ಅಮೆರಿಕಾಗೂ ವಿಸ್ತರಣೆಯಾದ ಬಾದಶಾಹ ಶಾರುಖ್ ಖಾನ್ ಕ್ರಿಕೆಟ್ ಸಾಮ್ರಾಜ್ಯ

ಬಾಲಿವುಡ್ ಬಾದಶಾಹ ಶಾರುಖ್ ಖಾನ್ ತನ್ನ ಸಾಮ್ರಾಜ್ಯ ವಿಸ್ತರಿಸುವುದನ್ನು ಮುಂದುವರಿಸಿದ್ದಾರೆ. ಒಬ್ಬ ನಟನಾಗಿ ಅವರು ಈಗಾಗಲೆ ಬಾಲಿವುಡ್​ನಿಂದ ಹಾಲಿವುಡ್​ಗೆ ಲಗ್ಗೆಯಿಟ್ಟಿದ್ದಾರೆ; ಆದರೆ ಅಮೆರಿಕಾದಲ್ಲಿ ಈ ಬಾರಿ ಅವರು ಕಾಲಿಡುತ್ತಿರುವುದು ನಟನಾಗಿ ಅಲ್ಲ, ಬದಲಿಗೆ ಅಲ್ಲಿ ಕೊಲ್ಕತಾ ನೈಟ್ ರೈಡರ್ಸ್ ರೀತಿಯ ಮತ್ತೊಂದು ಫ್ರಾಂಚೈಸಿಯ ಮಾಲೀಕನಾಗಿ.

ಇಂಡಿಯನ್ ಪ್ರಿಮೀಯರ್ ಲೀಗ್ ಮಾದರಿಯಲ್ಲಿ ಇಷ್ಟರಲ್ಲೇ ಲಾಂಚ್ ಆಗಲಿರುವ ಮೇಜರ್ ಲೀಗ್ ಟಿ20 ಕ್ರಿಕೆಟ್ ಟೂರ್ನಮೆಂಟ್ ಅಮೆರಿಕದಲ್ಲಿ ನಡೆಯಲಿದ್ದು ಅದರಲ್ಲಿ ಭಾಗವಹಿಸುವ 6 ಫ್ರಾಂಚೈಸಿಗಳ ಪೈಕಿ ಒಂದನ್ನು ಖಾನ್ ಖರೀದಿಸಿದ್ದಾರೆ ಮತ್ತು ಅದಕ್ಕೆ ‘ಲಾಸ್ ಏಂಜೆಲಿಸ್ ನೈಟ್ ರೈಡರ್ಸ್’ ಎಂದು ಹೆಸರಿಟ್ಟಿದ್ದಾರೆ. ಮೇಜರ್  ಲೀಗ್​  ಕ್ರಿಕೆಟ್ ಮೊಟ್ಟಮೊದಲ ಆವೃತ್ತಿಯು 2022ರ ಐಪಿಎಲ್ ಮುಗಿದ ಕೂಡಲೇ ನಡೆಯಲಿದೆ. ಅಮೆರಿಕಾದಲ್ಲೂ ಆಗ ಬೇಸಿಗೆಯ ಸಮಯವಿರುತ್ತದೆ. ಈ ಟೂರ್ನಮೆಂಟ್​ನಲ್ಲಿ ಭಾಗವಹಿಸಲಿರುವ ಇತರ 5 ಫ್ರಾಂಚೈಸಿಗಳು ನೆಲೆಗೊಂಡಿರುವ ನಗರಗಳೆಂದರೆ ನ್ಯೂ ಯಾರ್ಕ್, ಸ್ಯಾನ್ ಫ್ರಾನ್ಸಿಸ್ಕೊ, ಡಲ್ಲಾಸ್, ವಾಷಿಂಗ್ಟನ್ ಡಿಸಿ ಮತ್ತು ಚಿಕ್ಯಾಗೊ.

ಮೂಲಗಳ ಪ್ರಕಾರ, ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್​ನ (ಐಸಿಸಿ) ಸದಸ್ಯತ್ವ ಹೊಂದಿರುವ ಕ್ರಿಕೆಟ್ ಯುಎಸ್​ಎನಿಂದ ಮೇಜರ್  ಲೀಗ್ ಕ್ರಿಕೆಟ್ ಆಯೋಜಿಸುವ ಹಕ್ಕುಗಳನ್ನು ಪಡೆದಿರುವ ‘ಅಮೆರಿಕನ್ ಎಂಟರ್​ಪ್ರೈಸಸ್’ ಹೆಸರಿನ ಕಂಪನಿಯಲ್ಲಿ ಖಾನ್ ಒಡೆತನದಲ್ಲಿರುವ ಸಂಸ್ಥೆಯೊಂದು ಸಹಭಾಗಿತ್ವ ಹೊಂದಿದೆ. ಈ ಸಂಸ್ಥೆಯೊಂದಿಗೆ ಬಾಲಿವುಡ್ ನಟ ಒಂದು ಕರಾರನ್ನು ಸಹ ಮಾಡಿಕೊಂಡಿದ್ದಾರೆ. ಆ ಕರಾರಿನ ಪ್ರಕಾರ ಮೇಜರ್ ಕ್ರಿಕೆಟ್ ಲೀಗ್ ಆರಂಭಗೊಂಡ ನಂತರ ಐದು ವರ್ಷಗಳ ಅವಧಿಯವರೆಗೆ ಭಾರತೀಯ ಮೂಲದ ಯಾವುದೇ ಕಂಪನಿ, ಉದ್ಯಮಿ ಅಥವಾ ವ್ಯಕ್ತಿಗೆ ಲೀಗ್​ನಲ್ಲಿ ಭಾಗವಹಿಸುವ ಟೀಮನ್ನು ಖರೀದಿಸುವ ಅವಕಾಶ ನೀಡಬಾರದು. ಸಲ್ಮಾನ್ ಖಾನ್ ಸಹ ಒಂದು ಫ್ರಾಂಚೈಸಿ ಖರೀದಿಸಬಹುದೆಂಬ ಭಯ ಅವರನ್ನು ಕಾಡಿರಬೇಕು.

ಶಾರುಖ್ ಖಾನ್

ಕ್ರಿಕೆಟ್​ನಲ್ಲಿ ಅಪಾರ ಹಣ ಹೂಡುತ್ತಿರುವ ಖಾನ್​ಗೆ ತನ್ನ ಒಡೆತನದ ಮೂರನೆ ಫ್ರಾಂಚೈಸಿ ಲಾಸ್ ಏಂಜೆಲಿಸ್ ನೈಟ್ ರೈಡರ್ಸ್ ಆಗಿದೆ. ಕೊಲ್ಕತಾ ನೈಟ್ ರೈಡರ್ಸ್ ಅಲ್ಲದೆ ಕೆರಿಬೀಯನ್ ಪ್ರಿಮೀಯರ್​ ಲೀಗ್​ನಲ್ಲಿ ಆಡುವ ಟ್ರಿನ್​ಬ್ಯಾಗೊ ನೈಟ್ ರೈಡರ್ಸ್ ಟೀಮನ್ನು ಸಹ ಅವರು ಖರೀದಿಸಿದ್ದು, ಐಪಿಎಲ್​ನಲ್ಲಿ ಮುಂಬೈ ಇಂಡಿಯನ್ಸ್​ಗೆ ಆಡುವ ಕೈರನ್ ಪೊಲ್ಲಾರ್ಡ್ ಅದರ ನಾಯಕನಾಗಿದ್ದಾರೆ.

ಕೆಕೆಅರ್ ಲೊಗೊ