ಕೇವಲ ಹಾಲು ಮಾತ್ರವಲ್ಲ ಅದರ ಉತ್ಪನ್ನಗಳ ಬೆಲೆನೂ ಜಾಸ್ತಿ ಆಗುತ್ತೆ: ಸುಳಿವು ಕೊಟ್ಟ ಸವದಿ

ಬೆಂಗಳೂರು, (ಅಕ್ಟೋಬರ್ 29): ಕೊನೆಗೂ ರಾಜ್ಯ ಸರ್ಕಾರ ನಂದಿನಿ ಹಾಲಿನ ದರವನ್ನು 8 ರೂ. ಹೆಚ್ಚಳ ಮಾಡಿದೆ. ಈ 8 ರೂಪಾಯಿ ಪೈಕಿ ರೈತರಿಗೆ 7 ರೂಪಾಯಿ ಮತ್ತು ಉಳಿದ 1 ರೂಪಾಯಿ ಒಕ್ಕೂಟಗಳಿಗೆ ಸಿಗಲಿದ್ದು, ನವೆಂಬರ್ 1 ರಿಂದ ಪರಿಸ್ಕೃತ ದರ ಜಾರಿಗೆ ಬರಲಿದೆ. ಇದರ ಬೆನ್ನಲ್ಲೇ ಇದೀಗ ಹೋಟೆಲ್​​ಗಳಲ್ಲಿ ಕಾಫಿ,ಟೀ ಹಾಗೂ ತಿಂಡಿ ತಿನಿಸುಗಳ ದರ ಏರಿಕೆಯಾಗಲಿದೆ. ಇದರ ಮಧ್ಯೆ ಇದೀಗ ಹಾಲಿನ ಉತ್ಪನ್ನಗಳ ದರ ಸಹ ಹೆಚ್ಚಳವಾಗಲಿದೆ. ಈ ಬಗ್ಗೆ ಸ್ವತಃ ಸಹಕಾರಿ ಸಚಿವ ಲಕ್ಷ್ಮಣ ಸವದಿ ಸುಳಿವು ನೀಡಿದ್ದಾರೆ.

ಸಚಿವ ಸಂಪುಟ ಬಳಿಕ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ ಲಕ್ಷ್ಮಣ ಸವದಿ, ಹಾಲಿನ ದರ 10 ರೂಪಾಯಿ ಏರಿಕೆ ಮಾಡುವಂತೆ ಒಕ್ಕೂಟಗಳ ಬೇಡಿಕೆ ಇತ್ತು. ಆದ್ರೆ, 8 ರೂಪಾಯಿ ಹೆಚ್ಚಳ ಮಾಡಿದ್ದೇವೆ. ರೈತರಿಗೆ 7 ರೂಪಾಯಿ ಒಕ್ಕೂಟಗಳಿಗೆ 1 ರೂಪಾಯಿ ಹೆಚ್ಚಳ ಮಾಡಲಾಗಿದೆ. ಬೇರೆ ರಾಜ್ಯಗಳಲ್ಲಿ ಹಾಲಿನ ದರ ಜಾಸ್ತಿ ಇದೆ. ನಮ್ಮ ರಾಜ್ಯದಲ್ಲಿ ಹಾಲಿನ ದರ ಏರಿಕೆ ಮಾಡೋದು ಅನಿವಾರ್ಯವಾಗಿತ್ತು. ಇಲ್ಲದಿದ್ರೆ ರೈತರು ಬೇರೆ ರಾಜ್ಯಗಳಿಗೆ ಹಾಲು ಮಾರಾಟ ಮಾಡ್ತಾರೆ. ಆ ರೀತಿ ರೈತರು ಬೇರೆ ರಾಜ್ಯಗಳಿಗೆ ಹಾಲು ಮಾರಾಟ ಮಾಡಿದ್ರೆ ಹಾಲಿನ ಅಭಾವ ಉಂಟಾಗುತ್ತೆ. ಗ್ರಾಹಕರು ಕೂಡ ಈ ದರ ಏರಿಕೆಗೆ ಸಪೋರ್ಟ್ ಮಾಡಬೇಕು. ನೀವು ಕೊಡುವ ದುಡ್ಡು ರೈತರಿಗೆ ಹೋಗುತ್ತೆ. ಹಾಗೇ ಒಂದು ಏರಿಕೆ ಆದ್ರೆ ಎಲ್ಲವೂ ಏರಿಕೆ ಆಗುತ್ತೆ ಎಂದು ಹೇಳುವ ಮೂಲಕ ಹಾಲಿನ ಉತ್ಪನ್ನ ದರ ಹೆಚ್ಚಳದ ಸುಳಿವು ನೀಡಿದರು.

ಕರ್ನಾಟಕದ ಮತ್ತಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