ಕಾಬೂಲ್ ವಿಮಾನ ನಿಲ್ದಾಣ ಈಗ ತಾಲಿಬಾನ್ ಸುಪರ್ದಿಯಲ್ಲಿದೆ: ಏರ್​ಪೋರ್ಟ್​ ನಿರ್ವಹಣೆಯ ಕೌಶಲ ತಾಲಿಬಾನ್​ಗೆ ಇದೆಯೇ?

ಕಾಬೂಲ್: ಅಫ್ಘಾನಿಸ್ತಾನದ ರಾಜಧಾನಿ ಕಾಬೂಲ್​ನ ಹಮೀದ್ ಕರ್ಜೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಇದೀಗ ತಾಲಿಬಾನಿಗಳ ಸುಪರ್ದಿಗೆ ಬಂದಿದೆ. ಬಂದೂಕು ಹಿಡಿದು ವಿಮಾನ ನಿಲ್ದಾಣ ವಶಪಡಿಸಿಕೊಂಡ ತಾಲಿಬಾನ್​ಗೆ ವಿಮಾನ ನಿಲ್ದಾಣದ ಕಾರ್ಯಾಚರಣೆಯನ್ನು ನಿರ್ವಹಿಸುವ ಕೌಶಲವಿದೆಯೇ? ಈ ಪ್ರಶ್ನೆಗೆ ಹಲವು ದೇಶಗಳು ಇಲ್ಲ ಎಂದೇ ಉತ್ತರಿಸುತ್ತವೆ.

ವಿಮಾನ ನಿಲ್ದಾಣವನ್ನು ತನ್ನ ಸುಪರ್ದಿಗೆ ಪಡೆದ ನಂತರ ತಾಲಿಬಾನ್ ಸಂಭ್ರಮ ಆಚರಿಸಿತ್ತು. ಆದರೆ ಇದೀಗ ವಿಮಾನ ನಿಲ್ದಾಣವನ್ನು ನಿರ್ವಹಿಸುವ ಸವಾಲನ್ನು ತಾಲಿಬಾನ್ ಎದುರಿಸಬೇಕಿದೆ. ವಿಮಾನ ನಿಲ್ದಾಣದ ರನ್​ವೇ ಮೇಲೆ ನಿಂತ ತಾಲಿಬಾನ್ ವಕ್ತಾರ ಅಮೆರಿಕ ವಿರುದ್ಧದ ಗೆಲುವನ್ನು ಘೋಷಿಸಿದ್ದ ರೀತಿಯನ್ನು ಗಮನಿಸಿದರೆ ತಾಲಿಬಾನ್ ವಿಮಾನ ನಿಲ್ದಾಣವನ್ನು ತನ್ನ ಸುಪರ್ದಿಗೆ ಪಡೆಯುವ ವಿಚಾರವನ್ನು ಎಷ್ಟು ಗಂಭೀರವಾಗಿ ಪರಿಗಣಿಸಿತ್ತು ಎಂಬುದು ಅರ್ಥವಾಗುತ್ತದೆ. ಮುಂದಿನ ದಿನಗಳಲ್ಲಿ ವಿಮಾನ ನಿಲ್ದಾಣದ ಭವಿಷ್ಯ ಏನಾಗಬಹುದು? ಉತ್ತರ ಹುಡುಕುವ ಪ್ರಯತ್ನ ಇಲ್ಲಿದೆ.

ಕಳೆದ ಎರಡು ತಿಂಗಳುಗಳಿಂದ ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ಜನರನ್ನು ತೆರವುಗೊಳಿಸುವ ಕಾರ್ಯಾಚರಣೆ ನಡೆಯುತ್ತಿತ್ತು. ವಿಪರೀತ ಜನಸಂದಣಿ ಸೇರಿದ್ದ ಕಾರಣ ವಿಮಾನ ನಿಲ್ದಾಣದಲ್ಲಿದ್ದ ಹಲವು ತಾಂತ್ರಿಕ ಸಲಕರಣೆಗಳು ಹಾಗೂ ಪ್ರಯಾಣಿಕ ಸೌಕರ್ಯಗಳು ಹಾಳಾಗಿವೆ. ಇವನ್ನು ಸರಿಪಡಿಸದೇ ವಿಮಾನ ನಿಲ್ದಾಣದ ಕಾರ್ಯಾಚರಣೆ ನಿರ್ವಹಿಸುವುದು ಕಷ್ಟ.

