ಸೆಮಿಫೈನಲ್ ಇಲ್ಲ..! ಹೀಗಿರಲಿದೆ ಚಾಂಪಿಯನ್ಸ್ ಟ್ರೋಫಿ ಟೂರ್ನಿ

ವುಮೆನ್ಸ್ ಕ್ರಿಕೆಟ್ ಇತಿಹಾಸದಲ್ಲೇ ಮೊದಲ ಬಾರಿಗೆ ‘ಮಹಿಳಾ ಚಾಂಪಿಯನ್ಸ್ ಟ್ರೋಫಿ‘ ಟೂರ್ನಿಯನ್ನು ಆಯೋಜಿಸಲು ಐಸಿಸಿ ಗ್ರೀನ್ ಸಿಗ್ನಲ್ ನೀಡಿದೆ. ಈ ಚೊಚ್ಚಲ ಟೂರ್ನಿಯನ್ನು ಟಿ20 ಸ್ವರೂಪದಲ್ಲಿ ನಡೆಸಲು ನಿರ್ಧರಿಸಲಾಗಿದ್ದು, ಅದರಂತೆ ಮುಂದಿನ ವರ್ಷ ಫೆಬ್ರವರಿ 14 ರಿಂದ ಈ ಜಾಗತಿಕ ಮಹಾಸಮರ ಅಧಿಕೃತವಾಗಿ ಆರಂಭವಾಗಲಿದೆ. ಸಾಮಾನ್ಯವಾಗಿ ಐಸಿಸಿ ಟೂರ್ನಿಗಳಲ್ಲಿ ಲೀಗ್ ಹಂತ ಮುಗಿದ ಬಳಿಕ ಸೆಮಿಫೈನಲ್ ಪಂದ್ಯಗಳು ನಡೆಯುವುದು ವಾಡಿಕೆ. ಆದರೆ, ಚೊಚ್ಚಲ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯಲ್ಲಿ ಯಾವುದೇ ಸೆಮಿಫೈನಲ್ ಪಂದ್ಯಗಳು ಇರುವುದಿಲ್ಲ ಎಂದು ಇಂಟರ್ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್  ಖಚಿತಪಡಿಸಿದೆ.

‘ರೌಂಡ್ ರಾಬಿನ್’ ಮಾದರಿ:

ಚೊಚ್ಚಲ ಮಹಿಳಾ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯು ರೌಂಡ್ ರಾಬಿನ್ ಮಾದರಿಯಲ್ಲಿ ಆಯೋಜಿಸಲು ನಿರ್ಧರಿಸಲಾಗಿದೆ. ಹೀಗಾಗಿಯೇ ಈ ಟೂರ್ನಿಯಲ್ಲಿ ಸೆಮಿಫೈನಲ್ ಪಂದ್ಯಗಳು ಇರುವುದಿಲ್ಲ. ಬದಲಾಗಿ ಲೀಗ್ ಹಂತದಲ್ಲಿ ಭಾಗವಹಿಸುವ 6 ತಂಡಗಳು ಪರಸ್ಪರ ತಲಾ ಒಂದೊಂದು ಪಂದ್ಯವನ್ನು ಆಡಲಿವೆ.

ಲೀಗ್ ಹಂತ ಮುಕ್ತಾಯಗೊಂಡಾಗ ಅಂಕಪಟ್ಟಿಯಲ್ಲಿ ಮೊದಲ ಎರಡು ಸ್ಥಾನಗಳನ್ನು ಅಲಂಕರಿಸುವ ತಂಡಗಳು ನೇರವಾಗಿ ಫೆಬ್ರವರಿ 28 ರಂದು ನಡೆಯಲಿರುವ ಮಹಾ ಫೈನಲ್ ಪಂದ್ಯಕ್ಕೆ ಅರ್ಹತೆ ಪಡೆಯಲಿವೆ.

