Wimbledon Women’s Final: ಬಾರ್ಬೊರಾ ಕ್ರೆಚಿಕೋವಾಗೆ ವಿಂಬಲ್ಡನ್ ಕಿರೀಟ

ಲಂಡನ್​ನ ಸೆಂಟರ್ ಕೋರ್ಟ್​ ಅಂಗಳದಲ್ಲಿ ನಡೆದ ವಿಂಬಲ್ಡನ್ (Wimbledon) ಮಹಿಳಾ ಸಿಂಗಲ್ಸ್ ಫೈನಲ್​ನಲ್ಲಿ ಜೆಕ್​ ಗಣರಾಜ್ಯದ ಬಾರ್ಬೊರಾ ಕ್ರೆಚಿಕೋವಾ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ. ಉತ್ತಮ ಹೋರಾಟಕ್ಕೆ ಸಾಕ್ಷಿಯಾಗಿದ್ದ ಈ ಪಂದ್ಯದಲ್ಲಿ ಇಟಲಿಯ ಜಾಸ್ಮಿನ್ ಪಾವೊಲಿನಿ ಅವರನ್ನು ಸೋಲಿಸಿ ಚೊಚ್ಚಲ ವಿಂಬಲ್ಡನ್ ಕಿರೀಟ ಮುಡಿಗೇರಿಸಿಕೊಂಡರು.

ಈ ಪಂದ್ಯದ ಮೊದಲ ಸುತ್ತಿನಲ್ಲಿ ಬಾರ್ಬೊರಾ ಕ್ರೆಚಿಕೋವಾ ಉತ್ತಮ ಸರ್ವ್​ಗಳ ಮೂಲಕ ಆರಂಭದಲ್ಲೇ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ್ದರು. ಪರಿಣಾಮ ಜಾಸ್ಮಿನ್ 2 ಪಾಯಿಂಟ್ಸ್ ಕಲೆಹಾಕುವಲಷ್ಟರಲ್ಲಿ ಬಾರ್ಬೊರಾ 6 ಅಂಕಗಳನ್ನು ಗಳಿಸಿದ್ದರು. ಅದರಂತೆ ಮೊದಲ ಸೆಟ್​ ಅನ್ನು 6-2 ಅಂತರದಿಂದ ಗೆದ್ದ ಬಾರ್ಬೊರಾ ಕ್ರೆಚಿಕೋವಾಗೆ ದ್ವಿತೀಯ ಸುತ್ತಿನಲ್ಲಿ ಅಂಕಗಳಿಸಲು ಬೆವರಿಳಿಸಬೇಕಾಯಿತು.

ದಿಟ್ಟ ಹೋರಾಟ ಪ್ರದರ್ಶಿಸಿದ ಜಾಸ್ಮಿನ್ ಪಾವೊಲಿನಿ ಬ್ಯಾಕ್ ಟು ಬ್ಯಾಕ್ ಪಾಯಿಂಟ್ಸ್​ ಗಳಿಸಿದರೆ, ಬಾರ್ಬೊರಾ 2 ಅಂಕದಲ್ಲೇ ಉಳಿದರು. ಈ ಮೂಲಕ ಜಾಸ್ಮಿನ್ 2ನೇ ಸುತ್ತನ್ನು 6-2 ಅಂತರದಿಂದ ಗೆದ್ದುಕೊಂಡರು.

ಆದರೆ ಅಂತಿಮ ಸುತ್ತಿನಲ್ಲಿ ಕಂಬ್ಯಾಕ್ ಮಾಡಿದ ಬಾರ್ಬೊರಾ ಕ್ರೆಚಿಕೋವಾ ದ್ವಿತೀಯ ಸುತ್ತಿನಲ್ಲಿ ಮಾಡಿದ ತಪ್ಪುಗಳನ್ನು ಸರಿಪಡಿಸಿಕೊಂಡರು. ಅಲ್ಲದೆ ಚಾಣಾಕ್ಷ ಆಟದೊಂದಿಗೆ ಜಾಸ್ಮಿನ್​ ಮೇಲೆ ಒತ್ತಡ ಹೇರುವಲ್ಲಿ ಯಶಸ್ವಿಯಾದರು. ಇದಾಗ್ಯೂ ಒಂದು ಹಂತದಲ್ಲಿ ಉಭಯರು 4-4 ಅಂತರದಿಂದ ಸಮಬಲ ಸಾಧಿಸಿದ್ದರಿಂದ ಪಂದ್ಯವು ರಣರೋಚಕ ಹೋರಾಟಕ್ಕೆ ಸಾಕ್ಷಿಯಾಯಿತು. ಆದರೆ ತಮ್ಮೆಲ್ಲಾ ಅನುಭವನ್ನು ಧಾರೆಯೆರೆದ ಬಾರ್ಬೊರಾ ಕ್ರೆಚಿಕೋವಾಗೆ ಅಂತಿಮವಾಗಿ 6-4 ಅಂತರದಿಂದ ಗೆಲ್ಲುವ ಮೂಲಕ ಚಾಂಪಿಯನ್ ಪಟ್ಟಕ್ಕೇರಿದರು.

