5000 ಏಕದಿನ ಪಂದ್ಯಗಳು: ಒಡಿಐ ಕ್ರಿಕೆಟ್ನಲ್ಲಿ ಭಾರತೀಯದ್ದೇ ಅಧಿಪತ್ಯ!
1971ರಲ್ಲಿ ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ನಡುವೆ ಮೊದಲ ಏಕದಿನ ಪಂದ್ಯ ನಡೆದಾಗ, ಈ ಫಾರ್ಮ್ಯಾಟ್ ಜಾಗತಿಕ ಕ್ರಿಕೆಟ್ ಅನ್ನು ಈ ಮಟ್ಟಿಗೆ ಆಳುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ. ಇಂದು ಪುರುಷರ ಒಡಿಐ ಕ್ರಿಕೆಟ್ 5,000 ಪಂದ್ಯಗಳ ಐತಿಹಾಸಿಕ ಮೈಲಿಗಲ್ಲನ್ನು ದಾಟಿ ನಿಂತಿದೆ. ವಿಶೇಷವೆಂದರೆ, ಕಳೆದ ಐದು ದಶಕಗಳ ಈ ಕ್ರಿಕೆಟ್ ವಿಕಾಸವನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಪ್ರತಿ ಯುಗದಲ್ಲೂ ಜಾಗತಿಕ ಕ್ರಿಕೆಟ್ನ ದಿಕ್ಕನ್ನು ನಿರ್ಧರಿಸಿದ್ದು ಭಾರತೀಯ ಆಟಗಾರರೇ ಎಂಬುದು ಸ್ಪಷ್ಟವಾಗುತ್ತದೆ.
ಪುರುಷರ ಏಕದಿನ ಕ್ರಿಕೆಟ್ನಲ್ಲಿ 5,000 ಪಂದ್ಯಗಳು ಪೂರ್ಣಗೊಂಡಿದೆ. 1971 ರಲ್ಲಿ ಆರಂಭವಾದ ಈ 50 ಓವರ್ಗಳ ಕ್ರಿಕೆಟ್ ಪ್ರಯಾಣದಲ್ಲಿ, ಜಾಗತಿಕ ಮಟ್ಟದ ಪ್ರಮುಖ ಬ್ಯಾಟಿಂಗ್ ದಾಖಲೆಗಳ ಪೈಕಿ ಶೇಕಡಾ 80 ರಷ್ಟನ್ನು ಭಾರತೀಯ ಆಟಗಾರರೇ ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಸಚಿನ್ ತೆಂಡೂಲ್ಕರ್, ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಅವರಂತಹ ದಿಗ್ಗಜರು ಏಕದಿನ ಕ್ರಿಕೆಟ್ ಸಾಮ್ರಾಜ್ಯವನ್ನು ಹೇಗೆ ಆಳಿದ್ದಾರೆ ಎಂಬುದರ ಸಂಪೂರ್ಣ ವಿವರ ಇಲ್ಲಿದೆ.
ಮೈಲುಗಲ್ಲುಗಳಲ್ಲಿ ಪಾರುಪತ್ಯ:
ವಿಶ್ವ ಕ್ರಿಕೆಟ್ನ ಒಟ್ಟು ಪಂದ್ಯಗಳನ್ನು ತಲಾ 1,000 ಪಂದ್ಯಗಳ ಅವಧಿಯಾಗಿ ವಿಂಗಡಿಸಿದಾಗ, ಭಾರತೀಯ ಬ್ಯಾಟರ್ಗಳ ಪ್ರಾಬಲ್ಯ ಎದ್ದು ಕಾಣುತ್ತದೆ.
- 1001 ರಿಂದ 2000 ಒನ್ ಡೇ ಪಂದ್ಯಗಳ ಅವಧಿ: ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ 9,149 ರನ್ ಹಾಗೂ 30 ಶತಕಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದರು.
- 3001 ರಿಂದ 4000 ಒನ್ ಡೇ ಪಂದ್ಯಗಳ ಅವಧಿ: ರನ್ ಮಷೀನ್ ವಿರಾಟ್ ಕೊಹ್ಲಿ 8,534 ರನ್ ಹಾಗೂ 33 ಶತಕಗಳೊಂದಿಗೆ ಹೊಸ ಇತಿಹಾಸ ನಿರ್ಮಿಸಿದರು.
- 4001 ರಿಂದ 5000 ಒನ್ ಡೇ ಪಂದ್ಯಗಳ ಅವಧಿ: ಇತ್ತೀಚಿನ ಈ ಕಾಲಘಟ್ಟದಲ್ಲೂ ವಿರಾಟ್ ಕೊಹ್ಲಿ ಅವರೇ ಅತಿ ಹೆಚ್ಚು (19) ಶತಕ ಸಿಡಿಸಿ ಸಾಮ್ರಾಟನಾಗಿ ಮುಂದುವರಿದಿದ್ದಾರೆ.
