‘ಕೆಂಡ’ ಸಿನಿಮಾಗೆ ಜಯಂತ್ ಕಾಯ್ಕಿಣಿ ಪುತ್ರ ರಿತ್ವಿಕ್ ಸಂಗೀತ ನಿರ್ದೇಶನ
ಖ್ಯಾತ ಗೀತರಚನಕಾರ ಜಯಂತ ಕಾಯ್ಕಿಣಿ ಅವರ ಪುತ್ರ ರಿತ್ವಿಕ್ ಕಾಯ್ಕಿಣಿ ಸಂಗೀತ ನಿರ್ದೇಶಕನಾಗಿ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ನೀಡಿದ್ದಾರೆ. ‘ಕೆಂಡ’ ಸಿನಿಮಾಗೆ ಅವರು ಸಂಗೀತ ನಿರ್ದೇಶನ ಮಾಡಿದ್ದಾರೆ. ಈ ಸಿನಿಮಾದ ಹಾಡು ಬಿಡುಗಡೆ ಆಗಿದ್ದು, ಆ ಗೀತೆಗೆ ಜಯಂತ್ ಕಾಯ್ಕಿಣಿ ಸಾಹಿತ್ಯ ಬರೆದಿದ್ದಾರೆ. ಸಾಂಗ್ ಬಿಡುಗಡೆ ವೇಳೆ ಪುತ್ರನ ಬಗ್ಗೆ ಜಯಂತ ಕಾಯ್ಕಿಣಿ ಅವರು ಮಾತನಾಡಿದ್ದಾರೆ.
ಸಹದೇವ ಕೆಲವಡಿ ಅವರು ನಿರ್ದೇಶನ ಮಾಡಿರುವ ‘ಕೆಂಡ’ (Kenda) ಸಿನಿಮಾಗೆ ರಿತ್ವಿಕ್ ಕಾಯ್ಕಿಣಿ (Ritwik Kaikini) ಅವರು ಸಂಗೀತ ನೀಡಿದ್ದಾರೆ. ಈ ಮೂಲಕ ಮ್ಯೂಸಿಕ್ ಡೈರೆಕ್ಟರ್ ಆಗಿ ಅವರು ಸ್ಯಾಂಡಲ್ವುಡ್ಗೆ ಪರಿಚಿತರಾಗುತ್ತಿದ್ದಾರೆ. ಈ ಸಿನಿಮಾದ ‘ತಾಜಾ ಸುದ್ದಿ..’ ಹಾಡು ಬಿಡುಗಡೆ ಆಗಿದೆ. ಜಯಂತ್ ಕಾಯ್ಕಿಣಿ (Jayanth Kaikini) ಬರೆದ ಈ ಹಾಡಿಗೆ ಅನನ್ಯಾ ಭಗತ್ ಹಾಗೂ ರಿತ್ವಿಕ್ ಕಾಯ್ಕಿಣಿ ಧ್ವನಿ ನೀಡಿದ್ದಾರೆ. ‘ಡಿ-ಬೀಟ್ಸ್’ ಮೂಲಕ ಈ ಸಾಂಗ್ ರಿಲೀಸ್ ಆಗಿದೆ. ನಿರ್ದೇಶಕ ಯೋಗರಾಜ್ ಭಟ್, ಸಂಗೀತ ನಿರ್ದೇಶಕ ಹರಿಕೃಷ್ಣ, ಶೈಲಜಾ ನಾಗ್ ಅವರು ಹಾಡಿನ ಬಿಡುಗಡೆ ಕಾರ್ಯಕ್ರಮಕ್ಕೆ ಬಂದು ಶುಭ ಹಾರೈಸಿದ್ದಾರೆ. ‘ಅಮೆಯುಕ್ತಿ ಸ್ಟುಡಿಯೋಸ್’ ಮೂಲಕ ರೂಪಾ ರಾವ್ ಮತ್ತು ಸಹದೇವ್ ಕೆಲವಡಿ ಅವರು ‘ಕೆಂಡ’ ಸಿನಿಮಾಗೆ ಬಂಡವಾಳ ಹೂಡಿದ್ದಾರೆ. ಬಿ.ವಿ. ಭರತ್, ಪ್ರಣವ್ ಶ್ರೀಧರ್, ವಿನೋದ್, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ.
‘ನಾನು ಸಾಹಿತಿಯಾಗಿ ಮಾತನಾಡಬಹುದು. ಆದರೆ ತಂದೆಯಾಗಿ ಮಾತನಾಡಿದರೆ ಮನೆಗೆ ಹೋದಮೇಲೆ ನಾನೇ ಪೆಟ್ಟು ತಿನ್ನಬೇಕಾಗುತ್ತದೆ. ಇದು ನನಗೆ ತುಂಬಾ ಕೌಟುಂಬಿಕವಾದ ಕ್ಷಣ. ಎಷ್ಟೋ ವರ್ಷಗಳ ಹಿಂದೆ ಇದೇ ರೀತಿಯ ಬಾಂಧವ್ಯ ಶೈಲಜಾ ನಾಗ್, ಬಿ. ಸುರೇಶ ಹಾಗೂ ಯೋಗರಾಜ್ ಭಟ್ ಅವರ ನಡುವೆ ಮೂಡಿತ್ತು. ಈಗ ರಿತ್ವಿಕ್ ಹಾಗೂ ಸಹದೇವ್ ಅವರ ಪಯಣ ಶುರುವಾಗಿದೆ. ರಿತ್ವಿಕ್ ಬಗ್ಗೆ ನನಗೆ ಖುಷಿಯಾಗುತ್ತದೆ. ಅವನಿಗೆ ಇಷ್ಟವಾದ ಕೆಲಸ ಮಾಡುತ್ತಿದ್ದಾನೆ. ಅದಕ್ಕೆ ಉತ್ತಮವಾದ ಸಹಯೋಗ ಸಿಕ್ಕಿದೆ’ ಎಂದು ಜಯಂತ್ ಕಾಯ್ಕಿಣಿ ಹೇಳಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.