ಅಂಪೈರ್ನ ವಿವಾದಾತ್ಮಕ ತೀರ್ಪಿನಿಂದ ಪಡಿಕ್ಕಲ್ಗೆ ದ್ವಿಶತಕ ಮಿಸ್!
ನ್ಯೂಝಿಲೆಂಡ್ ‘ಎ’ ವಿರುದ್ಧ ಲಿಂಕನ್‌ನಲ್ಲಿ ನಡೆಯುತ್ತಿರುವ ಮೊದಲ ಅನಧಿಕೃತ ಟೆಸ್ಟ್ ಪಂದ್ಯದಲ್ಲಿ ಕನ್ನಡಿಗ ದೇವದತ್ ಪಡಿಕ್ಕಲ್ ಕೇವಲ 1 ರನ್‌ನಿಂದ ದ್ವಿಶತಕ ವಂಚಿತರಾಗಿದ್ದಾರೆ. ಭಾರತ ‘ಎ’ ತಂಡದ ಪರ ಎರಡನೇ ಇನಿಂಗ್ಸ್‌ನಲ್ಲಿ ಅತ್ಯಂತ ಜವಾಬ್ದಾರಿಯುತ ಬ್ಯಾಟಿಂಗ್ ಪ್ರದರ್ಶಿಸಿದ ಪಡಿಕ್ಕಲ್, 248 ಎಸೆತಗಳಲ್ಲಿ 24 ಬೌಂಡರಿ ಹಾಗೂ 3 ಸಿಕ್ಸರ್‌ಗಳ ನೆರವಿನಿಂದ 199 ರನ್ ಗಳಿಸಿದ್ದರು. ಆದರೆ, ದ್ವಿಶತಕದ ಹೊಸ್ತಿಲಲ್ಲಿದ್ದಾಗ ಅಂಪೈರ್ ನೀಡಿದ ವಿವಾದಾತ್ಮಕ ತೀರ್ಪಿಗೆ ಬಲಿಯಾಗಿ ಅವರು ವಿಕೆಟ್ ಒಪ್ಪಿಸಬೇಕಾಯಿತು.
Updated on: Oct 26, 2026 | 11:16 AM
ಲಿಂಕನ್‌ನ ಬರ್ಟ್ ಸಟ್ಕ್ಲಿಫ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ನ್ಯೂಝಿಲೆಂಡ್ ‘ಎ’ ವಿರುದ್ಧದ ಪಂದ್ಯದಲ್ಲಿ ದೇವದತ್ ಪಡಿಕ್ಕಲ್ ಅವರ ಔಟ್ ತೀರ್ಪು ಹೊಸ ವಿವಾದಕ್ಕೆ ಕಾರಣವಾಗಿದೆ. ಈ ಪಂದ್ಯದ ಎರಡನೇ ಇನಿಂಗ್ಸ್‌ನಲ್ಲಿ ಭರ್ಜರಿ 199 ರನ್ ಗಳಿಸಿದ್ದ ವೇಳೆ ಅಂಪೈರ್ ನೀಡಿದ ವಿವಾದಾತ್ಮಕ ಕ್ಯಾಚ್ ಔಟ್ ತೀರ್ಪಿನಿಂದಾಗಿ ಪಡಿಕ್ಕಲ್ ಭಾರೀ ನಿರಾಶೆಯೊಂದಿಗೆ ಮೈದಾನದಿಂದ ಹೊರನಡೆಯಬೇಕಾಯಿತು. ಸದ್ಯ ಅಂಪೈರ್ ಅವರ ಈ ತಪ್ಪು ತೀರ್ಪಿನ ವಿರುದ್ಧ ಸೋಷಿಯಲ್ ಮೀಡಿಯಾದಲ್ಲಿ ಕ್ರಿಕೆಟ್ ಅಭಿಮಾನಿಗಳಿಂದ ಭಾರೀ ಆಕ್ರೋಶಗಳು ವ್ಯಕ್ತವಾಗುತ್ತಿದೆ.
ಅಂಪೈರ್ ಎಡವಟ್ಟು!
ಪಂದ್ಯದ ಮೂರನೇ ದಿನದ ಚಹಾ ವಿರಾಮಕ್ಕೆ ಕೇವಲ 10 ನಿಮಿಷಗಳಷ್ಟೇ ಬಾಕಿ ಇತ್ತು. 199 ರನ್ ಗಳಿಸಿ ಕ್ರೀಸ್‌ನಲ್ಲಿದ್ದ ದೇವದತ್ ಪಡಿಕ್ಕಲ್ ದ್ವಿಶತಕದ ಸಂಭ್ರಮಕ್ಕೆ ಸಜ್ಜಾಗುತ್ತಿದ್ದರು. ಈ ವೇಳೆ ನ್ಯೂಝಿಲೆಂಡ್ ವೇಗಿ ಝಾಕ್ ಗಿಬ್ಸನ್ ಎಸೆದ ಲೆಗ್ ಸೈಡ್ ಎಸೆತವನ್ನು ಪಡಿಕ್ಕಲ್ ಗ್ಲಾನ್ಸ್ ಮಾಡಲು ಯತ್ನಿಸಿದರು. ಚೆಂಡು ವಿಕೆಟ್ ಕೀಪರ್ ಕೈ ಸೇರುತ್ತಿದ್ದಂತೆ ಕಿವೀಸ್ ಆಟಗಾರರು ಮನವಿ ಮಾಡಿದರು. ತಕ್ಷಣವೇ ಅಂಪೈರ್ ಔಟ್ ಎಂದು ಬೆರಳು ಎತ್ತಿದ್ದಾರೆ!
