ಹಬ್ಬದ ಸೀಸನ್ ಮುಗಿದರೂ ಕಾರುಗಳಿಗೆ ನಿಲ್ಲದ ಬೇಡಿಕೆ; ನವೆಂಬರ್​ನಲ್ಲಿ 3,50,000 ಕಾರುಗಳ ಮಾರಾಟ

ನವದೆಹಲಿ, ಡಿಸೆಂಬರ್ 3: ನವೆಂಬರ್ ತಿಂಗಳಲ್ಲಿ ಭಾರತದಲ್ಲಿ 3,50,000 ಕಾರುಗಳು ಮಾರಾಟವಾಗಿವೆ. ಕಳೆದ ವರ್ಷದ ಇದೇ ತಿಂಗಳಲ್ಲಿ 3.36 ಲಕ್ಷ ಕಾರುಗಳು ವಿಲೇವಾರಿಯಾಗಿದ್ದವು. ಅದಕ್ಕೆ ಹೋಲಿಸಿದರೆ ಕಾರು ಮಾರಾಟದಲ್ಲಿ ಶೇ. 4ರಷ್ಟು ಹೆಚ್ಚಳವಾಗಿದೆ. ಇಲ್ಲಿ ಕಾರು ಮಾರಾಟ ಎಂದರೆ ಶೋರೂಮ್​ನಿಂದ ಗ್ರಾಹಕರಿಗೆ ಆದ ಮಾರಾಟದ ಮಾಹಿತಿ ಅಲ್ಲ. ತಯಾರಕರಿಂದ ಕಾರುಗಳು ಡೀಲರ್​ಗಳಿಗೆ ತಲುಪಿರುವ ಸಂಖ್ಯೆ ಇದು. ಅಂದರೆ, ಹೋಲ್​ಸೇಲ್ ಮಾರಾಟದ ಸಂಖ್ಯೆ ಇದು.

ಹಬ್ಬದ ಸೀಸನ್ ಮುಗಿದರೂ ಕಾರುಗಳಿಗೆ ಬೇಡಿಕೆ ಮುಂದುವರಿದಿರುವುದು ಗಮನಾರ್ಹ. ಭಾರತದ ನಂಬರ್ ಒನ್ ಕಾರ್ ಕಂಪನಿಯಾದ ಮಾರುತಿ ಸುಜುಕಿಯ 1,41,312 ಕಾರುಗಳು ನವೆಂಬರ್​ನಲ್ಲಿ ಮಾರಾಟವಾಗಿವೆ. ಕಾರುಗಳಲ್ಲಿ ಎಸ್​ಯುವಿಗಳು ಹೆಚ್ಚು ಬೇಡಿಕೆ ಪಡೆಯುತ್ತಿವೆ. ಮಾರುತಿ ಸುಜುಕಿಯ ಒಟ್ಟಾರೆ ಕಾರು ಮಾರಾಟದಲ್ಲಿ ಎಸ್​ಯುವಿಗಳ ಪಾಲು ಶೇ. 29ರಷ್ಟಿದೆ.

ಇದನ್ನೂ ಓದಿ: ನವೆಂಬರ್​ನಲ್ಲಿ ಭಾರತದಲ್ಲಿ ಕಲ್ಲಿದ್ದಲು ಉತ್ಪಾದನೆ 90.62 ಮಿಲಿಯನ್ ಟನ್; ಶೇ. 7.2ರಷ್ಟು ಉತ್ಪಾದನೆ ಹೆಚ್ಚಳ

