ಸತತ ಆರನೇ ಸೋಲನ್ನು ತಪ್ಪಿಸಲು ಭಾರತ ಶಕ್ತಿಮೀರಿ ಪ್ರಯತ್ನಿಸಬೇಕಿದೆ

ಬುಧವಾರದಂದು ಕ್ಯಾನ್​ಬೆರಾದಲ್ಲಿ ನಡೆಯಲಿರುವ ಮೂರನೆ ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯವನ್ನು ಟೀಮ್ ಇಂಡಿಯಾದ ನಾಯಕ ವಿರಾಟ್​ ಕೊಹ್ಲಿ ಗೆಲ್ಲದೆ ಹೋದರೆ, ಕೆಲವು ಅಪಖ್ಯಾತಿಗಳಿಗೆ ಗುರಿಯಾಗಲಿದ್ದಾರೆ. ಈ ಆವೃತ್ತಿಯ ಕ್ರಿಕೆಟ್​ನಲ್ಲಿ ವಿಶ್ವದ ಅಗ್ರಮಾನ್ಯ ತಂಡವಾಗಿರುವ ಭಾರತ ನಾಳಿನ ಪಂದ್ಯವನ್ನು ಗೆಲ್ಲದಿದ್ದರೆ ಕೊಹ್ಲಿಯವರ ನಾಯಕತ್ವದಲ್ಲಿ ಈ ವರ್ಷ ಎರಡನೆ ಬಾರಿಗೆ ಟೀಮ್ ಇಂಡಿಯಾ ವ್ಹೈಟ್​ವಾಶ್ ಆದಂತಾಗುತ್ತದೆ. ಈ ವರ್ಷಾರಂಭದಲ್ಲಿ ನ್ಯೂಜಿಲೆಂಡ್ ತನ್ನ ಹಿತ್ತಲಲ್ಲಿ ನಡೆದ ಸರಣಿಯನ್ನು 3-0 ಅಂತರದಿಂದ ಭಾರತವನ್ನು ಸೋಲಿಸಿತ್ತು. ಆಗಲೂ ಕೊಹ್ಲಿಯೇ ಟೀಮಿನ ನಾಯಕರಾಗಿದ್ದರು.

ಆ ಮೂರು ಪಂದ್ಯಗಳು ಹಾಗೂ ಸಿಡ್ನಿಯಲ್ಲಿ ಆಡಲಾದ ಪ್ರಸಕ್ತ ಸರಣಿಯ ಎರಡು ಪಂದ್ಯಗಳು, ಅಂದರೆ ಕೊಹ್ಲಿ ಸತತವಾಗಿ 5 ಪಂದ್ಯಗಳನ್ನು ಸೋತಂತಾಗಿದೆ. ಒಂದು ಪಕ್ಷ ನಾಳಿನ ಪಂದ್ಯವನ್ನೂ ಭಾರತ ಸೋತರೆ ತಮ್ಮ ನಾಯಕತ್ವದಲ್ಲಿ ಸತತ ಎರಡು ವ್ಹೈಟ್​ವಾಶ್​ಗಳನ್ನು ಅನುಭವಿಸುವ ಪರಿಸ್ಥಿತಿ ಎದುರಿಸಬೇಕಾಗುತ್ತದೆ. ಅಲ್ಲದೆ ಕೊಹ್ಲಿ ಸತತವಾಗಿ 6 ಪಂದ್ಯಗಳನ್ನು ಸೋತು ಸುನಿಲ್ ಗವಾಸ್ಕರ್ ಅವರ ಅಹಿತಕರವಲ್ಲದ ದಾಖಲೆಯನ್ನು ಸರಿಗಟ್ಟಿದಂತಾಗುತ್ತದೆ.

ಸತತವಾಗಿ 5 ಪಂದ್ಯಗಳನ್ನು ಭಾರತ ಸೋತಿರುವುದು ನಿಜಕ್ಕೂ ಬೇಗ ಮರೆತುಹೋಗಬೇಕೆನ್ನುವ ದಾಖಲೆ. ಈ ಅಪಖ್ಯಾತಿಗೆ ಒಳಗಾಗಿರುವ ಭಾರತದ ಇತರ ಕ್ಯಾಪ್ಟನ್​ಗಳೆಂದರೆ, ದಿಲಿಪ್ ವೆಂಗ್​ಸರ್ಕಾರ್, ರವಿ ಶಾಸ್ತ್ರಿ, ಮತ್ತು ಮಹೇಂದ್ರಸಿಂಗ್ ಧೋನಿ. ಒಂದು ದಿನದ ಪಂದ್ಯಗಳಲ್ಲಿ ಭಾರತದ ಇದುವರೆಗಿನ ಅತಿಕೆಟ್ಟ ಪ್ರದರ್ಶನ 1981ರಲ್ಲಿ ಬಂದಿತ್ತು. ಈ ಆವೃತ್ತಿಯ ಕ್ರಿಕೆಟ್​ನಲ್ಲಿ ಆಗ ಸಾಧಾರಣ ತಂಡವೆನಿಸಿಕೊಂಡಿದ್ದ ಭಾರತ ಸತತವಾಗಿ 8 ಪಂದ್ಯಗಳನ್ನು ಸೋತಿತ್ತು.