ಆದರೆ ಈ ತೀರ್ಪು ಇಡೀ ಕ್ರಿಕೆಟ್ ಲೋಕವನ್ನು ಚಕಿತಗೊಳಿಸಿತು. ಚೆಂಡು ಬ್ಯಾಟ್‌ಗೆ ತಾಗಿರಲೇ ಇಲ್ಲ ಎಂಬುದು ರಿಪ್ಲೇ ವೇಳೆ ಸ್ಪಷ್ಟವಾಗಿ ಗೋಚರಿಸುತ್ತಿತ್ತು. ಸ್ವತಃ ಪಡಿಕ್ಕಲ್ ಕೂಡ ಅಂಪೈರ್ ತೀರ್ಪಿನಿಂದ ತೀವ್ರ ಆಘಾತಕ್ಕೊಳಗಾಗಿ, ಮೈದಾನದಲ್ಲೇ ಅಸಹಾಯಕರಾಗಿ ನಿಂತರು. ಬ್ಯಾಟ್‌ಗೂ ಚೆಂಡಿಗೂ ಮೈಲುಗಳಷ್ಟು ಅಂತರವಿತ್ತು ಎಂದು ಬ್ಯಾಟ್ ತೋರಿಸಿ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದರಾದರೂ, ವಿಧಿಯಿಲ್ಲದೆ ನಿರಾಸೆಯೊಂದಿಗೆ ಕ್ರೀಸ್ ತೊರೆಯಬೇಕಾಯಿತು. ಇದೀಗ ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಅಂಪೈರ್ ತೀರ್ಪಿನ ವಿರುದ್ಧ ಆಕ್ರೋಶಗಳು ವ್ಯಕ್ತವಾಗುತ್ತಿದೆ.
🚨 HEARTBREAK AT 199! 💔🤯
Devdutt Padikkal furious after a controversial umpiring decision ended his double-century dream just ONE run short! 😭💔
#DevduttPadikkal #Cricket https://t.co/V8JDkqmjwl
— CricketIndian_🇮🇳 (@CricketIndian_) October 26, 2026
ದೇವದತ್ ಆಸರೆ!
ಭಾರತ ‘ಎ’ ತಂಡ ಮೊದಲ ಇನಿಂಗ್ಸ್‌ನಲ್ಲಿ ಕೇವಲ 113 ರನ್‌ಗಳಿಗೆ ಆಲೌಟ್ ಆಗಿ ತೀವ್ರ ಮುಖಭಂಗ ಅನುಭವಿಸಿತ್ತು. ಎರಡನೇ ಇನಿಂಗ್ಸ್‌ನಲ್ಲೂ ಕೇವಲ 10 ರನ್ ಆಗುವಷ್ಟರಲ್ಲಿ ಯಶಸ್ವಿ ಜೈಸ್ವಾಲ್ ಹಾಗೂ ಕೆ.ಎಲ್. ರಾಹುಲ್ ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತಕ್ಕೆ ಒಳಗಾಗಿತ್ತು.
ಇದನ್ನೂ ಓದಿ: ಕೇವಲ ಐದೇ 5 ಎಸೆತಗಳಲ್ಲಿ ವಿಶ್ವ ದಾಖಲೆಯ ಚೇಸಿಂಗ್!
ಈ ಸಮಯದಲ್ಲಿ ಕ್ರೀಸ್‌ಗೆ ಬಂದ ದೇವದತ್ ಪಡಿಕ್ಕಲ್, ಮತ್ತೊಬ್ಬ ಯುವ ಬ್ಯಾಟರ್ ಸಾಯಿ ಸುದರ್ಶನ್ (91) ಜೊತೆಗೂಡಿ 3ನೇ ವಿಕೆಟ್‌ಗೆ 215 ರನ್‌ಗಳ ಜೊತೆಯಾಟವಾಡಿ ಭಾರತವನ್ನು ಅತ್ಯಂತ ಭದ್ರ ಸ್ಥಿತಿಗೆ ತಂದಿಟ್ಟರು. ಆ ಬಳಿಕ ಪಡಿಕ್ಕಲ್, ಯಶ್ ರಾಥೋಡ್ ಜೊತೆಗೂ 142 ರನ್ಗಳನ್ನು ಕಲೆಹಾಕಿದರು. ಈ ಮೂಲಕ ಚಹಾ ವಿರಾಮದ ವೇಳೆ ಭಾರತ ಎ ತಂಡ 377 ರನ್ ಪೇರಿಸುವಲ್ಲಿ ದೇವದತ್ ಪಡಿಕ್ಕಲ್ ಪ್ರಮುಖ ಪಾತ್ರವಹಿಸಿದ್ದಾರೆ.
