Anshul Kamboj: ಬರೋಬ್ಬರಿ 8 ವಿಕೆಟ್… ದುಲೀಪ್ ಟ್ರೋಫಿಯಲ್ಲಿ ದಾಖಲೆ ಬರೆದ ಅನ್ಶುಲ್
Anshul Kamboj : ಹರ್ಯಾಣ ಮೂಲದ 23 ವರ್ಷದ ಅನ್ಶುಲ್ ಕಾಂಬೋಜ್ ಐಪಿಎಲ್ನಲ್ಲಿ ಮುಂಬೈ ಇಂಡಿಯನ್ಸ್ ಪರ ಕಣಕ್ಕಿಳಿದಿದ್ದಾರೆ. 2024 ರಲ್ಲಿ ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಕಾಣಿಸಿಕೊಂಡಿದ್ದ ಅನ್ಶುಲ್ 3 ಪಂದ್ಯಗಳಿಂದ 2 ವಿಕೆಟ್ ಕಬಳಿಸಿದ್ದರು. ಇದೀಗ ದೇಶೀಯ ಟೂರ್ನಿಯಲ್ಲಿ 8 ವಿಕೆಟ್ ಉರುಳಿಸಿ ಯುವ ವೇಗಿ ಸಂಚಲನ ಸೃಷ್ಟಿಸಿರುವುದು ವಿಶೇಷ.
Updated on:Sep 15, 2024 | 11:35 AM
ದುಲೀಪ್ ಟ್ರೋಫಿಯ 4ನೇ ಪಂದ್ಯದಲ್ಲಿ ಭರ್ಜರಿ ಬೌಲಿಂಗ್ನೊಂದಿಗೆ ಯುವ ವೇಗಿ ಅನ್ಶುಲ್ ಕಾಂಬೋಜ್ ಹೊಸ ದಾಖಲೆ ಬರೆದಿದ್ದಾರೆ. ಅನಂತಪುರದ ರೂರಲ್ ಡೆವಲಪ್ಮೆಂಟ್ ಟ್ರಸ್ಟ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ಬಿ ತಂಡವು ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಭಾರತ ಸಿ ತಂಡವು ಇಶಾನ್ ಕಿಶನ್ (112) ಅವರ ಭರ್ಜರಿ ಶತಕದೊಂದಿಗೆ ಪ್ರಥಮ ಇನಿಂಗ್ಸ್ನಲ್ಲಿ 525 ರನ್ ಪೇರಿಸಿತು.
ಇದಕ್ಕುತ್ತರವಾಗಿ ಮೊದಲ ಇನಿಂಗ್ಸ್ ಆರಂಭಿಸಿದ ಭಾರತ ಬಿ ತಂಡಕ್ಕೆ ಅಭಿಮನ್ಯು ಈಶ್ವರನ್ (157) ಹಾಗೂ ಎನ್ ಜಗದೀಸನ್ (70) ಉತ್ತಮ ಆರಂಭ ಒದಗಿಸಿದ್ದರು. ಆದರೆ ಆ ಬಳಿಕ ಬಂದ ಬ್ಯಾಟರ್ಗಳಿಗೆ ಪೆವಿಲಿಯನ್ ಹಾದಿ ತೋರಿಸುವಲ್ಲಿ ಅನ್ಶುಲ್ ಕಾಂಬೋಜ್ ಯಶಸ್ವಿಯಾದರು.
ಎನ್ ಜಗದೀಸನ್ ವಿಕೆಟ್ ಕಬಳಿಸುವ ಮೂಲಕ ವಿಕೆಟ್ ಬೇಟೆ ಶುರು ಮಾಡಿದ ಅನ್ಶುಲ್ ಆ ಬಳಿಕ ಹಿಂತಿರುಗಿ ನೋಡಿಲ್ಲ. ಮುಶೀರ್ ಖಾನ್ (1), ಸರ್ಫರಾಝ್ ಖಾನ್ (16), ರಿಂಕು ಸಿಂಗ್ (6), ನಿತೇಶ್ ರೆಡ್ಡಿ ವಿಕೆಟ್ ಕಬಳಿಸಿ ಐದು ವಿಕೆಟ್ಗಳ ಸಾಧನೆ ಮಾಡಿದರು.
ಇದಾದ ಬಳಿಕವೂ ಕರಾರುವಾಕ್ ದಾಳಿ ಮುಂದುವರೆಸಿದ ಅನ್ಶುಲ್ ಕೆಳ ಕ್ರಮಾಂಕದ ಬ್ಯಾಟರ್ಗಳಿಗೆ ಪೆವಿಲಿಯನ್ ಹಾದಿ ತೋರಿಸಿದರು. ಈ ಮೂಲಕ 27.5 ಓವರ್ಗಳಲ್ಲಿ ಕೇವಲ 69 ರನ್ ನೀಡಿ 8 ವಿಕೆಟ್ಗಳನ್ನು ಕಬಳಿಸಿದರು. ಅಲ್ಲದೆ ಭಾರತ ಬಿ ತಂಡವು ಪ್ರಥಮ ಇನಿಂಗ್ಸ್ನಲ್ಲಿ 332 ರನ್ಗಳಿಗೆ ಆಲೌಟ್ ಆಗುವಲ್ಲಿ ಪ್ರಮುಖ ಪಾತ್ರವಹಿಸಿದರು.
