ಮತ್ತೆರಡು ದಾಖಲೆಗಳ ಹೊಸ್ತಿಲಲ್ಲಿ ವಿರಾಟ್ ಕೊಹ್ಲಿ
ಒಂದು ದಿನದ ಪಂದ್ಯಗಳಲ್ಲಿ ಅನಭಿಷಿಕ್ತ ಸಾಮ್ರಾಟನಾಗಿರುವ ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ನಾಳಿನ ಪಂದ್ಯದಲ್ಲಿ 23 ರನ್ ಗಳಿಸಿದಲ್ಲಿ ಅತ್ಯಂತ ಕಡಿಮೆ ಇನ್ನಿಂಗ್ಸ್ಗಳಲ್ಲಿ 12,000 ರನ್ಗಳನ್ನು ಪೂರೈಸಿದ ದಾಖಲೆಯನ್ನು ತಮ್ಮ ಹೆಸರಿಗೆ ವರ್ಗಾಯಿಸಿಕೊಳ್ಳಲಿದ್ದಾರೆ. ಈ ದಾಖಲೆ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರ ಹೆಸರಲ್ಲಿದೆ.
Updated on: Dec 01, 2020 | 5:38 PM
ಭಾರತ ಒಂದು ದಿನದ ಪಂದ್ಯಗಳ ಸರಣಿಯನ್ನು ಸೋತಾಗಿದೆ, ನಾಳೆ ಕ್ಯಾನ್ಬೆರಾದಲ್ಲಿ ನಡೆಯಲಿರುವ ಮೂರನೆ ಹಾಗೂ ಕೊನೆಯ ಪಂದ್ಯ ಕೇವಲ ಔಪಚಾರಿಕತೆಗಾಗಿ ನಡೆಯಲಿದೆಯಾದರೂ ಭಾರತ ಸಮಾಧಾನಕರ ಗೆಲುವಿಗಾಗಿ ಶ್ರಮಿಸಲಿದೆ. ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಇಂಥ ಸಂದರ್ಭಗಳು ಜರುಗುತ್ತಿರುತ್ತವೆ, ಸರಣಿಯ ಫಲಿತಾಂಶ ಎಲ್ಲ ಪಂದ್ಯಗಳು ಮುಗಿಯುವ ಮೊದಲೇ ಸಿಕ್ಕರೂ ಉಳಿದ ಪಂದ್ಯಗಳನ್ನು ಆಡಲೇಬೇಕಾಗುತ್ತದೆ. ಅದು ನಿಯಮ, ಯಾರೂ ಬದಲಾಯಿಸುವಂತಿಲ್ಲ.
ಭಾರತಕ್ಕೆ ಕೊನೆಯ ನಾಳಿನ ಪಂದ್ಯ ನಿಸ್ಸಂದೇಹವಾಗಿ ಪ್ರತಿಷ್ಠೆಯದ್ದಾಗಿದೆ. ಕ್ಲೀನ್ ಸ್ವೀಪ್ನಿಂದ ಬಚಾವಾಗಬೇಕಾದರೆ ಅದನ್ನು ಗೆಲ್ಲಲೇಬೇಕು. ಭಾರತಕ್ಕಿರುವ ಮತ್ತೊಂದು ಲಾಭದಾಯಕ ಅಂಶವೆಂದರೆ ನಾಳೆ ನಡೆಯುವ ಅಂತಿಮ ಪಂದ್ಯ ಮತ್ತು ಟಿ20 ಪಂದ್ಯಗಳ ಸರಣಿಗೆ ಅತ್ಯುತ್ತಮ ಫಾರ್ಮ್ನಲ್ಲಿದ್ದ ಅತಿಥೇಯರ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ ಲಭ್ಯರಿಲ್ಲ. ಮೊದಲಿನ ಎರಡು ಪಂದ್ಯಗಳಲ್ಲಿ ಅವರು ಭರ್ಜರಿ ಅರ್ಧ ಶತಕಗಳನ್ನು ಬಾರಿಸಿದ್ದು ಓದುಗರಿಗೆ ಗೊತ್ತಿದೆ.