ಭಾರತೀಯರ ಐತಿಹಾಸಿಕ ದಾಖಲೆಗಳು:
5,000 ಪಂದ್ಯಗಳ ಈ ಸುದೀರ್ಘ ಇತಿಹಾಸದಲ್ಲಿ ಭಾರತದ ಕ್ರಿಕೆಟಿಗರು ನಿರ್ಮಿಸಿರುವ ಅತಿ ದೊಡ್ಡ ದಾಖಲೆಗಳ ಪಟ್ಟಿ ಇಲ್ಲಿದೆ:
| ಐತಿಹಾಸಿಕ ದಾಖಲೆ | ಹೆಸರು | ದಾಖಲೆ | ದಾಖಲೆಯ ವಿಶೇಷತೆ |
|---|---|---|---|
|
ಅತಿ ಹೆಚ್ಚು ರನ್ಗಳು |
ಸಚಿನ್ ತೆಂಡೂಲ್ಕರ್ | 18,426 ರನ್ | ಏಕದಿನ ಇತಿಹಾಸದಲ್ಲಿ ಯಾರೂ ಮುರಿಯಲಾಗದ ರನ್ ಶಿಖರ. |
|
ಅತಿ ಹೆಚ್ಚು ಶತಕಗಳು |
ವಿರಾಟ್ ಕೊಹ್ಲಿ | 50 ಶತಕಗಳು | ಒನ್ ಡೇ ಕ್ರಿಕೆಟ್ನಲ್ಲಿ ಶತಕಗಳ ಅರ್ಧಶತಕ ಬಾರಿಸಿದ ಏಕೈಕ ಆಟಗಾರ. |
|
ಅತ್ಯಧಿಕ ವೈಯಕ್ತಿಕ ಸ್ಕೋರ್ |
ರೋಹಿತ್ ಶರ್ಮಾ | 264 ರನ್ | ಏಕದಿನ ಕ್ರಿಕೆಟ್ ಇತಿಹಾಸದ ಸಾರ್ವಕಾಲಿಕ ಗರಿಷ್ಠ ಸ್ಕೋರ್. |
|
ಅತಿ ಹೆಚ್ಚು ಪಂದ್ಯಗಳು |
ಸಚಿನ್ ತೆಂಡೂಲ್ಕರ್ | 463 ಪಂದ್ಯಗಳು | ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಧಿಕ ಪಂದ್ಯಗಳನ್ನಾಡಿದ ಆಟಗಾರ |
|
ಅತಿ ಹೆಚ್ಚು ಅರ್ಧಶತಕಗಳು |
ಸಚಿನ್ ತೆಂಡೂಲ್ಕರ್ | 96 ಅರ್ಧಶತಕಗಳು | ಏಕದಿನ ಕ್ರಿಕೆಟ್ ಇತಿಹಾಸದಲ್ಲೇ ಅತೀ ಹೆಚ್ಚು ಹಾಫ್ ಸೆಂಚುರಿ ಸಿಡಿಸಿದ ಬ್ಯಾಟರ್. |
|
ಅತ್ಯುತ್ತಮ ಬ್ಯಾಟಿಂಗ್ ಸರಾಸರಿ |
ವಿರಾಟ್ ಕೊಹ್ಲಿ | 58.59 ಸರಾಸರಿ | ಕನಿಷ್ಠ 50 ಇನ್ನಿಂಗ್ಸ್ ಆಡಿದ ಪೂರ್ಣ ಪ್ರಮಾಣದ ಐಸಿಸಿ ಸದಸ್ಯರಲ್ಲಿ ಅತ್ಯಧಿಕ. |
|
ಅತಿ ಹೆಚ್ಚು ದ್ವಿಶತಕಗಳು |
ರೋಹಿತ್ ಶರ್ಮಾ | 3 ದ್ವಿಶತಕಗಳು | ಏಕದಿನ ಕ್ರಿಕೆಟ್ನಲ್ಲಿ ಮೂಡಿಬಂದ ಒಟ್ಟು 11 ದ್ವಿಶತಕಗಳಲ್ಲಿ 3 ಡಬಲ್ ಸೆಂಚುರಿ ರೋಹಿತ್ ಶರ್ಮಾ ಹೆಸರಲ್ಲೇ ಇವೆ! |
|
ಅತಿ ಹೆಚ್ಚು ಬಾರಿ ನಾಟೌಟ್ |
ಎಂ.ಎಸ್. ಧೋನಿ | 84 ಬಾರಿ | ವಿಶ್ವದ ಶ್ರೇಷ್ಠ ಫಿನಿಶರ್; ಕೊನೆಯವರೆಗೂ ನಿಂತು ಪಂದ್ಯ ಗೆಲ್ಲಿಸಿದ ನಾಯಕ. |