ಈ ಕುರಿತು ಪ್ರತಿಕ್ರಿಯಿಸಿದ್ದ ತಾಲಿಬಾನ್ ವಕ್ತಾರ ಜಬಿವುಲ್ಲಾ ಮುಜಾಹಿದ್, ಪ್ರಸ್ತುತ ನಮ್ಮ ಪಡೆಗಳು ವಿಮಾನ ನಿಲ್ದಾಣವನ್ನು ತಮ್ಮ ಸುಪರ್ದಿಗೆ ತೆಗೆದುಕೊಳ್ಳಲು ಯತ್ನಿಸುತ್ತಿವೆ. ಮುಂದಿನ ದಿನಗಳಲ್ಲಿ ಇತರ ದೇಶಗಳ ಸಹಕಾರದಿಂದ ಕಾರ್ಯಾಚರಣೆ ನಿರ್ವಹಿಸಲು ಗಮನ ನೀಡಲಾಗುವುದು ಎಂದು ಹೇಳಿದ್ದರು. ಇತರ ದೇಶಗಳ ಎಂಬ ಅವರ ಮಾತನ್ನು ಕತಾರ್ ಮತ್ತು ಟರ್ಕಿ ಎಂದು ಅಂತರರಾಷ್ಟ್ರೀಯ ಸಮುದಾಯಗಳು ಅರ್ಥ ಮಾಡಿಕೊಂಡಿದ್ದವು.

ಆಗಸ್ಟ್ 31ರ ನಂತರ ವಿದೇಶಿ ಮಿಲಿಟರಿ ಪಡೆಗಳು ಅಫ್ಘಾನಿಸ್ತಾನದಲ್ಲಿ ಇರುವುದನ್ನು ಸಹಿಸುವುದಿಲ್ಲ ಎಂದು ತಾಲಿಬಾನ್ ಸ್ಪಷ್ಟಪಡಿಸಿತ್ತು. ನಮ್ಮ ಹೋರಾಟಗಾರರು ಮತ್ತು ವಿಶೇಷ ಪಡೆಗಳಿಗೆ ವಿಮಾನ ನಿಲ್ದಾಣ ನಿರ್ವಹಿಸುವ ಸಾಮರ್ಥ್ಯವಿದೆ. ನಮಗೆ ಯಾರ ಸಹಾಯವೂ ಬೇಡ ಎಂದು ಹೇಳಿತ್ತು.

ಆದರೆ ಅಫ್ಘಾನಿಸ್ತಾನ ವಿಮಾನ ನಿಲ್ದಾಣದಲ್ಲಿ ವಿದೇಶಿ ಪಡೆಗಳು ನೆಲೆಗೊಳ್ಳದಿದ್ದರೆ ವಾಣಿಜ್ಯ ವಿಮಾನಗಳ ಸಂಚಾರ ಆರಂಭವಾಗುವುದಿಲ್ಲ. ಈ ಹಿಂದೆ ಕಾಬೂಲ್ ವಿಮಾನ ನಿಲ್ದಾಣದ ಕಾರ್ಯಾಚರಣೆಯನ್ನು ಟರ್ಕಿ ನಿರ್ವಹಿಸುತ್ತಿತ್ತು. ಅದರೆ ಬೇರೆಯವರ ಸಹಾಯ ಬೇಡ ಎಂಬ ಹಟಮಾರಿ ಧೋರಣೆಯನ್ನು ತಾಲಿಬಾನ್​ ಅನುಸರಿಸುತ್ತಿರುವುದರಿಂದ ಟರ್ಕಿ ಸಹ ಈಗ ಕಾದುನೋಡುವ ತಂತ್ರಕ್ಕೆ ಮೊರೆಹೋಗಿದೆ.

(Who will run Afghanistan Kabul Airport now Questions over Operation of Commercial Flights)

ಇದನ್ನೂ ಓದಿ: ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ರಾಕೆಟ್‌ ಹಾರಾಟ; ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯಿಂದ ತಡೆ

ಇದನ್ನೂ ಓದಿ: ಹಳ್ಳಿಗಳನ್ನು ನಿರ್ಲಕ್ಷಿಸಿದ್ದು ದೊಡ್ಡ ತಪ್ಪಾಯ್ತು: ತಾಲಿಬಾನ್​ಗೆ ಶಕ್ತಿ ತುಂಬಿದ್ದು ಅಫ್ಘಾನ್ ಸರ್ಕಾರದ ತಪ್ಪು ಕೃಷಿ ನೀತಿಗಳು