ದಸರಾ 7ನೇ ದಿನದ ಸಂಭ್ರಮ: ರಾಜಬೀದಿಗಳಲ್ಲಿ ಟಾಂಗಾ ಏರಿ ಮೈಸೂರಿನ ಶ್ರೀಮಂತ ಇತಿಹಾಸ ಅನುಭವಿಸಿದ 40 ಜೋಡಿಗಳು!

ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವ 7ನೇ ದಿನದಂದು, ಪುರಾತತ್ವ ಇಲಾಖೆಯು ಪಾರಂಪರಿಕ ಕಟ್ಟಡಗಳ ಸಂರಕ್ಷಣೆ ಮತ್ತು ಅವುಗಳ ಇತಿಹಾಸದ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ದಂಪತಿಗಳಿಗಾಗಿ ವಿಶೇಷ ಟಾಂಗಾ ಸವಾರಿಯನ್ನು ಆಯೋಜಿಸಿತ್ತು. ಮೈಸೂರಿನ ಟೌನ್ ಹಾಲ್‌ನಿಂದ ಆರಂಭವಾದ ಈ ಸವಾರಿಗೆ ನಟಿ ಅಕ್ಷತಾ ಪಾಂಡವಪುರ ಅವರು ಚಾಲನೆ ನೀಡಿದರು. ಸುಮಾರು 40ಕ್ಕೂ ಹೆಚ್ಚು ಜೋಡಿಗಳು ಸಾಂಪ್ರದಾಯಿಕ ಉಡುಗೆಯಲ್ಲಿ ಈ ಸವಾರಿಯಲ್ಲಿ ಭಾಗವಹಿಸಿದ್ದರು. ಪುರುಷರು ರೇಷ್ಮೆ ಪಂಚೆ, ಮೈಸೂರು ಪೇಟ ಮತ್ತು ಶಲ್ಯ ಧರಿಸಿದ್ದರೆ, ಮಹಿಳೆಯರು ರೇಷ್ಮೆ ಸೀರೆ ತೊಟ್ಟು ಮಲ್ಲಿಗೆ ಹೂ ಮುಡಿದು ರಾಣಿಯರಂತೆ ಕಂಗೊಳಿಸುತ್ತಿದ್ದರು. ದಂಪತಿಗಳು ಟಾಂಗಾದಲ್ಲಿ ಕುಳಿತು ಮೈಸೂರಿನ ಐತಿಹಾಸಿಕ ಕಟ್ಟಡಗಳ ಮಾಹಿತಿಯನ್ನು ಪಡೆದುಕೊಂಡರು. ದೊಡ್ಡ ಗಡಿಯಾರ, ಚಾಮರಾಜ ಒಡೆಯರ್ ವೃತ್ತ, ಅಂಬಾ ವಿಲಾಸ್ ಅರಮನೆ ಮಾರ್ಗವಾಗಿ ಸಾಗಿ, ಮತ್ತೆ ಟೌನ್ ಹಾಲ್‌ಗೆ ವಾಪಸಾದ ಈ ಸವಾರಿಯು ಭಾಗವಹಿಸಿದವರಿಗೆ ಅಪೂರ್ವ ಅನುಭವ ನೀಡಿತ್ತು. ಮೈಸೂರಿನ ದಸರಾ ಸಂಭ್ರಮದಲ್ಲಿ ಪಾರಂಪರಿಕ ಸವಾರಿಯ ಭಾಗವಾಗಿದ್ದು ತಮ್ಮಲ್ಲಿ ಹೆಮ್ಮೆ ಮತ್ತು ಸಂತೋಷವನ್ನು ಮೂಡಿಸಿದೆ ಎಂದು ಹಲವು ದಂಪತಿಗಳು ತಿಳಿಸಿದರು.

ಮತ್ತಷ್ಟು ವಿಡಿಯೋ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