|
ಅತಿ ಹೆಚ್ಚು ಸಿಕ್ಸರ್ಗಳು (ಭಾರತ) |
ರೋಹಿತ್ ಶರ್ಮಾ | 362 ಸಿಕ್ಸರ್ಗಳು | ಸಿಕ್ಸ್ ಹಿಟ್ಟಿಂಗ್ನಲ್ಲಿ ಭಾರತದ ಅತ್ಯಂತ ಯಶಸ್ವಿ ಬ್ಯಾಟರ್ |
|
ಮೊದಲ ದ್ವಿಶತಕದ ಮೈಲಿಗಲ್ಲು |
ಸಚಿನ್ ತೆಂಡೂಲ್ಕರ್ | 200 (vs ಸೌತ್ಆ ಫ್ರಿಕಾ) | ಪುರುಷರ ಏಕದಿನ ಕ್ರಿಕೆಟ್ನಲ್ಲಿ ಮೊದಲ ದ್ವಿಶತಕ ಸಿಡಿಸಿದ ಬ್ಯಾಟರ್ ಎಂಬ ವಿಶ್ವ ದಾಖಲೆ ಸಚಿನ್ ಹೆಸರಿನಲ್ಲಿದೆ. |
ತ್ರಿಮೂರ್ತಿಗಳ ಅಧಿಪತ್ಯ (2013-2019):
ಭಾರತೀಯ ಕ್ರಿಕೆಟ್ನ ಸುವರ್ಣ ಯುಗವನ್ನು ರೋಹಿತ್ ಶರ್ಮಾ, ಶಿಖರ್ ಧವನ್ ಮತ್ತು ವಿರಾಟ್ ಕೊಹ್ಲಿ ಅವರ ಟಾಪ್-ಆರ್ಡರ್ ಜೋಡಿ ಸಾಬೀತುಪಡಿಸುತ್ತದೆ. 2013 ರಿಂದ 2019 ರ ಅವಧಿಯಲ್ಲಿ ಈ ಮೂವರು ಆಟಗಾರರೇ ಸೇರಿ ಒಟ್ಟು 73 ಶತಕಗಳನ್ನು ಬಾರಿಸಿದ್ದರು.
ಆಶ್ಚರ್ಯಕರ ವಿಷಯವೆಂದರೆ, ಇದೇ ಅವಧಿಯಲ್ಲಿ ಸೌತ್ ಆಫ್ರಿಕಾ (69 ಶತಕ) ಮತ್ತು ನ್ಯೂಝಿಲೆಂಡ್ (50 ಶತಕ) ತಂಡಗಳ ಆಟಗಾರರೆಲ್ಲರೂ ಸೇರಿ ಬಾರಿಸಿದ ಶತಕಗಳಿಗಿಂತಲೂ ಈ ಮೂವರು ಭಾರತೀಯರೇ ಹೆಚ್ಚು ಶತಕ ಸಿಡಿಸಿದ್ದರು.
ಜಯದ ಹಾದಿಯಲ್ಲೂ ಟೀಮ್ ಇಂಡಿಯಾ ನಂ.1
ಕೇವಲ ವೈಯಕ್ತಿಕ ದಾಖಲೆಗಳಷ್ಟೇ ಅಲ್ಲದೆ, ಒಟ್ಟು 5,000 ಪಂದ್ಯಗಳ ಇತಿಹಾಸದಲ್ಲಿ ಕಳೆದ ಎರಡು ಕಾಲಘಟ್ಟಗಳಲ್ಲಿ (ಅಂದರೆ ಜಾಗತಿಕವಾಗಿ ನಡೆದ ಕೊನೆಯ 2,000 ಪಂದ್ಯಗಳಲ್ಲಿ) ಭಾರತವು ವಿಶ್ವದಲ್ಲೇ ಅತ್ಯಂತ ಯಶಸ್ವಿ ತಂಡವಾಗಿ ಹೊರಹೊಮ್ಮಿದೆ.
ಇದನ್ನೂ ಓದಿ: 6 ರನ್ಗಳ ರೋಚಕ ಹೋರಾಟ: ರಣರೋಚಕ ಪಂದ್ಯದೊಂದಿಗೆ CPL ಶುರು
ಈ ಅವಧಿಯಲ್ಲಿ ಭಾರತವು ಜಗತ್ತಿನಲ್ಲೇ ಅತಿ ಹೆಚ್ಚು ಪಂದ್ಯಗಳನ್ನು ಗೆದ್ದಿದ್ದು ಮಾತ್ರವಲ್ಲದೆ, 1.983 ಮತ್ತು 2.139 ರ ಅತ್ಯುನ್ನತ ವಿನ್-ಲಾಸ್ ಅನುಪಾತವನ್ನು ಕಾಯ್ದುಕೊಂಡು ಜಾಗತಿಕ ಕ್ರಿಕೆಟ್ನಲ್ಲಿ ತನ್ನ ಅಧಿಪತ್ಯವನ್ನು ಸ್ಥಾಪಿಸಿದೆ.