India vs England: ಗೆದ್ದ ಟೀಂ ಇಂಡಿಯಾ; ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್​ಗೆ ಲಗ್ಗೆ

ಅಹಮದಾಬಾದ್: ನರೇಂದ್ರ ಮೋದಿ ಕ್ರಿಕೆಟ್​ ಮೈದಾನದಲ್ಲಿ ನಡೆಯುತ್ತಿರುವ 4 ಟೆಸ್ಟ್​ ಸರಣಿಗಳ ಅಂತಿಮ ಟೆಸ್ಟ್​ ಪಂದ್ಯದ 3ನೇ ದಿನದಾಟದಲ್ಲೇ ಟೀಂ ಇಂಡಿಯಾ ಗೆಲುವಿನ ನಗೆ ಬೀರಿದೆ. ಮೊದಲ ಇನ್ನಿಂಗ್ಸ್​ನಲ್ಲಿ ಟೀಂ ಇಂಡಿಯಾ ನೀಡಿದ 160 ರನ್​ಗಳ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್‌ ತಂಡ ಆರಂಭದಲ್ಲೇ ವಿಕೆಟ್​ಗಳನ್ನ ಕಳೆದುಕೊಳ್ಳಲು ಪ್ರಾರಂಭಿಸಿತು. ಕೇವಲ 65 ರನ್​ಗಳಿಗೆ ಇಂಗ್ಲೆಂಡ್‌ ತಂಡದ ಪ್ರಮುಖ 6 ವಿಕೆಟ್​ಗಳು ನೆಲಕ್ಕುರುಳಿತು. ಹೀಗಾಗಿ ಭಾರತಕ್ಕೆ ಇಂದೇ ಜಯದ ಮಾಲೆ ಬೀಳುವ ಎಲ್ಲಾ ಲಕ್ಷಣಗಳು ಕಂಡು ಬಂದಿತ್ತು. ಅದರಂತೆ ಭಾರತ ವಿಜಯ ಪತಾಕೆ ಹಾರಿಸಿದೆ.

ಮೊದಲ ಇನ್ನಿಂಗ್ಸ್​ನಲ್ಲಿ ಇಂಗ್ಲೆಂಡ್‌ ತಂಡ ನೀಡಿದ್ದ 205 ರನ್​ಗಳ ಅಲ್ಪಮೊತ್ತವನ್ನು ಬೆನ್ನತ್ತಿದ್ದ ಟೀಂ ಇಂಡಿಯಾ ಆರಂಭದಲ್ಲೇ ಆಘಾತಕ್ಕೊಳಗಾಯಿತು. ಆರಂಭಿಕರಾದ ಗಿಲ್​, ಪೂಜಾರ, ಕೊಹ್ಲಿ, ರಹಾನೆ, ಬೇಗನೆ ಪೆವಿಲಿಯನ್​ ಸೇರಿದರು. ಆದರೆ ರೋಹಿತ್​ ಜೊತೆಗೂಡಿದ ಪಂತ್​ ಶತಕ ಸಿಡಿಸಿ ಮಿಂಚಿದರು. ರೋಹಿತ್​ ಸಹ ಅಮೂಲ್ಯ 49 ರನ್​ಗಳ ಕೊಡುಗೆ ನೀಡಿದರು. ಪಂತ್​ ಜೊತೆ ಉತ್ತಮ ಆಟ ಆಡಿದ ಸುಂದರ್​ ಅಜೇಯ 96 ರನ್​ಗಳಿಸಿದರೆ, ಸುಂದರ್​ಗೆ ಉತ್ತಮ ಸಾಥ್​ ನೀಡಿದ ಅಕ್ಷರ್​ 44 ರನ್​ ಗಳಿಸಿದರು. ಅಂತಿಮವಾಗಿ ಭಾರತ 365 ರನ್​ಗಳಿಗೆ ತನ್ನ ಮೊದಲ ಇನ್ನಿಂಗ್ಸ್ ಮುಗಿಸಿತು.

ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ಗೆ ಟಿಕೆಟ್​ ಪಕ್ಕಾ 
ಇಂಗ್ಲೆಂಡ್‌ ವಿರುದ್ಧ ಅಂತಿಮ ಟೆಸ್ಟ್​ನಲ್ಲಿ ಗೆಲುವಿನ ಸನಿಹದಲ್ಲಿರುವ ಟೀಂ ಇಂಡಿಯಾಕ್ಕೆ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್ ಫೈನಲ್​ ಪ್ರವೇಶ ಸುಗಮವಾಗಿದೆ. ಒಂದು ವೇಳೆ ಟೀಂ ಇಂಡಿಯಾ ಈ ಪಂದ್ಯದಲ್ಲಿ ಗೆಲ್ಲಲು ಸಾಧ್ಯವಾಗದೆ ಇದ್ದರೂ ಕನಿಷ್ಠ ಪಕ್ಷ ಪಂದ್ಯವನ್ನು ಡ್ರಾ ಮಾಡಿಕೊಂಡರೂ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್​ಗೆ ಪ್ರವೇಶ ಸಿಗುವ ಅವಕಾಶವಿತ್ತು. ಹೀಗಾಗಿ ಲಾರ್ಡ್ಸ್​ನಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ ಟೀಂ ಇಂಡಿಯಾ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಪಟ್ಟಕ್ಕಾಗಿ ಸೆಣಸಾಡಲಿದೆ.

