ಡಬ್ಲ್ಯೂಟಿಸಿ ಫೈನಲ್​ ಪಂದ್ಯದಲ್ಲಿ ಭಾರತೀಯ ವೇಗದ ಬೌಲರ್​ಗಳು ನಡೆಸಿದ ದಾಳಿ ನಾಚಿಕೆ ಹುಟ್ಟಿಸುವಂತಿತ್ತು: ರೋಜರ್ ಬಿನ್ನಿ

ಭಾರತದ ಮಾಜಿ ಆಲ್​ರೌಂಡರ್ ರೋಜರ್ ಬಿನ್ನಿ ಸ್ವಲ್ಪ ಹಳಬರಿಗೆ ಬಹಳ ಚೆನ್ನಾಗಿ ನೆನಪಿರುತ್ತಾರೆ. 1983 ರಲ್ಲಿ ಕಪಿಲ್ ದೇವ್ ಅವರ ಡೇರ್​ ಡೆವಿಲ್ಸ್ ವಿಶ್ವಕಪ್ (ಪ್ರುಡೆನ್ಶಿಯಲ್ ಕಪ್) ಗೆದ್ದಾಗ ಆ ಡೆವಿಲ್​ಗಳಲ್ಲಿ ಬಿನ್ನಿ ಒಬ್ಬರಾಗಿದ್ದರಲ್ಲದೆ, ಭಾರತ ಮೊಟ್ಟ ಮೊದಲ ಬಾರಿಗೆ ವಿಶ್ವ ಚಾಂಪಿಯನ್​ಗಳ ಪಟ್ಟ ಧರಿಸಲು ಬಹಳ ಮಹತ್ತರವಾದ ಕಾಣಿಕೆ ನೀಡಿದ್ದರು. ಟೂರ್ನಿಯಲ್ಲಿ ಅತಿ ಹೆಚ್ಚು ವಿಕೆಟ್​ (18) ಪಡೆದ ಶ್ರೇಯಸ್ಸು ಅವರದ್ದು; ಕೇವಲ ಭಾರತದ ಪರ ಮಾತ್ರ ಅಲ್ಲ, ಟೂನಿಯಲ್ಲಿ ಭಾಗವಹಿಸಿದ ಎಲ್ಲ ದೇಶಗಳ ಬೌಲರ್​ಗಳ ಪೈಕಿ ಈ ಕನ್ನಡಿಗನೇ ಗರಿಷ್ಠ ವಿಕೆಟ್ ಪಡೆದಿದ್ದು. 1979 ರಿಂದ 1987ರವರಗೆ ಭಾರತಕ್ಕಾಗಿ ಅಡಿದ ಬಿನ್ನಿ 2000 ರಲ್ಲಿ ಭಾರತದ ಅಂಡರ್-19 ಟೀಮ್ ವಿಶ್ವಕಪ್ ಗೆದ್ದಾಗ ಅದರ ಕೋಚ್ ಆಗಿದ್ದರು. ನಂತರದ ವರ್ಷಗಳಲ್ಲಿ (2012) ಅವರು ಬಿಸಿಸಿಐ ರಾಷ್ಟ್ರೀಯ ಆಯ್ಕೆ ಸಮಿತಿ ಸದಸ್ಯರಾಗಿ ಸಹ ಕಾರ್ಯ ನಿರ್ವಹಿಸಿದರು. ಭಾರತವನ್ನು ಪ್ರತಿನಿಧಿಸಿದ ಮೊದಲ ಆಂಗ್ಲೋ-ಇಂಡಿಯನ್ ಕ್ರಿಕೆಟರ್ ಎಂಬ ಖ್ಯಾತಿಯೂ ಬಿನ್ನಿ ಅವರದ್ದು.

