ಭಾರತೀಯ ಸೇನೆ ದಾಳಿ ಮಾಡಿದ ಪಾಕಿಸ್ತಾನದ ನಗರಗಳ ಇತಿಹಾಸವೇನು ಗೊತ್ತೇ? ಇಲ್ಲಿದೆ ಆಸಕ್ತಿದಾಯಕ ಮಾಹಿತಿ

ಪಾಕಿಸ್ತಾನವು (Pakistan) ಜಮ್ಮು, ಪಂಜಾಬ್ ಮತ್ತು ರಾಜಸ್ಥಾನದ ಕೆಲವು ಭಾಗಗಳ ಮೇಲೆ ವಿಫಲ ದಾಳಿ ಯತ್ನ ನಡೆಸಿದ್ದಕ್ಕೆ ಭಾರತೀಯ ಸೇನೆಯು (Indian Army) ಸೂಕ್ತ ಪ್ರತ್ಯುತ್ತರ ನೀಡಿದೆ. ಭಾರತೀಯ ಸೇನಾ ಪಡೆಗಳು ಲಾಹೋರ್, ಕರಾಚಿ, ಇಸ್ಲಾಮಾಬಾದ್, ಸಿಯಾಲ್‌ಕೋಟ್, ಪೇಶಾವರ ಮತ್ತು ಬಹಾವಲ್ಪುರ್, ಕೋಟ್ಲಿ ವರೆಗೆ ದಾಳಿ ಮಾಡಿದೆ. ಭಾರತದ ಈ ದಾಳಿ ಪಾಕಿಸ್ತಾನದಲ್ಲಿ ಸಂಚಲನ ಮೂಡಿಸಿದೆ. ಪಾಕಿಸ್ತಾನದ ಈ ನಗರಗಳ ಐತಿಹಾಸಿಕ ಹಿನ್ನೆಲೆಯೇನು? ಅವುಗಳ ವಿಶೇಷತೆಗಳೇನು ಎಂಬ ಮಾಹಿತಿ ಇಲ್ಲಿದೆ.

ಲಾಹೋರ್

ಲಾಹೋರ್ ನಗರವನ್ನು ಪಾಕಿಸ್ತಾನದ ಹೃದಯ ಎಂದು ಕರೆಯಲಾಗುತ್ತದೆ. ಇದು ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ರಾಜಧಾನಿ. ಲಾಹೋರ್ ಪಾಕಿಸ್ತಾನದಲ್ಲಿ ಎರಡನೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ನಗರವಾಗಿದೆ. ಕರಾಚಿ ಮೊದಲ ಸ್ಥಾನದಲ್ಲಿದೆ. ಪಾಕಿಸ್ತಾನದ ಆದಾಯದ ಬಹುಪಾಲು ಭಾಗ ಲಾಹೋರ್‌ನಿಂದಲೇ ಬರುತ್ತದೆ. ಇದು ದೇಶದ ಈಶಾನ್ಯದಲ್ಲಿದೆ, ಭಾರತದೊಂದಿಗಿನ ಅಂತರರಾಷ್ಟ್ರೀಯ ಗಡಿಗೆ ಹತ್ತಿರದಲ್ಲಿದೆ. ಲಾಹೋರ್ ಐತಿಹಾಸಿಕ ಪರಂಪರೆ, ಸಾಂಸ್ಕೃತಿಕ ವೈವಿಧ್ಯತೆ ಮತ್ತು ರುಚಿಕರವಾದ ಪಾಕಪದ್ಧತಿಗೆ ಹೆಸರುವಾಸಿಯಾಗಿದೆ. ಈ ನಗರವು ಐತಿಹಾಸಿಕ ಲಾಹೋರ್ ಕೋಟೆ, ಬಾದ್‌ಶಾಹಿ ಮಸೀದಿ ಮತ್ತು ವಾಘಾ ಗಡಿಯಂತಹ ಆಕರ್ಷಣೆಗಳಿಗೆ ಹಾಗೂ ಪಂಜಾಬಿ ಸಂಸ್ಕೃತಿ, ಕಲೆ ಮತ್ತು ಸಂಗೀತಕ್ಕೆ ಹೆಸರುವಾಸಿಯಾಗಿದೆ.

