ದಸರಾ ಆನೆಗಳ ಗುಣ, ಸ್ವಭಾವದ ಬಗ್ಗೆ ಆರೈಕೆ ಮಾಡೋ ಸಿಬ್ಬಂದಿ ಹೇಳಿದ ಮಾತುಗಳನ್ನು ಕೇಳಿ!
ಮೈಸೂರು ಅರಮನೆಯಲ್ಲಿ ಆಯುಧ ಪೂಜೆಗೆ ಸಿದ್ಧಗೊಂಡಿದ್ದ ಪ್ರೀತಿ ಮತ್ತು ಚಂಚಲ್ ಆನೆಗಳ ಕುರಿತು ವಿಶೇಷ ವರದಿ. ರಾಜ ಯದುವೀರ್ ಕೃಷ್ಣದತ್ತ ಒಡೆಯರ್ ಅವರಿಂದ ಪೂಜೆಗೊಳಗಾದ ಆನೆಗಳಿಗೆ ಸುಂದರ ಅಲಂಕಾರ ಮಾಡಲಾಗಿತ್ತು. ಆರೈಕೆದಾರ ಪಾಷಾಬಾಯಿ, ಪ್ರೀತಿಯ ಸ್ನೇಹಪರ ಸ್ವಭಾವ, ದಸರಾ ಸಡಗರ, ವಿಶೇಷ ಆಹಾರ ಹಾಗೂ ರಾಜಮನೆತನದೊಂದಿಗಿನ ಬಾಂಧವ್ಯದ ಕುರಿತು ವಿವರಿಸಿದ್ದಾರೆ.
ಮೈಸೂರು, ಅಕ್ಟೋಬರ್ 20: ಮೈಸೂರು ಅರಮನೆಯಲ್ಲಿ ದಸರಾ ಆಯುಧ ಪೂಜೆಯ ಪ್ರಯುಕ್ತ ವಿಶೇಷ ಸಿದ್ಧತೆಗಳು ನಡೆದಿದ್ದವು. ಈ ವರ್ಷದ ದಸರಾಗೆ ಅರಮನೆಯ ಆನೆಗಳಾದ ಪ್ರೀತಿ ಮತ್ತು ಚಂಚಲ್ ಆನೆಯು ಪೂಜೆಗಾಗಿ ಸಿದ್ಧಗೊಂಡಿದ್ದವು. ಮಹಾರಾಜ ಯದುವೀರ್ ಕೃಷ್ಣದತ್ತ ಒಡೆಯರ್ ಅವರು ಈ ಆನೆಗಳಿಗೆ ಪೂಜೆಯನ್ನು ಸಲ್ಲಿಸಿದರು. ಪಟ್ಟದಾನೆ, ಪಟ್ಟದ ಹಸುಗಳು ಮತ್ತು ಕುದುರೆಗಳ ಜೊತೆ ಆನೆಗಳಿಗೂ ಪೂಜೆ ನಡೆಸುವುದು ಸಂಪ್ರದಾಯವಾಗಿದೆ.
ಆಯುಧ ಪೂಜೆಯ ಅಂಗವಾಗಿ ಆನೆಗಳಿಗೆ ಬಣ್ಣಗಳಿಂದ ಸುಂದರ ಅಲಂಕಾರ ಮಾಡಲಾಗಿತ್ತು. ಅವುಗಳ ಹಣೆ ಮೇಲೆ ಅರ್ಧಚಂದ್ರಾಕೃತಿ, ರಾಜರ ಗಂಡಭೇರುಂಡ ಲಾಂಛನ ಹಾಗೂ ವಿಷ್ಣುವಿನ ಶಂಖು ಚಕ್ರಗಳಂತಹ ಬೊಟ್ಟುಗಳನ್ನು ಬರೆಯಲಾಗಿತ್ತು. ಆನೆಗಳ ಆರೈಕೆ ಮಾಡುವ ಪಾಷಾಬಾಯಿ, ಪ್ರೀತಿ ಆನೆಯ ಸ್ವಭಾವದ ಕುರಿತು ವಿವರಿಸಿದರು. ಪ್ರೀತಿ ಆನೆಯು ಅತ್ಯಂತ ಮುದ್ದಾಗಿದ್ದು, ಎಲ್ಲರ ಜೊತೆ ಸ್ನೇಹಪರವಾಗಿರುತ್ತದೆ ಎಂದು ಹೇಳಿದರು. ದಸರಾ ಸಮಯದಲ್ಲಿ ಪ್ರೀತಿ ಹೆಚ್ಚು ಖುಷಿಯಾಗಿರುತ್ತದೆ ಮತ್ತು ಅಲಂಕಾರವನ್ನು ಇಷ್ಟಪಡುತ್ತದೆ ಎಂದೂ ಅವರು ತಿಳಿಸಿದರು.
ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