ದಾಖಲೆಯ 21ನೇ ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿ ಗೆಲ್ಲುವ ಫೆಡರರ್ ಆಸೆಗೆ ಅಡ್ಡಿಯಾದ ಪೋಲೆಂಡ್ನ ಹುರ್ಕಾಜ್
ಹುರ್ಕಾಜ್ ಅವರಿಗೆ ಫೆಡರರ್ ನೇರ ಸೆಟ್ಗಳಲ್ಲಿ ಸೋತಿದ್ದು ಅಚ್ಚರಿಯೇ ಸರಿ. ಯಾಕೆಂದರೆ, 2002 ರಿಂದ ಈ ಟೂರ್ನಿಯಲ್ಲಿ ಅವರು ಯಾವತ್ತೂ ನೇರ ಸೆಟ್ಗಳ ಪರಾಭವ ಕಂಡಿರಲಿಲ್ಲ. ವಿಂಬಲ್ಡನ್ನಲ್ಲಿ ಅವರ ಇಂದಿನ ಸೋಲು ಒಂದು ಯುಗದ ಅಂತ್ಯದಂತೆ ಭಾಸವಾಯಿತು
ವಿಂಬಲ್ಡನ್: ಸುಮಾರು ಎರಡು ದಶಕಗಳಿಂದ ವಿಶ್ವದ ಆಗ್ರಮಾನ್ಯ ಟೆನಿಸ್ ಆಟಗಾರರಲ್ಲಿ ಒಬ್ಬರೆನಿಸಿಕೊಂಡು ತಮ್ಮ ಉತ್ಕೃಷ್ಟ ಕರೀಯರ್ನಲ್ಲಿ 20 ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಗಳನ್ನು ಗೆದ್ದಿರುವ ಸ್ವಿಜರ್ಲ್ಯಾಂಡ್ನ ರೋಜರ್ ಫೆಡರರ್ ಅವರ ವಿಂಬಲ್ಡನ್ ಯಾತ್ರೆ ಕೇವಲ ಈ ವರ್ಷ ಮಾತ್ರವಲ್ಲ ಅವರು ಬದುಕಿನ ಉಳಿದ ಭಾಗಕ್ಕೂ ಕೊನೆಗೊಂಡಂತಾಗಿದೆ. 39 ವರ್ಷ ವಯಸ್ಸಿನ ಫೆಡರರ್ ಮುಂದಿನ ವರ್ಷ ಈ ಪ್ರತಿಷ್ಠಿತ ಟೂರ್ನಿಯಲ್ಲಿ ಆಡುವ ಸಾಧ್ಯತೆ ಪ್ರಾಯಶಃ ಇಲ್ಲ. ಆದರೆ ಬ್ರಿಟನ್ನಿನ ಕ್ರಿಡಾಸಕ್ತರು ಈ ಲೆಜೆಂಡರಿ ಆಟಗಾರನ ಮನಮೋಹಕ ಅಟವನ್ನು ಬಹಳ ದಿನಗಳವರೆಗೆ ನೆನಪಿಲ್ಲಿಟ್ಟುಕೊಳ್ಳಲಿದ್ದಾರೆ. ವಿಂಬಲ್ಡನ್ ಗ್ರಾಸ್ ಕೋರ್ಟ್ ಮೇಲೆ ಅವರು ನಿಜಕ್ಕೂ ಚಕ್ರಾಧಿಪತಿಯಂತೆ ಮೆರೆದರು. ಈ ವರ್ಷ ಅವರು ವಿಂಬಲ್ಡನ್ ಟ್ರೋಫಿ ಗೆದ್ದು ವೃತ್ತಪರ ಟೆನಿಸ್ಗೆ ವಿದಾಯ ಹೇಳಬಹುದು ಎಂದು ಅವರ ಅಭಿಮಾನಿಗಳು ಅಂದುಕೊಂಡಿದ್ದರು. ಆದರೆ ಬುಧವಾರ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಅವರ ಆಸೆಯನ್ನು ಪೋಲೆಂಡ್ ಯುವ ಆಟಗಾರ ಹ್ಯುಬರ್ಟ್ ಹರ್ಕಾಜ್ ಮಣ್ಣುಗೂಡಿಸಿದರು.
ಹರ್ಕಾಜ್ ಅವರಿಗೆ ಫೆಡರರ್ ನೇರ ಸೆಟ್ಗಳಲ್ಲಿ ಸೋತಿದ್ದು ಅಚ್ಚರಿಯೇ ಸರಿ. ಯಾಕೆಂದರೆ, 2002 ರಿಂದ ಈ ಟೂರ್ನಿಯಲ್ಲಿ ಅವರು ಯಾವತ್ತೂ ನೇರ ಸೆಟ್ಗಳ ಪರಾಭವ ಕಂಡಿರಲಿಲ್ಲ. ವಿಂಬಲ್ಡನ್ನಲ್ಲಿ ಅವರ ಇಂದಿನ ಸೋಲು ಒಂದು ಯುಗದ ಅಂತ್ಯದಂತೆ ಭಾಸವಾಯಿತು. ಪಂದ್ಯವನ್ನು ನೋಡುತ್ತಿದ್ದವರ ಹೃದಯಗಳೂ ಭಾರವಾಗಿದ್ದವು.
