Rishabh Pant: ರಿಷಭ್ ಪಂತ್​ನಿಂದ ಆಸ್ಟ್ರೇಲಿಯಾಗೆ 2 ಸಾವಿರ ಕೋಟಿ ಲಾಭ..!

ಟೀಮ್ ಇಂಡಿಯಾ (Team India) ವಿಕೆಟ್ ಕೀಪರ್ ಬ್ಯಾಟ್ಸ್​ಮನ್ ರಿಷಭ್ ಪಂತ್ (Rishabh Pant) ಕ್ರಿಕೆಟ್​ ಅಂಗಳದಲ್ಲಿ ಹೊಸ ಸೆನ್ಸೇಷನ್ ಸೃಷ್ಟಿಸಿದ್ದಾರೆ. ಅದು ಟೆಸ್ಟ್ ಪಂದ್ಯವಾಗಿರಲಿ, ಇಲ್ಲ ಏಕದಿನ ಮ್ಯಾಚ್ ಆಗಿರಲಿ…ರಿಷಭ್ ಪಂತ್ ಕ್ರೀಸ್​ನಲ್ಲಿದ್ದರೆ ಭಾರತ ಪಂದ್ಯ ಗೆದ್ದಂತೆ ಎನ್ನುವಷ್ಟರ ಮಟ್ಟಿಗೆ ವಿಶ್ವಾಸ ಮೂಡಿಸಿದ್ದಾರೆ. ಇತ್ತ ಟೀಮ್ ಇಂಡಿಯಾ ಪರ ಹೀಗೊಂದು ಪರ್ವ ಸೃಷ್ಟಿಸಿರುವ ಪಂತ್ ಅತ್ತ ಆಸ್ಟ್ರೇಲಿಯಾ ಕ್ರಿಕೆಟ್​ ಬೋರ್ಡ್​ ಲಾಭ ತಂದುಕೊಟ್ಟಿದ್ದಾರೆ ಎಂದರೆ ನಂಬುತ್ತೀರಾ? ನಂಬಲೇಬೇಕು. ಏಕೆಂದರೆ ರಿಷಭ್ ಪಂತ್ ಅವರ ಒಂದೇ ಒಂದು ಇನಿಂಗ್ಸ್​ನಿಂದಾಗಿ ಇದೀಗ ಕ್ರಿಕೆಟ್ ಆಸ್ಟ್ರೇಲಿಯಾ ಭರ್ಜರಿ ಲಾಭವನ್ನು ಪಡೆದುಕೊಂಡಿದೆ. ಅದು ಕೂಡ ಟಿವಿ ರೈಟ್ಸ್ ಮಾರಾಟದ ಮೂಲಕ.

ಇತ್ತೀಚೆಗೆ ಕ್ರಿಕೆಟ್ ಆಸ್ಟ್ರೇಲಿಯಾ ತನ್ನ ಟೂರ್ನಿಗಳ ಟಿವಿ ರೈಟ್ಸ್ ಮಾರಾಟಕ್ಕೆ ಬಿಡ್ಡಿಂಗ್ ಕರೆದಿತ್ತು. ಇದೀಗ 2 ಸಾವಿರ ಕೋಟಿ ನೀಡಿ 7 ವರ್ಷಗಳವರೆಗಿನ ಆಸ್ಟ್ರೇಲಿಯಾ ಪಂದ್ಯಗಳ ಮಾಧ್ಯಮ ಹಕ್ಕುಗಳನ್ನು ಡಿಸ್ನಿ ಸ್ಟಾರ್ ಪಡೆದುಕೊಂಡಿದೆ. ಇದಕ್ಕೆ ಮುಖ್ಯ ಕಾರಣ 2021 ರಲ್ಲಿ ರಿಷಭ್ ಪಂತ್ ಆಡಿದ ಒಂದು ಇನಿಂಗ್ಸ್ ಎಂದು ವಿಶ್ಲೇಷಿಸಲಾಗುತ್ತಿದೆ. ಕಳೆದ ವರ್ಷ ಗಬ್ಬಾ ಟೆಸ್ಟ್​​ನಲ್ಲಿ ಆಸ್ಟ್ರೇಲಿಯಾ ವಿರುದ್ದ ಪಂತ್ 89 ರನ್​ಗಳ ಐತಿಹಾಸಿಕ ಇನಿಂಗ್ಸ್​ ಆಡಿದ್ದರು. ಈ ಪಂದ್ಯದಲ್ಲಿ ಭಾರತ ತಂಡವು 3 ವಿಕೆಟ್​​ಗಳಿಂದ ಜಯ ಸಾಧಿಸಿತ್ತು. ಅಷ್ಟೇ ಅಲ್ಲದೆ 2-1 ಅಂತರದಿಂದ ಸರಣಿ ಜಯಿಸಿ ಹೊಸ ಇತಿಹಾಸ ಬರೆಯಿತು. ಈ ಸರಣಿ ಗೆಲುವಿನ ರುವಾರಿ ರಿಷಭ್ ಪಂತ್.

