Glenn Maxwell: ಆರ್ಸಿಬಿಯಲ್ಲಿ ಅದ್ಭುತ ಪ್ರದರ್ಶನ: ಕೊನೆಗೂ ಕಾರಣ ಬಿಚ್ಚಿಟ್ಟ ಗ್ಲೆನ್ ಮ್ಯಾಕ್ಸ್ವೆಲ್, ಏನಂದ್ರು ಗೊತ್ತಾ?
RCB vs PBKS, IPL 2021: ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಗ್ಲೆನ್ ಮ್ಯಾಕ್ಸ್ವೆಲ್ 3 ಬೌಂಡರಿ, 4 ಸಿಕ್ಸರ್ ಸಿಡಿಸಿ 57 ರನ್ ಚಚ್ಚಿದರು. ಪಂದ್ಯ ಮುಗಿದ ಬಳಿಕ ಮಾತನಾಡಿದ ಇವರು, ನಾನು ಆರ್ಸಿಬಿಯಲ್ಲಿ ಒಳ್ಳೆಯ ಲಯದಲ್ಲಿರುವುದಕ್ಕೆ ಕಾರಣ ಏನೆಂದು ಹೇಳಿದ್ದಾರೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ತಂಡ ಇಂದು ಇಂಡಿಯನ್ ಪ್ರೀಮಿಯರ್ ಲೀಗ್ 2021 ರಲ್ಲಿ (IPL 2021) ಪ್ಲೇ ಆಫ್ ಪ್ರವೇಶಿಸಿದೆ (RCB Playoffs) ಎಂದರೆ ಇದರಲ್ಲಿ ಗ್ಲೆನ್ ಮ್ಯಾಕ್ಸ್ವೆಲ್ (Glenn Maxwell) ಕೊಡುಗೆ ತುಸು ಹೆಚ್ಚಿದೆ ಎನ್ನಬಹುದು. ಕಳೆದ ಸೀಸನ್ನಲ್ಲಿ ಪಂಜಾಬ್ ಕಿಂಗ್ಸ್ (Punjab Kings) ಪರ ಕಣಕ್ಕಿಳಿದಿದ್ದ ಇವರು ಸಂಪೂರ್ಣ ವೈಫಲ್ಯ ಅನುಭವಿಸಿದರು. ಅನೇಕರಿಂದ ಟೀಕೆಗಳಿಗೂ ಒಳಗಾದರು. ಹೀಗಾಗಿ ಐಪಿಎಲ್ 2021 ಹರಾಜಿಗೂ (IPL Auction) ಮುನ್ನ ಪಂಜಾಬ್ ಫ್ರಾಂಚೈಸಿ ಇವರನ್ನು ತಂಡದಿಂದ ಕೈಬಿಟ್ಟಿತು. ಆದರೆ, ಇವರನ್ನು ಆರ್ಸಿಬಿ ಹರಾಜಿನಲ್ಲಿ ಚೆನ್ನೈ (CSK) ವಿರುದ್ಧ ಹೋರಾಡಿ ಕೊನೆಗೆ 14.25 ಕೋಟಿ ಕೊಟ್ಟು ಖರೀದಿ ಮಾಡಿತು. ಇವರನ್ನು ಇಷ್ಟು ಮೊತ್ತಕ್ಕೆ ವಿರಾಟ್ ಪಡೆ (Virat Kohli) ಖರೀದಿ ಮಾಡಿದ ಬಗ್ಗೆಯೂ ಮಾತುಗಳು ಕೇಳಿಬಂದವು. ಆದರೆ, ಟೀಕಾಕಾರರಿಗೆ ಇಂದು ಮ್ಯಾಕ್ಸ್ವೆಲ್ ಮುಟ್ಟುನೋಡುವಂತಹ ಉತ್ತರ ಕೊಡುತ್ತಿದ್ದಾರೆ. ಆರ್ಸಿಬಿ ತಂಡದ ಮ್ಯಾಚ್ ವಿನ್ನರ್ ಆಗಿ ಇವರು ಗುರುತಿಸಿಕೊಂಡಿದ್ದಾರೆ.
ಭಾನುವಾರ ನಡೆದ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲೇ ಮ್ಯಾಕ್ಸ್ವೆಲ್ 33 ಎಸೆತಗಳಲ್ಲಿ 3 ಬೌಂಡರಿ, 4 ಸಿಕ್ಸರ್ ಸಿಡಿಸಿ 57 ರನ್ ಚಚ್ಚಿದರು. ಈ ಮೂಲಕ ಸತತವಾಗಿ ಮೂರನೇ ಅರ್ಧಶತಕ ಬಾರಿಸಿದರು. ಕಳೆದ ಆವೃತ್ತಿಯಲ್ಲಿ ಪಂಜಾಬ್ ಕಿಂಗ್ಸ್ ತಂಡದಲ್ಲಿದ್ದಾಗ 11 ಪಂದ್ಯಗಳಿಂದ 108 ರನ್ ಗಳಿಸಿದ್ದ ಆಸ್ಟ್ರೇಲಿಯಾದ ಈ ಆಲ್ರೌಂಡರ್ ಈ ವರ್ಷದ ಆರ್ಸಿಬಿ ಪರ 12 ಪಂದ್ಯಗಳಿಂದ ಬರೋಬ್ಬರಿ 407 ರನ್ ಗಳಿಸಿದ್ಧಾರೆ. ಒಟ್ಟು 5 ಅರ್ಧಶತಕ ಮತ್ತು 19 ಸಿಕ್ಸರ್ಗಳು ಇವರ ಬ್ಯಾಟ್ನಿಂದ ಸಿಡಿದಿವೆ. ಇದಕ್ಕೆ ಕಾರಣವೇನು ಏನು?, ಆರ್ಸಿಬಿ ತಂಡದಲ್ಲಿ ಹೀಗೆ ಉತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗಿದ್ದು ಹೇಗೆ? ಎಂದು ಸ್ವತಃ ಅವರೇ ಹೇಳಿದ್ದಾರೆ.
