IPL Media Rights: ಐಪಿಎಲ್ನ ಪ್ರತಿ ಪಂದ್ಯ 111* ಕೋಟಿಗೆ ಮಾರಾಟ..!
IPL Media Rights: ಭಾನುವಾರ ನಡೆದ ಹರಾಜಿನಲ್ಲಿ ಟಿವಿ ಪ್ರಸಾರ ಹಕ್ಕುಗಳಿಗಾಗಿ ಸೋನಿ ನೆಟ್ವರ್ಕ್, ರಿಲಯನ್ಸ್ ವಯಾಕಾಮ್ 18 ಮತ್ತು ಸ್ಟಾರ್ ನೆಟ್ವರ್ಕ್ ನಡುವೆ ತೀವ್ರ ಪೈಪೋಟಿ ಕಂಡು ಬಂದಿತ್ತು.
IPL Media Rights: ಐಪಿಎಲ್ ನೇರ ಪ್ರಸಾರ ಹಕ್ಕುಗಳಿಗಾಗಿ ಭರ್ಜರಿ ಪೈಪೋಟಿ ಮುಂದುವರೆದಿದೆ. ಸೋಮವಾರ ನಡೆದ ಹರಾಜಿನ ಮೂಲಕ ಭಾರತದಲ್ಲಿನ ಟಿವಿ ಪ್ರಸಾರ ಹಕ್ಕುಗಳನ್ನು 23,575 ಕೋಟಿಗೆ ಡಿಸ್ನಿ (ಸ್ಟಾರ್ ನೆಟ್ವರ್ಕ್) ಪಡೆದುಕೊಂಡಿದೆ. ಹಾಗೆಯೇ ಭಾರತದ ಡಿಜಿಟಲ್ ಪ್ರಸಾರ ಹಕ್ಕುಗಳನ್ನು ರಿಲಯನ್ಸ್ ವಯಾಕಾಮ್-18 ಕಂಪೆನಿ 20,500 ಕೋಟಿ ನೀಡಿ ತಮ್ಮದಾಗಿಸಿಕೊಂಡಿದೆ. ಅದರಂತೆ 2023 ರಿಂದ 2027 ರವರೆಗೆ ಐಪಿಎಲ್ ನೇರ ಪ್ರಸಾರವು ಸ್ಟಾರ್ ಸ್ಪೋರ್ಟ್ಸ್ ಚಾನೆಲ್ ಹಾಗೂ ಡಿಜಿಟಲ್ ಪ್ರಸಾರವು ಜಿಯೋ ಹಾಗೂ ವೂಟ್ ಆ್ಯಪ್ಗಳಲ್ಲಿ ಇರಲಿದೆ. ವಿಶೇಷ ಎಂದರೆ ಈ ಬಾರಿ ಬಿಸಿಸಿಐ 4 ಪ್ಯಾಕೇಜ್ ಮೂಲಕ ಹರಾಜು ಪ್ರಕ್ರಿಯೆಯನ್ನು ನಡೆಸುತ್ತಿದೆ. ಅದರಂತೆ ಪ್ಯಾಕೇಜ್-ಎ ನಲ್ಲಿ ಟಿವಿ ರೈಟ್ಸ್ ನೀಡಲಾಗಿದ್ದರೆ, ಪ್ಯಾಕೇಜ್-ಬಿ ನಲ್ಲಿ ಡಿಜಿಟಲ್ ಹಕ್ಕುಗಳಿಗಾಗಿ ಬಿಡ್ಡಿಂಗ್ ನಡೆಸಲಾಗಿತ್ತು. ಇದೀಗ ಪ್ಯಾಕೇಜ್-ಸಿ ಹರಾಜು ನಡೆದಿದ್ದು, ಬಿಡ್ಡಿಂಗ್ ಪ್ರಕ್ರಿಯೆಯನ್ನು ಮಂಗಳವಾರಕ್ಕೆ ಮುಂದೂಡಲಾಗಿದೆ.
