ಸಾಲ ತೀರಿಸಲು ಕಿಡ್ನ್ಯಾಪ್ ನಾಟಕ: ತಂದೆಯಿಂದಲೇ ಹಣ ವಸೂಲಿಗೆ ಯತ್ನಿಸಿ ಪೊಲೀಸರ ಅತಿಥಿಯಾದ ಮಗ!
Updated on:Oct 02, 2026 | 12:57 PM
ಸಾಲ ತೀರಿಸಲು ಮಗನೊಬ್ಬ ತನ್ನ ತಂದೆಗೆ ವಂಚಿಸಲು ನಕಲಿ ಅಪಹರಣ ನಾಟಕವಾಡಿ 90 ಲಕ್ಷ ಬೇಡಿಕೆ ಇಟ್ಟಿದ್ದ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ವಿದ್ಯುತ್ ಗುತ್ತಿಗೆಯಲ್ಲಿ 1.5 ಕೋಟಿ ರೂ. ಸಾಲ ಮಾಡಿದ್ದ ಮನೀಷ್ ಎಂಬಾತ, ತಂದೆ ಮನೋಹರ್ ಅವರ ಬಳಿ ಹಣಕ್ಕಾಗಿ ನಕಲಿ ಅಪಹರಣದ ಕರೆ ಮಾಡಿಸಿದ್ದ. ಈ ಸಂಬಂಧ ಹುಡುಕಾಟದ ವೇಳೆ ಹಾಸನದಲ್ಲಿ ಪತ್ತೆಯಾದ ಮನೀಶ್ ಹಾಗೂ ಇಬ್ಬರು ಸ್ನೇಹಿತರನ್ನು ಆರ್.ಆರ್.ನಗರ ಪೊಲೀಸರು ಬಂಧಿಸಿದ್ದಾರೆ.
ಬೆಂಗಳೂರು, ಅಕ್ಟೋಬರ್ 02: ಸಾಲ ತೀರಿಸುವ ಸಲುವಾಗಿ ಕಿಡ್ನ್ಯಾಪ್ ನಾಟಕವಾಡಿ ತಂದೆಯಿಂದ ಹಣ ವಸೂಲಿಗೆ ಮಗನೇ ಯತ್ನಿಸಿರುವ ಘಟನೆ ಬೆಂಗಳೂರಲ್ಲಿ ನಡೆದಿದೆ. ಸೆ.29ರಂದು ಮನೀಷ್ ತಂದೆ ಮನೋಹರ್ ಪಾಟೀಲ್ಗೆ ಮನಿಷ್ ಮೊಬೈಲ್ನಿಂದ ವಾಟ್ಸಾಪ್ ಕರೆ ಮಾಡಿದ್ದ ಗ್ಯಾಂಗ್ ನಿಮ್ಮ ಮಗನ ಕಿಡ್ನ್ಯಾಪ್ ಮಾಡಿದ್ದೇವೆ ಎಂದು 90 ಲಕ್ಷ ರೂ. ಹಣಕ್ಕೆ ಡಿಮ್ಯಾಂಡ್ ಇಟ್ಟಿತ್ತು. ಇತ್ತ ಹಣದ ವ್ಯವಹಾರಕ್ಕಾಗಿ ಗದಗಕ್ಕೆ ಹೋಗ್ತೇನೆ ಎಂದು ಮನೆಯಿಂದ ತೆರಳಿದ್ದ ಮನೀಷ್, ಟ್ರೈನ್ನಲ್ಲಿ ಹೋಗ್ತೀನಿ ಎಂದು ಬೆಳಗ್ಗೆ ಫೋನ್ ಮಾಡ್ತೀನಿ ಎಂದು ಹೇಳಿದ್ದ. ಈ ನಡುವೆ ಬಂದ ಕಿಡ್ನ್ಯಾಪ್ ಕರೆಯಿಂದ ಮನೀಷ್ ತಂದೆ ಮನೋಹರ್ ಬೆಚ್ಚಿಬಿದ್ದಿದ್ದು, ತಕ್ಷಣ ಆರ್.ಆರ್.ನಗರ ಪೊಲೀಸರಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದರು. ಪೊಲೀಸರು ಮನೀಷ್ ಮೊಬೈಲ್ ಟ್ರ್ಯಾಕ್ ಮಾಡಿದಾಗ ಸ್ವಿಚ್ಆಫ್ ಬಂದಿದೆ. ಬಳಿಕ ಬೇರೊಂದು ನಂಬರ್ನಿಂದ ಹಣ ಅರೆಂಜ್ ಆಯ್ತಾ ಎಂದು ಕರೆ ಬಂದಿದ್ದು, ಆ ನಂಬರ್ ಟ್ರ್ಯಾಕ್ ಮಾಡಿ ಹಾಸನ ಭಾಗದಲ್ಲಿ ಪೊಲೀಸರು ಹುಡುಕಾಡಿದ್ದರು. ಈ ವೇಳೆ ಇಬ್ಬರು ಸ್ನೇಹಿತರ ಜೊತೆ ಆರಾಮಾಗಿ ಮನೀಷ್ ಮಲಗಿರೋದು ಕಂಡುಬಂದಿದೆ. ಮನೀಷ್ ಸೇರಿ ಮೂವರನ್ನ ವಶಕ್ಕೆ ಪಡೆದು ವಿಚಾರಿಸಿದಾಗ ಕಿಡ್ನ್ಯಾಪ್ ನಾಟಕ ಬಯಲಾಗಿದೆ. ಎಲೆಕ್ಟ್ರಿಕ್ ಕಂಟ್ರಾಕ್ಟ್ಗೆ ಮನೀಷ್ 1.5 ಕೋಟಿ ಸಾಲ ಮಾಡಿಕೊಂಡಿದ್ದ. ಈ ಸಾಲ ತೀರಿಸಲು ಕಿಡ್ನ್ಯಾಪ್ ನಾಟಕವಾಡಿದ್ದಾಗಿ ಆತ ತಪ್ಪೊಪ್ಪಿಕೊಂಡಿದ್ದಾನೆ ಎನ್ನಲಾಗಿದೆ.
ಮತ್ತಷ್ಟು ವಿಡಿಯೋ ನೋಡಲು ಇಲ್ಲಿ ಕ್ಲಿಕ್ ಮಾಡಿ.
Published on: Oct 02, 2026 12:56 PM