ಭಾರತ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್ ಪಂದ್ಯದಲ್ಲಿ ನ್ಯೂಜಿಲೆಂಡ್​ಗೆ ಸುಲಭವಾಗಿ ಶರಣಾಗಿದ್ದು ಎಲ್ಲ ಭಾರತೀಯರಂತೆ ಬಿನ್ನಿ ಅವರಿಗೂ ಕೋಪ ತರಿಸಿದೆ. ಭಾರತದ ಬೌಲರ್​ಗಳು ಕಳಪೆಮಟ್ಟದ ಬೌಲಿಂಗ್ ಪ್ರದರ್ಶನ ನೀಡಿದರು ಎಂದು ಇಂಗ್ಲಿಷ್ ಮಾಧ್ಯಮವೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಬಿನ್ನಿ ಹೇಳಿದ್ದಾರೆ. ಇಂಗ್ಗಿಷ್ ಕಂಡೀಶನ್​ಗಳಲ್ಲಿ ಹೇಗೆ ಬೌಲ್ ಮಾಡಬೇಕೆನ್ನುವುದನ್ನು ಅವರಿಗಿಂತ ಅಧಿಕಾರಯುತವಾಗಿ ಯಾರು ಮಾತಾಡಬಲ್ಲರು?

ಭಾರತ ಮೊದಲ ಇನ್ನಿಂಗ್ಸ್​ನಲ್ಲಿ ಕೇವಲ 217 ರನ್​ಗಳಿಗೆ ಅಲೌಟ್​ ಅದ ನಂತರ ನ್ಯೂಜಿಲೆಂಡ್ ಬ್ಯಾಟ್ಸ್​ಮನ್​ಗಳನ್ನು ಕಡಿಮೆ ಮೊತ್ತಕ್ಕೆ ಔಟ್​ ಮಾಡುವ ಗುರುತರ ಜವಾಬ್ದಾರಿ ಬೌಲರ್​ಗಳ ಮೇಲಿತ್ತು ಅದರೆ ಅವರು ಕಳಾಹೀನ ಪ್ರದರ್ಶನ ದಾಳಿ ನಡೆಸಿ ತೀವ್ರ ನಿರಾಶೆಗೊಳಿಸಿದರು ಎಂದು ಬಿನ್ನಿ ಹೇಳಿದ್ದಾರೆ. ಭಾರತದ ವೇಗದ ಬೌಲರ್​ಗಳು ಆಫ್​ಸ್ಟಂಪ್​ ಹೊರಗಡೆ ಶಾರ್ಟ್​ ಎಸೆತಗಳನ್ನು ಬೌಲ್​ ಮಾಡಿದ್ದು, ನ್ಯೂಜಿಲೆಂಡ್ ಆರಂಭ ಆಟಗಾರರಿಗೆ ಅವುಗಳನ್ನು ಆಡದೆ ಬಿಡಲು ಮತ್ತು ಇನ್ನಿಂಗ್ಸ್ ಕಟ್ಟಲು ನೆರವಾಯಿತು ಎಂದು ಅವರು ಹೇಳಿದ್ದಾರೆ.

ರೋಜರ್ ಬಿನ್ನಿ

ನ್ಯೂಜಿಲೆಂಡ್ ಓಪನರ್​ಗಳು-ಟಾಮ್ ಲಾಥಮ್ ಮತ್ತು ಡೆವೊನ್ ಕಾನ್ವೇ ಮೊದಲ ವಿಕೆಟ್​ಗೆ 70 ರನ್ ಕಲೆ ಹಾಕಲು ಭಾರತೀಯ ವೇಗದ ಬೌಲರ್​ಗಳ ನೀರಸ, ಮೊನಚುರಹಿತ ಮತ್ತು ನಿಯಂತ್ರಣರಹಿತ ಬೌಲಿಂಗ್ ಕಾರಣವಾಯಿತು ಎಂದು ಬಿನ್ನಿ ಹೇಳಿದ್ದಾರೆ.

