10 ರನ್​ಗಳ ಅವಶ್ಯಕತೆ, ಹ್ಯಾಟ್ರಿಕ್ ವಿಕೆಟ್ ಕಬಳಿಸಿದ ಮಧುಶಂಕ

ಹರಾರೆಯಲ್ಲಿ ನಡೆದ ಝಿಂಬಾಬ್ವೆ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಶ್ರೀಲಂಕಾ ತಂಡ ರೋಚಕ ಜಯ ಸಾಧಿಸಿದೆ. ಈ ಗೆಲುವಿನ ರೂವಾರಿ ಎಡಗೈ ವೇಗಿ ದಿಲ್ಶನ್ ಮಧುಶಂಕ. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಶ್ರೀಲಂಕಾ ತಂಡರ ಪಾತುಮ್ ನಿಸ್ಸಂಕಾ 76 ರನ್ ಬಾರಿಸಿದರೆ, ಜನಿತ್ ಲಿಯಾನಾಗೆ 70 ರನ್​ ಗಳಿಸಿದರು. ಇನ್ನು ಕಮಿಂದು ಮೆಂಡಿಸ್ 57 ರನ್​ಗಳ ಕೊಡುಗೆ ನೀಡಿದರು. ಈ ಮೂಲಕ ಶ್ರೀಲಂಕಾ ತಂಡವು 50 ಓವರ್​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 298 ರನ್ ಕಲೆಹಾಕಿತು.

ಈ ಗುರಿಯನ್ನು ಬೆನ್ನತ್ತಿದ ಝಿಂಬಾಬ್ವೆ ತಂಡವು 49 ಓವರ್​ಗಳ ಮುಕ್ತಾಯದ ವೇಳೆಗೆ 5 ವಿಕೆಟ್ ಕಳೆದುಕೊಂಡು 289 ರನ್ ಕಲೆಹಾಕಿದ್ದರು.  ಅದರಂತೆ ಕೊನೆಯ ಓವರ್​ನಲ್ಲಿ ಕೇವಲ 10 ರನ್​ಗಳ ಅವಶ್ಯಕತೆಯಿತ್ತು. ಅತ್ತ ಕ್ರೀಸ್​ನಲ್ಲಿ ಸಿಕಂದರ್ ರಾಝ ಇದ್ದ ಕಾರಣ ಝಿಂಬಾಬ್ವೆ ತಂಡದ ಗೆಲುವನ್ನು ನಿರೀಕ್ಷಿಸಲಾಗಿತ್ತು.

ಆದರೆ 50ನೇ ಓವರ್ ಎಸೆದ ದಿಲ್ಶನ್ ಮಧುಶಂಕ ಎಲ್ಲರ ಲೆಕ್ಕಾಚಾರಗಳನ್ನು ತಲೆಕೆಳಗಾಗಿಸಿದರು. 50ನೇ ಓವರ್​ನ ಮೊದಲ ಎಸೆತದಲ್ಲೇ ಸಿಕಂದರ್ ರಾಝ (92) ಅವರನ್ನು ಬೌಲ್ಡ್ ಮಾಡಿದರು. ಇನ್ನು ದ್ವಿತೀಯ ಎಸೆತದಲ್ಲಿ ಬ್ರಾಡ್ ಇವನ್ಸ್ (0) ವಿಕೆಟ್ ಪಡೆದರು. ಹಾಗೆಯೇ ಮೂರನೇ ಎಸೆತದಲ್ಲಿ ರಿಚರ್ಡ್ ನ್ಗರಾವ (0) ಅವರನ್ನು ಕ್ಲೀನ್ ಬೌಲ್ಡ್ ಮಾಡಿ ಹ್ಯಾಟ್ರಿಕ್ ವಿಕೆಟ್ ಸಾಧನೆ ಮಾಡಿದರು.

ಈ ಹ್ಯಾಟ್ರಿಕ್ ವಿಕೆಟ್​ನೊಂದಿಗೆ ದಿಲ್ಶನ್ ಮಧುಶಂಕ ಅಂತಿಮ ಓವರ್​ನಲ್ಲಿ ನೀಡಿದ್ದು ಕೇವಲ 2 ರನ್​ಗಳು ಮಾತ್ರ. ಈ ಮೂಲಕ ರಣರೋಚಕ ಪಂದ್ಯದಲ್ಲಿ ಶ್ರೀಲಂಕಾ ತಂಡಕ್ಕೆ 7 ರನ್​ಗಳ ರೋಚಕ ಜಯ ತಂದುಕೊಡುವಲ್ಲಿ ಮಧುಶಂಕ ಯಶಸ್ವಿಯಾದರು.

ಇನ್ನು ಮೂರು​ ವಿಕೆಟ್​ನೊಂದಿಗೆ ಶ್ರೀಲಂಕಾ ಪರ ಏಕದಿನ ಕ್ರಿಕೆಟ್​ನಲ್ಲಿ ಹ್ಯಾಟ್ರಿಕ್ ವಿಕೆಟ್ ಕಬಳಿಸಿದ 8ನೇ ಬೌಲರ್​ ಎನಿಸಿಕೊಂಡರು. ಇದಕ್ಕೂ ಮುನ್ನ ಈ ಸಾಧನೆ ಮಾಡಿದ ಬೌಲರ್​ಗಳ ಪಟ್ಟಿ ಈ ಕೆಳಗಿನಂತಿದೆ…

• ಚಾಮಿಂಡ ವಾಸ್ vs  ಝಿಂಬಾಬ್ವೆ (2001) &  ಬಾಂಗ್ಲಾದೇಶ್ (2003)

• ಲಸಿತ್ ಮಾಲಿಂಗ vs ಸೌತ್ ಆಫ್ರಿಕಾ (2007), ಕೀನ್ಯಾ (2011) ಮತ್ತು ಆಸ್ಟ್ರೇಲಿಯಾ (2011)

• ಫರ್ವೇಝ್ ಮಹರೂಫ್ vs ಭಾರತ (2010)

• ತಿಸಾರ ಪೆರೇರಾ vs ಪಾಕಿಸ್ತಾನ್ (2012)

• ವನಿಂದು ಹಸರಂಗ vs ಝಿಂಬಾಬ್ವೆ (2017)

• ಶೆಹನ್ ಮಧುಶಂಕ vs ಬಾಂಗ್ಲಾದೇಶ್ (2018)

• ಮಹೇಶ್ ತೀಕ್ಷಣ vs ನ್ಯೂಝಿಲೆಂಡ್ (2025)

• ದಿಲ್ಶನ್ ಮಧುಶಂಕ vs ಝಿಂಬಾಬ್ವೆ (2025)