‘ಕರಿಮಣಿಗೆ ಈಗ ಮತ್ತೆ ಬೆಲೆ ಬಂದಿದೆ’: ವೈರಲ್ ಹಾಡಿಗೆ ಗುರುಕಿರಣ್ ಪ್ರತಿಕ್ರಿಯೆ
Updated on: Mar 04, 2024 | 10:47 PM
‘ಒಂದು ಕಾಲದಲ್ಲಿ ಕರಿಮಣಿಗೆ ತುಂಬ ಬೆಲೆ ಇತ್ತು. ಈಗ ಇದೆಯೋ ಇಲ್ಲವೋ ಗೊತ್ತಿಲ್ಲ. ಆದರೆ ಸಡನ್ ಆಗಿ ಕರಿಮಣಿ ಹಾಡಿಗೆ ವ್ಯಾಲ್ಯೂ ಬಂದಿದೆ. ನಮ್ಮ ಕೆಲಸಕ್ಕೆ ಬೆಲೆ ಬಂದಾಗ ಖಂಡಿತಾ ಖುಷಿ ಆಗುತ್ತದೆ’ ಎಂದು ಗುರುಕಿರಣ್ ಅವರು ಹೇಳಿದ್ದಾರೆ. ‘ಏನಿಲ್ಲ.. ಏನಿಲ್ಲ..’ ಹಾಡು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆದ ಬಗ್ಗೆ ಅವರು ತಮ್ಮ ಅಭಿಪ್ರಾಯ ತಿಳಿಸಿದ್ದಾರೆ.
ಗುರುಕಿರಣ್ (Gurukiran) ಸಂಗೀತ ನಿರ್ದೇಶನ ಮಾಡಿದ ‘ಉಪೇಂದ್ರ’ ಸಿನಿಮಾದ ‘ಏನಿಲ್ಲ.. ಏನಿಲ್ಲ’ (Enilla Enilla) ಹಾಡು ಇತ್ತೀಚೆಗೆ ವೈರಲ್ ಆಗಿದ್ದು ಗೊತ್ತೇ ಇದೆ. ಈ ಬಗ್ಗೆ ಗುರುಕಿರಣ್ ಅವರು ಪ್ರತಿಕ್ರಿಯೆ ನೀಡಿದ್ದಾರೆ. ಎಷ್ಟೋ ವರ್ಷಗಳ ಹಿಂದೆ ಬಿಡುಗಡೆ ಆದ ಹಾಡು ಈಗ ಟ್ರೆಂಡ್ ಆಗಿದ್ದಕ್ಕೆ ಅವರು ಕೂಡ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಆ ಕುರಿತು ಗುರುಕಿರಣ್ ಅವರು ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ. ‘ಅಂದು ಉಪೇಂದ್ರ ಸಿನಿಮಾ ಬಿಡುಗಡೆ ಆದಾಗ ಹಾಡುಗಳು ತೋಪಾಗಿವೆ ಎಂದು ಒಬ್ಬರು ಬರೆದಿದ್ದರು. ಆದರೆ ಎಲ್ಲ ಹಾಡುಗಳು ದೊಡ್ಡ ಮಟ್ಟದಲ್ಲಿ ಹಿಟ್ ಆದವು. ‘ಬರಿ ಓಳು..’, ‘ಮಸ್ತ್ ಮಸ್ತ್ ಹುಡುಗಿ..’, ‘ಉಪ್ಪಿಗಿಂತ ರುಚಿ ಬೇರೆ ಇಲ್ಲ..’ ಹಾಡುಗಳ ಸದ್ದಿನ ನಡುವೆ ಕರಿಮಣಿ ಹಾಡು ಕಳೆದುಹೋಗಿತ್ತು. ಆದರೆ ಈಗ ಮತ್ತೆ ಕ್ರೇಜ್ ಬಂದಿದೆ. ಅದನ್ನು ನಮಗೆ ಈಗ ನಂಬೋಕೆ ಆಗಲ್ಲ. ಈಗ ಹೊಸ ಸಾಂಗ್ ಬಿಡುಗಡೆ ಮಾಡುವಾಗ ಪ್ರಮೋಷನ್ಗೆ ಹೆಚ್ಚು ಖರ್ಚು ಮಾಡಬೇಕಾಗುತ್ತದೆ. ಆದರೆ ಕರಿಮಣಿ ಸಾಂಗ್ ಯಾವುದೇ ಪ್ರಚಾರ ಇಲ್ಲದೇ ಈಗ ಓಡುತ್ತಿದೆ ಎಂದರೆ ಅದು ಆ ಹಾಡಿಗೆ ಇರುವ ಶಕ್ತಿ’ ಎಂದು ಗುರುಕಿರಣ್ ಹೇಳಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
