WTC ನೂತನ ಅಂಕ ಪಟ್ಟಿ ಪ್ರಕಟ
ಸೌತ್ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ನಡುವಣ ಮೂರು ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲ ಎರಡು ಪಂದ್ಯಗಳು ಮುಗಿಯುತ್ತಿದ್ದಂತೆ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ನೂತನ ಅಂಕಪಟ್ಟಿ ಪ್ರಕಟವಾಗಿದೆ. ಈ ಪಟ್ಟಿಯಲ್ಲಿ ಆಸ್ಟ್ರೇಲಿಯಾ ಮೊದಲ ಸ್ಥಾನದಲ್ಲಿದ್ದರೆ, ನ್ಯೂಝಿಲೆಂಡ್ ದ್ವಿತೀಯ ಸ್ಥಾನ ಕಾಯ್ದುಕೊಂಡಿದೆ. ಇನ್ನು ಮೂರನೇ ಸ್ಥಾನದಲ್ಲಿ ಸೌತ್ ಆಫ್ರಿಕಾ ಕಾಣಿಸಿಕೊಂಡಿದೆ.
Updated on: Oct 24, 2026 | 2:29 PM
ಕೆಬೆರ್ಹಾದಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೌತ್ ಆಫ್ರಿಕಾ ತಂಡ ಇನ್ನಿಂಗ್ಸ್ ಹಾಗೂ 31 ರನ್‌ಗಳ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಮೂರು ಪಂದ್ಯಗಳ ಟೆಸ್ಟ್ ಸರಣಿಯು 1-1 ರಿಂದ ಸಮಬಲಗೊಂಡಿದೆ. ಇದರ ಬೆನ್ನಲ್ಲೇ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ 2025-27ರ ಅಂಕಪಟ್ಟಿಯಲ್ಲೂ ಮಹತ್ವದ ಬದಲಾವಣೆಯಾಗಿದೆ.
ಈ ಬದಲಾವಣೆಯ ಹೊರತಾಗಿಯೂ ಆಸ್ಟ್ರೇಲಿಯಾ ತಂಡದ ನಂಬರ್ 1 ಸ್ಥಾನಕ್ಕೆ ಯಾವುದೇ ಧಕ್ಕೆಯಾಗಿಲ್ಲ ಎಂಬುದು ವಿಶೇಷ. ಅಂದರೆ ಸೌತ್ ಆಫ್ರಿಕಾ ವಿರುದ್ಧದ ಈ ಹೀನಾಯ ಸೋಲಿನ ಹೊರತಾಗಿಯೂ ಆಸ್ಟ್ರೇಲಿಯಾ ತಂಡ 75.00% PCT ನೊಂದಿಗೆ ಅಗ್ರಸ್ಥಾನದಲ್ಲೇ ಮುಂದುವರಿದಿದೆ. ಆದರೆ ಈ ಮುಂಚೆ ಇದ್ದ ಅವರ ಗೆಲುವಿನ ಸರಾಸರಿ ಭಾರಿ ಕುಸಿತ ಕಂಡಿದೆ.
ಸೌತ್ ಆಫ್ರಿಕಾಕ್ಕೆ ಬಿಗ್ ಬೂಸ್ಟ್:
ಪಂದ್ಯದ ಆರಂಭದ ಎರಡು ದಿನ ಮಳೆಗೆ ಆಹುತಿಯಾಗಿದ್ದರೂ, ನಾಯಕ ಟೆಂಬಾ ಬವುಮಾ ಅವರ ಆಕರ್ಷಕ 179 ರನ್ ಹಾಗೂ ಬೌಲರ್‌ಗಳ ಸಾಂಘಿಕ ಪ್ರದರ್ಶನದಿಂದ ಪ್ರೋಟೀಸ್ ಪಡೆ ಐತಿಹಾಸಿಕ ಜಯ ದಾಖಲಿಸಿತು. ಇದರಿಂದಾಗಿ ಸೌತ್ ಆಫ್ರಿಕಾ ತಂಡದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಶೇಕಡಾವಾರು ಅಂಕ 60% ರಿಂದ 66.67% ಗೆ ಜಿಗಿದಿದ್ದು, ಮೂರನೇ ಸ್ಥಾನದಲ್ಲೇ ಭದ್ರವಾಗಿದೆ.