ಕರಾಚಿ

ಮೊಹಮ್ಮದ್ ಅಲಿ ಜಿನ್ನಾ ಜನ್ಮಸ್ಥಳ ಆಗಿರುವ ಕರಾಚಿ, ಪಾಕಿಸ್ತಾನದ ಸಿಂಧ್ ಪ್ರಾಂತ್ಯದ ರಾಜಧಾನಿಯಾಗಿದೆ. ಇದು ಪಾಕಿಸ್ತಾನದ ಅತಿ ದೊಡ್ಡ ನಗರ. ಅರಬ್ಬೀ ಸಮುದ್ರದ ಕರಾವಳಿಯಲ್ಲಿರುವ ಕರಾಚಿ ನಗರವನ್ನು ಪಾಕಿಸ್ತಾನದ ಸಾಂಸ್ಕೃತಿಕ, ಆರ್ಥಿಕ ಮತ್ತು ಶೈಕ್ಷಣಿಕ ರಾಜಧಾನಿ ಎಂದು ಪರಿಗಣಿಸಲಾಗಿದೆ. ಇದು ಪಾಕಿಸ್ತಾನದ ಅತಿದೊಡ್ಡ ಬಂದರು ನಗರವೂ ​​ಆಗಿದೆ. 1947 ರಲ್ಲಿ ಪಾಕಿಸ್ತಾನ ಭಾರತದಿಂದ ಬೇರ್ಪಟ್ಟಾಗ, ಕರಾಚಿಯನ್ನು ಪಾಕಿಸ್ತಾನದ ರಾಜಧಾನಿಯಾಗಿ ಆಯ್ಕೆ ಮಾಡಲಾಗಿತ್ತು. ಈ ನಗರವು ವಿಭಿನ್ನ ಜನಾಂಗೀಯ ಗುಂಪುಗಳು ಮತ್ತು ಧಾರ್ಮಿಕ ಸಮುದಾಯಗಳಿಗೆ ಹೆಸರುವಾಸಿಯಾಗಿದೆ. ಕರಾಚಿಯಲ್ಲಿ ಅನೇಕ ಪ್ರಮುಖ ಐತಿಹಾಸಿಕ ಕಟ್ಟಡಗಳು, ವಸ್ತು ಸಂಗ್ರಹಾಲಯಗಳು, ಉದ್ಯಾನವನಗಳು ಮತ್ತು ಕಡಲತೀರಗಳಿವೆ. ಈ ನಗರವು ಪಾಕಿಸ್ತಾನಕ್ಕೆ ಬರುವ ಪ್ರವಾಸಿಗರಲ್ಲಿ ಬಹಳ ಜನಪ್ರಿಯವಾಗಿದೆ. ಇಲ್ಲಿ ಅನೇಕ ವಸ್ತು ಸಂಗ್ರಹಾಲಯಗಳು ಮತ್ತು ಸುಂದರವಾದ ಮಸೀದಿಗಳಿವೆ.

ಇದನ್ನೂ ಓದಿ

ಪಾಕ್​ನಿಂದ ಸ್ವಾತಂತ್ರ್ಯ ಕೋರಿ ವಿಶ್ವಸಂಸ್ಥೆಗೆ ಮನವಿ ಮಾಡಿದ ಖ್ಯಾತ ಬರಹಗಾರ

ಬೆಂಗಳೂರು ಹೆಚ್​ಎಎಲ್​ನಲ್ಲಿ ಹೈ ಅಲರ್ಟ್, ಸಿಬ್ಬಂದಿ ರಜೆ ರದ್ದು

ಮತ್ತೆ ಪಾಕಿಸ್ತಾನದೊಳಗೆ ನುಗ್ಗಿದ ಭಾರತ; ಇಸ್ಲಮಾಬಾದ್, ಲಾಹೋರ್ ಮೇಲೆ ದಾಳಿ

ಚೀನಾ ಜೆಟ್‌ ಬಳಸಿದ್ದೇವೆಂಬ ಪಾಕ್ ಹೇಳಿಕೆಗೆ ಬೀಜಿಂಗ್ ಪ್ರತಿಕ್ರಿಯೆ

ಇಸ್ಲಾಮಾಬಾದ್

1960 ರ ಸುಮಾರಿಗೆ ಪಾಕಿಸ್ತಾನದ ರಾಜಧಾನಿಯಾಗಿ ಇಸ್ಲಾಮಾಬಾದ್ ಅನ್ನು ಸ್ಥಾಪಿಸಲಾಯಿತು. ನಗರವನ್ನು ನಿರ್ದಿಷ್ಟವಾಗಿ ವಿಶಾಲವಾದ ರಸ್ತೆಗಳು, ತೆರೆದ ಸ್ಥಳಗಳು ಮತ್ತು ಉದ್ಯಾನವನಗಳನ್ನು ಒಳಗೊಂಡಂತೆ ಗ್ರಿಡ್ ಮಾದರಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ. ಸೆಕ್ರೆಟರಿಯೇಟ್, ಪಾಕಿಸ್ತಾನ್ ಹೌಸ್ ಮತ್ತು ಇತರ ಪ್ರಮುಖ ಸರ್ಕಾರಿ ಕಟ್ಟಡಗಳು ಇಸ್ಲಾಮಾಬಾದ್​​ನಲ್ಲಿವೆ. ಈ ನಗರವು ದೇಶದ ರಾಜಕೀಯ ಮತ್ತು ಆಡಳಿತ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಒಂದು ಪ್ರಮುಖ ಆರ್ಥಿಕ ಕೇಂದ್ರವೂ ಆಗಿದ್ದು, ಅಲ್ಲಿ ವಿವಿಧ ಕೈಗಾರಿಕೆಗಳು ಮತ್ತು ವ್ಯವಹಾರಗಳು ನೆಲೆಗೊಂಡಿವೆ.

ಇಸ್ಲಾಮಾಬಾದ್ ವಿಶ್ವವಿದ್ಯಾಲಯ ಮತ್ತು ಅಲ್ಲಾಮಾ ಇಕ್ಬಾಲ್ ಮುಕ್ತ ವಿಶ್ವವಿದ್ಯಾಲಯದಂತಹ ಹಲವಾರು ಪ್ರಸಿದ್ಧ ಶಿಕ್ಷಣ ಸಂಸ್ಥೆಗಳಿಗೆ ಇಸ್ಲಾಮಾಬಾದ್ ನೆಲೆಯಾಗಿದೆ. ಇದು ಹಲವಾರು ಐತಿಹಾಸಿಕ ತಾಣಗಳು, ವಸ್ತು ಸಂಗ್ರಹಾಲಯಗಳು ಮತ್ತು ಕಲಾ ಕೇಂದ್ರಗಳನ್ನು ಹೊಂದಿರುವ ಸಾಂಸ್ಕೃತಿಕ ಕೇಂದ್ರವೂ ಆಗಿದೆ. ಇಸ್ಲಾಮಾಬಾದ್ ಮಾರ್ಗಲ್ಲಾ ಬೆಟ್ಟಗಳ ರಾಷ್ಟ್ರೀಯ ಉದ್ಯಾನವನ ಮತ್ತು ಶಕರ್ಪರಿಯನ್ ಸೇರಿದಂತೆ ಉದ್ಯಾನವನಗಳು ಮತ್ತು ಕಾಡುಗಳಿಗೆ ಹೆಸರುವಾಸಿಯಾಗಿದೆ. ಇದು ಹಲವಾರು ಐತಿಹಾಸಿಕ ತಾಣಗಳಿಗೆ ನೆಲೆಯಾಗಿದೆ, ಇದರಲ್ಲಿ ದೇಶದ ಪ್ರಮುಖ ಫೈಸಲ್ ಮಸೀದಿ ಸೇರಿದೆ, ಇದು ವಿಶ್ವದ ಆರನೇ ಅತಿದೊಡ್ಡ ಮಸೀದಿಯಾಗಿದೆ.

