ಬರೋಬ್ಬರಿ 416 ರನ್​ಗಳು: ಹಿಟ್​ಮ್ಯಾನ್ ಸಿಡಿಲಬ್ಬರಕ್ಕೆ ಇದುವೇ ಸಾಕ್ಷಿ..!

ಈ ಬಾರಿಯ ವಿಶ್ವಕಪ್​ನಲ್ಲಿ ಟೀಮ್ ಇಂಡಿಯಾ ಬ್ಯಾಟರ್​ಗಳು ರನ್ ಪ್ರವಾಹವೇ ಹರಿಸಿದ್ದಾರೆ. ಇದಕ್ಕೆ ಸಾಕ್ಷಿಯೇ ರನ್​ ಸರದಾರರ ಪಟ್ಟಿಯಲ್ಲಿ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಶ್ರೇಯಸ್ ಅಯ್ಯರ್ ಹಾಗೂ ಕೆಎಲ್ ರಾಹುಲ್ ಕಾಣಿಸಿಕೊಂಡಿರುವುದು.

ಇಲ್ಲಿ ವಿರಾಟ್ ಕೊಹ್ಲಿ 711 ರನ್​ಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದರೆ, 550 ರನ್​ ಪೇರಿಸಿರುವ ರೋಹಿತ್ ಶರ್ಮಾ 5ನೇ ಸ್ಥಾನದಲ್ಲಿದ್ದಾರೆ. ಇನ್ನು ಶ್ರೇಯಸ್ ಅಯ್ಯರ್ 526 ರನ್​ಗಳೊಂದಿಗೆ 6ನೇ ಸ್ಥಾನದಲ್ಲಿದ್ದಾರೆ. ಹಾಗೆಯೇ 386 ರನ್ ಕಲೆಹಾಕಿರುವ ಕೆಎಲ್ ರಾಹುಲ್ 14ನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದ್ದಾರೆ.

ವಿಶೇಷ ಎಂದರೆ ಟೀಮ್ ಇಂಡಿಯಾದ ಈ ರನ್​ ಸರದಾರರ ಪಟ್ಟಿಯಲ್ಲಿ ಎಲ್ಲರದ್ದೂ ಒಂದು ಲೆಕ್ಕವಾದರೆ, ಹಿಟ್​ಮ್ಯಾನ್ ರೋಹಿತ್ ಶರ್ಮಾದ್ದು ಮತ್ತೊಂದು ಲೆಕ್ಕ. ಏಕೆಂದರೆ ಈ ಬಾರಿಯ ವಿಶ್ವಕಪ್​ನಲ್ಲಿ ಆರಂಭಿಕನಾಗಿ ಕಣಕ್ಕಿಳಿದಿರುವ ರೋಹಿತ್ ಶರ್ಮಾ 10 ಇನಿಂಗ್ಸ್​ಗಳಲ್ಲಿ 1 ಶತಕ ಹಾಗೂ 3 ಅರ್ಧಶತಕಗಳನ್ನು ಬಾರಿಸಿದ್ದಾರೆ.

ಇದೇ ವೇಳೆ ವಿರಾಟ್ ಕೊಹ್ಲಿ 3 ಶತಕ ಹಾಗೂ 5 ಅರ್ಧಶತಕಗಳನ್ನು ಸಿಡಿಸಿದ್ದಾರೆ. ಮತ್ತೊಂದೆಡೆ ಶ್ರೇಯಸ್ ಅಯ್ಯರ್ 2 ಶತಕ ಹಾಗೂ 3 ಅರ್ಧಶತಕಗಳನ್ನು ಬಾರಿಸಿದ್ದಾರೆ. ಆದರೆ ಇತರೆ ಬ್ಯಾಟರ್​ಗಳ ನಡುವೆ ರೋಹಿತ್ ಶರ್ಮಾ ಅವರು ವಿಭಿನ್ನವಾಗಿ ನಿಲ್ಲುವುದು ತಮ್ಮ ಸಿಡಿಲಬ್ಬರದ ಬ್ಯಾಟಿಂಗ್​ನಿಂದಾಗಿ ಎಂಬುದು ವಿಶೇಷ.

ಏಕೆಂದರೆ ಈ ಬಾರಿಯ ವಿಶ್ವಕಪ್​ನಲ್ಲಿ ಹಿಟ್​ಮ್ಯಾನ್ ಕಲೆಹಾಕಿರುವ 550 ರನ್​ಗಳಲ್ಲಿ 416 ರನ್​ಗಳು ಬೌಂಡರಿಗಳಿಂದಲೇ ಮೂಡಿಬಂದಿವೆ.

ರೋಹಿತ್ ಶರ್ಮಾ 10 ಇನಿಂಗ್ಸ್​ಗಳಲ್ಲಿ ಒಟ್ಟು 62 ಫೋರ್​ಗಳನ್ನು ಹಾಗೂ 28 ಸಿಕ್ಸ್​ಗಳನ್ನು ಸಿಡಿಸಿದ್ದಾರೆ. ಈ ಮೂಲಕವೇ 416 ರನ್​ ಪೇರಿಸಿ ಅಬ್ಬರಿಸಿದ್ದಾರೆ. ಅಂದರೆ ಗಳಿಸಿದ ಒಟ್ಟು ರನ್​ಗಳ ಶೇ.75 ಕ್ಕಿಂತ ಹೆಚ್ಚಿನ ರನ್​ಗಳು ಬೌಂಡರಿಗಳಿಂದಲೇ ಕಲೆಹಾಕಿರುವುದು ವಿಶೇಷ.

ಇದೇ ವೇಳೆ 711 ರನ್​ ಪೇರಿಸಿರುವ ವಿರಾಟ್ ಕೊಹ್ಲಿ 9 ಸಿಕ್ಸ್ ಹಾಗೂ 64 ಫೋರ್​ಗಳನ್ನು ಬಾರಿಸಿದ್ದಾರೆ. ಹಾಗೆಯೇ ಶ್ರೇಯಸ್ ಅಯ್ಯರ್ 24 ಸಿಕ್ಸ್ ಹಾಗೂ 36 ಫೋರ್​ಗಳನ್ನು ಸಿಡಿಸಿದ್ದಾರೆ.

ಇದನ್ನೂ ಓದಿ: Virat Kohli: ಸಚಿನ್ ಅವರ 3 ವಿಶ್ವ ದಾಖಲೆ ಮುರಿದ ಕಿಂಗ್ ಕೊಹ್ಲಿ

ಇತ್ತ ಟೀಮ್ ಇಂಡಿಯಾಗೆ ಸಿಡಿಲಬ್ಬರದ ಆರಂಭ ಒದಗಿಸುವ ಮೂಲಕ ರೋಹಿತ್ ಶರ್ಮಾ ಉಳಿದ ಬ್ಯಾಟರ್​ಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡಿರುವುದು ಸ್ಪಷ್ಟ. ಇದೇ ಕಾರಣದಿಂದಾಗಿ ಈ ಬಾರಿಯ ವಿಶ್ವಕಪ್​ನಲ್ಲಿ ಟೀಮ್ ಇಂಡಿಯಾ ಉತ್ತಮ ಆರಂಭ ಪಡೆದು ಬೃಹತ್ ಮೊತ್ತ ಪೇರಿಸಲು ಸಾಧ್ಯವಾಗುತ್ತಿದೆ ಎಂದರೆ ತಪ್ಪಾಗಲಾರದು.