ಪ್ಯಾರಿಸ್ ಒಲಿಂಪಿಕ್ಸ್​ಗೆ ನೇರ ಅರ್ಹತೆ ಪಡೆದ ನೀರಜ್ ಚೋಪ್ರಾ

ಹಂಗೇರಿಯ ಬುಡಾಪೆಸ್ಟ್​ನಲ್ಲಿ ನಡೆದ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್​ನ ಜಾವೆಲಿನ್ ಥ್ರೋನಲ್ಲಿ ನೀರಜ್ ಚೋಪ್ರಾ (Neeraj Chopra) ಫೈನಲ್​ಗೆ​ ಪ್ರವೇಶಿಸಿದ್ದಾರೆ. ಫೈನಲ್​ನ ಅರ್ಹತಾ ಸುತ್ತಿನಲ್ಲಿ 88.77 ಮೀಟರ್ ದೂರ ಭರ್ಜಿ ಎಸೆಯುವ ಮೂಲಕ ನೀರಜ್ ಚೋಪ್ರಾ ಅಂತಿಮ ಸುತ್ತಿಗೆ ಪ್ರವೇಶಿಸಿದರು. ಇದರೊಂದಿಗೆ 2024 ರಲ್ಲಿ ನಡೆಯಲಿರುವ ಪ್ಯಾರಿಸ್ ಒಲಿಂಪಿಕ್ಸ್​ಗೂ ನೇರ ಅರ್ಹತೆ ಪಡೆದುಕೊಂಡರು.

ಟಾರ್ಗೆಟ್​ 83 ಮೀಟರ್:

ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್​ನಲ್ಲಿ ಫೈನಲ್​ಗೆ ಪ್ರವೇಶಿಸಲು ಕನಿಷ್ಠ 83 ಮೀಟರ್​ ದೂರದವರೆಗೆ ಜಾವೆಲಿನ್ ಎಸೆಯಬೇಕಿತ್ತು. ಇತ್ತ ಮೊದಲ ಎಸೆತದಲ್ಲೇ 88.77 ಮೀಟರ್ ಎಸೆದು ನೀರಜ್ ಚೋಪ್ರಾ ಫೈನಲ್​ಗೆ ಅರ್ಹತೆ ಪಡೆದುಕೊಂಡರು. ಅಲ್ಲದೆ ಇದಾದ ಬಳಿಕ ಉಳಿದ ಯಾವುದೇ ಎಸೆತಗಾರರು ಚೋಪ್ರಾ ಅವರ ದೂರವನ್ನು ಕ್ರಮಿಸಿರಲಿಲ್ಲ. ಹೀಗಾಗಿ ಏಕೈಕ ಎಸೆತದೊಂದಿಗೆ ನೀರಜ್ ಅಗ್ರಸ್ಥಾನ ಅಲಂಕರಿಸಿದರು.

ಒಲಿಂಪಿಕ್ಸ್​ಗೆ ನೇರ ಎಂಟ್ರಿ:

ಪ್ಯಾರಿಸ್​ನಲ್ಲಿ ನಡೆಯಲಿರುವ 2024ರ ಒಲಿಂಪಿಕ್ಸ್​ಗಾಗಿ ಜುಲೈ 1 ರಿಂದ ಅರ್ಹತಾ ವಿಂಡೋ ತೆರೆದಿದೆ. ಇಲ್ಲಿ  85.50 ಮೀಟರ್ ಮಾರ್ಕ್​​ ಅನ್ನು ಅರ್ಹತಾ ಮಾನದಂಡವಾಗಿ ನಿಗದಿ ಮಾಡಲಾಗಿದ್ದು, ಇದೀಗ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್​ನಲ್ಲಿ 88.77 ಮೀಟರ್ ದೂರದವರೆಗೆ ಜಾವೆಲಿನ್ ಎಸೆಯುವ ಮೂಲಕ ನೀರಜ್ ಚೋಪ್ರಾ ಒಲಿಂಪಿಕ್ಸ್​ಗೆ ನೇರ ಅರ್ಹತೆ ಪಡೆದುಕೊಂಡಿದ್ದಾರೆ.