ಅಂದು ರಿಷಭ್ ಪಂತ್ ಅವರ ಭರ್ಜರಿ ಬ್ಯಾಟಿಂಗ್​ ಅನ್ನು ವಿಶ್ವದಾದ್ಯಂತ ಕ್ರಿಕೆಟ್ ಪ್ರೇಮಿಗಳು ಟಿವಿಯಲ್ಲಿ ವೀಕ್ಷಿಸಿದ್ದರು. ಹೀಗಾಗಿಯೇ ಆಸ್ಟ್ರೇಲಿಯಾ ಪಂದ್ಯಗಳ ವಾಲ್ಯೂ ಕೂಡ ಹೆಚ್ಚಾಗಿತ್ತು. ಇದೇ ಕಾರಣದಿಂದಾಗಿ ಈ ಬಾರಿ ಆಸ್ಟ್ರೇಲಿಯಾ ಪಂದ್ಯಗಳ ಟಿವಿ ರೈಟ್ಸ್​​ಗಾಗಿ ಭರ್ಜರಿ ಪೈಪೋಟಿ ಕಂಡು ಬಂದಿದೆ. ಅಷ್ಟೇ ಅಲ್ಲದೆ ಟೀಮ್ ಇಂಡಿಯಾ ಮುಂಬರುವ ದಿನಗಳಲ್ಲಿ ಆಸ್ಟ್ರೇಲಿಯಾ ವಿರುದ್ದ ಪ್ರಮುಖ ಸರಣಿಗಳನ್ನು ಆಡಲಿದೆ.

ಇದನ್ನೆಲ್ಲಾ ಮುಂದಿಟ್ಟು ಕ್ರಿಕೆಟ್ ಆಸ್ಟ್ರೇಲಿಯಾ ಮಾಧ್ಯಮ ಹಕ್ಕುಗಳ ಹರಾಜನ್ನು ನಡೆಸಿದ್ದು, ಅಂತಿಮವಾಗಿ ಡಿಸ್ನಿ ಸ್ಟಾರ್ ಸುಮಾರು 2 ಸಾವಿರ ಕೋಟಿ ರೂ.ಗೆ 7 ವರ್ಷಗಳವರೆಗಿನ ಆಸ್ಟ್ರೇಲಿಯಾದ ಪಂದ್ಯಗಳ ಟಿವಿ ರೈಟ್ಸ್ ಪಡೆದುಕೊಂಡಿದೆ. ಇತ್ತ ನಿರೀಕ್ಷೆಗೂ ಮೀರಿ ಕ್ರಿಕೆಟ್ ಆಸ್ಟ್ರೇಲಿಯಾ ಆದಾಯಗಳಿಸಲು ಮುಖ್ಯ ಕಾರಣ ರಿಷಭ್ ಪಂತ್ ಗಬ್ಬಾದಲ್ಲಿ ಆಡಿದ ಆ ಒಂದು ಇನಿಂಗ್ಸ್ ಎಂದು ವಿಶ್ಲೇಷಿಸಲಾಗುತ್ತಿದೆ.

ಇನ್ನು ಡಿಸ್ನಿ ಸ್ಟಾರ್ ಇತ್ತೀಚೆಗೆ 2023-27ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ ಟಿವಿ ಹಕ್ಕುಗಳನ್ನು ಪಡೆದುಕೊಂಡಿತ್ತು. ಇದೀಗ ಬಿಗ್ ಬ್ಯಾಷ್ ಲೀಗ್ ಅನ್ನು ಕೂಡ ಪ್ರಸಾರ ಮಾಡಲಿದ್ದಾರೆ. ಅಂದರೆ, ವಿಶ್ವದ ಎರಡು ಪ್ರಮುಖ T20 ಕ್ರಿಕೆಟ್ ಲೀಗ್‌ಗಳ ಪ್ರಸಾರ ಹಕ್ಕುಗಳು ಈಗ ಡಿಸ್ನಿ ಸ್ಟಾರ್ ಬಳಿ ಇರುವುದು ವಿಶೇಷ.