ಗಾವಸ್ಕರ್​ಗೆ ಉಡುಗೂರೆ..!
ತಮ್ಮ ಟೆಸ್ಟ್​ ವೃತ್ತಿ ಜೀವನಕ್ಕೆ ಕಾಲಿರಿಸಿ 50 ವರ್ಷ ತುಂಬಿದ ಸಂತಸದಲ್ಲಿರುವ ಟೀಂ ಇಂಡಿಯಾದ ಮಾಜಿ ಆಟಗಾರ ಸುನೀಲ್​ ಗವಾಸ್ಕರ್​ಗೆ ಈ ಟೆಸ್ಟ್​ ಗೆಲುವು ಉಡುಗೂರೆ ಅಂತಲೇ ಬಿಂಬಿತವಾಗುತ್ತಿದೆ. ಈ ಹಿಂದೆ ಪಿಚ್​ ಬಗ್ಗೆ ಸಾಕಷ್ಟು ಮಾಜಿ ಇಂಗ್ಲೆಂಡ್​ ಆಟಗಾರರು ಟೀಕೆ ಮಾಡಿದ್ದಾಗ, ಗವಾಸ್ಕರ್​ ಟೀಂ ಇಂಡಿಯಾದ ಬೆನ್ನಿಗೆ ನಿಂತಿದ್ದರು. ಅಲ್ಲದೆ ಟೀಕಾಕಾರರಿಗೆ ಸರಿಯಾಗಿಯೇ ಬಿಸಿ ಮುಟ್ಟಿಸಿದರು. ಹೀಗಾಗಿ ಈ ಟೆಸ್ಟ್​ ಗೆಲುವು ಟೀಂ ಇಂಡಿಯಾ ಪಾಳಯಕ್ಕೆ ಎರೆಡೆರಡು ಖುಷಿ ನೀಡುತ್ತಿದೆ. ಮೊದಲನೆಯದು ಗವಾಸ್ಕರ್​ ಅವರ ಸಾಧನೆಗೆ ಗೆಲುವಿನ ಉಡುಗೂರೆಯಾದರೆ, ಎರಡನೇಯದು ಪ್ರಧಾನಿ ಮೋದಿ ಕ್ರಿಕೆಟ್​ ಕ್ರೀಡಾಂಗಣದಲ್ಲಿ ಸತತ ಎರಡನೇ ಜಯ ಸಾಧಿಸಿದ್ದಾಗಿದೆ.

ಭಾರತೀಯರಲ್ಲಿ ಮನೆಮಾಡಿದ ಖುಷಿ.. ಸೆಲೆಬ್ರೇಷನ್ಸ್​ ಸ್ಟಾರ್ಟೆಡ್​! 
ಇಂಡಿಯಾ- ಇಂಗ್ಲೆಂಡ್​ ನಡುವಿನ ಪಂದ್ಯವೆಂದರೆ ಟೀಂ ಇಂಡಿಯಾ ಅಭಿಮಾನಿಗಳಿಗೆ ಅದು ಕಣ್ಣಿಗೆ ಹಬ್ಬವಿದ್ದಂತೆ. ಏಕೆಂದರೆ ಈ ಎರಡೂ ತಂಡಗಳ ನಡುವಿನ ಕದನಕ್ಕೆ, ಇಂಡಿಯಾ-ಪಾಕಿಸ್ತಾನ ನಡುವಿನ ಹೈವೋಲ್ಟೆಜ್​ ಪಂದ್ಯದಷ್ಟೇ ಹೈಪ್​ ಇರುತ್ತದೆ. ಹೀಗಾಗಿ ಟೀಂ ಇಂಡಿಯಾದ ಈ ಗೆಲುವು ಕ್ರಿಕೆಟ್​ ಅಭಿಮಾನಿಗಳಿಗೆ ಎಲ್ಲಿಲ್ಲದ ಖುಷಿ ನೀಡುವುದಂತೂ ಗ್ಯಾರೆಂಟಿ.. ಅದಕ್ಕೇ ಅದಾಗಲೇ.. Celebrations have Started!

ಇದನ್ನೂ ಓದಿ:India vs England 4th Test Day 3: ಲಂಚ್ ವಿರಾಮದ ನಂತರ ಅಶ್ವಿನ್ ಡಬಲ್ ಸ್ಟ್ರೈಕ್ !