Philippines Earthquake: ಫಿಲಿಪೈನ್ಸ್ನಲ್ಲಿ ಪ್ರಬಲ ಭೂಕಂಪ; 7.1 ತೀವ್ರತೆ ದಾಖಲು, ಏರ್ಪೋರ್ಟ್ ರನ್ ವೇ ಬಳಿ ಸಣ್ಣ ಬಿರುಕು
ಭೂಕಂಪದ ತೀವ್ರತೆ ನೋಡಿ ಮೊದಲು ಇದು ಸುನಾಮಿಯ ಮುನ್ನೆಚ್ಚರಿಕೆ ಎಂದು ಹೇಳಲಾಗಿತ್ತು. ಆದರೆ ನಂತರ ಫಿಲಿಪೈನ್ಸ್ನ ಭೂಕಂಪಶಾಸ್ತ್ರ ಅಧ್ಯಯನ ಕೇಂದ್ರ ಅದನ್ನು ತಳ್ಳಿಹಾಕಿದೆ.
ಫಿಲಿಪೈನ್ಸ್ನಲ್ಲಿ ಇಂದು ಪ್ರಬಲ ಭೂಕಂಪ (Philippines Earthquake) ಉಂಟಾಗಿದೆ. ಭೂಕಂಪದ ತೀವ್ರತೆ ರಿಕ್ಟರ್ ಮಾಪಕದಲ್ಲಿ 7.1ರಷ್ಟು ದಾಖಲಾಗಿದೆ ಎಂದು ಯುಎಸ್ ಭೂವೈಜ್ಞಾನಿಕ ಸಮೀಕ್ಷೆ ಸಂಸ್ಥೆ (U.S. Geological Survey (USGS) ತಿಳಿಸಿದೆ. ಈ ಭೂಕಂಪದಿಂದ ಅಂತ ದೊಡ್ಡಮಟ್ಟದ ಹಾನಿಯಾಗಲಿಲ್ಲ, ಯಾರ ಜೀವವೂ ಹೋದ ಬಗ್ಗೆ ವರದಿಯಾಗಿಲ್ಲ. ಭೂಮಿಯ 65.6 ಕಿಮೀ ಆಳದಲ್ಲಿ ಕಂಪನ ಆಗಿದ್ದು, ದಾವೋ ನಗರದ ಆಗ್ನೇಯದಲ್ಲಿರುವ ಫಿಲಿಪೈನ್ ಸಾಗರ ಭೂಕಂಪದ ಕೇಂದ್ರ (Epicentre) ವಾಗಿದೆ. ಭೂಕಂಪದ ತೀವ್ರತೆ ನೋಡಿದರೆ ಅಪಾರ ಹಾನಿಯಾಗಿದೆ ಎಂದು ಭಾವಿಸಲಾಗಿತ್ತು. ಆದರೆ ಅಂಥ ದೊಡ್ಡ ಮಟ್ಟದ ಹಾನಿಯೇನೂ ಆಗಿಲ್ಲ. ಯಾವುದೇ ಕಟ್ಟಡ, ಮನೆಗಳೂ ಕುಸಿದುಬಿದ್ದಿಲ್ಲ ಎಂದು ಸ್ಥಳೀಯ ಆಡಳಿತ ಅಧಿಕಾರಿ ರಿಚಾರ್ಡೋ ಜಲದ್ ತಿಳಿಸಿದ್ದಾರೆ.
ಈ ಭೂಕಂಪ ಸ್ಥಳೀಯ ವಿಮಾನ ನಿಲ್ದಾಣಗಳು, ಸಾಗರದ ಬಂದರುಗಳು ಸೇರಿ ಮತ್ತಿತರ ಪ್ರಮುಖ ಸ್ಥಳಗಳ ಮೇಲೆ ಅಂಥ ದೊಡ್ಡಮಟ್ಟದ ಪ್ರಭಾವ ಬೀರಲಿಲ್ಲ. ಆದಾಗ್ಯೂ ದಕ್ಷಿಣದ ದಾವೊ ಓರಿಯಂಟಲ್ ಪ್ರಾಂತ್ಯದಲ್ಲಿ ಇರುವ ವಿಮಾನ ನಿಲ್ದಾಣದ ರನ್ ವೇ ಬಳಿ ಸಣ್ಣಮಟ್ಟದ ಬಿರುಕು ಕಾಣಿಸಿಕೊಂಡಿದೆ. ಹಾಗಂತ ಯಾವುದೇ ಪ್ರಯಾಣಿಕರಿಗೂ ತೊಂದರೆ ಆಗಿಲ್ಲ ಎಂದೂ ತಿಳಿಸಿದ್ದಾರೆ.
ಭೂಕಂಪದ ತೀವ್ರತೆ ನೋಡಿ ಮೊದಲು ಇದು ಸುನಾಮಿಯ ಮುನ್ನೆಚ್ಚರಿಕೆ ಎಂದು ಹೇಳಲಾಗಿತ್ತು. ಆದರೆ ನಂತರ ಫಿಲಿಪೈನ್ಸ್ನ ಭೂಕಂಪಶಾಸ್ತ್ರ ಅಧ್ಯಯನ ಕೇಂದ್ರ ಅದನ್ನು ತಳ್ಳಿಹಾಕಿದೆ. ಸುನಾಮಿ ಸಂಭವಿಸುವ ಅಪಾಯ ಇಲ್ಲ ಎಂದು ಹೇಳಿದೆ. ಫಿಲಿಪೈನ್ಸ್ನ ಭೌಗೋಳಿಕೆ ರಚನೆ ಪ್ರಕಾರ, ಇಲ್ಲಿ ಆಗಾಗ ಭೂಕಂಪ ಸಂಭವಿಸುತ್ತಿರುತ್ತದೆ.
ಇದನ್ನೂ ಓದಿ: ಕುರಿ ಕಾಯುತ್ತಿದ್ದ ಸಿದ್ದರಾಮಯ್ಯನವರ ರಾಜಕೀಯ ಹಾದಿಯೇ ಅಚ್ಚರಿ; ಇಲ್ಲಿದೆ ರೋಚಕ ಸ್ಟೋರಿ