ಭಾರತ ತಂಡದ ಮುಂದಿರುವ ಹಾದಿ:
ಭಾರತ ಸದ್ಯ 51.52% ಶೇಕಡಾವಾರು ಅಂಕಗಳೊಂದಿಗೆ 5ನೇ ಸ್ಥಾನದಲ್ಲಿದೆ. ಟಾಪ್ 2 ರೇಸ್‌ನಲ್ಲಿ ಮುಂದುವರಿಯಬೇಕಾದರೆ ಟೀಮ್ ಇಂಡಿಯಾ ಮುಂದಿನ ಸರಣಿಗಳಲ್ಲಿ ದೊಡ್ಡ ಜಯ ಸಾಧಿಸಬೇಕಿದೆ. ಅಂದರೆ ನ್ಯೂಝಿಲೆಂಡ್ ಮತ್ತು ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಭಾರತ ತಂಡ ಪ್ರಚಂಡ ಪ್ರದರ್ಶನ ನೀಡಿದರೆ ಮಾತ್ತ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ಫೈನಲ್ಗೇರಬಹುದು.
WTC 2025-27 ಅಂಕಪಟ್ಟಿ (ಅ.24):
| ಸ್ಥಾನ | ತಂಡ | ಪಂದ್ಯ | ಜಯ | ಸೋಲು | ಡ್ರಾ | ಅಂಕಗಳು | PCT (%) |
|---|---|---|---|---|---|---|---|
| 1 | ಆಸ್ಟ್ರೇಲಿಯಾ | 12 | 9 | 3 | 0 | 108 | 75.00% |
| 2 | ನ್ಯೂಝಿಲೆಂಡ್ | 6 | 4 | 2 | 0 | 52 | 72.22% |
| 3 | ಸೌತ್ ಆಫ್ರಿಕಾ | 6 | 4 | 2 | 0 | 48 | 66.67% |
| 4 | ಬಾಂಗ್ಲಾದೇಶ್ | 6 | 3 | 3 | 0 | 40 | 55.56% |
| 5 | ಭಾರತ | 11 | 5 | 4 | 2 | 68 | 51.52% |
| 6 | ಇಂಗ್ಲೆಂಡ್ | 16 | 7 | 8 | 1 | 74 | 38.54% |
| 7 | ಶ್ರೀಲಂಕಾ | 6 | 1 | 5 | 0 | 24 | 33.33% |
| 8 | ವೆಸ್ಟ್ ಇಂಡೀಸ್ | 12 | 2 | 9 | 1 | 30 | 20.83% |
| 9 | ಪಾಕಿಸ್ತಾನ್ | 9 | 2 | 5 | 2 | 5 | 4.63% |
ಇದನ್ನೂ ಓದಿ: ಟೀಮ್ ಇಂಡಿಯಾ ಆಟಗಾರರು ಶೂನ್ಯಕ್ಕೆ ಔಟ್: 113 ರನ್ಗಳಿಗೆ ಆಲೌಟ್!
ಮುಂದಿನ ಮಹತ್ವದ ಪಂದ್ಯಗಳು:
ಅಕ್ಟೋಬರ್ 27 ರಿಂದ 31 ರವರೆಗೆ ಕೇಪ್‌ಟೌನ್‌ನಲ್ಲಿ ಸೌತ್ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ನಡುವಣ ಸರಣಿಯ ಕೊನೆಯ ಹಾಗೂ ನಿರ್ಣಾಯಕ 3ನೇ ಟೆಸ್ಟ್ ಪಂದ್ಯ ನಡೆಯಲಿದೆ. ಒಂದು ವೇಳೆ ಸೌತ್ ಆಫ್ರಿಕಾ ಈ ಪಂದ್ಯವನ್ನೂ ಗೆದ್ದು ಸರಣಿ ಕೈವಶ ಮಾಡಿಕೊಂಡರೆ, ಅವರ PCT 71.42% ಗೆ ಏರಲಿದ್ದು, ಆಸ್ಟ್ರೇಲಿಯಾ ಟಾಪ್ 2 ಸ್ಥಾನದಿಂದ ಕೆಳಗಿಳಿಯುವ ಅಪಾಯ ಎದುರಿಸಲಿದೆ. ಹೀಗಾಗಿ ಮೂರನೇ ಪಂದ್ಯದಲ್ಲಿ ಉಭಯ ತಂಡಗಳಿಂದ ಭರ್ಜರಿ ಪೈಪೋಟಿ ನಿರೀಕ್ಷಿಸಬಹುದು.
