ದೀರ್ಘಾವಧಿಯ ಡಕ್ ಔಟ್: ಅತ್ಯಂತ ಕೆಟ್ಟ ದಾಖಲೆ ಬರೆದ ಲೌರೆನ್ಸ್

ಏಕದಿನ ಕ್ರಿಕೆಟ್​ನಲ್ಲಿ ಅತ್ಯಂತ ದೀರ್ಘಾವಧಿಯ ಬಳಿಕ ಡಕ್ ಔಟಾದ ಆರಂಭಿಕ ಆಟಗಾರ ಎಂಬ ಕಳಪೆ ದಾಖಲೆಯೊಂದು ನಮೀಬಿಯಾ ಬ್ಯಾಟರ್ ಲೋ-ಹಂಡ್ರೆ ಲೌರೆನ್ಸ್ ಪಾಲಾಗಿದೆ. ಅದು ಕೂಡ 23 ಎಸೆತಗಳನ್ನು ಎದುರಿಸಿ ಎಂಬುದು ವಿಶೇಷ. ಅಂದರೆ ಕ್ರಿಕೆಟ್ ಇತಿಹಾಸದಲ್ಲಿ ಅತೀ ಹೆಚ್ಚು ಎಸೆತಗಳನ್ನು ಎದುರಿಸಿ ಶೂನ್ಯಕ್ಕೆ ಔಟಾದ ಆರಂಭಿಕ ಬ್ಯಾಟರ್​ಗಳ ಪಟ್ಟಿಯಲ್ಲಿ ಈಗ ಲೋ-ಹಂಡ್ರೆ ಲೌರೆನ್ಸ್ ಅಗ್ರಸ್ಥಾನ ಅಲಂಕರಿಸಿದ್ದಾರೆ. ಇದಕ್ಕೂ ಮುನ್ನ ಬಾಂಗ್ಲಾದೇಶ್ ತಂಡದ ಮಾಜಿ ಆಟಗಾರ ಅತರ್ ಅಲಿ ಖಾನ್ ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದರು.

1988 ರಲ್ಲಿ ಟೀಮ್ ಇಂಡಿಯಾ ವಿರುದ್ಧದ ಪಂದ್ಯದಲ್ಲಿ ಬಾಂಗ್ಲಾದೇಶ್ ಪರ ಆರಂಭಿಕನಾಗಿ ಕಣಕ್ಕಿಳಿದಿದ್ದ ಅತರ್ ಅಲಿ ಖಾನ್ 22 ಎಸೆತಗಳನ್ನು ಎದುರಿಸಿ ಶೂನ್ಯಕ್ಕೆ ಔಟಾಗಿದ್ದರು.

ಇದೀಗ ಸ್ಕಾಟ್ಲೆಂಡ್ ವಿರುದ್ಧದ ಏಕದಿನ ವಿಶ್ವಕಪ್ ಲೀಗ್-2 ಪಂದ್ಯದಲ್ಲಿ ನಮೀಬಿಯಾ ಪರ ಆರಂಭಿಕನಾಗಿ ಕಣಕ್ಕಿಳಿದ ಲೋ-ಹಂಡ್ರೆ ಲೌರೆನ್ಸ್ 23ನೇ ಎಸೆತದಲ್ಲಿ ಶೂನ್ಯಕ್ಕೆ ಔಟಾಗಿದ್ದಾರೆ. ಇದರೊಂದಿಗೆ ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಂತ ದೀರ್ಘಾವಧಿಯ ಡಕ್​ ಔಟಾದ ಆರಂಭಿಕ ಆಟಗಾರ ಎಂಬ ಅನಗತ್ಯ ದಾಖಲೆ ಲೋ-ಹಂಡ್ರೆ ಲೌರೆನ್ಸ್ ಪಾಲಾಗಿದೆ.

ಯಾರ ಹೆಸರಿನಲ್ಲಿದೆ ವಿಶ್ವ ದಾಖಲೆ?

ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ದೀರ್ಘಾವಧಿ ಬಳಿಕ ಡಕ್​ ಔಟ್ ಆದ ಬ್ಯಾಟರ್ ಎಂಬ ಹೀನಾಯ ದಾಖಲೆ ವೆಸ್ಟ್ ಇಂಡೀಸ್​ನ ರುನಾಕೊ ಮಾರ್ಟನ್ ಹೆಸರಿನಲ್ಲಿದೆ. 2006 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿದ ರುನಾಕೊ 31 ಎಸೆತಗಳನ್ನು ಎದುರಿಸಿದರೂ ಯಾವುದೇ ರನ್ ಗಳಿಸದೇ ಔಟಾಗಿದ್ದರು. ಇದುವೇ ಸೀಮಿತ ಓವರ್​ಗಳಲ್ಲಿ ಕಂಡು ಬಂದ ಅತ್ಯಂತ ದೀರ್ಘಾವಧಿಯ ಡಕ್ ಔಟ್.

ಇದನ್ನೂ ಓದಿ: IPL 2025: ಮುಂಬೈ ಇಂಡಿಯನ್ಸ್ ತಂಡಕ್ಕೆ ಸೂರ್ಯಕುಮಾರ್ ಯಾದವ್ ಗುಡ್ ಬೈ?

ಇದೀಗ ಏಕದಿನ ಕ್ರಿಕೆಟ್​ನಲ್ಲಿ ಆರಂಭಿಕನಾಗಿ ಕಣಕ್ಕಿಳಿದು ಅತ್ಯಂತ ದೀರ್ಘಾವಧಿ ಬಳಿಕ ಶೂನ್ಯಕ್ಕೆ ಔಟಾದ ಆರಂಭಿಕ ಬ್ಯಾಟರ್ ಎಂಬ ಕಳಪೆ ದಾಖಲೆ ಲೋ-ಹಂಡ್ರೆ ಲೌರೆನ್ಸ್ ಹೆಸರಿಗೆ ಸೇರ್ಪಡೆಯಾಗಿದೆ.