ನ್ಯೂಝಿಲೆಂಡ್​ ವಿರುದ್ಧ ಐತಿಹಾಸಿಕ ಜಯ ಸಾಧಿಸಿದ ಯುಎಇ

ದುಬೈ ಇಂಟರ್​ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ನ್ಯೂಝಿಲೆಂಡ್ ವಿರುದ್ಧದ 2ನೇ ಟಿ20 ಪಂದ್ಯದಲ್ಲಿ ಯುಎಇ ತಂಡ ಅಮೋಘ ಗೆಲುವು ದಾಖಲಿಸಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಯುಎಇ ತಂಡ ಕಿವೀಸ್ ಪಡೆಯನ್ನು ಬ್ಯಾಟಿಂಗ್​ಗೆ ಆಹ್ವಾನಿಸಿತು. ಅದರಂತೆ ಮೊದಲು ಬ್ಯಾಟ್ ಮಾಡಿದ ನ್ಯೂಝಿಲೆಂಡ್ ತಂಡವು ನಿಧಾನಗತಿಯ ಆರಂಭ ಪಡೆಯಿತು. ಆರಂಭಿಕ ಆಟಗಾರರಾದ ಚಾಡ್ ವೋವ್ಸ್ 21 ರನ್​ಗಳಿಸಿದರೆ, ಟಿಮ್ ಸೀಫರ್ಟ್ 7 ರನ್​ಗಳಿಸಲಷ್ಟೇ ಶಕ್ತರಾಗಿದ್ದರು.

ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಮಿಚೆಲ್ ಸ್ಯಾಂಟ್ನರ್ ಕೇವಲ 1 ರನ್​ಗಳಿಸಿ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಕ್ಲೀವರ್ ಶೂನ್ಯಕ್ಕೆ ಔಟಾದರು. ಮೆಕಾಂಚಿಯ ಇನಿಂಗ್ಸ್​ ಕೇವಲ 9 ರನ್​ಗಳಿಗೆ ಸೀಮಿತವಾಯಿತು.

ಕೇವಲ 65 ರನ್​ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ನ್ಯೂಝಿಲೆಂಡ್ ತಂಡಕ್ಕೆ ಈ ಹಂತದಲ್ಲಿ ಮಾರ್ಕ್​ ಚಾಪ್ಮನ್ ಆಸರೆಯಾದರು. ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಚಾಪ್ಮನ್ 46 ಎಸೆತಗಳಲ್ಲಿ 3 ಸಿಕ್ಸ್ ಹಾಗೂ 3 ಫೋರ್​ಗಳೊಂದಿಗೆ 63 ರನ್ ಸಿಡಿಸಿದರು.

ಮಾರ್ಕ್ ಚಾಪ್ಮನ್ ಅವರ ಈ ಅರ್ಧಶತಕದ ನೆರವಿನೊಂದಿಗೆ ನ್ಯೂಝಿಲೆಂಡ್ ತಂಡವು ನಿಗದಿತ 20 ಓವರ್​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 142 ರನ್ ಕಲೆಹಾಕಿತು.

143 ರನ್​ಗಳ ಸುಲಭ ಗುರಿಯನ್ನು ಬೆನ್ನತ್ತಿದ ಯುಎಇ ತಂಡ ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ ಆರ್ಯನ್ಶ್ ಶರ್ಮಾ (0) ಮೊದಲ ಓವರ್​ನಲ್ಲೇ ಟಿಮ್ ಸೌಥಿ ಎಸೆತದಲ್ಲಿ ಔಟಾದರು. ಆದರೆ ಮತ್ತೊಂದೆಡೆ ನಾಯಕ ಮುಹಮ್ಮದ್ ವಸೀಂ ಭರ್ಜರಿ ಬ್ಯಾಟಿಂಗ್ ಮುಂದುವರೆಸಿದ್ದರು.

