ಭಾರೀ ಹಿಮಪಾತದಿಂದ ಮನಾಲಿಯಲ್ಲಿ ಟ್ರಾಫಿಕ್ ಜಾಮ್; ಹಿಮದಲ್ಲೇ ಮುಚ್ಚಿಹೋದ ಮರ, ಕಾರುಗಳು

ಹೆಚ್ಚುತ್ತಿರುವ ಹಿಮಪಾತದಿಂದಾಗಿ ಮನಾಲಿ-ಸೋಲಾಂಗ್‌ಗೆ ಭೇಟಿ ನೀಡದಂತೆ ಸಾಮಾಜಿಕ ಮಾಧ್ಯಮ ಬಳಕೆದಾರರು ಪ್ರಯಾಣಿಕರಿಗೆ ಎಚ್ಚರಿಕೆ ನೀಡಿದ್ದಾರೆ. ಡಿಸೆಂಬರ್ ಅಂತ್ಯದವರೆಗೆ ರಾಜ್ಯದಲ್ಲಿ ಹಿಮಪಾತದ ಎಚ್ಚರಿಕೆ ನೀಡಲಾಗಿದೆ. ಹವಾಮಾನ ವೈಪರೀತ್ಯದಿಂದಾಗಿ ಸೋಲಾಂಗ್ ಕಣಿವೆ ಮತ್ತು ಅಟಲ್ ಸುರಂಗದ ನಡುವೆ 2,000ಕ್ಕೂ ಹೆಚ್ಚು ವಾಹನಗಳು ಮುಂದೆ ಸಾಗಲಾರದೆ ನಿಂತಿವೆ. ಸುಮಾರು 1,800 ವಾಹನಗಳನ್ನು ಸುರಕ್ಷಿತವಾಗಿ ಹಿಮದಿಂದ ಹೊರತೆಗೆಯಲಾಗಿದೆ, ಸರಿಸುಮಾರು 200 ವಾಹನಗಳು ಇನ್ನೂ ಸಿಕ್ಕಿಹಾಕಿಕೊಂಡಿದೆ. ಶಿಮ್ಲಾ ಮತ್ತು ಹಿಮಾಚಲ ಪ್ರದೇಶದ ಮೇಲಿನ ಜಿಲ್ಲೆಗಳು ಕಳೆದ ಎರಡು ದಿನಗಳಿಂದ ಎಡೆಬಿಡದೆ ಭಾರೀ ಮಳೆ ಮತ್ತು ಹಿಮಪಾತವನ್ನು ಎದುರಿಸುತ್ತಿವೆ.