ವ್ಹೈಟ್​ವಾಶ್ ಆಗುವುದನ್ನು ತಪ್ಪಿಸಿಕೊಂಡ ಭಾರತ; ಪಾಂಡ್ಯ, ಜಡೇಜಾ ಮತ್ತು ಠಾಕುರ್ ಹೀರೊಗಳು

ಅಸ್ಟ್ರೇಲಿಯಾವನ್ನು ಇಂದು ಮಣಿಸಿಯೇ ತೀರುವ ಛಲದೊಂದಿಗೆ ಟೀಮ್ ಇಂಡಿಯಾ ಇಂದು ಮೈದಾನಕ್ಕಿಳಿದರೂ ಗೆಲುವು ಅಷ್ಟು ಸುಲಭವಾಗಿ ದಕ್ಕಲಿಲ್ಲ. ಅತಿಥೇಯರು ಕೊನೆ ಹಂತದವರೆಗೆ ಹೋರಾಡಿ ಕೇವಲ 13 ರನ್​ಗಳಿಂದ ಪಂದ್ಯ ಸೋತರು.

ಟಾಸ್ ಗೆದ್ದ ಟೀಮ್ ಇಂಡಿಯಾದ ನಾಯಕ ವಿರಾಟ್​ ಕೊಹ್ಲಿ ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧರಿಸಿದರು. ಭಾರತದ ತಂಡದಲ್ಲಿ 4 ಬದಲಾವಣೆಗಳನ್ನು ಮಾಡಲಾಗಿತ್ತು. ಮಾಯಾಂಕ್ ಅಗರ್ವಾಲ್, ಮೊಹಮ್ಮದ್ ಶಮಿ, ಯುಜ್ವೇಂದ್ರ ಚಹಲ್ ಮತ್ತು ನವದೀಪ್ ಸೈನಿ ಅವರನ್ನು ಡ್ರಾಪ್ ಮಾಡಿ ಶಾರ್ದಲ್ ಠಾಕುರ್, ಶುಭ್ಮನ್ ಗಿಲ್, ಕುಲ್ದೀಪ್ ಯಾದವ್ ಮತ್ತು ಟಿ ನಟರಾಜನ್ ಅವರನ್ನು ಆಡಿಸಲಾಯಿತು. ನಟರಾಜನ್​ಗೆ ಇದು ಮೊಟ್ಟಮೊದಲ ಅಂತರರಾಷ್ಟ್ರೀಯ ಪಂದ್ಯ.

ಗಿಲ್ ತಮ್ಮ ಮೇಲಿಟ್ಟಿದ ವಿಶ್ವಾಸವನ್ನು ಉಳಿಸಿಕೊಳ್ಳಲಿಲ್ಲ. ಅಸಲಿಗೆ ಭಾರತದ ಪರ ರನ್ ಗಳಿಸದವರೆಂದರೆ, ನಾಯಕ ವಿರಾಟ್ ಕೊಹ್ಲಿ, ಆಲ್​ರೌಂಡರ್​ಗಳಾದ ಹಾರ್ದಿಕ್ ಪಾಂಡ್ಯ ಮತ್ತು ರವೀಂದ್ರ ಜಡೇಜಾ. ಕೊಹ್ಲಿ ತಮ್ಮ ವೈಯಕ್ತಿಕ ಸ್ಕೋರ್ 23 ಆಗಿದ್ದಾಗ ಒಂದು ದಿನದ ಪಂದ್ಯಗಳಲ್ಲಿ 12,000 ರನ್​ಗಳನ್ನು ಪೂರೈಸಿದರು. ಕೊಹ್ಲಿ ಕೇವಲ 254 ಇನ್ನಿಂಗ್ಸ್​ಗಳಲ್ಲಿ ಈ ಸಾಧನೆ ಮಾಡಿದ್ದು ಹೊಸ ದಾಖಲೆಯಾಗಿದೆ.

ಅಸ್ಟ್ರೇಲಿಯ ವಿಕೆಟ್ ಪತನಗೊಂಡಿರುವುದನ್ನು ಸಂಭ್ರಮಿಸುತ್ತಿರುವ ಕೊಹ್ಲಿ ಮತ್ತು ಇತರರು

ಪಾಂಡ್ಯ ಮತ್ತು ಜಡೇಜಾ ತಾವು ವಿಶ್ವದರ್ಜೆಯ ಆಲ್​ರೌಂಡರ್​ಗಳೆಂದು ಇಂದು ಸಾಬೀತು ಮಾಡಿದರು. ಕೊಹ್ಲಿ ಔಟಾದಾಗ ಭಾರತ ಒತ್ತಡಲ್ಲಿತ್ತು, ಆಗ ಸ್ಕೋರ್ 153/5. ಆದರೆ ಇವರಿಬ್ಬರು ಮೈದಾನದ ಮಧ್ಯೆದಲ್ಲಿ ಅಭೂತಪೂರ್ವ ಪ್ರಭುದ್ಧತೆ ಪ್ರದರ್ಶಿಸಿ ಟೀಮಿನ ಮೊತ್ತ 300ರ ಗಡಿ ದಾಟುವಂತೆ ಮಾಡಿದರು. ಮೊದಲ ಪಂದ್ಯದಲ್ಲಿ 90 ರನ್ ಗಳಿಸಿದ್ದ ಪಾಂಡ್ಯ ಇಂದು ಸಹ ಶತಕ (ಅಜೇಯ 92 ) ಗಳಿಸುವುದನ್ನು ತಪ್ಪಿಸಿಕೊಂಡರು. ಆದರೆ ಅವರ ಕಾಂಟ್ರಿಬ್ಯೂಷನ್ ಶತಕಕ್ಕಿಂತ ಮಹತ್ವದ್ದಾಗಿತ್ತು. ಜಡೇಜಾ (ಅಜೇಯ 66) ಅವರೊಂದಿಗಿನ ಜೊತೆಯಾಟದಲ್ಲಿ ಪಾಂಡ್ಯ ಅತ್ಯಮೂಲ್ಯ ಮತ್ತು ಪಂದ್ಯದ ಗತಿಯನ್ನೇ ತಿರುಗಿಸಿದ 150ರನ್​ಗಳ ಜೊತೆಯಾಟದಲ್ಲಿ ಪಾಲ್ಗೊಂಡರು.

