GST: ಪೆಟ್ರೋಲಿಯಂ ಉತ್ಪನ್ನಗಳನ್ನು ಜಿಎಸ್ಟಿಯೊಳಗೆ ತರಬಹುದಾ? ಶುಕ್ರವಾರದ ತನ ಕಾದು ನೋಡಬೇಕು
ಇದೇ ಶುಕ್ರವಾರದಂದು ನಡೆಯುವ ಜಿಎಸ್ಟಿ ಸಭೆಯಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳನ್ನು ಜಿಎಸ್ಇ ಅಡಿ ತರುವ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.
Updated on:Sep 15, 2021 | 5:41 PM
ಇದೇ ಶುಕ್ರವಾರ (ಸೆಪ್ಟೆಂಬರ್ 17, 2021) ಜಿಎಸ್ಟಿ ಸಮಿತಿಯ 45ನೇ ಸಭೆ ನಿಗದಿ ಆಗಿದೆ. ಪೆಟ್ರೋಲಿಯಂ ಉತ್ಪನ್ನಗಳನ್ನು ಜಿಎಸ್ಟಿ ಒಳಗೆ ಸೇರ್ಪಡೆ ಮಾಡಬಹುದು ಎಂಬ ನಿರೀಕ್ಷೆ ಅಗಾಧವಾಗಿದೆ. ಈ ಹಿನ್ನೆಲೆಯಲ್ಲಿ, ಹೀಗಾದರೆ ಕೈಗಾರಿಕೆ ಮತ್ತು ಗ್ರಾಹಕರ ಮೇಲೆ ಆಗುವ ಪರಿಣಾಮಗಳೇನು ಎಂಬುದನ್ನು ವಿವರಿಸುವಂಥ ಲೇಖನ ಇಲ್ಲಿದೆ. ತೈಲ ಅನ್ವೇಷಣೆ ಮಾಡುವಂಥ ಆಯಿಲ್ ಅಂಡ್ ನ್ಯಾಚುರಲ್ ಗ್ಯಾಸ್ ಕಾರ್ಪೊರೇಷನ್ ಲಿಮಿಟೆಡ್ (ಒಎನ್ಜಿಸಿ)ನಂಥವು ವಿವಿಧ ಇನ್ಪುಟ್ಗಳನ್ನು ಬಳಸುತ್ತವೆ. ಅವುಗಳಿಗೆ ಜಿಎಸ್ಟಿ ಆಗುತ್ತದೆ. ಆದರೆ ಕಚ್ಚಾತೈಲ ಹಾಗೂ ನೈಸರ್ಗಿಕ ಅನಿಲ ಜಿಎಸ್ಟಿ ಅಡಿ ಬರುವುದಿಲ್ಲವಾದ್ದರಿಂದ ಪರೋಕ್ಷ ತೆರಿಗೆ ನೀತಿಯ ಎರಡು ಪ್ರತ್ಯೇಕ ಹೆಡ್ಗಳ ಅಡಿಯಲ್ಲಿ ಬರುತ್ತವೆ. ಕಚ್ಚಾ ತೈಲ ಹಾಗೂ ನೈಸರ್ಗಿಕ ಅನಿಲವನ್ನು ಜಿಎಸ್ಟಿಯಲ್ಲಿ ಸೇರ್ಪಡೆ ಮಾಡುವುದರಿಂದ ಉದ್ಯಮವು ಹೆಚ್ಚು ತೆರಿಗೆ ಕ್ಷಮತೆಯಿಂದ ಇರುವಂತೆ ಆಗುತ್ತದೆ.
