ಅಮೆರಿಕದ ಡೆಟ್ ಮಾರುಕಟ್ಟೆಯನ್ನು ತೊರೆಯುತ್ತಿರುವ ಹೂಡಿಕೆದಾರರು; ಏನು ಕಾರಣ?

ವಾಷಿಂಗ್ಟನ್, ಮೇ 19: ಜಾಗತಿಕ ಹಣಕಾಸು ಮಾರುಕಟ್ಟೆಯಲ್ಲಿ ಸದ್ಯ ‘ಬಾಂಡ್ ರಕ್ತಪಾತ’ (Bond Bloodbath) ನಡೆಯುತ್ತಿದೆ ಎಂದು ವರದಿಗಳು ಹೇಳುತ್ತಿವೆ. ಸಾಂಪ್ರದಾಯಿಕವಾಗಿ ಅತ್ಯಂತ ಸುರಕ್ಷಿತ ಹೂಡಿಕೆ ಎಂದು ಪರಿಗಣಿಸಲಾಗುತ್ತಿದ್ದ ಬಾಂಡ್ ಮತ್ತು ಸಾಲ ಮಾರುಕಟ್ಟೆಯಿಂದ (Debt Market) ಜಾಗತಿಕ ಹೂಡಿಕೆದಾರರು ಭಾರಿ ಪ್ರಮಾಣದಲ್ಲಿ ತಮ್ಮ ಹಣವನ್ನು ಹಿಂಪಡೆಯುತ್ತಿದ್ದಾರೆ. ಇದು ಜಾಗತಿಕ ಆರ್ಥಿಕತೆಯಲ್ಲಿ ಹೊಸ ಆತಂಕವನ್ನು ಸೃಷ್ಟಿಸಿದೆ. ಅಮೆರಿಕ ಸರ್ಕಾರದ ಬಾಂಡ್​ಗಳಿಂದ ನಿರ್ಗಮಿಸುತ್ತಿರುವವರ ಸಂಖ್ಯೆ ಹೆಚ್ಚುತ್ತಲೇ ಇದೆ.

ಬಾಂಡ್ ಇಳುವರಿ (Yields) ಏರಿಕೆ – ಬಾಂಡ್ ಬೆಲೆಗಳ ಕುಸಿತ

ಬಾಂಡ್ ಮಾರುಕಟ್ಟೆಯ ಮೂಲ ನಿಯಮದಂತೆ, ಬಾಂಡ್ ಇಳುವರಿ (Bond Yields) ಹೆಚ್ಚಾದಾಗ, ಚಾಲ್ತಿಯಲ್ಲಿರುವ ಹಳೆಯ ಬಾಂಡ್‌ಗಳ ಬೆಲೆಗಳು (Bond Prices) ಕುಸಿಯುತ್ತವೆ. 10 ವರ್ಷದ ಅಮೆರಿಕನ್ ಸಾಲಪತ್ರದ ಇಳುವರಿ ದಾಖಲೆಯ ಶೇ. 4.16ಕ್ಕೆ ಏರಿದೆ. 30 ವರ್ಷದ ಬಾಂಡ್​ನ ಯೀಲ್ಡ್ ಶೇ. 5.14ಕ್ಕೆ ಏರಿದೆ. ಇದು ಸಾರ್ವಕಾಲಿಕ ಗರಿಷ್ಠ ಮಟ್ಟ. ಅಮೆರಿಕದ ರಿಸರ್ವ್ ಬ್ಯಾಂಕ್​ನ ಬಡ್ಡಿ ದರ ಶೇ. 3.50ರಿಂದ ಶೇ. 3.75 ಶ್ರೇಣಿಯಲ್ಲಿದೆ. ಬಾಂಡ್ ಇಳುವರಿಯು ಅದನ್ನೂ ಮೀರಿ ಮೇಲೆ ಹೋಗಿದೆ. ಇದು ಹೂಡಿಕೆದಾರರು ಬಾಂಡ್ ಮಾರಲು ಸರಿಯಾದ ಸಂದರ್ಭವೆನಿಸಿರಬಹುದು.

