NSE co-location scam: ಫೋನ್​ ಕದ್ದಾಲಿಕೆ ಪ್ರಕರಣದಲ್ಲಿ ಚಿತ್ರಾ, ರವಿ ನರೇನ್ ಹಾಗೂ ಸಂಜಯ್ ಪಾಂಡೆ ವಿರುದ್ಧ ಎಫ್​ಐಆರ್​

ರಾಷ್ಟ್ರೀಯ ವಿನಿಮಯ ಕೇಂದ್ರ- ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್​ (NSE)ನ ಮಾಜಿ ಮುಖ್ಯಸ್ಥೆ ಚಿತ್ರಾ ರಾಮಕೃಷ್ಣ, ರವಿ ನರೇನ್ ಮತ್ತು ಮುಂಬೈನ ಮಾಜಿ ಪೊಲೀಸ್ ಕಮಿಷನರ್ ಸಂಜಯ್ ಪಾಂಡೆ ವಿರುದ್ಧ ಕೇಂದ್ರೀಯ ತನಿಖಾ ದಳವು (CBI) ಹೊಸದಾಗಿ ಪ್ರಕರಣ ದಾಖಲಿಸಿಕೊಂಡಿದೆ. 2009ರಿಂದ 2017ರ ಮಧ್ಯೆ ಎನ್​ಎಸ್​ಇ ಉದ್ಯೋಗಿಗಳ ಫೋನ್​ ಕದ್ದಾಲಿಕೆ ಮಾಡಿರುವ ಆರೋಪದಲ್ಲಿ ಗೃಹ ವ್ಯವಹಾರಗಳ ಸಚಿವಾಲಯದ (MHA) ನಿರ್ದೇಶನದ ಮೇರೆಗೆ ಈ ಕ್ರಮವನ್ನು ತೆಗೆದುಕೊಳ್ಳಲಾಗಿದೆ. ಈ ಹೊಸ ವರದಿಯಲ್ಲಿ ಸಿಬಿಐನಿಂದ ಇತರ ಆರೋಪಗಳು ಕೂಡ ಸೇರ್ಪಡೆ ಆಗಿದೆ. ಭಾರತದ ವಿವಿಧೆಡೆ ಇರುವ ಮಾಜಿ ಪೊಲೀಸ್​ ಕಮಿಷನರ್​ ಸಂಜಯ್​ ಪಾಂಡೆಗೆ ಸೇರಿದ ಜಾಗಗಳಲ್ಲಿ ಶೋಧ ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂದು ಮೂಲಗಳು ತಿಳಿಸಿರುವುದಾಗಿ ಮಾಧ್ಯಮಗಳಲ್ಲಿ ವರದಿ ಆಗಿದೆ.

ಎಫ್​ಐಆರ್​ನಲ್ಲಿ ತಿಳಿಸಿರುವಂತೆ, ಮೂವರು ಆರೋಪಿಗಳು ಕಾನೂನುಬಾಹಿರವಾಗಿ 2009ರಿಂದ 2017ರ ಮಧ್ಯೆ ಎನ್​ಎಸ್​ಇ ಉದ್ಯೋಗಿಗಳ ಫೋನ್ ಕದ್ದಾಲಿಕೆ ಮಾಡಿದ್ದಾರೆ. ಈ ಕಾನೂನು ಬಾಹಿರ ನಿಗಾಗೆ ಚಿತ್ರಾ ಮತ್ತು ನರೇನ್ ಇವರಿಬ್ಬರು ಸಂಜಯ್ ಪಾಂಡೆಯ ಸಹಾಯ ಪಡೆದಿದ್ದಾರೆ ಎಂದು ಹೇಳಲಾಗಿದೆ. ಕಳೆದ ತಿಂಗಳು ಸೆಕ್ಯೂರಿಟೀಸ್ ಎಕ್ಸ್​ಚೇಂಜ್ ಬೋರ್ಡ್​ ಆಫ್ ಇಂಡಿಯಾ (SEBI)ದಿಂದ 2015ರ ಡಾರ್ಕ್ ಫೈಬರ್ ಪ್ರಕರಣದಲ್ಲಿ ಎನ್ಎಸ್​​ಇ ಮಾಜಿ ಸಿಇಒ ಚಿತ್ರಾ ರಾಮಕೃಷ್ಣ, ಎನ್​ಎಸ್​ಇ ಸಿಒಒ ಆನಂದ್ ಸುಬ್ರಮಣಿಯನ್ ಮತ್ತು ಎನ್​ಎಸ್​ಇ ಸೇರಿದಂತೆ 18 ಸಂಸ್ಥೆಗಳನ್ನು ಕಂಡು ಹಿಡಿಯಲಾಗಿತ್ತು.

ಬಂಡವಾಳ ಮಾರುಕಟ್ಟೆಯ ನಿಯಂತ್ರಕ ಸಂಸ್ಥೆಯಾದ ಸೆಬಿ ಕ್ಯುಮುಲೇಟಿವ್ (ಸಂಚಿತ) ದಂಡ 43.8 ಕೋಟಿ ರೂಪಾಯಿಯನ್ನು 18 ಸಂಸ್ಥೆಗಳ ಮೇಲೆ ಹಾಕಲಾಗಿತ್ತು. ಅದರಲ್ಲಿ ಎನ್​ಎಸ್​ಇವೊಂದಕ್ಕೇ 7 ಕೋಟಿ ರೂಪಾಯಿ ದಂಡ ಹಾಕಲಾಗಿತ್ತು. ಎನ್​ಎಸ್​ಇ ಮುಖ್ಯ ಬಿಜಿನೆಸ್ ಡೆವಲಪ್​ಮೆಂಟ್ ಅಧಿಕಾರಿ ರವಿ ವಾರಾಣಸಿ ಅವರಿಗೆ 5 ಕೋಟಿ ಹಾಗೂ ಚಿತ್ರಾ ರಾಮಕೃಷ್ಣಗೆ 5 ಕೋಟಿ ದಂಡ ಹಾಕಲಾಗಿತ್ತು.