ಸಿಯಾಲ್‌ಕೋಟ್

ಸಿಯಾಲ್‌ಕೋಟ್ ಬಹಳ ಹಳೆಯ ಮತ್ತು ಶ್ರೀಮಂತ ಇತಿಹಾಸವನ್ನು ಹೊಂದಿದ್ದು, ಇದು ಪಂಜಾಬಿ ಸಂಸ್ಕೃತಿ ಮತ್ತು ಇತಿಹಾಸದೊಂದಿಗೆ ಬೆಸೆದುಕೊಂಡಿದೆ. ಈ ನಗರವು ಪ್ರಾಚೀನ ಕಾಲದಿಂದಲೂ ಒಂದು ಪ್ರಮುಖ ಕೇಂದ್ರವಾಗಿದೆ. ಸಿಯಾಲ್‌ಕೋಟ್ ಅನ್ನು ಹೆಚ್ಚಾಗಿ ಶಕಲ್ ಅಥವಾ “ಸಾಗುಲ್ ನಗರ” ಎಂದೂ ಕರೆಯಲಾಗುತ್ತದೆ. ಭಾರತ-ಪಾಕಿಸ್ತಾನ ವಿಭಜನೆಯ ಸಮಯದಲ್ಲಿ ಸಿಯಾಲ್‌ಕೋಟ್ ಒಂದು ಪ್ರಮುಖ ಗಡಿ ನಗರವಾಗಿತ್ತು. ಇಂದು ಸಿಯಾಲ್‌ಕೋಟ್ ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಪ್ರಮುಖ ನಗರವಾಗಿದ್ದು, ಕೈಗಾರಿಕೆ ಮತ್ತು ಕೃಷಿಗೆ ಹೆಸರುವಾಸಿಯಾಗಿದೆ. ಕ್ರೀಡಾ ಸಾಮಗ್ರಿಗಳ ಕೈಗಾರಿಕೆ ಮತ್ತು ತಯಾರಿಕೆಯಿಂದಲೂ ಗುರುತಿಸಿಕೊಂಡಿದೆ. ಸಿಯಾಲ್‌ಕೋಟ್ ಅನ್ನು ಫುಟ್‌ಬಾಲ್ ರಾಜಧಾನಿ ಎಂದೂ ಕರೆಯುತ್ತಾರೆ. ಫುಟ್ಬಾಲ್, ಕ್ರಿಕೆಟ್ ಬ್ಯಾಟ್, ಚೆಂಡು ಮತ್ತು ಇತರ ಕ್ರೀಡಾ ಸಾಮಗ್ರಿಗಳನ್ನು ಇಲ್ಲಿ ತಯಾರಿಸಲಾಗುತ್ತದೆ. ಸಿಯಾಲ್‌ಕೋಟ್ ಪಾಕಿಸ್ತಾನಕ್ಕೆ ವಿದೇಶಿ ವಿನಿಮಯ ಗಳಿಕೆಯ ಪ್ರಮುಖ ಮೂಲವಾಗಿದೆ.

ಬಹವಾಲ್ಪುರ್

ಬಹವಾಲ್ಪುರ್ ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಸಟ್ಲೆಜ್ ನದಿಯ ಆಗ್ನೇಯದಲ್ಲಿರುವ ಒಂದು ದೊಡ್ಡ ನಗರ. ಇದು ಪಾಕಿಸ್ತಾನದ 11 ನೇ ದೊಡ್ಡ ನಗರ. ಬಹವಾಲ್ಪುರ್ ಜಿಲ್ಲೆ ಪಾಕಿಸ್ತಾನದ ಅತಿದೊಡ್ಡ ಜಿಲ್ಲೆಗಳಲ್ಲಿ ಒಂದಾಗಿದೆ. ಬಹವಾಲ್ಪುರವನ್ನು 1748 ರಲ್ಲಿ ನವಾಬ್ ಬಹವಾಲ್ ಖಾನ್ ಸ್ಥಾಪಿಸಿದ್ದ. ಇದು ಹಿಂದೆ ರಾಜಪ್ರಭುತ್ವದ ರಾಜ್ಯವಾಗಿತ್ತು. ಇದು 1955 ರವರೆಗೆ ನವಾಬರ ಅಬ್ಬಾಸಿ ಕುಟುಂಬದ ಆಳ್ವಿಕೆಯಲ್ಲಿತ್ತು. 1947 ರಲ್ಲಿ ಭಾರತ ವಿಭಜನೆಯಾದಾಗ, ಬಹವಾಲ್ಪುರವು ಪಾಕಿಸ್ತಾನಕ್ಕೆ ಸೇರಿದ ಮೊದಲ ರಾಜಪ್ರಭುತ್ವದ ರಾಜ್ಯವಾಗಿತ್ತು.