ಹಣದುಬ್ಬರದ ಆತಂಕ

ಅಮೆರಿಕದ ಸಾಲಪತ್ರಗಳ ಇಳುವರಿ ಹೆಚ್ಚಿದೆ ಎಂದರೆ ಅಲ್ಲಿ ಹಣದುಬ್ಬರ ಧಾವಿಸುತ್ತಿರುವ ಸೂಚನೆ ಎಂದು ಭಾವಿಸಲಾಗುತ್ತದೆ. ಇದರಿಂದ ಎರಡು ಪರಿಣಾಮಗಳಾಗಬಹುದು. ಅಮೆರಿಕದ ಫೆಡರಲ್ ರಿಸರ್ವ್ ಸಂಸ್ಥೆ ಬಡ್ಡಿದರ ಕಡಿತಗೊಳಿಸಲು ಮುಂದಾಗದೇ ಹೋಗಬಹುದು. ಮತ್ತೊಂದು ಪರಿಣಾಮವೆಂದರೆ, ಹಣದುಬ್ಬರ ಹೆಚ್ಚಿನ ಮಟ್ಟದಲ್ಲಿದ್ದರೆ ಹಾಲಿ ಹೂಡಿಕೆದಾರರಿಗೆ ಸಿಗುವ ಭವಿಷ್ಯದ ಬಡ್ಡಿ ಪಾವತಿಯ ಅಸಲಿ ಮೌಲ್ಯ ಕುಂದುವ ಸಾಧ್ಯತೆ ಹೆಚ್ಚು.

ಇದನ್ನೂ ಓದಿ: ದೇಶಕ್ಕೆ ಅಪ್ಪಳಿಸುತ್ತಿದೆ ಆರ್ಥಿಕ ಚಂಡಮಾರುತ; ಕುಸಿಯಲಿದೆ ಅರ್ಥ ವ್ಯವಸ್ಥೆ: ರಾಹುಲ್ ಗಾಂಧಿ ಆತಂಕ

ಬಡ್ಡಿ ದರಗಳು ಹೆಚ್ಚಾದಾಗ ಮಾರುಕಟ್ಟೆಗೆ ಬರುವ ಹೊಸ ಬಾಂಡ್‌ಗಳು ಹೆಚ್ಚಿನ ಲಾಭ ನೀಡುತ್ತವೆ. ಇದರಿಂದಾಗಿ ಹೂಡಿಕೆದಾರರು ಹಳೆಯ ಕಡಿಮೆ ಲಾಭದ ಬಾಂಡ್‌ಗಳನ್ನು ಮಾರಿ ಹೊರಬರುತ್ತಿದ್ದಾರೆ.

ಸರ್ಕಾರಗಳ ಅತಿಯಾದ ಸಾಲ ಮತ್ತು ವಿತ್ತೀಯ ಕೊರತೆ

ಅಮೆರಿಕ ಸೇರಿದಂತೆ ಹಲವು ಪ್ರಮುಖ ದೇಶಗಳ ಸರ್ಕಾರಗಳು ತಮ್ಮ ವೆಚ್ಚಗಳಿಗಾಗಿ ಮಾರುಕಟ್ಟೆಯಿಂದ ಭಾರಿ ಪ್ರಮಾಣದಲ್ಲಿ ಸಾಲವನ್ನು ಪಡೆಯುತ್ತಿವೆ (Deficit Spending). ಮಾರುಕಟ್ಟೆಗೆ ಅತಿಯಾದ ಹೊಸ ಬಾಂಡ್‌ಗಳ ಪೂರೈಕೆಯಾಗುತ್ತಿರುವುದರಿಂದ, ಹಳೆಯ ಬಾಂಡ್‌ಗಳ ಬೇಡಿಕೆ ಕುಸಿದು ಅವುಗಳ ಮೌಲ್ಯ ಮತ್ತಷ್ಟು ರಕ್ತಪಾತಕ್ಕೆ ಈಡಾಗುತ್ತಿದೆ.

