ಔಟಾದ ಕೋಪದಲ್ಲಿ ಬ್ಯಾಟ್ ಮುರಿದು ಹಾಕಿದ ಪಾಕ್ ಕ್ರಿಕೆಟಿಗ; ವಿಡಿಯೋ ನೋಡಿ

2025 ರ ಏಷ್ಯಾಕಪ್​ಗೂ ಮೊದಲು ಪಾಕಿಸ್ತಾನ ತಂಡ ಯುಎಇಯಲ್ಲಿ ಟಿ20 ಸರಣಿಯನ್ನು ಆಡುತ್ತಿದೆ. ಈ ಸರಣಿಯ 2ನೇ ಪಂದ್ಯದಲ್ಲಿ ಪಾಕಿಸ್ತಾನ ತಂಡ ಗೆಲುವು ಸಾಧಿಸಿತ್ತಾದರೂ, ತಂಡದ ಯುವ ಆಟಗಾರ ಮೊಹಮ್ಮದ್ ಹ್ಯಾರಿಸ್ ಔಟಾದ ಹತಾಶೆಯಲ್ಲಿ ತಮ್ಮ ಬ್ಯಾಟ್ ಅನ್ನು ಮುರಿದು ಹಾಕಿದ್ದಾರೆ. ವಾಸ್ತವವಾಗಿ ಈ ತ್ರಿಕೋನ ಸರಣಿಯ ಮೊದಲ ಪಂದ್ಯದಲ್ಲಿ ಅಫ್ಘಾನಿಸ್ತಾನದ ವಿರುದ್ಧ 13 ಎಸೆತಗಳಲ್ಲಿ ಕೇವಲ 15 ರನ್ ಬಾರಿಸಿದ್ದ ಹ್ಯಾರಿಸ್, ಯುಎಇಯಂತಹ ದುರ್ಬಲ ತಂಡದ ವಿರುದ್ಧವೂ 2 ಎಸೆತಗಳಲ್ಲಿ ಕೇವಲ 1 ರನ್ ಗಳಿಸಿ ಪೆವಿಲಿಯನ್‌ಗೆ ಮರಳಿದರು.

ಆಗಸ್ಟ್ 30 ರ ಶನಿವಾರ ಶಾರ್ಜಾದಲ್ಲಿ ನಡೆದ ಪಂದ್ಯದಲ್ಲಿ, ಯುಎಇಯ ವೇಗಿ ಜುನೈದ್ ಸಿದ್ದಿಕಿ ಹ್ಯಾರಿಸ್ ಅವರನ್ನು ಕ್ಷಣಾರ್ಧದಲ್ಲಿ ಔಟ್ ಮಾಡಿದರು. ಹ್ಯಾರಿಸ್ ಥರ್ಡ್​ ಮ್ಯಾನ್ ಕಡೆಗೆ ಶಾಟ್ ಹೊಡೆದರು ಮತ್ತು 6 ರನ್ ಗಳಿಸುವ ನಿರೀಕ್ಷೆಯಲ್ಲಿದ್ದರು. ಆದರೆ ಫೀಲ್ಡರ್ ಬೌಂಡರಿಯಲ್ಲಿ ಸುಲಭವಾದ ಕ್ಯಾಚ್ ಪಡೆದರು. ಇದರಿಂದ ಹತಾಶರಾದ ಹ್ಯಾರಿಸ್ ತನ್ನ ಬ್ಯಾಟ್ ಅನ್ನು ಜೋರಾಗಿ ನೆಲಕ್ಕೆ ಹೊಡೆದರು. ಇದರಿಂದಾಗಿ ಬ್ಯಾಟ್ ಮತ್ತು ಅದರ ಹ್ಯಾಂಡಲ್ ಬೇರ್ಪಟ್ಟವು. ಪಾಕಿಸ್ತಾನಿ ಬ್ಯಾಟ್ಸ್‌ಮನ್‌ನ ಈ ನಡೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅವರನ್ನು ಬಹಳಷ್ಟು ನಿಂದಿಸಲಾಗುತ್ತಿದೆ. ವಾಸ್ತವವಾಗಿ, ಹ್ಯಾರಿಸ್ ಕಳೆದ 8 ಸತತ ಇನ್ನಿಂಗ್ಸ್‌ಗಳಲ್ಲಿ ವೈಫಲ್ಯ ಅನುಭವಿಸಿದ್ದು, ಆಡಿರುವ 42 ಎಸೆತಗಳಲ್ಲಿ ಕೇವಲ 37 ರನ್ ಮಾತ್ರ ಕಲೆಹಾಕಿದ್ದಾರೆ.