ಒಂದೇ ದಿನ 16 ವಿಕೆಟ್ ಕಳೆದುಕೊಂಡ ವೀಂಡೀಸ್​ಗೆ ಇನ್ನಿಂಗ್ಸ್ ಸೋಲಿನ ಭೀತಿ!

ಜರ್ಮೈನ್ ಬ್ಲ್ಯಾಕ್​ವುಡ್​ ಮತ್ತು ಅಲ್ಜರಿ ಜೊಸೆಫ್

70 ಮತ್ತು 80 ರ ದಶಕದಲ್ಲಿ ಕ್ರಿಕೆಟ್ ವಿಶ್ವವನ್ನು ಭೀತಿಗೊಳಪಡಿಸಿದ್ದ ವೆಸ್ಟ್ ಇಂಡೀಸ್, ನಂತರದ ದಿನಗಳಲ್ಲಿ ಬ್ರಿಯಾನ್ ಲಾರಾ, ಕರ್ಟ್ಲೀ ಆ್ಯಂಬ್ರೋಸ್, ಕರ್ಟ್ನೀ ವಾಲ್ಷ್, ಕ್ರಿಸ್ ಗೇಲ್, ಶಿವನಾರಾಯನ್ ಚಂದ್ರಪಾಲ್, ಮುಂತಾದ ಸೂಪರ್ ಸ್ಟಾರ್ ಬ್ಯಾಟ್ಸ್​ಮನ್ ಮತ್ತು ಬೌಲರ್​ಗಳನ್ನು ಸೃಷ್ಟಿಮಾಡಿದರೂ ಅದರ ಗತವೈಭವ ಪುನಃ ನೋಡಸಿಗುತ್ತಿಲ್ಲ. ಈಗಿನ ಟೀಮನ್ನು ಸೋಲಿಸುವುದು ದುರ್ಬಲ ತಂಡಗಳಿಗೂ ಸುಲಭವಾಗಿದೆ.

ಇದನ್ನ ಯಾಕೆ ಹೇಳಬೇಕಾಗಿದೆಯೆಂದರೆ, ನ್ಯೂಜಿಲೆಂಡ್ ಪ್ರವಾಸದಲ್ಲಿರುವ ವಿಂಡೀಸ್ ತಂಡ ಹ್ಯಾಮಿಲ್ಟನ್​ನ ಸ್ನೆಡೆನ್ ಪಾರ್ಕ್​ನಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಅತಿಥೇಯರನ್ನು ಎದುರಿಸುತ್ತಿದೆ. ಪಂದ್ಯದ ಮೂರನೇ ದಿನವಾದ ಇಂದು ವಿಂಡೀಸ್ 16 ವಿಕೆಟ್​ಗಳನ್ನು ಕಳೆದುಕೊಂಡಿದೆ. ಹೌದು ನೀವು ಓದಿದ್ದು ಸರಿ; ವಿಂಡೀಸ್​ನ ಕೆಳ ಕ್ರಮಾಂಕದ ಬ್ಯಾಟ್ಸ್​ಮನ್ ಜರ್ಮೈನ್ ಬ್ಲ್ಯಾಕ್​ವುಡ್ (ಅಜೇಯ 80, 9X4 2×6) ವೇಗದ ಬೌಲರ್ ಅಲ್ಜರಿ ಜೊಸೆಫ್ (ಅಜೇಯ 59 9×4 1×6) ಮುರಿಯದ 7 ನೇ ವಿಕೆಟ್​​ಗೆ ಅವರು 110 ರನ್​ಗಳನ್ನು ಸೇರಿಸದೆ ಹೋಗಿದ್ದರೆ ಮೊದಲ ಟೆಸ್ಟ್ ಇವತ್ತೇ ಮುಗಿದುಹೋಗುತ್ತಿತ್ತು.

ಹಾಗೆ ನೋಡಿದರೆ, ಸ್ನೆಡೆನ್ ಪಾರ್ಕ್​ನಲ್ಲಿರುವ ಪಿಚ್ ಬೌಲರ್​ಗಳ ಗಣಿಪ್ರದೇಶವೇನೂ ಅಲ್ಲ. ಇದೇ ಪಿಚ್ ಮೇಲೆ ಮೊದಲು ಬ್ಯಾಟ್​ ಮಾಡಿದ ಅತಿಥೇಯರು ಕೇವಲ ಒಂದೂವರೆಗಳ ದಿನ ಆಟದಲ್ಲಿ 7/519 ಬೃಹತ್ ಮೊತ್ತ  ಪೇರಿಸಿ ಡಿಕ್ಲೇರ್ ಮಾಡಿಕೊಂಡಿತು. ನಾಯಕ ಕೇನ್ ವಿಲಿಯಮ್ಸನ್ ತಮ್ಮ ಕರೀಯರ್-ಬೆಸ್ಟ್ 251 ರನ್ ಗಳಿಸಿ ಔಟಾದರೆ, ಓಪನರ್ ಟಾಮ್ ಲಾಥಮ್ 86 ರನ್ ಗಳಿಸಿದರು.

ಕೇನ್ ವಿಲಿಯಮ್ಸನ್

ಎರಡನೆ ದಿನದಾಟದಲ್ಲಿ ಅಂದರೆ ನಾಯಕ ವಿಲಿಯಮ್ಸನ್ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡ ನಂತರ ವಿಂಡೀಸ್ ಆರಂಭಿಕ ಬ್ಯಾಟ್ಸ್​ಮನ್​ಗಳು ಯಾವುದೆ ಅಳುಕಿಲ್ಲದೆ, ಆತ್ಮವಿಶ್ವಾಸದಿಂದ ಕಿವಿ ವೇಗದ ಬೌಲರ್​ಗಳನ್ನು ಎದುರಿಸಿದರಲ್ಲದೆ ದಿನದಾಟ ಕೊನೆಗೊಳ್ಳುವವರೆಗೆ ಬೇರ್ಪಡಲಿಲ್ಲ. 24 ಓವರ್​ಗಳನ್ನು ಅವರು ನಿರಾತಂಕದಿಂದ ಎದುರಿಸಿ ಮೊದಲ ವಿಕೆಟ್​ಗೆ 53 ರನ್ ಸೇರಿಸಿದರು.

