Prithvi Shaw: ವಿದೇಶದಲ್ಲಿ ಅಬ್ಬರಿಸಿದ ಪೃಥ್ವಿ ಶಾ
Prithvi Shaw: ಟೀಮ್ ಇಂಡಿಯಾದಿಂದ ಹೊರಬಿದ್ದಿರುವ ಪೃಥ್ವಿ ಶಾ ಕಳೆದೊಂದು ವರ್ಷದಿಂದ ಇಂಗ್ಲೆಂಡ್ನ ಕೌಂಟಿ ಕ್ರಿಕೆಟ್ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಕಳೆದ ಸೀಸನ್ ಒನ್ ಡೇ ಕಪ್ನಲ್ಲಿ ಕಾಣಿಸಿಕೊಂಡಿದ್ದ ಪೃಥ್ವಿ ನಾರ್ಥಾಂಪ್ಟನ್ಶೈರ್ ಪರ 4 ಪಂದ್ಯಗಳನ್ನಾಡಿದ್ದರು. ಈ ವೇಳೆ 1 ದ್ವಿಶತಕ ಹಾಗೂ 1 ಶತಕದೊಂದಿಗೆ ಅಬ್ಬರಿಸಿದ್ದರು. ಆದರೆ ಆ ಬಳಿಕ ಗಾಯಗೊಂಡ ಕಾರಣ ಟೂರ್ನಿಯಿಂದ ಹೊರಗುಳಿದಿದ್ದರು. ಇದೀಗ ಮತ್ತೆ ಒನ್ ಡೇ ಕಪ್ ಮೂಲಕ ಹಿಂತಿರುಗಿರುವ ಪೃಥ್ವಿ ಶಾ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ.
Updated on: Jul 30, 2024 | 9:42 AM
ಇಂಗ್ಲೆಂಡ್ನಲ್ಲಿ ನಡೆಯುತ್ತಿರುವ ಒನ್ ಡೇ ಕಪ್ ಟೂರ್ನಿಯಲ್ಲಿ ಪೃಥ್ವಿ ಶಾ ಸ್ಪೋಟಕ ಅರ್ಧಶತಕ ಸಿಡಿಸಿ ಮಿಂಚಿದ್ದಾರೆ. ಈ ಪಂದ್ಯದಲ್ಲಿ ನಾರ್ಥಾಂಪ್ಟನ್ಶೈರ್ ಪರ ಕಣಕ್ಕಿಳಿದ ಯುವ ದಾಂಡಿಗ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು. ಮಿಡ್ಲ್ಸೆಕ್ಸ್ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ನಾರ್ಥಾಂಪ್ಟನ್ಶೈರ್ ತಂಡದ ನಾಯಕ ಲೆವಿಸ್ ಮೆಕ್ಮಾನಸ್ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಇನಿಂಗ್ಸ್ ಆರಂಭಿಸಿದ ಪೃಥ್ವಿ ಶಾ ನಾರ್ಥಾಂಪ್ಟನ್ಶೈರ್ ತಂಡಕ್ಕೆ ಸ್ಪೋಟಕ ಆರಂಭ ಒದಗಿಸುವಲ್ಲಿ ಯಶಸ್ವಿಯಾದರು.
ಮೊದಲ ಓವರ್ನಿಂದಲೇ ಆಕ್ರಮಣಕಾರಿ ಬ್ಯಾಟಿಂಗ್ಗೆ ಒತ್ತು ನೀಡಿದ್ದ ಪೃಥ್ವಿ ಫೋರ್ಗಳ ಸುರಿಮಳೆಗೈದರು. ಈ ಮೂಲಕ 58 ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 12 ಫೋರ್ಗಳೊಂದಿಗೆ 76 ರನ್ ಚಚ್ಚಿದರು. ಇನ್ನು ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿದ ಗಸ್ ಮಿಲ್ಲರ್ 68 ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 9 ಫೋರ್ಗಳೊಂದಿಗೆ 73 ರನ್ ಬಾರಿಸಿದರು.
ಮಿಲ್ಲರ್ ಹಾಗೂ ಪೃಥ್ವಿ ಶಾ ಅವರ ಈ ಸ್ಪೋಟಕ ಅರ್ಧಶತಕಗಳ ನೆರವಿನಿಂದ ನಾರ್ಥಾಂಪ್ಟನ್ಶೈರ್ ತಂಡವು 50 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 317 ರನ್ ಕಲೆಹಾಕಿತು.
