮತ್ತು ಅಧ್ಯಾತ್ಮಿಕ ಬೆಳವಣಿಗೆಯ ಅಧಿದೇವತೆ. ಇವರನ್ನು ಪೂಜಿಸುವುದರಿಂದ ಅರಿವು ಹೆಚ್ಚಾಗುತ್ತದೆ ಮತ್ತು ಸವಾಲುಗಳನ್ನು ಎದುರಿಸಲು ಸರಿಯಾದ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಸಹಾಯವಾಗುತ್ತದೆ. ನವಗ್ರಹಗಳಲ್ಲಿ ಪ್ರಮುಖವಾಗಿ ಶನಿ, ರಾಹು ಮತ್ತು ಬುಧ ಗ್ರಹಗಳು ತೊಂದರೆಗಳನ್ನು ಉಂಟುಮಾಡುವಾಗ, ದಕ್ಷಿಣಾಮೂರ್ತಿಯ ಪೂಜೆಯು ಅವುಗಳ ನಕಾರಾತ್ಮಕ ಪರಿಣಾಮಗಳನ್ನು ಕಡಿಮೆ ಮಾಡಲು ಸಹಕಾರಿ ಎಂದು ನಂಬಲಾಗಿದೆ. ವಿದೇಶದಲ್ಲಿರುವವರು ಈ ಗ್ರಹಗಳ ಕಾಟಕ್ಕೆ ಸಿಲುಕಿದಾಗ, ಅವರ ಪೋಷಕರು ಇಲ್ಲಿ ದಕ್ಷಿಣಾಮೂರ್ತಿ ಪೂಜೆಯನ್ನು ಆಚರಿಸಿದರೆ ಶುಭ ಫಲಿತಾಂಶಗಳನ್ನು ನಿರೀಕ್ಷಿಸಬಹುದು.

ಇದನ್ನೂ ಓದಿ: ವಾಸ್ತು ಪ್ರಕಾರ ಫ್ರಿಡ್ಜ್ ಮೇಲೆ ಈ ವಸ್ತುಗಳನ್ನು ಇಡಲೇಬಾರದು; ಸಮಸ್ಯೆ ತಪ್ಪಿದ್ದಲ್ಲ

ದಕ್ಷಿಣಾಮೂರ್ತಿ ಪೂಜಾ ವಿಧಿ:

ಈ ಪೂಜೆಯನ್ನು ಸತತ 12 ದಿನಗಳವರೆಗೆ ಆಚರಿಸಬೇಕು, ಆದರೆ ವಾರದಲ್ಲಿ ಮೂರು ದಿನಗಳ ಕಾಲ ಮಾತ್ರ. ಮಂಗಳವಾರ, ಬುಧವಾರ ಮತ್ತು ಗುರುವಾರಗಳು ಈ ಪೂಜೆಗೆ ಸೂಕ್ತವಾದ ದಿನಗಳು. ಬೆಳಗಿನ ಜಾವದಲ್ಲಿ ಈ ಆಚರಣೆಯನ್ನು ಮಾಡಬೇಕು.