ಆದರೆ, ಮೂರನೆ ದಿನ ಮೋಡ ಮುಸುಕಿದ ವಾತಾವರಣದ ಸಂಫೂರ್ಣ ಲಾಭ ಪಡೆದ ನ್ಯೂಜಿಲೆಂಡ್ ವೇಗದ ಬೌಲರ್​ಗಳು ಪಟಪಟನೆ ಪ್ರವಾಸಿ ತಂಡದ ಬ್ಯಾಟ್ಸ್​ಮನ್​ಗಳನ್ನು ಔಟ್​ ಮಾಡಿದರು. ವಿಂಡೀಸ್ ಕೇವಲ 138ರನ್ ಗಳಿಸಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡಿತು. ಓಪನರ್ಸ್ ಕ್ರೇಗ್ ಬ್ರಾಥ್​ವೈಟ್ 21, ಮತ್ತು ಜಾನ್ ಕ್ಯಾಂಬೆಲ್, ಹಾಗೂ ಕೆಳ ಕ್ರಮಾಂಕದ ಆಟಗಾರರಾದ ಬ್ಲ್ಯಾಕ್​ವುಡ್ 23 ಮತ್ತು ನಾಯಕ ಜೇಸನ್ ಹೋಲ್ಡರ್ 25 ಅವರನ್ನು ಹೊರತುಪಡಿಸಿದರೆ ಉಳಿದೆಲ್ಲ ಬ್ಯಾಟ್ಸ್​ಮನ್​ಗಳು ಕ್ರೀಸಿಗೆ ಭೇಟಿ ನೀಡಿ ಪೆವಿಲಿಯನ್​ಗೆ ವಾಪಸ್ಸಾದರು. ಅತಿಥೇಯರ ಪರ ಟಿಮ್ ಸೌಥಿ 4/35, ಕೈಲ್ ಜೇಮಿಸನ್ 2/33, ನೀಲ್ ವ್ಯಾಗ್ನರ್ 2/33 ಮತ್ತು ಟ್ರೆಂಟ್ ಬೌಲ್ಟ್ 1/30 ಬೌಲಿಂಗ್​ನಲ್ಲಿ ಮೆರೆದರು.

381 ರನ್​ಗಳಿಂದ ಹಿಂದುಳಿದ ವಿಂಡೀಸ್ ಮೇಲೆ ವಿಲಿಯಮ್ಸನ್ ಫಾಲೋ-ಆನ್ ಹೇರಿದರು, ಆದರೆ ಎರಡನೇ ಇನ್ನಿಂಗ್ಸ್​ನಲ್ಲಿ ಪ್ರವಾಸಿಗರ ಪ್ರದರ್ಶನ ಇನ್ನೂ ಕಳಪೆಯಾಗಿತ್ತ್ತು. 89 ರನ್​ಗಳಾಗಿವುಷ್ಟರಲ್ಲಿ ಅದರ 6 ಪ್ರಮುಖ ಬ್ಯಾಟ್ಸ್​ಮನ್​ಗಳು ಔಟಾದರು. ಆದರೆ 7 ನೇ ವಿಕೆಟ್​ಗೆ ಜೊತೆಗೂಡಿದ ಬ್ಲ್ಯಾಕ್​ವುಡ್ ಮತ್ತು ಜೊಸೆಫ್ ಆಕ್ರಮಣಕಾರಿ ಆಟವಾಡತೊಡಗಿ ಕೇವಲ 20 ಓವರ್​ಗಳಲ್ಲಿ 110 ರನ್ ಸೇರಿಸಿದರಲ್ಲದೆ ಪಂದ್ಯವನ್ನು ನಾಲ್ಕನೆ ದಿನಕ್ಕೆ ಒಯ್ದರು. ಇಂದಿನ ಆಟ ಕೊನೆಗೊಂಡಾಗ ವಿಂಡೀಸ್ ಸ್ಕೋರ್ 196/6 ಆಗಿತ್ತು.

ಇನ್ನಿಂಗ್ಸ್ ಸೋಲಿನಿಂದ ತಪ್ಪಿಸಿಕೊಳ್ಳಲು ವೆಸ್ಟ್ ಇಂಡೀಸ್​ಗೆ ಇನ್ನೂ 185 ರನ್​ಗಳ ಅವಶ್ಯಕತೆಯಿದೆ. ನಾಳೆ ಭೋಜನ ವಿರಾಮಕ್ಕೆ ಮೊದಲು ಅಥವಾ ಅದಕ್ಕೆ ಮೊದಲೇ ಟೆಸ್ಟ್​ ಮುಗಿದರೆ ಆಶ್ಚರ್ಯಪಡಬೇಕಿಲ್ಲ. ಎರಡನೇ ಇನ್ನಿಂಗ್ಸ್​ನಲ್ಲಿ ಸೌಥೀ, ಬೌಲ್ಟ್, ಜೇಮಿಸನ್, ಡೆರಿಲ್ ಮಿಚೆಲ್ ತಲಾ ಒಂದೊಂದು ವಿಕೆಟ್ ಪಡೆದಿದ್ದರೆ, ವ್ಯಾಗ್ನರ್ 2 ವಿಕೆಟ್ ಕಬಳಿಸಿದ್ದಾರೆ.