ಗೆದ್ದು ಬೀಗಿದ ಮಿಡ್ಲ್ಸೆಕ್ಸ್:
318 ರನ್ಗಳ ಗುರಿಯನ್ನು ಬೆನ್ನತ್ತಿದ ಮಿಡ್ಲ್ಸೆಕ್ಸ್ ಪರ ಆರಂಭಿಕ ಜೋ ಕ್ರಾಕ್ನೆಲ್ 49 ರನ್ ಬಾರಿಸಿದರು. ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ನಾಥನ್ ಫೆರ್ನಾಂಡಿಸ್ 83 ರನ್ಗಳ ಕೊಡುಗೆ ನೀಡಿದರು.
ಆದರೆ ಪಂದ್ಯದ ಚಿತ್ರಣ ಬದಲಿಸಿದ್ದು ನಾಯಕ ಮಾರ್ಕ್ ಸ್ಟೋನ್ಮನ್. ಒಂದು ಹಂತದಲ್ಲಿ ನಾರ್ಥಾಂಪ್ಟನ್ಶೈರ್ ಪರ ವಾಲಿದ್ದ ಪಂದ್ಯವನ್ನು ಸ್ಟೋನ್ಮನ್ ಭರ್ಜರಿ ಬ್ಯಾಟಿಂಗ್ ಮೂಲಕ ಮಿಡ್ಲ್ಸೆಕ್ಸ್ನತ್ತ ವಾಲುವಂತೆ ಮಾಡಿದರು.
78 ಎಸೆತಗಳನ್ನು ಎದುರಿಸಿದ ಮಾರ್ಕ್ ಸ್ಟೋನ್ಮನ್ 1 ಸಿಕ್ಸ್ ಹಾಗೂ 10 ಫೋರ್ಗಳೊಂದಿಗೆ 83 ರನ್ ಚಚ್ಚಿದರು. ಈ ಮೂಲಕ ಮಿಡ್ಲ್ಸೆಕ್ಸ್ ತಂಡವು 48.1 ಓವರ್ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 319 ರನ್ ಕಲೆಹಾಕುವ ಮೂಲಕ ಭರ್ಜರಿ ಜಯ ಸಾಧಿಸಿತು.
ಮಿಡ್ಲ್ಸೆಕ್ಸ್ ಪ್ಲೇಯಿಂಗ್ 11: ನಾಥನ್ ಫೆರ್ನಾಂಡಿಸ್ , ಜೋ ಕ್ರಾಕ್ನೆಲ್ , ಸ್ಯಾಮ್ ರಾಬ್ಸನ್ , ಮಾರ್ಕ್ ಸ್ಟೋನ್ಮನ್ (ನಾಯಕ) , ಜ್ಯಾಕ್ ಡೇವಿಸ್ (ವಿಕೆಟ್ ಕೀಪರ್) , ಮಾರ್ಟಿನ್ ಆಂಡರ್ಸನ್ , ಲ್ಯೂಕ್ ಹೋಲ್ಮನ್ , ಜೋಶ್ ಡಿ ಕೈರ್ಸ್ , ಹೆನ್ರಿ ಬ್ರೂಕ್ಸ್ , ಇಶಾನ್ ಕೌಶಲ್ , ನೋವಾ ಕಾರ್ನ್ವೆಲ್.
ಇದನ್ನೂ ಓದಿ: Suryakumar Yadav: ಸೂರ್ಯಕುಮಾರ್ ಯಾದವ್ ಅಬ್ಬರಕ್ಕೆ ಮ್ಯಾಕ್ಸ್ವೆಲ್ ವಿಶ್ವ ದಾಖಲೆ ಉಡೀಸ್
ನಾರ್ಥಾಂಪ್ಟನ್ಶೈರ್ ಪ್ಲೇಯಿಂಗ್ 11: ಪೃಥ್ವಿ ಶಾ , ಎಮಿಲಿಯೊ ಗೇ , ರಿಕಾರ್ಡೊ ವಾಸ್ಕೊನ್ಸೆಲೋಸ್ , ಜಾರ್ಜ್ ಬಾರ್ಟ್ಲೆಟ್ , ಸೈಫ್ ಜೈಬ್ , ಲೆವಿಸ್ ಮೆಕ್ಮಾನಸ್ (ನಾಯಕ) , ಗಸ್ ಮಿಲ್ಲರ್ , ಜಸ್ಟಿನ್ ಬ್ರಾಡ್ , ಜೇಮ್ಸ್ ಸೇಲ್ಸ್ , ಮೈಕೆಲ್ ಫಿನಾನ್ , ರಾಫೆಲ್ ವೆಥರಾಲ್.
