IPL 2020: ಟೂರ್ನಮೆಂಟ್​ನಲ್ಲಿ ಧೂಳೆಬ್ಬಿಸಲು ಬಂದ ಅಮೆರಿಕದ ಘಾತಕ ಬೌಲರ್​, ಯಾರು ಈತ?

IPL ಟೂರ್ನಿ ಹತ್ತಿರವಾಗ್ತಿದ್ದಂತೆ, ದಿನ ದಿನಕ್ಕೂ ರಂಗು ಪಡೆದುಕೊಳ್ತಿದೆ. ವಿದೇಶಿ ಸ್ಟಾರ್ ಆಟಗಾರರು ಮರಳುಗಾಡಿನ IPL ಸಂಗ್ರಾಮಕ್ಕೆ ಒಬ್ಬೊಬ್ಬರಾಗಿ ಎಂಟ್ರಿ ಕೊಡ್ತಿದ್ದಾರೆ. ಆದ್ರೀಗ IPL ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ, ಅಮೆರಿಕದ ಆಟಗಾರನೊಬ್ಬ ಕಣಕ್ಕಿಳಿಯುತ್ತಿದ್ದಾನೆ.

ಐಪಿಎಲ್​ಗೆ ಎಂಟ್ರಿಕೊಟ್ಟ ಮೊದಲ ಅಮೆರಿಕ ಆಟಗಾರ!
ಮಿಲಿಯನ್ ಡಾಲರ್ ಟೂರ್ನಿಯಲ್ಲಿ ಕ್ರಿಕೆಟ್ ಶಿಶುಗಳೆನಿಸಿಕೊಂಡ ಅಫ್ಘಾನಿಸ್ತಾನ ಹಾಗೂ ನೇಪಾಳದ ಕ್ರಿಕೆಟಿಗರು ಅಬ್ಬರಿಸ್ತಿರೋದು ನಿಮಗೆಲ್ಲಾ ಗೊತ್ತೇ ಇದೆ. ಆದ್ರೀಗ IPL ಅನ್ನೋ ಕಲರ್​ಫುಲ್ ಟೂರ್ನಿಗೆ ಅಮೆರಿಕಾ ದೇಶದ ಆಟಗಾರನೊಬ್ಬ ಸರ್​ಪ್ರೈಸ್ ಎಂಟ್ರಿ ಕೊಟ್ಟಿದ್ದಾನೆ.

ಹೌದು, ಅಮೆರಿಕದಿಂದ ಬಂದಿರುವ ಈ ಬೌಲರ್ ಹೆಸರು ಅಲಿ ಖಾನ್. ಈತನ ಬೌಲಿಂಗ್ ಎದುರಿಸಿದ ಸ್ಟಾರ್ ಬ್ಯಾಟ್ಸ್​ಮನ್​ಗಳೇ ಒಂದು ಕ್ಷಣ ದಂಗಾಗಿ ಹೋಗ್ತಾರೆ. ಯಾಕಂದ್ರೆ ಈ ಅಲಿ ಖಾನ್ ಅನ್ನೋ ವೇಗಿ ಬೆಳಕಿಗೆ ಬಂದಿದ್ದೇ,  ವೆಸ್ಟ್​ ಇಂಡೀಸ್​​ನ ದೈತ್ಯ ವೇಗಿ ಕರ್ಟ್ನಿ ವಾಲ್ಶ್ ಅವರಿಂದ.

ಅಲಿ ಖಾನ್ ಇಂದಲ್ಲ ನಾಳೆ ಒಬ್ಬ ಘಾತಕ ವೇಗಿಯಾಗ್ತಾನೆ ಅನ್ನೋ ಭವಿಷ್ಯವನ್ನ ವೆಸ್ಟ್ ಇಂಡೀಸ್​ನ ಘಾತಕ ವೇಗಿ ಕರ್ಟ್ನಿ ವಾಲ್ಶ್ ನುಡಿದಿದ್ದರು. ಅಮೆರಿಕದಲ್ಲಿ ಪ್ರತಿಭಾವಂತ ಕ್ರಿಕೆಟಿಗರನ್ನ ಆಯ್ಕೆ ಮಾಡೋದಕ್ಕೆ ತೆರಳಿದ್ದ ವಾಲ್ಶ್, ಅಲಿ ಖಾನ್ ಬೌಲಿಂಗ್​ಗೆ ಫಿದಾ ಆಗಿ, ಆತನನ್ನ ಆಯ್ಕೆ ಮಾಡಿದ್ದಾರೆ.