ನಿನ್ನೆ ನಡೆದ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಬಾಜಿಕೊಂಡ ಬಳಿಕ ಮಾತನಾಡಿದ ಗ್ಲೆನ್ ಮ್ಯಾಕ್ಸ್ವೆಲ್, ನಾನು ಆರ್ಸಿಬಿಯಲ್ಲಿ ಒಳ್ಳೆಯ ಲಯದಲ್ಲಿರುವುದಕ್ಕೆ ಕಾರಣ ನನ್ನ ಬ್ಯಾಟಿಂಗ್ ಪೊಸಿಶನ್ ಎಂದು ಹೇಳಿದ್ದಾರೆ.
“ನಂಬರ್ ನಾಲ್ಕರ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡುವುದು ಎಂದರೆ ನನಗೆ ಇಷ್ಟ. ಇದು ನನ್ನ ಫೇವರಿಟ್ ಪೊಸಿಶನ್. ಆಸ್ಟ್ರೇಲಿಯಾ ತಂಡದಲ್ಲೂ ನಾನು ಇದೇ ಸ್ಥಾನದಲ್ಲಿ ಆಡುತ್ತೇನೆ. ಆ ಸ್ಥಾನದಲ್ಲಿ ಸಾಕಷ್ಟು ಯಶಸ್ವಿ ಆಗಿದ್ದೇನೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಕೂಡ ನನಗೇ ಅದೇ ಸ್ಥಾನದಲ್ಲಿ ಆಡಲು ಅವಕಾಶ ಮಾಡಿಕೊಟ್ಟಿದೆ. ಆದರೆ, ಹಿಂದಿನ ಸೀಸನ್ನಲ್ಲಿ ಐದನೇ ಕ್ರಮಾಂಕದಲ್ಲಿ ಆಡಿದ್ದೆ. ಅಲ್ಲಿ ಹೆಚ್ಚು ರನ್ ಗಳಿಸಲು ಸಾಧ್ಯವಾಗಲಿಲ್ಲ. ಅದಕ್ಕೆ ಈ ಬದಲಾದ ಪೊಸಿಶನ್ ಕಾರಣ ಇರಬಹುದು” ಎಂದು ಮ್ಯಾಕ್ಸ್ವೆಲ್ ಹೇಳಿದ್ದಾರೆ.
ಆರ್ಸಿಬಿ ತಂಡ ಅನಾಧಿಕಾಲದಿಂದಲೂ ಮಧ್ಯಮ ಕ್ರಮಾಂಕಕ್ಕೆ ಒಬ್ಬ ಒಳ್ಳೆಯ ಬ್ಯಾಟರ್ನ ಕೊರತೆ ಅನುಭವಿಸುತ್ತಿತ್ತು. ನಾಲ್ಕನೇ ಕ್ರಮಾಂಕದಲ್ಲಿ ಅನೇಕರು ಕಣಕ್ಕಿಳಿದರೂ ಯಶಸ್ವಿಯಾಗಲಿಲ್ಲ. ಸದ್ಯ ಈ ಪೊಸಿಶನ್ನಲ್ಲಿ ಮ್ಯಾಕ್ಸ್ವೆಲ್ ಅದ್ಭುತ ಆಟವಾಡುತ್ತಿದ್ದಾರೆ. ಓಪನರ್ಗಳಾಗಿ ವಿರಾಟ್ ಕೊಹ್ಲಿ ಹಾಗೂ ದೇವದತ್ ಪಡಿಕ್ಕಲ್ ತಂಡಕ್ಕೆ ಉತ್ತಮ ಆರಂಭ ಒದಗಿಸುತ್ತಿದ್ದರೆ, ಮೂರನೇ ಕ್ರಮಾಂಕದಲ್ಲಿ ಶ್ರೀಕರ್ ಭರತ್ ಅವರಿಗೆ ಫಿಕ್ಸ್ ಆಗಿದೆ. ನಾಲ್ಕನೇ ಕ್ರಮಾಂಕ ಗ್ಲೆನ್ ಮ್ಯಾಕ್ಸ್ವೆಲ್ ಮತ್ತು ಎಬಿ ಡಿವಿಲಿಯರ್ಸ್ ಐದನೇ ಸ್ಥಾನದಲ್ಲಿ ಬಂದು ಪಂದ್ಯವನ್ನು ಫಿನಿಶ್ ಮಾಡುವ ಜವಾಬ್ದಾರಿ ಹೊತ್ತು ಕೊಂಡಿದ್ದಾರೆ.
IPL 2021, DC vs CSK: ಇಂದು ಟೇಬಲ್ ಟಾಪರ್ಗಳ ರೋಚಕ ಕದನ: ಡೆಲ್ಲಿ vs ಚೆನ್ನೈ ಪಂದ್ಯದಲ್ಲಿ ಯಾರಿಗೆ ಗೆಲುವು?
(Glenn Maxwell explains The Reason of Success In Royal Challengers Bangalore IPL 2021 after match RCB vs PBKS)