ಆದರೆ, ಕಳೆದೊಂದು ದಶಕದಲ್ಲಿ ಟೀಮ್ ಇಂಡಿಯಾದ ದಾಖಲೆ, ಕೀರ್ತಿ ಬಹಳ ಭಿನ್ನವಾಗಿದೆ. 2011 ರಲ್ಲಿ ವಿಶ್ವಕಪ್​ ಗೆದ್ದಿರುವುದು, ಎರಡು ವರ್ಷಗಳ ನಂತರ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದಿದ್ದು ಮತ್ತು ವಿಶ್ವದೆಲ್ಲೆಡೆ ಒಂದು ದಿನದ ಪಂದ್ಯಗಳ ಸರಣಿಗಳನ್ನು ಗೆದ್ದಿರುವುದು ಭಾರತ ಈ ಆವೃತ್ತಿಯಲ್ಲಿ ಅಗ್ರಮಾನ್ಯ ತಂಡಗಳಲ್ಲೊಂದು ಎನ್ನುವುದು ಸಾಬೀತಾಗಿದೆ.

ಆದರೆ, ಈ ವರ್ಷ ಭಾರತದ ಪ್ರದರ್ಶನಗಳು, ಆಸ್ಟ್ರೇಲಿಯ ವಿರುದ್ಧ ವರ್ಷದ ಆರಂಭದಲ್ಲಿ 2-1ರಿಂದ ಸರಣಿ ಗೆದ್ದಿದ್ದು ಬಿಟ್ಟರೆ ಕಳಪೆಯಾಗಿವೆ. ಸತತ 5 ಸೋಲುಗಳು ಭಾರತದ ಪ್ರತಿಷ್ಠೆಗೆ ಘಾಸಿಯನ್ನುಂಟು ಮಾಡಿವೆ. ಕೊಹ್ಲಿಗೆ ಮತ್ತು ಅವರ ಟೀಮಿನ ಸದಸ್ಯರಿಗೆ ಇದರ ಅರಿವಿದೆ. ಕೊವಿಡ್-19 ಸಾಂಕ್ರಾಮಿಕ ರೋಗ ಸೃಷ್ಟಿಸಿದ ಭಯಾನಕ ಸನ್ನಿವೇಶದಿಂದಾಗಿ ಒಂದು ವರ್ಷದ ಮಟ್ಟಿಗೆ ಭಾರತೀಯರು ಅಂತರರಾಷ್ಟ್ರೀಯ ಕ್ರಿಕೆಟ್​ನಿಂದ ದೂರವಿದ್ದರೆನ್ನುವುದು ನಿಜವಾದರೂ ಅದನ್ನೇ ಕಳಪೆ ಪ್ರರ್ದರ್ಶನಗಳಿಗೆ ಕಾರಣ ಅಂತ ಹೇಳಲಾಗದು. ಯಾಕೆಂದರೆ, ಸೆಪ್ಟೆಂಬರ್​ನಿಂದ ನವೆಂಬರ್​ವರೆಗೆ ಭಾರತದ ಆಟಗಾರರೆಲ್ಲ ಇಂಡಿಯನ್ ಪ್ರಿಮೀಯರ್ ಲೀಗ್​ನಲ್ಲಿ ಭಾಗಿಯಾಗಿದ್ದರು. ಅಲ್ಲದೆ, ಕ್ರೀಡಾ ಚಟುವಟಿಕೆಗಳು ಕೇವಲ ಭಾರತದಲ್ಲಿ ಮಾತ್ರ ನಿಷೇಧಗೊಂಡಿರಲಿಲ್ಲ, ವಿಶ್ವದೆಲ್ಲೆಡೆ ಅದೇ ಸ್ಥಿತಿಯಿತ್ತು.

ವಿರಾಟ್ ಕೊಹ್ಲಿ