‘ಮೋದಿ, ಯೋಗಿಯವರನ್ನು ನನ್ನ ಮದುವೆಗೆ ಕರೆಯುತ್ತೇನೆ’ ಎನ್ನುತ್ತಿದ್ದಾನೆ ಉತ್ತರಪ್ರದೇಶದ ಈ ಯುವಕ

Viral : ಮದುವೆ ಎಂದರೆ ಸುಮ್ಮನೆಯೇ? ಯಾರ್ಯಾರನ್ನೆಲ್ಲ ಕರೆಯಬೇಕು ಎನ್ನುವ ಪಟ್ಟಿಯೇ ನಿಮಗಿಂತ ಉದ್ದ ಇರುತ್ತದೆ. ಆದರೆ ಇದೀಗ ಮದುವೆಯಾಗಲು ಹೊರಟಿರುವ ಈ ವ್ಯಕ್ತಿಯ ಪಟ್ಟಿ ಮಾತ್ರ ಅವನಿಗಿಂತ ಬಹಳ ದೊಡ್ಡದಿದೆ! ಉತ್ತರ ಪ್ರದೇಶದ ಶಾಮ್ಲಿ ಜಿಲ್ಲೆಯ ಅಜೀಂ ಮನ್ಸೂರಿ ಎಂಬ ವ್ಯಕ್ತಿ ನವೆಂಬರ್ 7 ರಂದು ಮದುವೆಯಾಗಲಿದ್ದಾನೆ. ತನ್ನ ಮದುವೆಗೆ ಪ್ರಧಾನಿ ನರೇಂದ್ರ ಮೋದಿ, ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ಅವರನ್ನು ಆಹ್ವಾನಿಸಬೇಕೆಂದುಕೊಂಡಿದ್ದಾನೆ.

ಅಜೀಂನ ಎತ್ತರ 2.3 ಅಡಿ ಎನ್ನುವುದು ಒಂದು ಕಡೆ ಮತ್ತು ತನ್ನ ಮದುವೆಗೆ ಪ್ರಧಾನಮಂತ್ರಿ, ಮುಖ್ಯಮಂತ್ರಿಗಳು ಬರಬೇಕು ಎನ್ನುವುದು ಇನ್ನೊಂದು ಕಡೆ. ಈ ಎರಡು ವಿಶೇಷಗಳಿಂದ ಅಜೀಂ ಈಗ ಮಾಧ್ಯಮದ ಕೇಂದ್ರಬಿಂದುವಾಗುತ್ತಿದ್ದಾನೆ. ‘ನನ್ನ ಮದುವೆ ನವೆಂಬರ್ 7ರಂದು ನಡೆಯಲಿದೆ. ಮೋದಿ ಮತ್ತು ಯೋಗಿ ಅವರಿಗೆ ಆಮಂತ್ರಣ ಕೊಟ್ಟು ಆಹ್ವಾನಿಸಲು ದೆಹಲಿಗೆ ಹೋಗಲಿದ್ದೇನೆ’ ಎಂದು ಎಎನ್​ಐಗೆ ಈತ ತಿಳಿಸಿದ್ದಾನೆ.

ಆದರೆ ಇಷ್ಟು ಕುಳ್ಳ ವ್ಯಕ್ತಿ ಅಜೀಮ್​ಗೆ ಸಹಜವಾಗಿ ಮದುವೆ ಎನ್ನುವುದು ಕನಸಿನ ಮಾತೇ. ಸಾಕಷ್ಟು ವರ್ಷಗಳಿಂದ ಅವರು ಸಂಗಾತಿಯ ಹುಡುಕಾಟದಲ್ಲಿದ್ದ. ಕೊನೆಗೂ ಇವನಿಗೆ ಸಂಗಾತಿ ಸಿಕ್ಕಿದ್ದಾಳೆ. ಈ ಪರಿಶ್ರಮದ ಹಿಂದೆ ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್​ ಒಳಗೊಂಡಂತೆ, ಅನೇಕ ರಾಜಕಾರಣಿಗಳು, ಅಧಿಕಾರಿಗಳು ಇದ್ದಾರೆ. ಇವರೆಲ್ಲರೂ ಇವರಿಗೆ ಸಂಗಾತಿಯನ್ನು ಹುಡುಕಲು ಸಹಾಯ ಮಾಡಿದ್ದಾರೆ.

ಅಜೀಂನ ಸಂಗಾತಿ ಬುಷಾರಾ ಹಾಪುರ್​ ಮೂಲದವಳು. 2021ರಲ್ಲಿ ಪರಸ್ಪರ ಭೇಟಿಯಾಗಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ. ಈಕೆಯ ಎತ್ತರ 3 ಅಡಿ. ಪದವಿ ಮುಗಿಸಿ ಮದುವೆಯಾಗುವುದಾಗಿ ಆಕೆ ನಿರ್ಧರಿಸಿದ್ದಳು. ಆ ಪ್ರಕಾರ ಈಗ ಮದುವೆ ಏರ್ಪಾಡಾಗಿದೆ. ಅಜೀಮ್​ ಕಾಸ್ಮೆಟಿಕ್​ ಅಂಗಡಿಯನ್ನು ಹೊಂದಿದ್ದಾನೆ. ತಕ್ಕಮಟ್ಟಿಗೆ ಸಂಪಾದನೆಯೂ ಇದೆ. ಐದು ಜನ ಅಣ್ಣಂದಿರಿದ್ದಾರೆ. ಶಾಲೆಯಲ್ಲಿ ಸಹಪಾಠಿಗಳು, ಶಿಕ್ಷಕರಿಂದ ಅವಮಾನ ಮತ್ತು ತಮಾಷೆಯನ್ನು ಅನುಭವಿಸಿ ಐದನೇ ಕ್ಲಾಸಿಗೆ ಶಾಲೆಯನ್ನು ಬಿಟ್ಟಿದ್ದಾನೆ.

ಇದೀಗ ಮದುವೆಯ ಭರ್ಜರಿ ತಯಾರಿಯಲ್ಲಿದ್ದಾನೆ. ಮದುವೆಗಾಗಿ ವಿಶೇಷವಾದ ಶೇರ್​ವಾನಿ ಮತ್ತು ಸೂಟ್​ಗಳನ್ನು ಹೊಲಿಸುತ್ತಿದ್ದಾನೆ.

ಪ್ರಧಾನಮಂತ್ರಿಗಳು ಮತ್ತು ಉತ್ತರ ಪ್ರದೇಶದ ಮುಖ್ಯಮಂತ್ರಿಗಳು ಇವರಿಬ್ಬರ ಮದುವೆಗೆ ಬರುತ್ತಾರಾ, ಏನಂತೀರಿ?

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