‘ರವಿವಾರದಂದು (ಟೆಸ್ಟ್ ಪಂದ್ಯದ ಮೂರನೇ ದಿನ) ಭಾರತದ ಬೌಲರ್​ಗಳು ಬೌಲ್ ಮಾಡುತ್ತಿದ್ದುದನ್ನು ನೋಡುವುದು ನಾಚಿಕೆಗೇಡಿನ ಸಂಗತಿಯಾಗಿತ್ತು. ಇಂಗ್ಲೆಂಡ್​ ಪಿಚ್​ಗಳ ಮೇಲೆ ಬೌಲ್​ ಮಾಡುವ ರೀತಿ ಅದಲ್ಲ. ಅಂಥ ದಾಳಿ ಎದುರಾಳಿಗಳಿಗೆ ತೊಂದರೆ ನೀಡಬಲ್ಲದೆ? ಇದೆಂಥ ಬೌಲಿಂಗ್ ಪ್ರದರ್ಶನ? ಅವರು ಟೆಸ್ಟ್​ ಮ್ಯಾಚ್​ ಆಡೋದಿಕ್ಕೆ ಬಂದಿದ್ದರು, ತಮಾಷೆಗಲ್ಲ,’ ಎಂದು ಬಿನ್ನಿ ಹೇಳಿದ್ದಾರೆ.

ವೇಗದ ಬೌಲರ್​ಗಳು ಅದರಲ್ಲೂ ವಿಶೇಷವಾಗಿ ಮೊಹಮ್ಮದ್ ಶಮಿ ಮತ್ತು ಇಶಾಂತ್ ಶರ್ಮ ಪಂದ್ಯದ ನಾಲ್ಕನೇ ದಿನ ಉತ್ತಮವಾಗಿ ದಾಳಿ ನಡೆಸಿ ನ್ಯೂಜಲೆಂಡ್​ ಸ್ಕೋರ್ 160/6 ಗೆ ಕುಸಿಯುವಂತೆ ಮಾಡಿದರಾದರೂ ಕೆಳ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳನ್ನು ಬೇಗ ಔಟ್​ ಮಾಡಲು ವಿಫಲರಾದ ಕಾರಣ ಅವರಿಗೆ 32 ರನ್​ಗಳ ಮುನ್ನಡೆ ಸಿಕ್ಕಿತು.

ಮೊದಲ ಇನ್ನಿಂಗ್ಸ್​ನಲ್ಲಿ ಭಾರತದ ವೇಗದ ಬೌಲರ್​ಗಳು ದಾಳಿ ನಡೆಸುವಾಗ ರಕ್ಷಣಾತ್ಮಕ ನೀತಿ ಅನುಸರಿಸಿದ್ದು ರೋಜರ್​ ಬಿನ್ನಿಯನ್ನು ಕೆರಳಿಸಿದೆ. ಪಿಚ್ ಅರ್ಧಭಾಗ ಬ್ಯಾಟ್ಸ್​ಮನ್​ಗೆ ಸೇರಿದ್ದರೆ, ಬೌಲರ್ ಬೌಲ್ ಮಾಡುವ ತುದಿಯ ಅರ್ಧ ಭಾಗ ಬೌಲರ್​ಗೆ ಸೇರಿದ್ದಾಗಿರುತ್ತದೆ ಎಂದು ಬಿನ್ನಿ ಹೇಳುತ್ತಾರೆ. ಇಂಗ್ಲೆಂಡ್​ನಲ್ಲಿ ಆಡುವಾಗ ಬೌಲರ್​ಗಳು ತಮ್ಮ ಅರ್ಧಭಾಗದಲ್ಲಿ ಬೌಲ್ ಮಾಡದೆ ಬ್ಯಾಟ್ಸ್​ಮನ್​ನ ಅರ್ಧಭಾಗದಲ್ಲಿ ಬೌಲ್ ಮಾಡಬೇಕು ಎಂದು ಬಿನ್ನಿ ಹೇಳುತ್ತಾರೆ.