ಬಹವಾಲ್ಪುರ್ ಐತಿಹಾಸಿಕ ಸ್ಮಾರಕಗಳು ಮತ್ತು ಅರಮನೆಗಳಿಗೆ ಹೆಸರುವಾಸಿಯಾಗಿದೆ. ಇಲ್ಲಿ ನೂರ್ ಮಹಲ್, ದರ್ಬಾರ್ ಮಹಲ್ ಮತ್ತು ದೇರಾವಾರ್ ಕೋಟೆಯಂತಹ ಅನೇಕ ಪ್ರಮುಖ ಐತಿಹಾಸಿಕ ಸ್ಥಳಗಳಿವೆ. ಬಹವಾಲ್ಪುರ್ ತನ್ನ ರತ್ನಗಂಬಳಿಗಳು, ಕಸೂತಿ ಮತ್ತು ಕುಂಬಾರಿಕೆಗೆ ಹೆಸರುವಾಸಿಯಾಗಿದೆ. ಬಹವಾಲ್ಪುರದ ಇಸ್ಲಾಮಿಯಾ ವಿಶ್ವವಿದ್ಯಾಲಯವು ಪ್ರಸಿದ್ಧ ವಿಶ್ವವಿದ್ಯಾಲಯವಾಗಿದೆ. ಇಲ್ಲಿ ಜಾಮಾ ಮಸೀದಿ ಸುಭಾನ್ ಅಲ್ಲಾಹ್ ಎಂದು ಕರೆಯಲ್ಪಡುವ ಒಂದು ಐತಿಹಾಸಿಕ ಮಸೀದಿಯೂ ಇದೆ. ಪಾಕಿಸ್ತಾನ ಸೇನೆಯ 31ನೇ ದಳದ ಪ್ರಧಾನ ಕಚೇರಿಯೂ ಬಹವಾಲ್ಪುರದಲ್ಲಿದೆ.

ಪೇಶಾವರ

ಪೇಶಾವರ ದಕ್ಷಿಣ ಏಷ್ಯಾದ ಅತ್ಯಂತ ಹಳೆಯ ನಗರಗಳಲ್ಲಿ ಒಂದಾಗಿದೆ ಮತ್ತು ಪ್ರಾಚೀನ ಗಾಂಧಾರ ಸಾಮ್ರಾಜ್ಯದ ಪ್ರಮುಖ ನಗರವಾಗಿತ್ತು. ಪೇಶಾವರವು ಕುಶಾನ ಸಾಮ್ರಾಜ್ಯ ಮತ್ತು ದುರಾನಿ ಸಾಮ್ರಾಜ್ಯದ ರಾಜಧಾನಿಯೂ ಆಗಿತ್ತು. ಈ ನಗರವು ಭವ್ಯ ಸಂಸ್ಕೃತಿ ಮತ್ತು ಇತಿಹಾಸವನ್ನು ಹೊಂದಿದೆ. ಪಾಕಿಸ್ತಾನದ ಅತ್ಯಂತ ಹಳೆಯ ಮತ್ತು ಐತಿಹಾಸಿಕ ಕಟ್ಟಡಗಳು ಈ ನಗರದಲ್ಲಿವೆ. ಬೌದ್ಧಧರ್ಮವು ಇಲ್ಲಿ ಪ್ರವರ್ಧಮಾನಕ್ಕೆ ಬಂದಿತು. ಚಕ್ರವರ್ತಿ ಕಾನಿಷ್ಕ ಈ ನಗರವನ್ನು ತನ್ನ ರಾಜಧಾನಿಯನ್ನಾಗಿ ಮಾಡಿಕೊಂಡಿದ್ದ.