ಷೇರು ಮಾರುಕಟ್ಟೆ ಮತ್ತು ಪರ್ಯಾಯ ಹೂಡಿಕೆಗಳ ಆಕರ್ಷಣೆ

ಬಾಂಡ್ ಮಾರುಕಟ್ಟೆಯಲ್ಲಿ ನಷ್ಟವಾಗುತ್ತಿರುವ ಹಿನ್ನೆಲೆಯಲ್ಲಿ, ಹೆಚ್ಚಿನ ರಿಸ್ಕ್ ಇದ್ದರೂ ಉತ್ತಮ ಲಾಭ ನೀಡುವ ಷೇರು ಮಾರುಕಟ್ಟೆ (Equities) ಅಥವಾ ಇತರ ಆಲ್ಟರ್ನೇಟಿವ್ ಆಸ್ತಿಗಳತ್ತ (Alternative Assets) ಹೂಡಿಕೆದಾರರು ಮುಖ ಮಾಡುತ್ತಿದ್ದಾರೆ.

ಇದನ್ನೂ ಓದಿ: ಮೇ 20ಕ್ಕೆ ರಾಷ್ಟ್ರವ್ಯಾಪಿ ಔಷಧ ವ್ಯಾಪಾರಿಗಳ ಮುಷ್ಕರ; ಬಂದ್ ಆಗಲಿವೆ ಮೆಡಿಕಲ್ ಸ್ಟೋರ್​ಗಳು; ಯಾಕಿದು ಪ್ರತಿಭಟನೆ?

ಉದಯೋನ್ಮುಖ ಮಾರುಕಟ್ಟೆಗಳಿಗೂ ಹೊಡೆತ

ಅಧಿಕ ಬಾಂಡ್ ಯೀಲ್ಡ್​ನಿಂದ ಡಾಲರ್ ಮೌಲ್ಯ ಹೆಚ್ಚುತ್ತದೆ. ಇದರಿಂದ ಭಾರತದಂತಹ ಉದಯೋನ್ಮುಖ ಆರ್ಥಿಕತೆಯ ಮಾರುಕಟ್ಟೆಗಳಿಂದ ಹೂಡಿಕೆಗಳು ಹೊರಹೋಗುವ ಸಾಧ್ಯತೆ ಹೆಚ್ಚು ಎಂದು ವಿಶ್ಲೇಷಿಸಲಾಗುತ್ತದೆ.

ಒಟ್ಟಾರೆಯಾಗಿ, ನಿರಂತರ ಹಣದುಬ್ಬರ, ಹೆಚ್ಚುತ್ತಿರುವ ಬಡ್ಡಿ ದರಗಳು ಮತ್ತು ಸರ್ಕಾರಗಳ ವಿಪರೀತ ಸಾಲದ ನೀತಿಗಳಿಂದಾಗಿ ಜಾಗತಿಕ ಬಾಂಡ್ ಮಾರುಕಟ್ಟೆಯು ಕಳೆದ ನಾಲ್ಕು ದಶಕಗಳಲ್ಲೇ ಅತ್ಯಂತ ಕಠಿಣ (Bear Market) ಪರಿಸ್ಥಿತಿಯನ್ನು ಎದುರಿಸುತ್ತಿದೆ. ಸುರಕ್ಷಿತ ಹೂಡಿಕೆಯಾಗಿದ್ದ ಬಾಂಡ್‌ಗಳು ಸದ್ಯ ಹೂಡಿಕೆದಾರರಿಗೆ ನಷ್ಟದ ತಾಣವಾಗಿ ಮಾರ್ಪಟ್ಟಿರುವುದರಿಂದ ಜಾಗತಿಕ ನಿಧಿಗಳು ಸಾಲದ ಮಾರುಕಟ್ಟೆಯಿಂದ ಭಾರಿ ಪ್ರಮಾಣದಲ್ಲಿ ಹೊರನಡೆಯುತ್ತಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