• ವಸ್ತ್ರ ಧಾರಣೆ: ಪೂಜೆ ಮಾಡುವವರು ಸ್ನಾನ ಮಾಡಿ ಶುಭ್ರವಾದ ಬಿಳಿಯ ವಸ್ತ್ರಗಳನ್ನು ಧರಿಸಬೇಕು.
• ದೀಪ ಪ್ರಜ್ವಲನ: ಒಂದು ದೀಪವನ್ನು ಹಚ್ಚಿ ಅದರಲ್ಲಿ ತುಪ್ಪ ಮತ್ತು ಎಳ್ಳೆಣ್ಣೆಯನ್ನು ಸಮ ಪ್ರಮಾಣದಲ್ಲಿ ಬೆರೆಸಿ ಹಾಕಬೇಕು. ದೀಪವನ್ನು ಪೂರ್ವಾಭಿಮುಖವಾಗಿ ಇಡಬೇಕು, ಏಕೆಂದರೆ ಪೂರ್ವ ದಿಕ್ಕಿನ ದೀಪಕ್ಕೆ ಹೆಚ್ಚು ಶಕ್ತಿ ಇರುತ್ತದೆ ಎಂದು ಹೇಳಲಾಗುತ್ತದೆ.
• ಮಂತ್ರ ಜಪ: ದಕ್ಷಿಣಾಮೂರ್ತಿಯ ಫೋಟೋ ಅಥವಾ ವಿಗ್ರಹದ ಮುಂದೆ ಕುಳಿತು “ಓಂ ದಕ್ಷಿಣಾಮೂರ್ತಯೇ ನಮಃ” ಎಂಬ ಮಂತ್ರವನ್ನು ಅಥವಾ “ಓಂ ನಮೋ ಭಗವತೇ ದಕ್ಷಿಣಾಮೂರ್ತಯೇ ಮಹ್ಯಂ ಮೇಧಾಂ ಪ್ರಜ್ಞಾಂ ಪ್ರಯಚ್ಛ ಸ್ವಾಹಾ” ಎಂಬ ಮಂತ್ರವನ್ನು ಭಕ್ತಿಯಿಂದ ಜಪಿಸಬೇಕು.
• ನೈವೇದ್ಯ: ಬೆಲ್ಲದಿಂದ ಮಾಡಿದ ಪಾಯಸಕ್ಕೆ ಸ್ವಲ್ಪ ತುಪ್ಪ ಬೆರೆಸಿ ದಕ್ಷಿಣಾಮೂರ್ತಿಗೆ ನೈವೇದ್ಯವಾಗಿ ಅರ್ಪಿಸಬೇಕು. ಪೂಜೆಯ ನಂತರ ಈ ನೈವೇದ್ಯವನ್ನು ಮನೆಯ ಸದಸ್ಯರೆಲ್ಲರೂ ಪ್ರಸಾದವಾಗಿ ಸ್ವೀಕರಿಸಬಹುದು.
• ಸಂಕಲ್ಪ ಮತ್ತು ಪ್ರಾರ್ಥನೆ: ಪೂಜೆ ಮಾಡುವಾಗ, ವಿದೇಶದಲ್ಲಿರುವ ವ್ಯಕ್ತಿಯ ಹೆಸರನ್ನು ಉಲ್ಲೇಖಿಸಿ, ಅವರ ವಿದ್ಯಾಭ್ಯಾಸ, ಉದ್ಯೋಗ, ಆರೋಗ್ಯ, ಸ್ಥಿರತೆ, ಅಲ್ಲಿನ ಜನರೊಂದಿಗೆ ಸೌಹಾರ್ದಯುತ ಸಂಬಂಧ, ವೀಸಾ ಅಥವಾ ಗ್ರೀನ್ ಕಾರ್ಡ್ ಪಡೆಯುವ ಯಶಸ್ಸು ಹೀಗೆ ಅವರ ಎಲ್ಲ ಸಮಸ್ಯೆಗಳು ನಿವಾರಣೆಯಾಗಿ ಶುಭವಾಗಲಿ ಎಂದು ದಕ್ಷಿಣಾಮೂರ್ತಿಯಲ್ಲಿ ಪ್ರಾರ್ಥಿಸಬೇಕು. ಉದಾಹರಣೆಗೆ, “ರವಿ ಎಂಬ ಹುಡುಗನಿಗೆ ವಿದ್ಯಾಭ್ಯಾಸದಲ್ಲಿ ಉದ್ಯೋಗದಲ್ಲಿ ಸ್ಥಿರತೆ ಸಿಗಲಿ” ಎಂದು ಹೇಳಿ ಪ್ರಾರ್ಥಿಸಬಹುದು.

ದೀಪದ ಮೂಲಕ ದೇವತೆಗಳನ್ನು ಆವಾಹಿಸುವುದು ಒಂದು ಸಾಮಾನ್ಯ ಪದ್ಧತಿಯಾಗಿದೆ. ದಕ್ಷಿಣಾಮೂರ್ತಿ ಪೂಜೆಯನ್ನು ಶ್ರದ್ಧೆಯಿಂದ, ನಂಬಿಕೆಯಿಂದ ಆಚರಿಸಿದರೆ ವಿದೇಶದಲ್ಲಿರುವ ನಿಮ್ಮ ಬಂಧುಗಳಿಗೆ ಸಂದರ್ಶನಗಳಲ್ಲಿ ಯಶಸ್ಸು, ಉದ್ಯೋಗದಲ್ಲಿ ಬಡ್ತಿ ಮತ್ತು ಸ್ಥಿರತೆ ದೊರೆಯುತ್ತದೆ ಎಂದು ಗುರೂಜಿ ಸಲಹೆ ನೀಡಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