ಇದನ್ನೂ ಓದಿ: ಪಾಕಿಸ್ತಾನದಲ್ಲಿ ಕ್ರಿಕೆಟ್ ಸಂಪೂರ್ಣ ಬಂದ್: ಮುಂದಿನ 10 ವರ್ಷ ಯಾವುದೇ ಅಂತರರಾಷ್ಟ್ರೀಯ ಪಂದ್ಯ ನಡೆಯಲ್ಲ

ದಿವಂಗತ ನಟ ದಿಲೀಪ್ ಕುಮಾರ್ ಅವರ ಮನೆ ಪೇಶಾವರದ ಪ್ರಸಿದ್ಧ ಮತ್ತು ಐತಿಹಾಸಿಕ ಕಿಸ್ಸಾ ಖ್ವಾನಿ ಬಜಾರ್‌ನಲ್ಲಿರುವ ಮೊಹಲ್ಲಾ ಖುದಾದಾದ್‌ನಲ್ಲಿದೆ. ಈಗ ಈ ಪ್ರದೇಶವು ದೊಡ್ಡ ವ್ಯಾಪಾರ ಕೇಂದ್ರವಾಗಿ ಮಾರ್ಪಟ್ಟಿದೆ. ರಾಜ್ ಕಪೂರ್ ಕುಟುಂಬ ಕೂಡ ಪೇಶಾವರಕ್ಕೆ ಸೇರಿದೆ. ಕಪೂರ್ ಹವೇಲಿ ಪೇಶಾವರದ ದಿಲ್ಗರನ್ ಪ್ರದೇಶದಲ್ಲಿದೆ. ಈ ಮಹಲನ್ನು 1918 ಮತ್ತು 1922 ರ ನಡುವೆ ನಿರ್ಮಿಸಲಾಯಿತು. ರಾಜ್ ಕಪೂರ್ ಕೂಡ ಈ ಭವನದಲ್ಲಿ ಜನಿಸಿದ್ದರು. ಪೇಶಾವರ್ ಖೈಬರ್ ಪಖ್ತುಂಖ್ವಾ ಪ್ರಾಂತ್ಯದ ರಾಜಧಾನಿ. ಪೇಶಾವರದಲ್ಲಿ ಪಾಷ್ಟೋ ಭಾಷೆ ಮಾತನಾಡುತ್ತಾರೆ.

ಕೋಟ್ಲಿ (ಪಿಒಕೆ)

ಕೋಟ್ಲಿ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದ (ಪಿಒಕೆ) ಒಂದು ಭಾಗವಾಗಿದೆ. ಇದು ಐತಿಹಾಸಿಕ ನಗರ. ಇದು 12 ನೇ ಶತಮಾನದಲ್ಲಿ ಕಾಶ್ಮೀರದ ರಾಜಮನೆತನದ ಮಂಗ್ರಾಲ್ ಕುಟುಂಬದ ಶಾಖೆಯಾದ ಮಂಗ್ರಾಲ್ ಕುಟುಂಬದ ಅಧೀನದಲ್ಲಿತ್ತು. ಕೋಟ್ಲಿಯನ್ನು ಹಿಂದೆ ಕೊಹ್ತಾಲಿ ಎಂದು ಕರೆಯಲಾಗುತ್ತಿತ್ತು, ಇದರರ್ಥ ‘ಪರ್ವತದ ಕೆಳಗೆ’. 1819 ರಲ್ಲಿ, ಕೋಟ್ಲಿಯನ್ನು ಸಿಖ್ ಸಾಮ್ರಾಜ್ಯದ ರಾಜ ರಂಜಿತ್ ಸಿಂಗ್ ವಶಪಡಿಸಿಕೊಂಡಿದ್ದ. 1947 ರಲ್ಲಿ ಭಾರತ ಮತ್ತು ಪಾಕಿಸ್ತಾನ ಸ್ವಾತಂತ್ರ್ಯ ಪಡೆದ ನಂತರ, ಕೋಟ್ಲಿಯನ್ನು ಪಾಕಿಸ್ತಾನ ವಶಪಡಿಸಿಕೊಂಡಿತು ಮತ್ತು ಅಂದಿನಿಂದ ಪಾಕಿಸ್ತಾನದ ನಿಯಂತ್ರಣದಲ್ಲಿದೆ.

Published On - 11:05 am, Fri, 9 May 25