ವಿಜಯದಶಮಿಯ ಐತಿಹಾಸಿಕ ಮತ್ತು ಪೌರಾಣಿಕ ಮಹತ್ವ: ಡಾ. ಶೆಲ್ವಪಿಳ್ಳೈ ಅಯ್ಯಂಗಾರ್ ವಿವರಣೆ

ಧಾರ್ಮಿಕ ಚಿಂತಕ ಡಾ. ಶೆಲ್ವಪಿಳ್ಳೈ ಅಯ್ಯಂಗಾರ್ ಅವರು ವಿಜಯದಶಮಿಯ ಐತಿಹಾಸಿಕ ಮತ್ತು ಪೌರಾಣಿಕ ಹಿನ್ನೆಲೆಯ ಬಗ್ಗೆ ಆಳವಾದ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ. ವಿಜಯದಶಮಿಯಂದು ಮೆರವಣಿಗೆ, ಬನ್ನಿ ಮರಕ್ಕೆ ಪೂಜೆ ಸಲ್ಲಿಸುವ ಕಾರ್ಯಗಳು ನಡೆಯುತ್ತವೆ. ಒಡೆಯರ್ ರಾಜಮನೆತನದ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಸಹ ಬನ್ನಿ ಪೂಜೆಯಲ್ಲಿ ಪಾಲ್ಗೊಳ್ಳುತ್ತಾರೆ. ಅರಮನೆಯಲ್ಲಿ ವಿಜಯದಶಮಿಯನ್ನು ವಿಜಯಲಕ್ಷ್ಮಿ ವ್ರತೋತ್ಸವ ಎಂದೂ ಕರೆಯುತ್ತಿದ್ದರು ಎಂದು ಮುಮ್ಮಡಿ ಕೃಷ್ಣರಾಜ ಒಡೆಯರ್ ಕಾಲದ ರಾಜವಂಶ ರತ್ನಪ್ರಭಾ ಗ್ರಂಥದಲ್ಲಿ ಉಲ್ಲೇಖವಿದೆ. ಪೌರಾಣಿಕವಾಗಿ ವಿಜಯದಶಮಿ ಶ್ರೀರಾಮಚಂದ್ರ ರಾವಣನನ್ನು ಗೆದ್ದ ದಿನವೆಂದು ಹೇಳಲಾಗುತ್ತದೆ. ವಿಜಯಲಕ್ಷ್ಮಿ ರಾಮನಿಗೆ ವರಮಾಲೆ ಹಾಕಿದಳು ಎಂಬ ನಂಬಿಕೆಯಿದೆ. ಹಾಗೆಯೇ, ಭಂಡಾಸುರ ವಧೆ ಮಾಡಿದ ಮಹಿಷಾಸುರಮರ್ದಿನಿಯ ರೂಪವೇ ವಿಜಯಲಕ್ಷ್ಮಿ. ಆಯುಧ ಪೂಜೆಯೂ ಈ ದಿನದ ಪ್ರಮುಖ ಆಚರಣೆಯಾಗಿದ್ದು, ಆಯುಧಗಳು ಕೆಟ್ಟವರ ಸಂಹಾರಕ್ಕೆ ಮತ್ತು ಒಳ್ಳೆಯವರ ರಕ್ಷಣೆಗೆ ಎಂದು ಭೀಷ್ಮ ಧರ್ಮರಾಜನಿಗೆ ತಿಳಿಸಿದ್ದನ್ನು ಸ್ಮರಿಸಲಾಗುತ್ತದೆ. ಶಮಿ ವೃಕ್ಷಕ್ಕೆ ಪೂಜೆ ಸಲ್ಲಿಸಿ, ಅದರ ಎಲೆಗಳನ್ನು ಮುಡಿಯುವುದು ಮಂಗಳಕರ ಎಂದು ನಂಬಲಾಗುತ್ತದೆ. ವಿಜಯದಶಮಿಯಂದು ವಿಜಯಲಕ್ಷ್ಮಿಯನ್ನು ಪೂಜಿಸುವ ಎಲ್ಲರಿಗೂ ವಿಜಯ ಪ್ರಾಪ್ತಿಯಾಗಲಿ ಎಂಬ ಆಶಯವನ್ನು ಡಾ. ಶೆಲ್ವಪಿಳ್ಳೈ ಅಯ್ಯಂಗಾರ್ ವ್ಯಕ್ತಪಡಿಸಿದರು.

ಮತ್ತಷ್ಟು ವಿಡಿಯೋ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