302 ರನ್​ಗಳ ಸವಾಲು ಅತಿಥೇಯರಿಗೆ, ಡೇವಿಡ್ ವಾರ್ನರ್ ಅವರ ಅನುಪಸ್ಥಿತಿಯಲ್ಲಿ ಖಂಡಿತವಾಗಿಯೂ ದೊಡ್ಡದಾಗಿತ್ತು. ಅವರ ಸ್ಥಾನದಲ್ಲಿ ಇನ್ನಿಂಗ್ಸ್ ಆರಂಭಿಸಿದ ಮಾರ್ನಸ್ ಲಬುಶೇನ್ ವಿಫಲರಾದರು. ಆದರೆ ಆಸ್ಟ್ರೇಲಿಯಾಗೆ ಆಘಾತ ಎದುರಾಗಿದ್ದು ಇನ್-ಫಾರ್ಮ್ ಆಟಗಾರ ಸ್ಟೀವ್ ಸ್ಮಿತ್ ಔಟಾದಾಗ. ಮೊಸೆಸ್ ಹೆನ್ರಿಕೆ ಮತ್ತು ಕೆಮೆರಾನ್ ಕ್ರೀಸ್ ಮೇಲೆ ಟಿಕಾಯಿಸುವ ಲಕ್ಷಣ ತೋರುತ್ತಿದ್ದಾಗಲೇ ಪೆವಿಲಿಯನ್​ಗೆ ಮರಳಿದರು. ಏತನ್ಮಧ್ಯೆ, ಉತ್ತಮವಾಗಿ ಆಡುತ್ತಿದ್ದ ನಾಯಕ ಆರನ್ ಫಿಂಚ್ 75 ರನ್ ಗಳಿಸಿ ಔಟಾದರು.

ಆದರೆ ಭಾರತಕ್ಕೆ ಆಪತ್ತು ಇದ್ದಿದ್ದು ಗ್ಲೆನ್ ಮಾಕ್ಸ್​ವೆಲ್ ಮತ್ತು ಅಲೆಕ್ಸ್ ಕೇರಿ ಅವರಿಂದ. ಯಾಕೆಂದರೆ, ಕೇವಲ ಮೂರು ತಿಂಗಳ ಹಿಂದೆ ಇವರಿಬ್ಬರು ಇಂಗ್ಲೆಂಡ್ ವಿರುದ್ಧ ತಮ್ಮ ತಂಡ 73 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡು ಶೋಚನೀಯ ಸ್ಥಿತಿಯಲ್ಲಿದ್ದರೂ ಇಬ್ಬರು ಶತಕಗಳನ್ನು ಬಾರಿಸಿದ್ದೂ ಅಲ್ಲದೆ 200ಕ್ಕೂ ಹೆಚ್ಚಿನ ರನ್​ಗಳ ಜೊತೆಯಾಟದಲ್ಲಿ ಪಾಲ್ಗೊಂಡು ಟೀಮನ್ನು ಗೆಲ್ಲಿಸಿದ್ದರು. ಇವತ್ತು ಸಹ ಅವರು ಭಾರತಕ್ಕೆ ಘಾತಕರಾಗುವ ಲಕ್ಷಣಗಳು ಕಾಣಿಸುತ್ತಿದ್ದವು. ಆದರೆ ಕೇರಿ ರನೌಟ್​ ಆಗುವುದರೊಂದಿಗೆ ಅಪಾಯ ದೂರವಾಯಿತಾದರೂ, ಮಾಕ್ಸ್​ವೆಲ್ ಅಕ್ರಮಣಕಾರಿ ಆಟ ಮುಂದುವರಿಸಿದ್ದರು. ಆದರೆ ಬುಮ್ರಾ ಅವರನ್ನು ಬೋಲ್ಡ್ ಮಾಡಿದಾಗ ಪಂದ್ಯ ಸಂಪೂರ್ಣವಾಗಿ ಭಾರತದೆಡೆ ವಾಲಿತು. ಶಾರ್ದುಲ್ ಠಾಕುರ್ 3 ವಿಕೆಟ್ ಪಡೆದು ಅತ್ಯಂತ ಯಶಸ್ವೀ ಬೌಲರ್ ಎನಿಸಿದರೆ, ಬುಮ್ರಾ ಮತ್ತು ನಟರಾಜನ್ ತಲಾ 2 ವಿಕೆಟ್ ಪಡೆದರು.

ಈ ಗೆಲುವು ಭಾರತಕ್ಕೆ ವ್ಹೈಟ್​ವಾಶ್ ಆಗುವ ಅಪಖ್ಯಾತಿಯಿಂದ ತಪ್ಪಿಸಿದೆ ಮತ್ತು ಮುಂದಿನ ಪಂದ್ಯಗಳಿಗೆ ಭಾರತದ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ.