ಸೂಪರ್ ಸ್ಮ್ಯಾಶ್​ನಲ್ಲಿ ಸಿಎಸ್​ಕೆ ಮಾಜಿ ಸ್ಪಿನ್ನರ್ ಸಿಡಿಲಬ್ಬರ: ಚಾಂಪಿಯನ್ ಪಟ್ಟಕ್ಕೇರಿದ ತಂಡ

ಐಪಿಎಲ್ 2022 ರ ಮೆಗಾ ಹರಾಜಿನ (Ipl 2022 Auction) ತಯಾರಿಗೆ ಸಿದ್ದತೆಗಳು ಶುರುವಾಗಿದೆ. ಈಗಾಗಲೇ ಸಿಎಸ್​ಕೆ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ (MS Dhoni) ಚೆನ್ನೈ ತಲುಪಿದ್ದಾರೆ . ಫೆಬ್ರವರಿ 12-13 ರಂದು ಬೆಂಗಳೂರಿನಲ್ಲಿ ಮೆಗಾ ಹರಾಜು ನಡೆಸಲು ನಿರ್ಧರಿಸಲಾಗಿದ್ದು, ಅದಕ್ಕೂ ಮುನ್ನ ಸಿಎಸ್​ಕೆ ತಂಡವು ಬಿಡ್ಡಿಂಗ್ ಕಾರ್ಯತಂತ್ರಗಳನ್ನು ಮಾಡಿಕೊಳ್ಳಲು ಧೋನಿ ಚೆನ್ನೈಗೆ ಬಂದಿಳಿದಿದ್ದಾರೆ. ಸದ್ಯ ಸಿಎಸ್​ಕೆ ತಂಡದಲ್ಲಿ ರವೀಂದ್ರ ಜಡೇಜಾ, ಧೋನಿ ಹಾಗೂ ರುತುರಾಜ್ ಗಾಯಕ್ವಾಡ್ ಇದ್ದು, ಹೀಗಾಗಿ ಹೊಸ ತಂಡವನ್ನು ಕಟ್ಟಲು ಯಾವ ಆಟಗಾರನನ್ನು ಆಯ್ಕೆ ಮಾಡಬೇಕು, ಯಾರಿಗಾಗಿ ಹೆಚ್ಚು ಬಿಡ್ ಮಾಡಬೇಕೆಂಬ ಪ್ಲ್ಯಾನ್​ನಲ್ಲಿದೆ ಚೆನ್ನೈ ಸೂಪರ್ ಕಿಂಗ್ಸ್ (CSK)​. ಇದರ ಬೆನ್ನಲ್ಲೇ ಅತ್ತ ಸಿಎಸ್​ಕೆ ತಂಡದ ಮಾಜಿ ಆಟಗಾರ ಮಿಚೆಲ್ ಸ್ಯಾಂಟ್ನರ್ ( Mitchell Santner) ನ್ಯೂಜಿಲೆಂಡ್‌ನಲ್ಲಿ ಅಬ್ಬರಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ನ್ಯೂಜಿಲೆಂಡ್​ನ T20 ಲೀಗ್ ಸೂಪರ್ ಸ್ಮ್ಯಾಶ್‌ನ ಫೈನಲ್​ ಪಂದ್ಯದಲ್ಲಿ ಕ್ಯಾಂಟರ್​ಬರಿ ತಂಡದ ವಿರುದ್ದ ಸ್ಯಾಂಟ್ನರ್ ಭರ್ಜರಿ ಬ್ಯಾಟಿಂಗ್ ಮಾಡಿದರು. ನಾರ್ದನ್ ಡಿಸ್ಟ್ರಿಕ್ಟ್ ಪರ ಆಡುತ್ತಿರುವ ಮಿಚೆಲ್ ಸ್ಯಾಂಟ್ನರ್ ಕೇವಲ 40 ಎಸೆತಗಳಲ್ಲಿ 9 ಸಿಕ್ಸರ್ ಮತ್ತು 4 ಬೌಂಡರಿಗಳ ನೆರವಿನಿಂದ 92 ರನ್ ಬಾರಿಸಿದ್ದಾರೆ. 230 ಸ್ಟ್ರೈಕ್ ರೇಟ್‌ನಲ್ಲಿ ಬ್ಯಾಟ್ ಬೀಸಿರುವ ಸ್ಯಾಂಟ್ನರ್ ಸಿಕ್ಸ್​ ಫೋರ್​ಗಳ ಮೂಲಕವೇ ಕೇವಲ 13 ಎಸೆತಗಳಲ್ಲಿ 70 ರನ್ ಗಳಿಸಿರುವುದು ವಿಶೇಷ. ಪರಿಣಾಮ ನಾರ್ಥನ್ ಡಿಸ್ಟ್ರಿಕ್ಟ್​ ತಂಡವು 20 ಓವರ್‌ಗಳಲ್ಲಿ 217 ರನ್‌ ಕಲೆಹಾಕಿತು.