ಇಲ್ಲಿ ಪ್ಯಾಕೇಜ್-ಎ (ಟಿವಿ ರೈಟ್ಸ್) 23,370 ಕೋಟಿಗೆ ಮಾರಾಟವಾದರೆ, ಪ್ಯಾಕೇಜ್-ಬಿ (ಡಿಜಿಟಲ್ ಪ್ರಸಾರ ಹಕ್ಕುಗಳು) 20,500 ಕೋಟಿಗೆ ಹರಾಜಾಗಿದೆ. ಈ ಮೂಲಕ ಕೇವಲ ಎರಡು ಪ್ಯಾಕೇಜ್ಗಳ ಮೂಲಕ ಬಿಸಿಸಿಐ ಬರೋಬ್ಬರಿ 44,075 ಕೋಟಿ ಆದಾಯಗಳಿಸಿದೆ. ಇದೀಗ ಆರಂಭಿಕ ಪಂದ್ಯ, ಅಂತಿಮ ಪಂದ್ಯ, ಮೂರು ಪ್ಲೇ-ಆಫ್‌ಗಳು ಮತ್ತು ಕೆಲವು ವಾರಾಂತ್ಯದ ಡಬಲ್ ಹೆಡರ್‌ ಪಂದ್ಯಗಳನ್ನು ಒಳಗೊಂಡಿರುವ 18 ಮ್ಯಾಚ್ಗಳಿಗೆ ಸೀಮಿತವಾಗಿರುವ ಡಿಜಿಟಲ್ ಹಕ್ಕುಗಳ ಪ್ಯಾಕೇಜ್-ಸಿ ಬಿಡ್ಡಿಂಗ್ ನಡೆಯುತ್ತಿದೆ.
ಸೋಮವಾರದ ಅಂತ್ಯಕ್ಕೆ ಈ ಬಿಡ್ಡಿಂಗ್ ಮೊತ್ತ 1813 ಕೋಟಿಗೆ ಬಂದು ನಿಂತಿದೆ. ಅಂದರೆ ಈಗಾಗಲೇ ಬಿಸಿಸಿಐಗೆ 45,775 ಕೋಟಿ (44,075+1813 ) ಹರಿದು ಬಂದಿದೆ. ಅದರಂತೆ ಪ್ರತಿ ಪಂದ್ಯವು 111.92 ಕೋಟಿಗೆ ಮಾರಾಟವಾಗಿದೆ. ಇದರೊಂದಿಗೆ ವಿಶ್ವದ ಎರಡನೇ ಅತ್ಯಂತ ಶ್ರೀಮಂತ ಸ್ಪೋರ್ಟ್ಸ್ ಲೀಗ್ ಆಗಿ ಐಪಿಎಲ್ ಗುರುತಿಸಿಕೊಂಡಿದೆ. ಸದ್ಯ ಅಗ್ರಸ್ಥಾನದಲ್ಲಿ ಅಮೆರಿಕದ ನ್ಯಾಷನಲ್ ಫುಟ್‌ಬಾಲ್ ಲೀಗ್ (NFL) ಇದ್ದು, ಇದರ ಪ್ರತಿ ಪಂದ್ಯದ ನೇರ ಪ್ರಸಾರದ ಹಕ್ಕು 133 ಕೋಟಿಗೆ ಮಾರಾಟವಾಗಿದೆ.
ಇದೀಗ ಐಪಿಎಲ್ ಪ್ರತಿ ಪಂದ್ಯಗಳ ಪ್ರಸಾರ ಹಕ್ಕುಗಳು 111 ಕೋಟಿಗೆ ತಲುಪಿದೆ. ಈ ಮೂಲಕ ವಿಶ್ವದ ಶ್ರೀಮಂತ ಕ್ರಿಕೆಟ್ ಆಗಿ ಐಪಿಎಲ್ ಗುರುತಿಸಿಕೊಂಡಿದೆ. ಅಷ್ಟೇ ಅಲ್ಲದೆ ವಿಶ್ವದ ಅತ್ಯಂತ ದುಬಾರಿ ಪ್ರಸಾರ ಹಕ್ಕನ್ನು ಹೊಂದಿರುವ 2ನೇ ಲೀಗ್ ಆಗಿ ಹೊರಹೊಮ್ಮಿದೆ. ಇನ್ನು ವಿದೇಶಿ ಪ್ರಸಾರ ಹಕ್ಕುಗಳಿಗಾಗಿ ಪ್ಯಾಕೇಜ್ ಡಿ ಬಿಡ್ಡಿಂಗ್ ಕೂಡ ನಡೆಯಬೇಕಿದ್ದು, ಈ ಪ್ಯಾಕೇಜ್ನ ಹರಾಜು 3 ಕೋಟಿಯಿಂದ ಪ್ರಾರಂಭವಾಗುತ್ತದೆ. ಹೀಗಾಗಿ ಐಪಿಎಲ್ ಪ್ರಸಾರ ಹಕ್ಕುಗಳಿಂದ 50 ಸಾವಿರಕ್ಕೂ ಅಧಿಕ ಮೊತ್ತಗಳಿಸುವ ನಿರೀಕ್ಷೆಯಲ್ಲಿದೆ ಬಿಸಿಸಿಐ.
ಕ್ರಿಕೆಟ್ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 6:43 pm, Mon, 13 June 22