ಒಂದು ದಿನದ ಪಂದ್ಯಗಳಲ್ಲಿ ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ಹೊಂದಿರುವ ದಾಖಲೆ ದಂಗುಬಡಿಸುತ್ತದೆ. ನಾಳಿನ ಪಂದ್ಯದಲ್ಲಿ ಮತ್ತೊಂದು ದಾಖಲೆ ಅವರ ಮಡಿಲು ಸೇರಲು ಕಾಯುತ್ತಿದೆ. ಈ ಫಾರ್ಮಾಟ್ನಲ್ಲಿ 12,000 ರನ್ಗಳನ್ನು ಪೂರೈಸಲು ಅವರಿಗೆ ಕೇವಲ 23 ರನ್ಗಳ ಅವಶ್ಯಕತೆಯಿದೆ. ನಾಳೆ ಅವರು ಅಷ್ಟು ರನ್ಗಳನ್ನು ಗಳಿಸಿದರೆ, ಈ ಮೈಲಿಗಲ್ಲನ್ನು ಅತಿ ಕಡಿಮೆ ಇನ್ನಿಂಗ್ಸ್ಗಳಲ್ಲಿ ದಾಟಿದ ಆಟಗಾರನೆನಿಸಿಕೊಳ್ಳಲಿದ್ದಾರೆ. ಈ ದಾಖಲೆ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರ ಹೆಸರಲ್ಲಿದೆ. ಸಚಿನ್ ತಮ್ಮ 300 ನೇ ಇನ್ನಿಂಗ್ಸ್ನಲ್ಲಿ (309 ಪಂದ್ಯಗಳು) 12,000 ರನ್ಗಳನ್ನು ಪೂರೈಸಿದರು. ಕೊಹ್ಲಿ ನಾಳೆ 23 ರನ್ ಗಳಿಸಿದರೆ ಕೇವಲ ತಮ್ಮ 242 ಇನ್ನಿಂಗ್ಸ್ನಲ್ಲಿ (251ನೇ ಪಂದ್ಯ) ಈ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಳ್ಳಲಿದ್ದಾರೆ.
ಅಂದಹಾಗೆ, 12,000 ರನ್ ಕ್ಲಬ್ನಲ್ಲಿ ಸದ್ಯಕ್ಕೆ ಐವರು ಬ್ಯಾಟ್ಸ್ಮನ್ಗಳಿದ್ದಾರೆ. ಆಸ್ಟ್ರೇಲಿಯಾದ ಮಾಜಿ ಕ್ಯಾಪ್ಟನ್ ರಿಕ್ಕಿ ಪಾಂಟಿಂಗ್ ತಮ್ಮ 314ನೇ ಇನ್ನಿಂಗ್ಸ್ನಲ್ಲಿ (323ನೇ ಪಂದ್ಯ), ಶ್ರೀಲಂಕಾದ ಮಾಜಿ ಕ್ಯಾಪ್ಟನ್ ಕುಮಾರ ಸಂಗಕ್ಕಾರ ತಮ್ಮ 336ನೇ ಇನ್ನಿಂಗ್ಸ್ನಲ್ಲಿ (359ನೇ ಪಂದ್ಯ), ಶ್ರೀಲಂಕಾದರೇ ಆಗಿರುವ ಸನತ್ ಜಯಸೂರ್ಯ ತಮ್ಮ 379 ನೇ ಇನ್ನಿಂಗ್ಸ್ನಲ್ಲಿ (390ನೇ ಪಂದ್ಯ) ಹಾಗೂ ಮತ್ತೊಬ್ಬ ಶ್ರೀಲಂಕನ್ ಮಹೇಲ ಜಯವರ್ದೆನೆ ತಮ್ಮ 399 ನೇ ಇನ್ನಿಂಗ್ಸ್ನಲ್ಲಿ (426ನೇ ಪಂದ್ಯ) 12,000 ರನ್ಗಳನ್ನು ಪೂರೈಸಿದ್ದಾರೆ.
ಸಚಿನ್ ತೆಂಡೂಲ್ಕರ್
ತೆಂಡೂಲ್ಕರ್ ಅವರ ಮತ್ತೊಂದು ದಾಖಲೆಯನ್ನು ನಾಳೆ ಸರಿಗಟ್ಟುವ ಅವಕಾಶವನ್ನು ಕೊಹ್ಲಿ ಹೊಂದಿದ್ದಾರೆ. ಒಂದು ದಿನದ ಪಂದ್ಯಗಳಲ್ಲಿ ತೆಂಡೂಲ್ಕರ್ ಆಸ್ಟ್ರೇಲಿಯ ವಿರುದ್ಧ ಭಾರತದ ಪರ ಅತ್ಯಧಿಕ 9 ಶತಕಗಳನ್ನು ಬಾರಿಸಿದ್ದಾರೆ. ಈ ದೇಶದ ವಿರುದ್ಧ ಇದುವರೆಗೆ 8 ಶತಕಗಳನ್ನು ದಾಖಲಿಸಿರುವ ಕೊಹ್ಲಿ ನಾಳೆ ಶತಕ ಬಾರಿದ್ದೇಯಾದಲ್ಲಿ ಲಿಟ್ಲ್ ಮಾಸ್ಟರ್ ಅವರ ರೆಕಾರ್ಡ್ ಅನ್ನು ಸರಿಗಟ್ಟುತ್ತಾರೆ.
