UP T20 League 2024: ರಿಂಕು ಸಿಂಗ್ ಅಲಭ್ಯತೆಯ ನಡುವೆ ಚಾಂಪಿಯನ್ ಕಿರೀಟ ತೊಟ್ಟ ಮೀರತ್ ಮೇವರಿಕ್ಸ್​

ಎರಡನೇ ಆವೃತ್ತಿಯ ಯುಪಿ ಟಿ20 ಲೀಗ್​ಗೆ ಅದ್ಧೂರಿ ತೆರೆ ಬಿದ್ದಿದೆ. ಸೆಪ್ಟೆಂಬರ್ 14 ರಂದು ನಡೆದ ರೋಚಕ ಫೈನಲ್ ಪಂದ್ಯದಲ್ಲಿ ಮಾಧವ್ ಕೌಶಿಕ್ ನಾಯಕತ್ವದ ಮೀರತ್ ಮೇವರಿಕ್ಸ್ ತಂಡ, ಕಾನ್ಪುರ ಸೂಪರ್‌ಸ್ಟಾರ್ ತಂಡವನ್ನು 5 ವಿಕೆಟ್​ಗಳಿಂದ ಮಣಿಸಿ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿತು. ಮೀರತ್ ಪರ ನಾಯಕನ ಇನ್ನಿಂಗ್ಸ್ ಆಡಿದ ಮಾಧವ್ ಕೌಶಿಕ್ ಅಜೇಯ 75 ರನ್‌ಗಳ ಇನ್ನಿಂಗ್ಸ್‌ ಆಡಿ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಕೊನೆಯ ಓವರ್​ವರೆಗೂ ರೋಚಕವಾಗಿ ಸಾಗಿದ ಪಂದ್ಯದಲ್ಲಿ ಕೌಶಿಕ್ 2 ಎಸೆತಗಳು ಬಾಕಿ ಇರುವಾಗಲೇ ಸಿಕ್ಸರ್ ಬಾರಿಸಿ ತಂಡಕ್ಕೆ ಜಯ ತಂದುಕೊಟ್ಟರು.

191 ರನ್​ಗಳ ಟಾರ್ಗೆಟ್

ಎಕಾನಾದಲ್ಲಿ ನಡೆದ ಈ ಫೈನಲ್ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಕಾನ್ಪುರ ಸೂಪರ್‌ಸ್ಟಾರ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 5 ವಿಕೆಟ್‌ ಕಳೆದುಕೊಂಡು 190 ರನ್ ಕಲೆಹಾಕಿತು. ತಂಡದ ಪರ ನಾಯಕ ಸಮೀರ್ ರಿಜ್ವಿ 36 ಎಸೆತಗಳಲ್ಲಿ 57 ರನ್‌ಗಳ ಅತ್ಯಧಿಕ ಇನ್ನಿಂಗ್ಸ್‌ ಆಡಿದರೆ, ರಿಜ್ವಿ ಹೊರತಾಗಿ ಶೌರ್ಯ ಸಿಂಗ್ 56 ರನ್ ಮತ್ತು ಶೋಯೆಬ್ ಸಿದ್ದಿಕಿ 35 ರನ್ ಗಳಿಸಿದರು. ಈ ಮೂವರ ಆಟದಿಂದ ಕಾನ್ಪುರ ತಂಡ 190 ರನ್​ಗಳ ಸ್ಪರ್ಧಾತ್ಮಕ ಮೊತ್ತವನ್ನು ಕಲೆಹಾಕಿತು. ಮೀರತ್ ಮೇವರಿಕ್ಸ್ ಪರ ಬೌಲಿಂಗ್‌ನಲ್ಲಿ ಮಿಂಚಿದ ಯಶ್ ಗಾರ್ಗ್ ಗರಿಷ್ಠ 3 ವಿಕೆಟ್ ಪಡೆದರು.

