IND vs NZ: ಮಿಚೆಲ್ ಶತಕ; 5 ವಿಕೆಟ್ ಪಡೆದ ಶಮಿ! 274 ರನ್ ಟಾರ್ಗೆಟ್
IND vs NZ, ICC World Cup 2023: ಭಾರತ ಮತ್ತು ನ್ಯೂಜಿಲೆಂಡ್ ನಡುವೆ ನಡೆಯುತ್ತಿರುವ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ ತಂಡ ನಿಗದಿತ 50 ಓವರ್‌ಗಳಲ್ಲಿ 274 ರನ್ ಕಲೆಹಾಕಿದೆ. ಕೊನೆಯಲ್ಲಿ ಭಾರತದ ಬೌಲರ್‌ಗಳು ಬಲಿಷ್ಠ ಪುನರಾಗಮನ ಮಾಡಿ ಕಿವೀಸ್ ತಂಡವನ್ನು 300 ರನ್ಗಳ ಗಡಿ ದಾಟಲು ಅವಕಾಶ ನೀಡಲಿಲ್ಲ.
ಭಾರತ ಮತ್ತು ನ್ಯೂಜಿಲೆಂಡ್ (India Vs New Zealand) ನಡುವೆ ನಡೆಯುತ್ತಿರುವ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ ತಂಡ ನಿಗದಿತ 50 ಓವರ್‌ಗಳಲ್ಲಿ 274 ರನ್ ಕಲೆಹಾಕಿದೆ. ಕೊನೆಯಲ್ಲಿ ಭಾರತದ ಬೌಲರ್‌ಗಳು ಬಲಿಷ್ಠ ಪುನರಾಗಮನ ಮಾಡಿ ಕಿವೀಸ್ ತಂಡವನ್ನು 300 ರನ್ಗಳ ಗಡಿ ದಾಟಲು ಅವಕಾಶ ನೀಡಲಿಲ್ಲ. ನ್ಯೂಜಿಲೆಂಡ್ ತಂಡದ ಪರ ಡೆರಿಲ್ ಮಿಚೆಲ್ (Daryl Mitchell) ಅಜೇಯ ಶತಕ ಬಾರಿಸಿದರೆ, ಕರ್ನಾಟಕ ಮೂಲದ ರಚಿನ್ ರವೀಂದ್ರ (Rachin Ravindra) ಅರ್ಧಶತಕ ಸಿಡಿಸಿ ಮಿಂಚಿದರು. ಇಂದು ಭಾರತದ ಪರ ಮೊದಲ ಪಂದ್ಯ ಆಡುತ್ತಿರುವ ಮೊಹಮ್ಮದ್ ಶಮಿ (Mohammed Shami) ಅತಿ ಹೆಚ್ಚು 5 ವಿಕೆಟ್ ಪಡೆದರೆ, ಕುಲ್ದೀಪ್ ಯಾದವ್ 2 ವಿಕೆಟ್ ಪಡೆದರು.
ಕಿವೀಸ್ಗೆ ಆರಂಭಿಕ ಆಘಾತ
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಕಿವೀಸ್ ತಂಡಕ್ಕೆ ವಿಶೇಷ ಆರಂಭ ಸಿಗಲಿಲ್ಲ. ಡೆವೊನ್ ಕಾನ್ವೆ ಖಾತೆಯನ್ನೂ ತೆರೆಯದೆ ಸಿರಾಜ್ಗೆ ಬಲಿಯಾದರು. 17 ರನ್ ಗಳಿಸಿದ್ದಾಗ ವಿಲ್ ಯಂಗ್ ಕೂಡ ಶಮಿ ಎಸೆತದಲ್ಲಿ ಬೌಲ್ಡ್ ಆದರು. 19 ರನ್‌ಗಳಿಗೆ ಎರಡು ವಿಕೆಟ್‌ಗಳು ಪತನಗೊಂಡ ನಂತರ, ರಚಿನ್ ರವೀಂದ್ರ ಮತ್ತು ಡೆರಿಲ್ ಮಿಚೆಲ್ ನ್ಯೂಜಿಲೆಂಡ್ ಇನ್ನಿಂಗ್ಸ್‌ನ ಜವಾಬ್ದಾರಿಯನ್ನು ವಹಿಸಿಕೊಂಡರು. ಪವರ್‌ಪ್ಲೇ ಅಂತ್ಯದ ನಂತರ ಕಿವೀಸ್ ತಂಡದ ಸ್ಕೋರ್ 2 ವಿಕೆಟ್ ನಷ್ಟಕ್ಕೆ 34 ರನ್ ಆಗಿತ್ತು.
IND vs NZ: 5 ವಿಕೆಟ್ ಉರುಳಿಸಿ ಅನಿಲ್ ಕುಂಬ್ಳೆ ದಾಖಲೆ ಮುರಿದ ಮೊಹಮ್ಮದ್ ಶಮಿ..!