ಪಾದಾರ್ಪಣೆ ಮಾಡಿದ ಮೊದಲ ಬಾಲ್​ನಲ್ಲೇ ಸಂಗಕ್ಕಾರ ಔಟ್​!
29 ವರ್ಷದ ಅಲಿ ಖಾನ್ ಗಂಟೆಗೆ 140 ಕಿ.ಮೀ ವೇಗದಲ್ಲಿ ಬೌಲಿಂಗ್ ಮಾಡ್ತಾನೆ. ಕೆರಿಬಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಅಲಿ ಖಾನ್ ಪಾದಾರ್ಪಣೆ ಮಾಡಿದ ಮೊದಲ ಪಂದ್ಯದ ಮೊದಲ ಓವರ್​ನ ಮೊದಲ ಬಾಲ್​ನಲ್ಲೇ ದಿಗ್ಗಜ ಕ್ರಿಕೆಟಿಗ ಕುಮಾರ್ ಸಂಗಕ್ಕಾರ ವಿಕೆಟ್ ಪಡೆದಿದ್ದ.

ಯಾರು ಈ ಅಲಿ ಖಾನ್?
ಅಲಿ ಖಾನ್ ಮೂಲತಃ ಅಮೆರಿಕದಲ್ಲಿ ಹುಟ್ಟಿ ಬೆಳೆದವನಲ್ಲ. ಅಲಿ ಖಾನ್ ಹುಟ್ಟಿದ್ದು ಪಾಕಿಸ್ತಾನ​ದ ಪಂಜಾಬ್​ನಲ್ಲಿ. ಅಲಿ ಖಾನ್ 18 ವರ್ಷದವನಾಗಿದ್ದಾಗ ಹೆತ್ತವರೊಂದಿಗೆ ಅಮೆರಿಕಕ್ಕೆ ಬಂದು ನೆಲೆಸಿದ್ದಾನೆ. ಅಮೆರಿಕದಲ್ಲಿ ನಡೆದ ಸಾಕಷ್ಟು T-20 ಲೀಗ್​ನಲ್ಲಿ ಎಲ್ಲರ ಗಮನ ಸೆಳೆದು, ಕರ್ಟ್ನಿ ವಾಲ್ಶ್​ ನೆರವಿನಿಂದ ಕೆರಿಬಿಯನ್ ಪ್ರೀಮಿಯರ್​ ಲೀಗ್​ಗೆ ಎಂಟ್ರಿ ಕೊಟ್ಟಿದ್ದ.

CPL​ನಿಂದ IPL.. TKR​ನಿಂದ KKR!
29ವರ್ಷದ ಬಲಗೈ ವೇಗದ ಬೌಲರ್ ಅಲಿ ಖಾನ್ ಈಗ IPLನಲ್ಲಿ ಕೊಲ್ಕತ್ತಾ ನೈಟ್ ರೈಡರ್ಸ್ ಪರ, ಬಿರುಗಾಳಿ ಎಬ್ಬಿಸೋದಕ್ಕೆ ರೆಡಿಯಾಗಿದ್ದಾನೆ. ಮೊನ್ನೆ ತಾನೇ ಕೆರಿಬಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಚಾಂಪಿಯನ್ ಆದ ಟ್ರಿನ್​ಬ್ಯಾಗೋ ನೈಟ್ ರೈಡರ್ಸ್ (TKR) ತಂಡದ ಪರ ಅಲಿ ಖಾನ್, ಬೊಂಬಾಟ್ ಸ್ಪೆಲ್ ಮಾಡಿದ್ದ. ಸೇಂಟ್ ಲೂಸಿಯಾ ವಿರುದ್ಧದ ಫೈನಲ್ ಪಂದ್ಯದಲ್ಲಿ ಅಲಿ ಎರಡು ವಿಕೆಟ್ ಪಡೆದು, TKR ತಂಡ ಚಾಂಪಿಯನ್ ಆಗೋದಕ್ಕೆ ನೆರವಾಗಿದ್ದ. ಅಲ್ಲದೇ, ಈ ಸೀಸನ್​ನ 8 ಪಂದ್ಯಗಳಲ್ಲಿ 8 ವಿಕೆಟ್ ಪಡೆದಿದ್ದ.