ಭಾರತದ ಕಾರು ಮಾರುಕಟ್ಟೆಯಲ್ಲಿ ಮಾರುತಿ ಸುಜುಕಿ ನಂಬರ್ ಒನ್ ಸ್ಥಾನದಲ್ಲಿ ಅಬಾಧಿತವಾಗಿ ಮುಂದುವರಿದಿದೆ. ಅದರ ಸ್ವಿಫ್ಟ್ ಡಿಜೈರ್ ಕಾರು ಅತಿಹೆಚ್ಚು ಮಾರಾಟ ಗಳಿಸಿದೆ. ಮಾರುತಿ ಸುಜುಕಿ ಬಿಟ್ಟರೆ ಹ್ಯುಂಡೈ, ಟಾಟಾ ಮೋಟಾರ್ಸ್, ಟೊಯೋಟಾ ಕಿರ್ಲೋಸ್ಕರ್, ನವೆಂಬರ್​ನಲ್ಲಿ ಅತಿಹೆಚ್ಚು ಕಾರು ಮಾರಿರುವ ಸಂಸ್ಥೆಗಳಾಗಿವೆ. ಟೊಯೊಟಾ ಕಿರ್ಲೋಸ್ಕರ್ ಕಾರುಗಳ ಮಾರಾಟದಲ್ಲಿ ಬರೋಬ್ಬರಿ ಶೇ. 44ರಷ್ಟು ಹೆಚ್ಚಳವಾಗಿದೆ.

ನವೆಂಬರ್​ನಲ್ಲಿ ಅತಿಹೆಚ್ಚು ಕಾರುಗಳ ಮಾರಾಟ ಮಾಡಿದ ಸಂಸ್ಥೆಗಳು

1. ಮಾರುತಿ ಸುಜುಕಿ: 1,41,312 ಕಾರುಗಳು
2. ಹ್ಯುಂಡೈ: 48,246 ಕಾರುಗಳು
3. ಟಾಟಾ ಮೋಟಾರ್ಸ್: 47,063 ಕಾರುಗಳು
4. ಟೊಯೋಟಾ ಕಿರ್ಲೋಸ್ಕರ್: 24,446 ಕಾರುಗಳು
5. ಜೆಎಸ್​ಡಬ್ಲ್ಯು ಎಂಜಿ ಮೋಟಾರ್: 6,019 ಕಾರುಗಳು

ಈ ಮೇಲಿನ ಟಾಪ್-5 ಕಂಪನಿಗಳ ಪೈಕಿ ಹ್ಯುಂಡೈ ಮಾತ್ರವೇ ನವೆಂಬರ್​ನಲ್ಲಿ ಮಾರಾಟದಲ್ಲಿ ಹಿನ್ನಡೆ ಕಂಡಿರುವುದು.

ಇದನ್ನೂ ಓದಿ: ಪಂಚಾಯತಿ ಸ್ತರದಲ್ಲಿ ಪರಿವರ್ತನೆ ತರುತ್ತಿರುವ ಕೃತಕ ಬುದ್ಧಿಮತ್ತೆಯ ಭಾಷಿಣಿ ಆ್ಯಪ್

ಸುಜುಕಿ ಬೈಕ್ ಮತ್ತು ಸ್ಕೂಟರ್ಸ್…

ಸುಜುಕಿ ಮೋಟಾರ್​ಸೈಕಲ್ ಸಂಸ್ಥೆ ನವೆಂಬರ್​ನಲ್ಲಿ 94,370 ದ್ವಿಚಕ್ರ ವಾಹನಗಳನ್ನು ಮಾರಿದೆ. ಇದರಲ್ಲಿ ದೇಶೀಯ ಮಾರುಕಟ್ಟೆಯಲ್ಲಿ ಮಾರಾಟವಾಗಿರುವುದು 78,333 ವಾಹನಗಳಾಗಿವೆ. 16 ಸಾವಿರಕ್ಕೂ ಹೆಚ್ಚು ದ್ವಿಚಕ್ರ ವಾಹನಗಳನ್ನು ಸುಜುಕಿ ರಫ್ತು ಮಾಡಿದೆ. ಕಳೆದ ವರ್ಷದ ನವೆಂಬರ್​ಗೆ ಹೋಲಿಸಿದರೆ ಈ ಬಾರಿ ಶೇ. 15ರಷ್ಟು ಹೆಚ್ಚು ರಫ್ತಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