Twitter Data: ಸುಂದರ್ ಪಿಚೈ, ಸಲ್ಮಾನ್ ಖಾನ್ ಸೇರಿ 40 ಕೋಟಿ ಟ್ವಿಟರ್ ಬಳಕೆದಾರರ ವೈಯಕ್ತಿಕ ವಿವರ ಡಾರ್ಕ್​ವೆಬ್​ನಲ್ಲಿ ಮಾರಾಟಕ್ಕೆ; ವರದಿ

ನವದೆಹಲಿ: ಗೂಗಲ್ ಸಿಇಒ ಸುಂದರ್ ಪಿಚೈ (Sundar Pichai), ಬಾಲಿವುಡ್ ನಟ ಸಲ್ಮಾನ್ ಖಾನ್ (Salman Khan), ಭಾರತದ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಸೇರಿದಂತೆ 40 ಕೋಟಿ ಟ್ವಿಟರ್ (Twitter) ಬಳಕೆದಾರರ ವೈಯಕ್ತಿಕ ದತ್ತಾಂಶ (Personal Data) ಸೋರಿಕೆಯಾಗಿದೆ. ಇದು ಡಾರ್ಕ್​​ವೆಬ್​ನಲ್ಲಿ (Dark Web) ಮಾರಾಟಕ್ಕಿದೆ ಎಂದು ಇಸ್ರೇಲ್​ನ ಸೈಬರ್ ಗುಪ್ತಚರ ಕಂಪನಿ ಹಡ್ಸನ್ ರಾಕ್ (Hudson Rock) ವರದಿ ತಿಳಿಸಿದೆ. ಇ-ಮೇಲ್, ಯೂಸರ್​ನೇಮ್, ಫಾಲೋವರ್ಸ್, ದೂರವಾಣಿ ಸಂಖ್ಯೆಗಳನ್ನೂ ಮಾರಾಟಕ್ಕಿಡಲಾಗಿದೆ. 40 ಕೋಟಿ ಬಳಕೆದಾರರ ಸಂಪೂರ್ಣ ಖಾಸಗಿ ಮಾಹಿತಿಯನ್ನು ಮಾರಾಟ ಮಾಡಲಿದ್ದೇನೆ ಎಂದು ಹ್ಯಾಕರ್ ಹೇಳಿರುವುದಾಗಿ ವರದಿ ಉಲ್ಲೇಖಿಸಿದೆ. ಉದ್ಯಮಿ ಎಲಾನ್ ಮಸ್ಕ್ ಅವರು ಟ್ವಿಟರ್ ಮಾಲೀಕತ್ವ ವಹಿಸಿಕೊಂಡ ಕೆಲವೇ ದಿನಗಳಲ್ಲಿ 54 ಲಕ್ಷ ಟ್ವಿಟರ್​ ಬಳಕೆದಾರರ ದತ್ತಾಂಶ ಸೋರಿಕೆಯಾಗಿತ್ತು. ಈ ಬಗ್ಗೆ ಐರಿಷ್ ದತ್ತಾಂಶ ಸಂರಕ್ಷಣಾ ಆಯೋಗ ತನಿಖೆ ನಡೆಸುತ್ತಿದೆ.