CPL​ನಲ್ಲಿ ಅಲಿ ಖಾನ್ ಪ್ರದರ್ಶನ
ಸಿಪಿಎಲ್​ನಲ್ಲಿ ಒಟ್ಟು 31ಪಂದ್ಯಗಳನ್ನಾಡಿರೋ ಅಲಿ ಖಾನ್, 8.3ರ ಎಕನಾಮಿಯಲ್ಲಿ 35ವಿಕೆಟ್ ಪಡೆದಿದ್ದಾನೆ. 22 ರನ್ ನೀಡಿ 3 ವಿಕೆಟ್ ಕಬಳಿಸಿರೋದು ಅಲಿ ಖಾನ್​ನ ಬೆಸ್ಟ್ ಸ್ಪೆಲ್ ಆಗಿದೆ.

ಅಲಿ ಖಾನ್​ಗೆ ಫಿದಾ ಆದ KKR ಕೋಚ್ ಮೆಕ್​ಲಮ್!
ಅಲಿ ಖಾನ್ CPL ಟೂರ್ನಿಯ ಪ್ರದರ್ಶನ KKR ಫ್ರಾಂಚೈಸಿಯನ್ನೂ ಇಂಪ್ರೆಸ್ ಮಾಡಿತ್ತು. ಅದು ಅಲ್ಲದೇ TKR ತಂಡದ ಕೋಚ್ ಆಗಿರೋ ಬ್ರೆಂಡನ್ ಮೆಕ್​ಲಮ್, KKR ತಂಡಕ್ಕೂ ಕೋಚ್. ಹೀಗಾಗಿ, ಮೆಕ್​ಲಮ್ ಅಲಿ ಖಾನ್​ನನ್ನ IPL​ಗಾಗಿ ದುಬೈಗೆ ಬರೋದಕ್ಕೆ ಬುಲಾವ್ ನೀಡಿದ್ದಾರೆ. IPL​ನಲ್ಲಿ ಸಿಕ್ಕಿರೋ ಅವಕಾಶವನ್ನ ಅಲಿ ಖಾನ್ ಸದ್ಬಳಕೆ ಮಾಡಿಕೊಳ್ಳೋದಾಗಿ ಹೇಳಿದ್ದಾನೆ.

ಅದೃಷ್ಟ ಹೇಗಿರುತ್ತೆ ನೋಡಿ. ಕಳೆದ ಸೀಸನ್​ನಲ್ಲೇ ಅಲಿ ಖಾನ್​ನನ್ನ IPL ಬಿಡ್ಡಿಂಗ್​ನಲ್ಲಿ ಯಾರೊಬ್ರು ಖರೀದಿಸಿರಲಿಲ್ಲ. IPL​ನಲ್ಲಾಡೋ ಭಾಗ್ಯ ನನಗಿಲ್ಲ ಅಂದ್ಕೊಂಡಿದ್ದ ಅಲಿಗೆ, ಈಗ IPL ಫ್ರಾಂಚೈಸಿ ಕೈ ಬೀಸಿ ಕರೆಯುತ್ತಿದೆ.

ಸದ್ಯ ಕೊಲ್ಕತ್ತಾ ತಂಡದ ವೇಗಿ ಹ್ಯಾರಿ ಗರ್ನಿ, ಗಾಯಗೊಂಡು ಟೂರ್ನಿಯಿಂದ ಹೊರ ಬಿದ್ದಿದ್ದಾರೆ. ಹೀಗಾಗಿ KKR ತಂಡ ಗರ್ನಿ ಸ್ಥಾನಕ್ಕೆ ಅಲಿ ಖಾನ್​ನನ್ನ ಭರ್ತಿ ಮಾಡಿಕೊಂಡಿದೆ. ಇದರೊಂದಿಗೆ ವಿಶ್ವದ ಶ್ರೀಮಂತ ಕ್ರಿಕೆಟ್ ಟೂರ್ನಿಯಲ್ಲಿ ಮೊಟ್ಟ ಮೊದಲ ಬಾರಿಗೆ ಅಮೆರಿಕ ದೇಶದ ಕ್ರಿಕೆಟಿಗ ಪಾಲ್ಗೊಳ್ಳುತ್ತಿದ್ದಾನೆ.