ಚಿನ್ನದ ಚೋಪ್ರಾ:

2020 ರಲ್ಲಿ ನಡೆದ ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ನೀರಜ್ ಚೋಪ್ರಾ ಜಾವೆಲಿನ್ ಥ್ರೋನಲ್ಲಿ ಭಾರತಕ್ಕೆ ಚಿನ್ನದ ಪದಕ ತಂದುಕೊಟ್ಟಿದ್ದರು. ಬರೋಬ್ಬರಿ 87.58 ಮೀ. ದೂರ ಭರ್ಜಿ ಎಸೆಯುವ ಮೂಲಕ ಚೋಪ್ರಾ ಈ ಸಾಧನೆ ಮಾಡಿದ್ದರು. ಇದೀಗ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್​ನಲ್ಲಿ 88.77 ಮೀಟರ್ ಥ್ರೋ ಎಸೆಯುವ ಮುಂಬರುವ ಒಲಿಂಪಿಕ್ಸ್​ನಲ್ಲೂ ಸ್ವರ್ಣ ಪದಕ ತಂದುಕೊಡುವ ಭರವಸೆ ಮೂಡಿಸಿದ್ದಾರೆ.

ಇದನ್ನೂ ಓದಿ: RCB ಯಿಂದ ಇಬ್ಬರು, CSK ಯಿಂದ ಒಬ್ಬರು: ತಂಡದಲ್ಲಿ ಮುಂಬೈ ಅವರದ್ದೇ ದರ್ಬಾರು..!

ಫೈನಲ್​ನಲ್ಲಿ 12 ಮಂದಿ:

ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್​ನ ಫೈನಲ್​ ರೌಂಡ್​ನಲ್ಲಿ ಒಟ್ಟು 12 ಮಂದಿ ಕಾಣಿಸಿಕೊಳ್ಳಲಿದ್ದಾರೆ. ಇವರಲ್ಲಿ ನೀರಜ್ ಚೋಪ್ರಾ ಅಗ್ರಸ್ಥಾನದಲ್ಲಿದ್ದರೆ, ಭಾರತದ ಡಿಪಿ ಮನು ಹಾಗೂ ಕಿಶೋರ್ ಜೆನಾ ಅಗ್ರ ಹತ್ತರಲ್ಲಿ ಕಾಣಿಸಿಕೊಂಡಿದ್ದಾರೆ. ಅದರಂತೆ ಭಾನುವಾರ ನಡೆಯಲಿರುವ ಫೈನಲ್​ನಲ್ಲಿ ಭರ್ಜಿ ಎಸೆಯುವ ಸ್ಪರ್ಧಾಳುಗಳ ಪಟ್ಟಿ ಈ ಕೆಳಗಿನಂತಿದೆ…

1.  ನೀರಜ್ ಚೋಪ್ರಾ (ಭಾರತ) – 88.77 ಮೀ. (ಕೊನೆಯ ಸುತ್ತಿನಲ್ಲಿ ಕ್ರಮಿಸಿದ ದೂರ)
2.  ನದೀಮ್ ಅರ್ಷದ್ (ಪಾಕಿಸ್ತಾನ) – 86.79 ಮೀ.
3.  ವಡ್ಲೆಜ್ (ಜೆಕ್ ರಿಪಬ್ಲಿಕ್) – 83.50 ಮೀ
4.  ವೆಬರ್ (ಜರ್ಮನಿ) – 82.39 ಮೀ
5.  ಮಾಟುಸೆವಿಸಿಯಸ್ (ಲಿಥುವೇನಿಯಾ) – 82.35 ಮೀ
6.  ಡಿಪಿ ಮನು (ಭಾರತ) – 81.31 ಮೀ
7.  ವೆಗ್ನರ್ (ಪೋಲೆಂಡ್) – 81.25 ಮೀ
8.  ಅಬ್ದೆಲ್​ ರೆಹಮಾನ್ (ಈಜಿಪ್ಟ್) – 80.75 ಮೀ
9.  ಕಿಶೋರ್ ಜೆನಾ (ಭಾರತ) – 80.55 ಮೀ
10.  ಹೆಲ್ಯಾಂಡರ್ (ಫಿನ್​ಲ್ಯಾಂಡ್) – 80.19 ಮೀ
11.  ಹರ್ಮನ್ (ಬೆಲ್ಜಿಯಂ) – 80.11ಮೀ
12.  ಮರ್ಡೇರ್ (ಮಾಲ್ಡೋವಿಯಾ) – 79.78ಮೀ