ಸ್ವಸ್ತಿಕ್- ಕೌಶಿಕ್ ಗೆಲುವಿನ ಜೊತೆಯಾಟ

ಇನ್ನು ಗೆಲುವಿಗೆ 191 ರನ್‌ಗಳ ಗುರಿ ಬೆನ್ನಟ್ಟಿದ ಮೀರತ್ ಪರ ಸ್ವಸ್ತಿಕ್ ಚಿಕಾರ 62 ರನ್​ಗಳ ಕಾಣಿಕೆ ನೀಡಿದರೆ, ನಾಯಕ ಕೌಶಿಕ್ ಅವರ ಅಜೇಯ ಅರ್ಧಶತಕದ ಆಧಾರದ ಮೇಲೆ 19.4 ಓವರ್‌ಗಳಲ್ಲಿ 5 ವಿಕೆಟ್‌ಗಳನ್ನು ಕಳೆದುಕೊಂಡು ಗೆಲುವು ಸಾಧಿಸಿತು. ಇದರೊಂದಿಗೆ ಮೊದಲ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರಿದ ಮೀರತ್ ತಂಡ, ಲೀಗ್​ನ ಮೊದಲ ಆವೃತ್ತಿಯಲ್ಲೂ ಫೈನಲ್ ತಲುಪಿತ್ತು. ಆದರೆ ಫೈನಲ್​ ಪಂದ್ಯದಲ್ಲಿ ಕಾಶಿ ರುದ್ರಾಸ್ ತಂಡದ ವಿರುದ್ಧ ಸೋತು ಚಾಂಪಿಯನ್ ಪಟ್ಟದಿಂದ ವಂಚಿತವಾಗಿತ್ತು.

ಕೊನೆಯ ಓವರ್‌ ರೋಚಕತೆ

ಕೊನೆಯ ಓವರ್‌ನಲ್ಲಿ ಮೀರತ್ ತಂಡಕ್ಕೆ 8 ರನ್‌ಗಳ ಅಗತ್ಯವಿತ್ತು. ನಾಯಕ ಮಾಧವ್ ಕೌಶಿಕ್ ಮತ್ತು ಹೃತಿಕ್ ಜೋಡಿ ಕ್ರೀಸ್‌ನಲ್ಲಿದ್ದರು. ಕಾನ್ಪುರ ಪರ ದಾಳಿಗಿಳಿದ ಬೌಲರ್ ಮೊಹ್ಸಿನ್ ಖಾನ್‌ ಅವರ ಮೊದಲ ಎಸೆತದಲ್ಲಿ ಹೃತಿಕ್ ಒಂದು ರನ್ ತೆಗೆದುಕೊಂಡರು. ಎರಡನೇ ಎಸೆತ ವೈಡ್ ಆಗಿದ್ದು, ಒಟ್ಟು 3 ರನ್ ಗಳಿಸಲಾಯಿತು. ಮುಂದಿನ ಎಸೆತದಲ್ಲಿ ಕೌಶಿಕ್ ಸಿಂಗಲ್ ತೆಗೆದುಕೊಂಡರೆ, ನಂತರದ ಎಸೆತದಲ್ಲೂ ಹೃತಿಕ್ ಸಿಂಗಲ್ ತೆಗೆದುಕೊಂಡು ನಾಯಕನಿಗೆ ಸ್ಟ್ರೈಕ್ ನೀಡಿದರು. ಈ ವೇಳೆ ಒತ್ತಡದಲ್ಲಿದ್ದ ಮೊಹ್ಸಿನ್ ಮತ್ತೆ ವೈಡ್ ಬೌಲ್ ಮಾಡಿದರು. ಆ ನಂತರ ಕೌಶಿಕ್ ಸಿಕ್ಸರ್ ಬಾರಿಸುವ ಮೂಲಕ ತಂಡವನ್ನು ಚಾಂಪಿಯನ್ ಮಾಡಿದರು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