ಸ್ಪೋಟಕ ಇನಿಂಗ್ಸ್ ಆಡಿದ ವಸೀಂ 29 ಎಸೆತಗಳಲ್ಲಿ 4 ಫೋರ್​ ಹಾಗೂ 3 ಭರ್ಜರಿ ಸಿಕ್ಸ್​ಗಳೊಂದಿಗೆ 55 ರನ್​ ಚಚ್ಚಿದರು. ಆ ಬಳಿಕ ಬಂದ ಅರವಿಂದ್ 25 ರನ್​ಗಳ ಕೊಡುಗೆ ನೀಡಿದರು.

ಇನ್ನು 4ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಅಸಿಫ್ ಖಾನ್ 29 ಎಸೆತಗಳಲ್ಲಿ ಅಜೇಯ 48 ಹಾಗೂ ಬಾಸಿಲ್ ಹಮೀದ್ ಅಜೇಯ 12 ರನ್​ಗಳಿಸುವ ಮೂಲಕ 15.4 ಓವರ್​ಗಳಲ್ಲಿ ತಂಡವನ್ನು ಗುರಿ ಮುಟ್ಟಿಸಿದರು. ಈ ಮೂಲಕ ಯುಎಇ ತಂಡವು 8 ವಿಕೆಟ್​ಗಳ ಅಮೋಘ ಗೆಲುವು ತನ್ನದಾಗಿಸಿಕೊಂಡಿತು.

ಐತಿಹಾಸಿಕ ಜಯ:

ಇದು ಯುಎಇ ತಂಡದ ಪಾಲಿಗೆ ಐತಿಹಾಸಿಕ ಗೆಲುವು. ಏಕೆಂದರೆ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ನ್ಯೂಝಿಲೆಂಡ್ ವಿರುದ್ಧ ಇದೇ ಮೊದಲ ಬಾರಿಗೆ ಜಯ ಸಾಧಿಸಿದೆ. ಅದು ಕೂಡ 8 ವಿಕೆಟ್​ಗಳ ಅಮೋಘ ಗೆಲುವು. ಈ ಮೂಲಕ ಯುಎಇ ಕ್ರಿಕೆಟ್ ತಂಡವು ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಹೊಸ ಅಧ್ಯಾಯ ಪುಟವನ್ನು ತೆರೆದಿದೆ.

ಯುಎಇ ಪ್ಲೇಯಿಂಗ್ 11: ಮುಹಮ್ಮದ್ ವಸೀಂ (ನಾಯಕ) , ಆರ್ಯನ್ಶ್ ಶರ್ಮಾ (ವಿಕೆಟ್ ಕೀಪರ್) , ವೃತ್ಯ ಅರವಿಂದ್ , ಆಸಿಫ್ ಖಾನ್ , ಅನ್ಶ್ ಟಂಡನ್ , ಬಾಸಿಲ್ ಹಮೀದ್ , ಅಲಿ ನಾಸೀರ್ , ಅಯಾನ್ ಅಫ್ಜಲ್ ಖಾನ್ , ಮೊಹಮ್ಮದ್ ಫರಾಜುದ್ದೀನ್ , ಮುಹಮ್ಮದ್ ಜವಾದುಲ್ಲಾ , ಜಹೂರ್ ಖಾನ್.

ಇದನ್ನೂ ಓದಿ: IPL 2024: LSG ತಂಡದಿಂದ ಗೌತಮ್ ಗಂಭೀರ್​ಗೆ ಗೇಟ್ ಪಾಸ್..?

ನ್ಯೂಝಿಲೆಂಡ್ ಪ್ಲೇಯಿಂಗ್ 11: ಚಾಡ್ ಬೋವ್ಸ್ , ಟಿಮ್ ಸೀಫರ್ಟ್ , ಡೇನ್ ಕ್ಲೀವರ್ (ವಿಕೆಟ್ ಕೀಪರ್) , ಮಾರ್ಕ್ ಚಾಪ್ಮನ್ , ಮಿಚೆಲ್ ಸ್ಯಾಂಟ್ನರ್ , ಜೇಮ್ಸ್ ನೀಶಮ್ , ಕೋಲ್ ಮೆಕಾಂಚಿ , ರಚಿನ್ ರವೀಂದ್ರ , ಕೈಲ್ ಜೇಮಿಸನ್ , ಟಿಮ್ ಸೌಥಿ (ನಾಯಕ) , ಬೆನ್ ಲಿಸ್ಟರ್.