AUS vs IND 3RD ODI | ಭಾರತಕ್ಕೆ ಗೆಲುವಿನ ಬುನಾದಿ ಹಾಕಿಕೊಟ್ಟ ಪಾಂಡ್ಯ-ಜಡೇಜ ಜೋಡಿ

ಕ್ಯಾನ್​ಬೆರಾ: ಭಾರತ-ಆಸ್ಟ್ರೇಲಿಯಾ ನಡುವಣ ನಿಗದಿತ 50 ಓವರ್​ ಕ್ರಿಕೆಟ್​ ಸರಣಿಯ ಅಂತಿಮ ಪಂದ್ಯದಲ್ಲಿ ಭಾರತ ಗೆಲುವಿನ ನಗೆ ಬೀರಿ, ಮುಂದಿನ ಟೆಸ್ಟ್​ ಸರಣಿಗಾಗಿ ಒಂದಿಷ್ಟು ಆತ್ಮವಿಶ್ವಾಸವನ್ನು ಬಗಲಿಗೇರಿಸಿಕೊಂಡಿತು.

ಮೊದಲು ಬ್ಯಾಟ್ ಮಾಡಿದ ಭಾರತ 5 ವಿಕೆಟ್​ನಷ್ಟಕ್ಕೆ 302 ರನ್​ ಗಳಿಸಿತು. ಇದನ್ನು ಬೆನ್ನಟ್ಟಿದ ಆಸ್ಟ್ರೇಲಿಯಾ 49.3 ಓವರ್​ಗಳಿಗೆ ಎಲ್ಲ ವಿಕೆಟ್ ಕಳೆದುಕೊಂಡು 289 ರನ್​ ಗಳಿಸಿತು.

ಈ ಪಂದ್ಯದಲ್ಲಿ 63 ರನ್​ ಗಳಿಸಿ, ಸಚಿನ್ ತೆಂಡುಲ್ಕರ್​ಗಿಂತಲೂ ಬೇಗ 12,000 ರನ್ ಗಳಿಸಿದ ಶ್ರೇಯಕ್ಕೆ​ ವಿರಾಟ್​ ಕೊಹ್ಲಿ ಪಾತ್ರರಾದರು. ಆದರೆ, ಫಸ್ಟ್​ ಡೌನ್ ಬಂದ ಅವರು 63 ರನ್ ಗಳಿಸಲು ಎದುರಿಸಿದ್ದು 78 ಬಾಲ್​. ಕೊಹ್ಲಿ ಮಾಡಿದ ದಾಖಲೆಗಾಗಿ ಅವರನ್ನು ಅಭಿನಂದಿಸಿದ ಅಭಿಮಾನಿಗಳು, ಸಂಕಷ್ಟ ಸಮಯದಲ್ಲಿ ತಂಡಕ್ಕೆ ಆಸರೆಯಾಗಲಿಲ್ಲ ಎಂದು ಬೇಸರವನ್ನೂ ವ್ಯಕ್ತಪಡಿಸಿದರು.

ಭಾರತದ ಗೆಲುವಿಗೆ ಭದ್ರಬುನಾದಿ ಹಾಕಿದವರು ಹಾರ್ದಿಕ್ ಪಾಂಡ್ಯ ಮತ್ತು ರವೀಂದ್ರ ಜಡೇಜ. ಹಾರ್ದಿಕ್ 76 ಬಾಲ್​ಗಳಲ್ಲಿ ಬಿರುಸಿನ 92 ರನ್ ಸಿಡಿಸಿದರೆ, ರವೀಂದ್ರ 50 ಬಾಲ್​ಗಳಲ್ಲಿ ರನ್ ಬಾರಿಸಿದರು.

ಭಾರತದ ಪರ ಇನ್ನಿಂಗ್ಸ್​ ಆರಂಭಿಸಿದ ಶಿಖರ್ ​ಧವನ್ ಮತ್ತು ಶುಭಮನ್ ಗಿಲ್​ ಜೋಡಿ ಹೆಚ್ಚುಹೊತ್ತು ನಿಲ್ಲಲಿಲ್ಲ. ಆಶ್ಟನ್ ಅಗರ್​ಗೆ ಎಲ್​ಬಿಡಬ್ಲ್ಯು ಆಗುವ ಮೊದಲು 39 ಬಾಲ್​ಗೆ 33 ರನ್ ಗಳಿಸಿದ ಶುಭಮನ್ ಗಿಲ್​ ಆಟ ಪ್ರೇಕ್ಷಕರಿಗೆ ತುಸು ಖುಷಿಕೊಟ್ಟಿತು. ಆದರೆ ಶಿಖರ್​ ಧವನ್​ರಿಂದ ನಿರೀಕ್ಷೆಯ ಆಟ ಬರಲಿಲ್ಲ. 27 ಬಾಲ್ ಎದುರಿಸಿದ ಧವನ್, 16 ರನ್ ಹೊಡೆದು ಆಶ್ಟನ್ ಅಗರ್​ಗೆ ಕ್ಯಾಚ್​ ಕೊಟ್ಟು ನಿರ್ಗಮಿಸಿದರು.