ಬೌಲರ್ ಯಾವಾಗಲೂ ಬ್ಯಾಟ್ಸ್​ಮನ್​ನ ಹಾಫ್​ನಲ್ಲಿ ಬೌಲ್​ ಮಾಡಬೇಕು, ತನ್ನ ಹಾಫ್​ನಲ್ಲಿ ಅಲ್ಲವೇ ಅಲ್ಲ. ಬ್ಯಾಟ್ಸ್​ಮನ್​ ಹೊಡೆತ ಬಾರಿಸುವಂತೆ ಪ್ರೇರೇಪಿಸಬೇಕು. ಕಡಿಮೆ ಅಂತರದ ಎಸೆತಗಳನ್ನು ಬೌಲ್ ಮಾಡಿದಾಗ ಬಾಲು ಹೆಚ್ಚು ಸ್ವಿಂಗ್​ ಆಗುತ್ತದೆ. ವಿಕೆಟ್ ಪಡೆಯಬೇಕಾದರೆ ನಿಮ್ಮ ದಾಳಿ ಆಕ್ರಮಣಕಾರಿಯಾಗಿರಬೇಕು. ರಕ್ಷಣಾತ್ಮವಾಗಿ ದಾಳಿ ನಡೆಸಿದರೆ ನಿಮಗೆ ವಿಕೆಟ್​ಗಳು ದಕ್ಕುವುದಿಲ್ಲ,’ ಎಂದು ಬಿನ್ನಿ ಹೇಳಿದ್ದಾರೆ.

ಕರ್ನಾಟಕದ ಆರಂಭ ಆಟಗಾರರಾಗಿದ್ದ ಬಿನ್ನಿಗೆ ಟೆಸ್ಟ್​ ಕ್ರಿಕೆಟ್​ನಲ್ಲಿ ಕೆಳ ಕ್ರಮಾಂಕದಲ್ಲಿ ಬ್ಯಾಟ್​ ಮಾಡುವ ಅವಕಾಶ ಸಿಗುತ್ತಿತ್ತು. ಬಾರತದ ಪರ ಆಡಿದ 27ಟೆಸ್ಟ್​ಗಳಲ್ಲಿ ಅವರು 5 ಅರ್ಧ ಶತಕಗಳೊಂದಿಗೆ 839 ರನ್ ​ಗಳಿಸಿದರು. ಅಜೇಯ 83 ಅವರ ಗರಿಷ್ಠ ಸ್ಕೋರ್​ ಆಗಿತ್ತು. ಟೆಸ್ಟ್​ಗಳಲ್ಲಿ ಅವರು ಪಡೆದ ವಿಕೆಟ್​ಗಳ ಸಂಖ್ಯೆ 47 ಮತ್ತು 6/56 ಅವರ ಬೆಸ್ಟ್ ಬೌಲಿಂಗ್ ಪರ್ಫಾಮನ್ಸ್ . 67 ಒಡಿಐ ಪಂದ್ಯಗಳಲ್ಲಿ 77 ವಿಕೆಟ್ (4/29 ಅತ್ಯುತ್ತಮ ಪ್ರದರ್ಶನ) ಪಡೆದ ಅವರು 629 ರನ್​ ಗಳಿಸಿದರು, ಅಜೇಯ 57 ಅವರ ಗರಿಷ್ಠ ಸ್ಕೋರ್ ಆಗಿತ್ತು.

ಇದನ್ನೂ ಓದಿ: WTC Final: ಜಡೇಜಾ ಆಲ್​ರೌಂಡರ್ ಕೋಟಾದಲ್ಲಿ ಆಯ್ಕೆಯಾಗಿರಲಿಲ್ಲ! ಟೀಂ ಇಂಡಿಯಾ ಸೋಲಿಗೆ ಕಾರಣ ವಿವರಿಸಿದ ಸಂಜಯ್ ಮಂಜ್ರೇಕರ್