ಭಾರತ B (ಪ್ಲೇಯಿಂಗ್ XI): ಅಭಿಮನ್ಯು ಈಶ್ವರನ್ (ನಾಯಕ), ಎನ್ ಜಗದೀಸನ್ (ವಿಕೆಟ್ ಕೀಪರ್), ಮುಶೀರ್ ಖಾನ್, ಸರ್ಫರಾಝ್ ಖಾನ್, ರಿಂಕು ಸಿಂಗ್, ನಿತೀಶ್ ರೆಡ್ಡಿ, ವಾಷಿಂಗ್ಟನ್ ಸುಂದರ್, ರವಿಶ್ರೀನಿವಾಸನ್ ಸಾಯಿ ಕಿಶೋರ್, ನವದೀಪ್ ಸೈನಿ, ಮುಖೇಶ್ ಕುಮಾರ್, ರಾಹುಲ್ ಚಾಹರ್.
ಇದನ್ನೂ ಓದಿ: ವಿಶ್ವದ ಟಾಪ್-5 ಬ್ಯಾಟರ್ಗಳನ್ನು ಹೆಸರಿಸಿದ ಕೆಎಲ್ ರಾಹುಲ್
ಭಾರತ C (ಪ್ಲೇಯಿಂಗ್ XI): ರುತುರಾಜ್ ಗಾಯಕ್ವಾಡ್ (ನಾಯಕ), ಇಶಾನ್ ಕಿಶನ್, ಸಾಯಿ ಸುದರ್ಶನ್, ರಜತ್ ಪಾಟಿದಾರ್, ಬಾಬಾ ಇಂದ್ರಜಿತ್, ಅಭಿಷೇಕ್ ಪೊರೆಲ್ (ವಿಕೆಟ್ ಕೀಪರ್), ಮಾನವ್ ಸುತಾರ್, ಅನ್ಶುಲ್ ಕಾಂಬೋಜ್, ಮಯಾಂಕ್ ಮಾರ್ಕಾಂಡೆ, ವಿಜಯಕುಮಾರ್ ವೈಶಾಕ್, ಸಂದೀಪ್ ವಾರಿಯರ್.
ದುಲೀಪ್ ಟ್ರೋಫಿ ದಾಖಲೆ:
ಈ 8 ವಿಕೆಟ್ಗಳೊಂದಿಗೆ ಅನ್ಶುಲ್ ಕಾಂಬೋಜ್ ದುಲೀಪ್ ಟ್ರೋಫಿ ಇತಿಹಾಸದಲ್ಲೇ ಇನಿಂಗ್ಸ್ವೊಂದರಲ್ಲಿ ಏಳಕ್ಕಿಂತ ಹೆಚ್ಚು ವಿಕೆಟ್ ಪಡೆದ 5ನೇ ಬೌಲರ್ ಎನಿಸಿಕೊಂಡಿದ್ದಾರೆ. ಹಾಗೆಯೇ ದುಲೀಪ್ ಟ್ರೋಫಿ ಇನಿಂಗ್ಸ್ನಲ್ಲಿ 8 ವಿಕೆಟ್ ಕಬಳಿಸಿದ ಮೂರನೇ ಬೌಲರ್ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.
ಮೊಹಂತಿ ಹೆಸರಿನಲ್ಲಿ ಭರ್ಜರಿ ದಾಖಲೆ:
ದುಲೀಪ್ ಟ್ರೋಫಿ ಟೂರ್ನಿಯ ಇನಿಂಗ್ಸ್ವೊಂದರಲ್ಲಿ ಅತ್ಯಧಿಕ ವಿಕೆಟ್ ಕಬಳಿಸಿದ ದಾಖಲೆ ದೇಬಾಸಿಸ್ ಮೊಹಂತಿ ಹೆಸರಿನಲ್ಲಿದೆ. 2001 ರಲ್ಲಿ ನಡೆದ ಸೌತ್ ಝೋನ್ ವಿರುದ್ಧದ ಪಂದ್ಯದಲ್ಲಿ ಮೊಹಂತಿ ಕೇವಲ 46 ರನ್ ನೀಡಿ 10 ವಿಕೆಟ್ಗಳನ್ನು ಕಬಳಿಸಿ ಇತಿಹಾಸ ನಿರ್ಮಿಸಿದ್ದರು. ಇದು ದೇಶೀಯ ಟೂರ್ನಿಯಲ್ಲಿ ನಿರ್ಮಾಣವಾದ ಅತ್ಯುತ್ತಮ ಬೌಲಿಂಗ್ ದಾಖಲೆಯಾಗಿದೆ.
ದುಲೀಪ್ ಟ್ರೋಫಿಯಲ್ಲಿನ ಅತ್ಯುತ್ತಮ ಬೌಲಿಂಗ್ ಪ್ರದರ್ಶನ:
- 10-46 – ದೇಬಾಸಿಸ್ ಮೊಹಂತಿ, 2001
- 9-55 – ಬಾಲೂ ಗುಪ್ತೆ, 1963
- 8-64 – ಸೌರಭ್ ಕುಮಾರ್, 2023
- 8-65 – ಅರ್ಷದ್ ಅಯೂಬ್, 1987
- 8-69 – ಅನ್ಶುಲ್ ಕಾಂಬೋಜ್, 2024.
Published On - 11:35 am, Sun, 15 September 24