ಎಲಾನ್ ಮಸ್ಕ್​ಗೇ ಸವಾಲು

ಹ್ಯಾಕರ್ ಟ್ವಿಟರ್ ಮಾಲೀಕ ಎಲಾನ್​ ಮಸ್ಕ್​ಗೇ ಸವಾಲು ಹಾಕಿ ಸಂದೇಶ ಪ್ರಕಟಿಸಿದ್ದಾನೆ. ‘ಮಸ್ಕ್ ಅವರೇ, ನೀವು ಈ ಸಂದೇಶವನ್ನು ಓದುತ್ತಿದ್ದರೆ ಗಮನಿಸಿ. ಈಗಾಗಲೇ 54 ಲಕ್ಷ ಬಳಕೆದಾರರ ದತ್ತಾಂಶ ಸೋರಿಕೆಯಾಗಿ ಸಂಕಷ್ಟಕ್ಕೆ ಸಿಲುಕಿದ್ದೀರಿ. ಈಗ 40 ಕೋಟಿ ಬಳಕೆದಾರರ ದತ್ತಾಂಶ ಸೋರಿಕೆಯಾಗಿದೆ. ನಿಮ್ಮ ಮುಂದಿರುವ ಉತ್ತಮ ಆಯ್ಕೆಯೆಂದರೆ ನೀವೇ ಹಣ ಪಾವತಿ ಮಾಡಿ ಈ ದತ್ತಾಂಶಗಳನ್ನು ಖರೀದಿಸುವುವುದು’ ಎಂದು ಉಲ್ಲೇಖಿಸಿದ್ದಾನೆ.

ಯಾವೆಲ್ಲ ಗಣ್ಯರ, ಸಂಸ್ಥೆಗಳ ದತ್ತಾಂಶ ಸೋರಿಕೆ?

• ಸುಂದರ್ ಪಿಚೈ
• ಸ್ಪೇಸ್​ಎಕ್ಸ್
• ಸಲ್ಮಾನ್ ಖಾನ್
• ಭಾರತ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ
• ವಿಶ್ವ ಆರೋಗ್ಯ ಸಂಘಟನೆಯ ಸೋಶಿಯಲ್ ಮೀಡಿಯಾ ಹ್ಯಾಂಡಲ್
• ಚಾರ್ಲಿ ಪುತ್
• ಶಾನ್ ಮೆಂಡಿಸ್
• ಅಲೆಕ್ಸಾಂಡ್ರಿಯಾ ಒಕಾಸಿಯೊ-ಕಾರ್ಟೆಜ್
• ಸಿಬಿಎಸ್​ ಮೀಡಿಯಾ
• ಡೊನಾಲ್ಡ್ ಟ್ರಂಪ್
• ಡೋಜಾ ಕ್ಯಾಟ್
• ನಾಸಾದ ಜೆಡಬ್ಲ್ಯುಎಸ್​ಟಿ ಖಾತೆ
• ಎನ್​ಬಿಎ

ಇದನ್ನೂ ಓದಿ: Twitter Gold Checkmark: ಟ್ವಿಟರ್​ನಲ್ಲಿ ಬ್ಲೂ ಜತೆಗೆ ಗ್ರೇ, ಗೋಲ್ಡ್ ಟಿಕ್; ಏನಿದರ ಒಳಮರ್ಮ? ಇಲ್ಲಿದೆ ನೋಡಿ

ಮಧ್ಯವರ್ತಿ ಮೂಲಕ ಡೀಲ್​ಗೆ ಮುಂದಾದ ಹ್ಯಾಕರ್

ಮಧ್ಯವರ್ತಿಗಳ ಮೂಲಕ ವ್ಯವಹಾರ ಕುದುರಿಸುವುದಕ್ಕೂ ಸಹಮತ ಇದೆ ಎಂದು ಹ್ಯಾಕರ್ ಹೇಳಿರುವುದಾಗಿ ಹಡ್ಸನ್ ರಾಕ್ ವರದಿ ತಿಳಿಸಿದೆ. ವ್ಯವಹಾರ ಅಂತಿಮಗೊಂಡರೆ ಈ ಸಂದೇಶವನ್ನು ಅಳಿಸಿಹಾಕಲಿದ್ದೇನೆ ಮತ್ತು ಮತ್ತೊಂದು ಬಾರಿ ದತ್ತಾಂಶವನ್ನು ಮಾರಾಟ ಮಾಡುವುದಿಲ್ಲ ಎಂದು ಹ್ಯಾಕರ್ ಭರವಸೆ ನೀಡಿದ್ದಾನೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಹೆಚ್ಚಿನ ಟೆಕ್ ಸ್ಟೋರಿ ಓದಲು ಇಲ್ಲಿ ಕ್ಲಿಕ್ ಮಾಡಿ