218 ರನ್​ಗಳ ಬೃಹತ್ ಗುರಿ ಬೆನ್ನತ್ತಿ ಕ್ಯಾಂಟರ್​ಬರಿ ತಂಡವು 18.5 ಓವರ್​ಗಳಲ್ಲಿ 161 ರನ್​ಗೆ ಆಲೌಟ್​ ಆದರು. ಇದರೊಂದಿಗೆ 56 ರನ್​ಗಳ ಜಯದೊಂದಿಗೆ ನಾರ್ಥನ್ ಡಿಸ್ಟ್ರಿಕ್ಟ್​ ಸೂಪರ್ ಸ್ಮ್ಯಾಶ್​ನ ಚಾಂಪಿಯನ್​ ಪಟ್ಟಕ್ಕೇರಿತು.

ಐಪಿಎಲ್​ನಲ್ಲಿ ಸಿಎಸ್​ಕೆ ಪರ 6 ಪಂದ್ಯಗಳನ್ನು ಆಡಿರುವ ಮಿಚೆಲ್ ಸ್ಯಾಂಟ್ನರ್ 6 ವಿಕೆಟ್ ಕಬಳಿಸಿದ್ದಾರೆ. ಕಳೆದ ಮೂರು ಸೀಸನ್​ಗಳಿಂದ ಸಿಎಸ್​ಕೆ ಭಾಗವಾಗಿದ್ದರೂ ಸ್ಯಾಂಟ್ನರ್​ ತಂಡದಲ್ಲಿ ಹೆಚ್ಚಿನ ಅವಕಾಶ ಸಿಕ್ಕಿರಲಿಲ್ಲ. ಇತ್ತ ನ್ಯೂಜಿಲೆಂಡ್​ನ ಟಿ20 ತಂಡದ ಖಾಯಂ ಸದಸ್ಯರಾಗಿರುವ ಸ್ಯಾಂಟ್ನರ್ ಬ್ಯಾಟಿಂಗ್​ನಲ್ಲೂ ಮಿಂಚಬಲ್ಲೆ ಎಂಬುದನ್ನು ಇದೀಗ ಸೂಪರ್​ಸ್ಮ್ಯಾಶ್ ಲೀಗ್ ಮೂಲಕ ತೋರಿಸಿಕೊಟ್ಟಿದ್ದಾರೆ. ಹೀಗಾಗಿ ಪ್ರಸ್ತುತ ಫಾರ್ಮ್ ಅನ್ನು ಪರಿಗಣಿಸಿ ಐಪಿಎಲ್​ನ ಬಹುತೇಕ ತಂಡಗಳು ಎಡಗೈ ಸ್ಪಿನ್ ಆಲ್​ರೌಂಡರ್​ನ ಖರೀದಿಗೆ ಪೈಪೋಟಿ ನಡೆಸುವ ಸಾಧ್ಯತೆಯಿದೆ.

ಇದನ್ನೂ ಓದಿ:  IND vs WI: ದಕ್ಷಿಣ ಆಫ್ರಿಕಾ ವಿರುದ್ದದ ಸರಣಿಯಲ್ಲಿದ್ದ 5 ಆಟಗಾರರು ಟೀಮ್ ಇಂಡಿಯಾದಿಂದ ಔಟ್..!

ಇದನ್ನೂ ಓದಿ: ICC ODI Rankings: ಐಸಿಸಿ ಏಕದಿನ ರ‍್ಯಾಕಿಂಗ್ ಪಟ್ಟಿ ಪ್ರಕಟ: ಕೊಹ್ಲಿ-ರೋಹಿತ್ ನಡುವೆ ಪೈಪೋಟಿ

ಇದನ್ನೂ ಓದಿ: IPL 2022 Auction: ಲಕ್ನೋ ತಂಡದ ಮೊದಲ ಟಾರ್ಗೆಟ್ ಯಾರು ಎಂಬುದನ್ನು ಬಹಿರಂಗಪಡಿಸಿದ ರಾಹುಲ್

(Mitchell Santner hit 92 runs in Super Smash Final ahead of IPL 2022 mega auction)