ಬ್ರಿಟನ್ ಆಟಗಾರ ಆಂಡಿ ಮುರ್ರೆ ಮತ್ತು ಅಮೇರಿಕಾದ ವಿಲಿಯಮ್ಸ್ ಸಹೋದರಿಯರನ್ನು ಹಲವಾರು ವರ್ಷಗಳಿಂದ ವಿಂಬಲ್ಡನ್ನಲ್ಲಿ ನೋಡುತ್ತಿರುವವರು, ಫೇಡರರ್ ಇದೇ ಕೊನೆ ಬಾರಿ ಇಲ್ಲಿ ನೋಡಿದ್ದು ಅಂತ ಒಪ್ಪಿಕೊಳ್ಳಲು ತಯಾರಿಲ್ಲ. ತಮ್ಮ ನಿರ್ಣಯದ ಬಗ್ಗೆ ಅವರು ಇಷ್ಟರಲ್ಲೇ ಸುಳಿವು ನೀಡಬಹುದು. ಅವರ ಇತ್ತೀಚಿನ ಫಿಟ್ನೆಸ್ ಗಮನಿಸುತ್ತಿದ್ದರೆ, ‘ಫೆಡ್ಡೀ ನಿಂಗೆ ವಯಸ್ಸಾಯ್ತೋ,’ ಅನ್ನಲೇಬೇಕಾಗಿದೆ.
ವಿಂಬಲ್ಡನ್ ಸೆಂಟರ್ ಕೋರ್ಟ್ ಜೊತೆ ಫೆಡರರ್ ಅವರದ್ದು ಅವಿನಾಭಾವ ಸಂಬಂಧ. ಇದೇ ಕೋರ್ಟ್ನಲ್ಲಿ ಇಂದಿನ ಪಂದ್ಯ ಅವರು ನೇರ ಸೆಟ್ಗಳಲ್ಲಿ ಸೋತಿದ್ದು ನಿಜವಾದರೂ, ಅದು ಹೀನಾಯ ಸೋಲೇನೂ ಅನಿಸಲಿಲ್ಲ. 6-3, 7-6 6-0 ಸ್ಕೋರ್ಲೈನ್ ಪಂದ್ಯ ಏಕಪಕ್ಷೀಯವಾಗಿತ್ತು ಎಂಬ ಭಾವನೆ ಮೂಡಿಸುತ್ತದೆ. ಅದರೆ ಅವರ ಚಮತ್ಕಾರಿಕ ಮತ್ತು ನೋಡುಗರನ್ನು ಮಂತ್ರಮುಗ್ಧಗೊಳಿಸುವ ಆಟದ ಸೊಬಗು ಇಡೀ ಪಂದ್ಯದಲ್ಲಿ ಅಲ್ಲದಿದ್ದರೂ ಝಲಕ್ಗಳಲ್ಲಿ ಕಂಡುಬಂತು. ಆರಡಿ ಐದಿಂಚು ಎತ್ತರದ ಹರ್ಕಾಜ್ ಇವತ್ತು ಮೈದಾನದಲ್ಲಿ ಆವೇಶಕ್ಕೊಳಗಾದವರಂತೆ ಆಡಿದರು. ಅವರಿಂದ ತಪ್ಪು ಘಟಿಸುವುದು ಸಾಧ್ಯವೇ ಇಲ್ಲವೇನೋ ಎಂಬ ಸನ್ನಿವೇಶ ಸೆಂಟರ್ ಕೋರ್ಟ್ನಲ್ಲಿತ್ತು.
ಎಂಟು ಬಾರಿ ವಿಂಬಲ್ಡನ್ ಚಾಂಪಿಯನ್ಶಿಪ್ ಗೆದ್ದಿರುವ ಫೆಡರರ್ಗೆ ಈ ಟೂರ್ನಿಯಲ್ಲಿ ಇಂದಿನದು 119 ನೇ ಪಂದ್ಯವಾಗಿತ್ತು. ಅಷ್ಟು ಪಂದ್ಯಗಳಲ್ಲಿ ಸ್ವಿಸ್ ಆಟಗಾರ ಕೇವಲ 14 ಬಾರಿ ಮಾತ್ರ ಸೋಲು ಅನುಭವಿಸಿದ್ದಾರೆ ಅಂದರೆ ಅವರು ಯಾವ ಪರಿ ಇಲ್ಲಿ ಹೆಚ್ಚುಗಾರಿಕೆ ಮೆರೆದಿದ್ದಾರೆ ಅನ್ನೋದು ವೇದ್ಯವಾಗುತ್ತದೆ.
ಇದನ್ನೂ ಓದಿ: Wimbledon 2021: ಸುಲಭವಾಗಿ ಗೆದ್ದು, 10 ನೇ ಬಾರಿಗೆ ವಿಂಬಲ್ಡನ್ ಸೆಮಿಫೈನಲ್ ತಲುಪಿದ ನೊವಾಕ್ ಜೊಕೊವಿಕ್
Published On - 12:34 am, Thu, 8 July 21