ಇಂಡಿಯನ್ ಆಯಿಲ್ ಕಾರ್ಪೊರೇಷನ್, ರಿಲಯನ್ಸ್ ಇಂಡಸ್ಟ್ರೀಸ್ನಂಥ ರಿಫೈನರ್ಗಳು ಬಳಸುವಂಥ ಕಚ್ಚಾ ತೈಲ ಜಿಎಸ್ಟಿಯಿಂದ ಹೊರಗಿದೆ. ಇತರ ಇನ್ಪುಟ್ಗಳಿಗೆ ಜಿಎಸ್ಟಿ ಆಗುತ್ತದೆ. ಆಮೇಲೆ ಅವರು ಫಿನಿಷ್ಡ್ ಉತ್ಪನ್ನಗಳು, ಅಂದರೆ ಪೆಟ್ರೋಲ್, ಡೀಸೆಲ್ ಹಾಗೂ ವಿಮಾನದಲ್ಲಿ ಬಳಸುವ ತೈಲಗಳು ಜಿಎಸ್ಟಿಯಿಂದ ಹೊರಗಿದ್ದು, ಕೇಂದ್ರ ಅಬಕಾರಿ ಸುಂಕ ಹಾಗೂ ರಾಜ್ಯ ಮಟ್ಟದ ವ್ಯಾಟ್ ಬೀಳುತ್ತದೆ. ಇನ್ನು ನಾಫ್ತಾ, ಹಗುರ ಡೀಸೆಲ್ ತೈಲ, ವ್ಯಾಕ್ಸಸ್, ಬಿಟಮನ್ ಮತ್ತು ಇತರ ರಿಫೈನರಿ ಉಪ ಉತ್ಪನ್ನಗಳು ಜಿಎಸ್ಟಿ ಅಡಿ ಬರುತ್ತವೆ. ಎಲ್ಲ ಪೆಟ್ರೋಲಿಯಂ ಉತ್ಪನ್ನಗಳನ್ನೂ ಜಿಎಸ್ಟಿ ಅಡಿಯಲ್ಲೇ ತಂದಾಗ ತೆರಿಗೆ ರಚನೆ ಸರಳವಾಗುತ್ತದೆ ಮತ್ತು ಹೆಚ್ಚು ತೆರಿಗೆ ಕ್ಷಮತೆ ಬರುತ್ತದೆ.
ತೆರಿಗೆಯ ಅಸಮರ್ಥತೆಯನ್ನು ತೊಡೆದು ಹಾಕುವುದರಿಂದ ಗ್ರಾಹಕರಿಗೆ ಅನುಕೂಲ ಆಗುವ ಸಾಧ್ಯತೆ ಹೆಚ್ಚು ಮತ್ತು ಕಂಪೆನಿಗಳು ಹೆಚ್ಚು ಸ್ಪರ್ಧಾತ್ಮಕವಾಗುತ್ತದೆ. ಇದರ ಜತೆಗೆ ಪೆಟ್ರೋಲ್, ಡೀಸೆಲ್ನಂಥ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಂದ ಭಾರೀ ತೆರಿಗೆ ಬೀಳುತ್ತಿರುವಂಂಥದ್ದು ಜಿಎಸ್ಟಿ ಅಡಿಯಲ್ಲಿ ಬಂದರೆ ತೆರಿಗೆ ಹೊರೆ ಕಡಿಮೆ ಆಗುತ್ತದೆ. ಗ್ರಾಹಕರಿಗೆ ಹೊರೆ ಕಡಿಮೆ ಆಗುವುದು ನಿಜ. ಆದರೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಹಣಕಾಸಿನ ಅಗತ್ಯಕ್ಕೆ ತೀವ್ರ ಕೊರತೆ ಎದುರಾಗುತ್ತದೆ.
ಕೊವಿಡ್ನಿಂದಾಗಿ ಸರ್ಕಾರದ ಆದಾಯ ಸಂಗ್ರಹಕ್ಕೆ ಭಾರೀ ಪೆಟ್ಟು ಬಿದ್ದಿರುವುದರಿಂದ ಜಿಎಸ್ಟಿ ಅಡಿಯಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳನ್ನು ಸೇರ್ಪಡೆ ಮಾಡುವುದು ಅನುಮಾನ ಎಂದು ತಜ್ಞರು ಅಭಿಪ್ರಾಯ ಪಡುತ್ತಾರೆ.
ಇದನ್ನೂ ಓದಿ: Bihar Panchayat Polls: ಪೆಟ್ರೋಲ್ ದರ ಏರಿಕೆ ಪ್ರತಿಭಟಿಸಿ ನಾಮಪತ್ರ ಸಲ್ಲಿಸಲು ಎಮ್ಮೆಯೇರಿ ಬಂದ ಅಭ್ಯರ್ಥಿ
(Are Petroleum Products Included Under GST On 45th Council Meeting)
Published On - 5:40 pm, Wed, 15 September 21