ಕೆ.ಎಲ್.ರಾಹುಲ್ (5) ಸಹ ಆಶ್ಟನ್​ ಅಗರ್​ ಅವರ ಎಲ್​ಬಿಡಬ್ಸ್ಯು ಬಲೆಗೆ ಬಿದ್ದರು. ಶ್ರೇಯಸ್​ ಅಯ್ಯರ್ (19 ರನ್) ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ನಿಲ್ಲಲಿಲ್ಲ.

ಈ ಮೊದಲ ಎರಡು ಪಂದ್ಯಗಳಲ್ಲಿ ಆಸ್ಟ್ರೇಲಿಯಾ ಪೇರಿಸಿದ್ದ ಬೃಹತ್ ಮೊತ್ತಕ್ಕೆ ಇಂದು ಭಾರತ ಗಳಸಿದ ಮೊತ್ತವನ್ನು ಹೋಲಿಸಿದರೆ ಕಡಿಮೆ ಎನಿಸುವುದು ಸಹಜ. ಆದರೆ ಮೊದಲ ಎರಡು ಪಂದ್ಯಗಳು ನಡೆದದ್ದು ಸಿಡ್ನಿ ಕ್ರೀಡಾಂಗಣದಲ್ಲಿ, ಇಂದಿನ ಪಂದ್ಯ ನಡೆದದ್ದು ಕ್ಯಾನ್​ಬೆರಾದಲ್ಲಿ. ಪಿಚ್​ ವರ್ತನೆಯು ಬೌಲರ್​ಗಳ ಕ್ಷಮತೆಯ ಪರಿಣಾಮ ಬೀರುತ್ತವೆ ಎನ್ನುವುದನ್ನು ನಾವು ಗಮನದಲ್ಲಿರಿಸಿಕೊಳ್ಳಬೇಕು.

ಈ ಪಂದ್ಯದ ಗೆಲುವಿನಿಂದ ಭಾರತ ಪಾಳಯದ ಆತ್ಮವಿಶ್ವಾಸ ವೃದ್ಧಿಸಿದ್ದಂತೂ ದಿಟ. ಇದು ಭಾರತ ತಂಡದ ಆಟಗಾರರ ದೇಹಭಾಷೆಯಲ್ಲಿಯೂ ಎದ್ದು ಕಾಣುತ್ತಿತ್ತು.

ಸಿಡ್ನಿಯಲ್ಲಿ ನ.27 ಮತ್ತು ನ.29ರಂದು ನಡೆದಿದ್ದ ಇದೇ ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಆಸ್ಟ್ರೇಲಿಯಾವೇ ಟಾಸ್​ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡು ಬೃಹತ್ ಮೊತ್ತ ಪೇರಿಸಿತ್ತು. ಭಾರತ ಸೋಲನುಭವಿಸಿತ್ತು. ಮೊದಲ ಪಂದ್ಯದಲ್ಲಿ ಆಸ್ಟ್ರೇಲಿಯಾ 375 ರನ್​ಗಳ ಗುರಿ ನೀಡಿತ್ತು. ಭಾರತಕ್ಕೆ 308 ರನ್​ ಗಳಿಸಲಷ್ಟೇ ಶಕ್ತವಾಯಿತು. ಸೋಲಿನ ಅಂತರ 66 ರನ್​.

2ನೇ ಪಂದ್ಯದಲ್ಲಿ 390 ರನ್​ಗಳ ಬೆಟ್ಟದಂಥ ಸವಾಲನ್ನೇ ಆಸ್ಟ್ರೇಲಿಯಾ ಮುಂದೊಡ್ಡಿತ್ತು. ಇದನ್ನು ಬೆನ್ನತ್ತಿದ್ದ ಭಾರತ ತಂಡಕ್ಕೆ ಗಳಿಸಲು ಸಾಧ್ಯವಾಗಿದ್ದು 338 ರನ್ ಮಾತ್ರ. ಸೋಲಿನ ಅಂತರ 51 ರನ್ ಆಗಿತ್ತು.