Job Recruitment: 2021ರಲ್ಲಿ ಡಿಗ್ರಿ ಪಾಸಾದವರು ಅರ್ಜಿ ಸಲ್ಲಿಸಲು ಅರ್ಹರಲ್ಲ ಎಂಬ ಜಾಹೀರಾತಿನ ಸತ್ಯಾಂಶ ಏನು?

ಉದ್ಯೋಗ ನೇಮಕಾತಿ ಅಧಿಸೂಚನೆಯೊಂದು ಸಿಕ್ಕಾಪಟ್ಟೆ ವೈರಲ್ ಆಗಿದೆ. ಓಹ್ ಆ ಕೆಲಸಕ್ಕೆ ಅಷ್ಟೊಂದು ಸಂಬಳವಾ ಅಥವಾ ಅಷ್ಟೊಂದು ಡಿಮ್ಯಾಂಡಾ ಅಂತೆಲ್ಲ ಅಂದುಕೊಳ್ಳಬೇಡಿ. ಜತೆಗೆ ಈ ವರದಿಯಲ್ಲಿ ಟ್ವಿಸ್ಟ್​ ಸಹ ಇದೆ. ಎಚ್​ಡಿಎಫ್​ಸಿ ಗೊತ್ತಲ್ಲಾ? ಅದರಿಂದ ಉದ್ಯೋಗ ನೇಮಕಾತಿಯ ಸುತ್ತೋಲೆ ಹೊರಡಿಸಲಾಗಿದ್ದು, 2021ರಲ್ಲಿ ತೇರ್ಗಡೆಯಾದ ಪದವೀಧರರು ಈ ಉದ್ಯೋಗಕ್ಕೆ ಅರ್ಜಿ ಹಾಕಿಕೊಳ್ಳಲು ಅರ್ಹರಲ್ಲ ಎಂಬ ಒಕ್ಕಣೆ ಇದ್ದು, ಅದೀಗ ಸೋಷಿಯಲ್ ಮೀಡಿಯಾದಲ್ಲಿ ಭರ್ಜರಿಯಾಗಿ ಗಿರಕಿ ಹೊಡೆಯುತ್ತಿದೆ. ದೇಶದ ಅತಿ ದೊಡ್ಡ ಖಾಸಗಿ ವಲಯದ ಬ್ಯಾಂಕ್​ ಆದ ಎಚ್​ಡಿಎಫ್​ಸಿಯಿಂದ ಸ್ಪಷ್ಟನೆ ನೀಡುವಂಥ ಸ್ಥಿತಿ ಬಂದಿದೆ. “ಟೈಪ್ ಮಾಡುವಾಗ ಆಗಿರುವಂಥ ತಪ್ಪಿದು. ಅದಕ್ಕಾಗಿ ವಿಷಾದಿಸುತ್ತೇವೆ,” ಎಂದು ಎಚ್​ಡಿಎಫ್​ಸಿ ವಕ್ತಾರರು ಟ್ವಿಟ್ಟರ್ ಬಳಕೆದಾರರೊಬ್ಬರಿಗೆ ಆಗಸ್ಟ್​ 3ನೇ ತಾರೀಕಿನಂದು ಪ್ರತಿಕ್ರಿಯಿಸಿದ್ದಾರೆ.

ಆ ವಕ್ತಾರರು ಇನ್ನೂ ಮುಂದುವರಿದು, ವಯೋಮಿತಿಯ ಮಾನದಂಡವನ್ನು ಪೂರ್ತಿಗೊಳಿಸುವುದಾದರೆ ಯಾವುದೇ ವರ್ಷ ಪದವಿ ಪಡೆದಂಥವರು ಸಹ ಅರ್ಜಿ ಹಾಕಿಕೊಳ್ಳಬಹುದು ಎಂದು ಸಹ ಹೇಳಿದ್ದಾರೆ. ಮದುರೈನಲ್ಲಿ 28 ವರ್ಷದೊಳಗಿನವರನ್ನು ವಾಕ್-ಇನ್ ಸಂದರ್ಶನಕ್ಕಾಗಿ ಕರೆದಂಥ ನಿಯತಕಾಲಿಕೆ ಜಾಹೀರಾತಿನಲ್ಲಿ ಈ ಅಂಶ ಒಳಗೊಂಡಿದೆ. “ನಾವು ಈಗಾಗಲೇ ಸರಿಯಾದ ಜಾಹೀರಾತನ್ನು ಇಲ್ಲಿ ಹಂಚಿಕೊಂಡಿದ್ದೇವೆ,” ಎಂದು ಎಚ್​ಡಿಎಫ್​ಸಿಯಿಂದ ಹೇಳಲಾಗಿದೆ. ಆದರೆ ಈ ಸ್ಪಷ್ಟನೆ ನೀಡುವ ಹೊತ್ತಿಗಾಗಲೇ ಸೋಷಿಯಲ್ ಮೀಡಿಯಾದಲ್ಲಿ ಈ ಜಾಬ್ ಅಡ್ವರ್ಟೈಸ್​ಮೆಂಟ್ ಸಿಕ್ಕಾಪಟ್ಟೆ ಸದ್ದು ಮಾಡಿಯಾಗಿತ್ತು.

ಕೊರೊನಾ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ 2020-21ರ ಶೈಕ್ಷಣಿಕ ವರ್ಷಕ್ಕೆ ವಿದ್ಯಾರ್ಥಿಗಳು ನೇರವಾಗಿ ಶಿಕ್ಷಣ ಪಡೆಯಲು ಸಾಧ್ಯವಾಗಿಯೇ ಇಲ್ಲ. ಪರೀಕ್ಷೆಗಳು ಸರಿಯಾಗಿ ನಡೆದಿಲ್ಲ. ಮತ್ತೆ ಕೆಲವು ಕಡೆ ಪಠ್ಯಕ್ರಮದ ಪ್ರಮಾಣವನ್ನೇ ಇಳಿಕೆ ಮಾಡಿ, ಪರೀಕ್ಷೆಗಳನ್ನು ನಡೆಸಿ, ಪಾಸ್ ಮಾಡಲಾಗಿದೆ. ಈ ಪರೀಕ್ಷೆ ಹಾಗೂ ಪಾಸ್ ಮಾಡುವ ವಿಧಾನದ ಬಗ್ಗೆಯೇ ಗೇಲಿ, ತಮಾಷೆ ಹಾಗೂ ಲೇವಡಿ ಕೇಳಿಬರುತ್ತಿದೆ. ಈ ಹಿನ್ನೆಲೆಯಲ್ಲಿ ಎಚ್​ಡಿಎಫ್​ಸಿಯ ಉದ್ಯೋಗ ನೇಮಕಾತಿ ಸುತ್ತೋಲೆಯನ್ನು ನೋಡಿದಾಗ, ಮತ್ತೂ ಹೆಚ್ಚಿನ ಚರ್ಚೆಗೆ ಹಾದಿ ಮಾಡಿಕೊಟ್ಟಿದೆ.

ಇದನ್ನೂ ಓದಿ: HDFC Bank: 2013ರಿಂದ 2020ರ ಮಧ್ಯೆ ಎಚ್​ಡಿಎಫ್​ಸಿ ಬ್ಯಾಂಕ್ ವಾಹನ ಸಾಲ ಪಡೆದವರಿಗೆ ಒಂದಿಷ್ಟು ಹಣ ರೀಫಂಡ್; ಯಾರಿಗೆ?

(2021 Passed Out Candidates Are Not Eligible Goes Viral On Social Media Here Is The Clarification By HDFC)