ರವೀಂದ್ರ ಅರ್ಧಶತಕ
ಆ ಬಳಿಕ ಉತ್ತಮ ಜೊತೆಯಾಟ ನಡೆಸಿದ ರವೀಂದ್ರ ಮತ್ತು ಮಿಚೆಲ್ ನ್ಯೂಜಿಲೆಂಡ್ ಸ್ಕೋರ್ ಅನ್ನು 13 ಓವರ್‌ಗಳಲ್ಲಿ 50 ಮತ್ತು 21 ಓವರ್‌ಗಳಲ್ಲಿ 100 ರನ್ಗಳ ಗಡಿ ದಾಟಿಸಿದರು. ಇದೇ ವೇಳೆ ರವೀಂದ್ರ 56 ಎಸೆತಗಳಲ್ಲಿ ಮತ್ತು ಮಿಚೆಲ್ 60 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಇವರಿಬ್ಬರು ಒಟ್ಟಾಗಿ ನ್ಯೂಜಿಲೆಂಡ್‌ನ ಸ್ಕೋರ್ ಅನ್ನು 150 ರನ್ಗಳ ಗಡಿ ದಾಟಿಸಿದರು. ಇಬ್ಬರೂ ಮೂರನೇ ವಿಕೆಟ್‌ಗೆ 159 ರನ್ ಜೊತೆಯಾಟ ನಡೆಸಿದರು. ನ್ಯೂಜಿಲೆಂಡ್‌ನ ಮೂರನೇ ವಿಕೆಟ್ 178 ರನ್‌ಗಳಿಗೆ ಪತನವಾಯಿತು. ರವೀಂದ್ರ 75 ರನ್ ಗಳಿಸಿ ಶಮಿಗೆ ಎರಡನೇ ಬಲಿಯಾದರು.
ಮಿಚೆಲ್ ಶತಕ
ಬಳಿಕ ಮಿಚೆಲ್, ನಾಯಕ ಲೇಥಮ್ ಜೊತೆಗೂಡಿ ನ್ಯೂಜಿಲೆಂಡ್ ಸ್ಕೋರ್ ಅನ್ನು 200ರ ಗಡಿ ದಾಟಿದರು. ಆದಾಗ್ಯೂ, ಕುಲ್ದೀಪ್ ಎಸೆತದಲ್ಲಿ ಲೇಥಮ್ ಔಟಾದರು. ಆದರೆ ದೃಢವಾಗಿ ನಿಂತ ಮಿಚೆಲ್, 100 ಎಸೆತಗಳಲ್ಲಿ ಶತಕ ಪೂರೈಸಿದರು. ಇನ್ನೊಂದು ತುದಿಯಲ್ಲಿ ವಿಕೆಟ್‌ಗಳು ಬೀಳುತ್ತಲೇ ಇದ್ದವು. ಕುಲ್ದೀಪ್ 23 ರನ್ಗಳ ವೈಯಕ್ತಿಕ ಸ್ಕೋರ್ನಲ್ಲಿ ಫಿಲಿಪ್ಸ್ ಅವರನ್ನು ಪೆವಿಲಿಯನ್ಗೆ ಕಳುಹಿಸಿದರು.
ಶಮಿಗೆ 5 ವಿಕೆಟ್
ಎಂಟು ರನ್ ಗಳಿಸಿದ್ದ ಚಾಪ್ಮನ್, ಬುಮ್ರಾಗೆ ಬಲಿಯಾದರು. ನ್ಯೂಜಿಲೆಂಡ್ ಇನಿಂಗ್ಸ್‌ನ 48ನೇ ಓವರ್‌ನಲ್ಲಿ ಸ್ಯಾಂಟ್ನರ್ ಮತ್ತು ಮ್ಯಾಟ್ ಹೆನ್ರಿ ಅವರನ್ನು ಶಮಿ ಬೌಲ್ಡ್ ಮಾಡಿದರು. ಇನಿಂಗ್ಸ್‌ನ ಕೊನೆಯ ಓವರ್‌ನಲ್ಲಿ ಶಮಿ, 130 ರನ್‌ಗಳಿಸಿದ್ದ ಮಿಚೆಲ್ ಅವರನ್ನು ಔಟ್ ಮಾಡಿ ಪಂದ್ಯದ ಐದನೇ ವಿಕೆಟ್ ಪಡೆದರು. ಅಂತಿಮವಾಗಿ ಕಿವೀಸ್ ತಂಡ 50 ಓವರ್‌ಗಳಲ್ಲಿ ಎಲ್ಲಾ ವಿಕೆಟ್‌ಗಳನ್ನು ಕಳೆದುಕೊಂಡು 273 ರನ್ ಗಳಿಸಲಷ್ಟೇ ಶಕ್ತವಾಯಿತು. ಭಾರತದ ಪರ ಶಮಿ ಐದು ವಿಕೆಟ್‌ಗಳ ಹೊರತಾಗಿ ಕುಲ್ದೀಪ್ ಎರಡು, ಬುಮ್ರಾಮತ್ತು ಸಿರಾಜ್ ತಲಾ ಒಂದು ವಿಕೆಟ್ ಪಡೆದರು.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 6:21 pm, Sun, 22 October 23