ಗೆಲುವಿನ ಸಂಭ್ರಮ:

The moment a dream became reality ✨#Wimbledon | @BKrejcikova pic.twitter.com/38xPz9pCin

— Wimbledon (@Wimbledon) July 13, 2024

2ನೇ ಸಿಂಗಲ್ಸ್ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿ:

ಬಾರ್ಬೊರಾ ಕ್ರೆಚಿಕೋವಾಗೆ ಇದು 2ನೇ ಸಿಂಗಲ್ಸ್ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿ. ಇದಕ್ಕೂ ಮುನ್ನ 2021 ರಲ್ಲಿ ಫ್ರೆಂಚ್ ಓಪನ್ ಪ್ರಶಸ್ತಿ ಗೆದ್ದಿದ್ದರು. ಹಾಗೆಯೇ 7 ಬಾರಿ ಡಬಲ್ಸ್ ಹಾಗೂ ಮೂರು ಬಾರಿ ಮಿಶ್ರ ಡಬಲ್ಸ್​ನಲ್ಲಿ  ಚಾಂಪಿಯನ್ಸ್ ಪಟ್ಟವನ್ನು ಅಲಂಕರಿಸಿದ್ದರು.

ಬಾರ್ಬೊರಾ ಕ್ರೆಚಿಕೋವಾ ಅವರ ಗ್ರ್ಯಾಂಡ್ ಸ್ಲಾಮ್ಸ್ ಪ್ರಶಸ್ತಿ ಪಟ್ಟಿ:

• ಫ್ರೆಂಚ್ ಓಪನ್ ಸಿಂಗಲ್ಸ್ (2021)
• ವಿಂಬಲ್ಡನ್ ಸಿಂಗಲ್ಸ್ (2024)
• ಆಸ್ಟ್ರೇಲಿಯನ್ ಓಪನ್ ಡಬಲ್ಸ್ (2022, 2023)
• ಫ್ರೆಂಚ್ ಓಪನ್ ಡಬಲ್ಸ್ (2018, 2021)
• ವಿಂಬಲ್ಡನ್ ಡಬಲ್ಸ್ (2018, 2022)
• ಯುಎಸ್ ಓಪನ್ ಡಬಲ್ಸ್ (2022)
• ಆಸ್ಟ್ರೇಲಿಯನ್ ಓಪನ್ ಮಿಶ್ರ ಡಬಲ್ಸ್ (2019, 2020, ಮತ್ತು 2021).

ಇದನ್ನೂ ಓದಿ: ಎಲ್ಲವನ್ನೂ ತ್ಯಾಗ ಮಾಡಿದ ಐಶ್ವರ್ಯಾಗೆ, ಬಚ್ಚನ್ ಕುಟುಂಬದಿಂದ ಸಿಕ್ಕಿದ್ದೇನು?

ಬ್ಯಾಕ್ ಟು ಬ್ಯಾಕ್ ಫೈನಲ್ ಸೋಲು:

ಒಂದೆಡೆ ಬಾರ್ಬೊರಾ ಕ್ರೆಚಿಕೋವಾ ಚೊಚ್ಚಲ ವಿಂಬಲ್ಡನ್ ಕಿರೀಟ ಮುಡಿಗೇರಿಸಿಕೊಂಡರೆ ಮತ್ತೊಂದೆಡೆ ಜಾಸ್ಮಿನ್ ಪಾವೊಲಿನಿ ಬ್ಯಾಕ್ ಟು ಬ್ಯಾಕ್ ಫೈನಲ್​ ಸೋಲಿನಿಂದ ನಿರಾಸೆ ಅನುಭವಿಸಿದರು. ಏಕೆಂದರೆ ಇದೇ ವರ್ಷ ನಡೆದ ಫ್ರೆಂಚ್ ಓಪನ್ ಫೈನಲ್​ನಲ್ಲಿ ಇಗಾ ಶ್ವಿಯಾಮ್​ಟೆಕ್ ವಿರುದ್ಧ ಜಾಸ್ಮಿನ್ ಸೋಲನುಭವಿಸಿದ್ದರು. ಇದೀಗ ಮತ್ತೊಮ್ಮೆ ಗ್ರ್ಯಾಂಡ್ ಸ್ಲಾಮ್​ ಗೆಲ್ಲುವ ಅವಕಾಶವನ್ನು ಕೈಚೆಲ್ಲಿಕೊಂಡಿದ್ದಾರೆ.