• ಪ್ರತಿ ತಂಡ ಆಡುವ ಪಂದ್ಯಗಳು: ಲೀಗ್ ಹಂತದಲ್ಲಿ ಪ್ರತಿ ತಂಡವು ಉಳಿದ 5 ತಂಡಗಳ ವಿರುದ್ಧ ತಲಾ ಒಂದೊಂದು ಪಂದ್ಯವನ್ನು ಆಡಬೇಕಾಗುತ್ತದೆ. ಅಂದರೆ ಪ್ರತಿ ತಂಡಕ್ಕೆ 5 ಲೀಗ್ ಪಂದ್ಯಗಳು ಸಿಗಲಿವೆ.
• ಒಟ್ಟು ಲೀಗ್ ಪಂದ್ಯಗಳು: ಆರೂ ತಂಡಗಳ ನಡುವೆ ಒಟ್ಟು 15 ಲೀಗ್ ಪಂದ್ಯಗಳು ಜರುಗಲಿವೆ.
• ಏಕೈಕ ಅಂಕ ಪಟ್ಟಿ: ಟೂರ್ನಿಯಲ್ಲಿ ಪಾಲ್ಗೊಳ್ಳುವ ಎಲ್ಲಾ 6 ತಂಡಗಳಿಗೂ ಒಂದೇ ಅಂಕ ಪಟ್ಟಿ ಇರಲಿದೆ.
• ಫೈನಲ್: ಲೀಗ್ ಹಂತ ಮುಗಿದ ನಂತರ ಅಂಕಪಟ್ಟಿಯಲ್ಲಿ ಟಾಪ್-2 ನಲ್ಲಿ ಕಾಣಿಸಿಕೊಳ್ಳುವ ತಂಡಗಳ ನಡುವೆ ಫೈನಲ್ ಪಂದ್ಯ ನಡೆಯಲಿದೆ.

3, 4, 5 ಮತ್ತು 6ನೇ ಸ್ಥಾನ ಪಡೆಯುವ ತಂಡಗಳು ಟೂರ್ನಿಯಿಂದ ನೇರವಾಗಿ ಹೊರಬೀಳಲಿವೆ. ಹೀಗಾಗಿ ಇಲ್ಲಿ ತಪ್ಪುಗಳಿಗೆ ಯಾವುದೇ ಅವಕಾಶ ಇರುವುದಿಲ್ಲ. ಪ್ರತಿ ಪಂದ್ಯವೂ ಕ್ವಾರ್ಟರ್ ಫೈನಲ್‌ನಷ್ಟೇ ರೋಚಕವಾಗಿರಲಿದೆ.

ಕಣದಲ್ಲಿರುವ 6 ತಂಡಗಳು:

ಜುಲೈ 6, 2026 ರ ಐಸಿಸಿ ಮಹಿಳಾ ಟಿ20 ತಂಡಗಳ ಶ್ರೇಯಾಂಕದ ಕಟ್‌-ಆಫ್ ಆಧಾರದ ಮೇಲೆ ಈ ಕೆಳಗಿನ ಆರು ತಂಡಗಳು ಈ ಪ್ರತಿಷ್ಠಿತ ಟೂರ್ನಿಗೆ ಅರ್ಹತೆ ಪಡೆದುಕೊಂಡಿವೆ.

1. ಭಾರತ
2. ಆಸ್ಟ್ರೇಲಿಯಾ
3. ಸೌತ್ ಆಫ್ರಿಕಾ
4. ಶ್ರೀಲಂಕಾ
5. ನ್ಯೂಝಿಲೆಂಡ್
6. ಇಂಗ್ಲೆಂಡ್

ಇದನ್ನೂ ಓದಿ: ಪಾಕಿಸ್ತಾನ್ ತಂಡದ ಅಧಃಪತನಕ್ಕೆ ಇಬ್ಬರು ಆಟಗಾರರೇ ಕಾರಣ!

ಟಿ20 ಕದನ:

ಪುರುಷರ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯನ್ನು ಏಕದಿನ ಮಾದರಿಯಲ್ಲಿ ಆಯೋಜಿಸಿದರೆ, ಮಹಿಳಾ ಚಾಂಪಿಯನ್ಸ್ ಟ್ರೋಫಿಯನ್ನು ಕೇವಲ ಟಿ20 ಸ್ವರೂಪದಲ್ಲಿ ಆಯೋಜಿಸಲು ಐಸಿಸಿ ನಿರ್ಧರಿಸಿದೆ. ಕಡಿಮೆ ಅವಧಿಯಲ್ಲಿ ಹೆಚ್ಚು ಮನರಂಜನೆ ಮತ್ತು ಕಠಿಣ ಸ್ಪರ್ಧೆಯನ್ನು ಒದಗಿಸುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಇಂಟರ್ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್ ತಿಳಿಸಿದೆ.